Petro 2 2 - Nyangbo New Testament

Asɛnɛ Baadɔkasɛ Nɛ̀ Kana Gɛ Bebeyì Alɛ

¹ Asɛ kɛzã gɛ asɛnɛ ebuiɖɔluanɛ atɛzã banɔɛishi abafala nɔ, kidzo ɛlɛ nabha asɛnɛ ɔdɔ̃ kakasɛ tsyɛ abekoeyì nɛ wɔnɔɛshi. Babà gã bɔshɛ mɛ abalɔkɔ asɛnɛ bɔdɔ̃ kakasɛ gɛ bazĩ udɔ akasɛ ɔnɔ ɔdɔ̃ nɔ, babàdã kadã nɛ Apaleteɛ gɛ ayɛkɛ balɛ edziɛ shu, gɛ balɛ ebui bhɛbhɛtɛ aba gbanà alɛ akpɛ butsì mɛ gulũi.

² Banɔ gelee abàzã ebui kpa elete alɛ edzo niede pɛ babà zaɖɔaɖɔ kpa nɛidzoɔ gɛinu kɛgbangbã shu.

³ Nɛ balɛ awuhũ dzadzã nɛ bɔdɔ̃ shu soɔ, asɛnɛ badɔkasɛ alɛ abalɔkɔ alɛ ɛdzɛdzɛ gɛ bafatɛ zhinì wɔnɔ kpɛ nɔ. Balɛ ɛpɔ bubuɔ dzi po alɛ kukuku, kɛlɛ kɛgɛ bayì alɛ, lɛ nɛ̀ awɔ̃.

⁴ Onupɛ Owusoso Akaa agɛ lɔkɔ etsye baxɔ̃ɛdɛ gɛ babhɛtɛ ebui kpa, pɛ avɛnɔ alɛ nɛifúɔ gɛtã tihɔɔ nɔ mɛ tɛ̀ bezepo kebhu kukuluɔ,

⁵ onupɛ agɛ lɔkɔ etsye kibelianɛ nɛ kibeɛ gɛ amana budekelĩ hohoe pɛ buvũ bagɛ egi tì Owusoso Akaa, pɛ ebú Noah, anɔ gɛ aɖɔaɖɔ nɛ kibui gbangbã bhɛbhɛtɛ shu, nɛ̀ baanɔ tegegene gɔgɔɛ nɔ,

⁶ onupɛ ebu Sodom nɛ̀ Gomora ɛma gbagbla ɛpɔ pɛ apɔɛ ɛlɛ lɛidzì bɔtɔ̃ɔ, pɛ abhɛtɛ ana sɛ tɛ̀ banɔ amɔ̃ elu nɛ kɛgɛ babà bagɛ etinyi Owusoso Akaa nabhaa,

⁷ kɛlɛ onupɛ ebu Lot anɔ dadalɛ yɛkpã, anɔ gɛamɔ ɔwɔ̃nyɔnɔ odenɔ ɛkpã zizĩ nɛ̀ ɔshabha mabhɛtɛ mabhɛtɛ eleteɛ ahɔɛ mɛɛ,

⁸ (ɔmɔsɛ anɔ dadalɛ alɛ́ gɛ azã banɔ nɔ̀ nɛishi kiwui nyia iwui. Yɛtɔwui dadalɛ mɔ ɔwɔ̃nyɔnɔ gelee odenɔ balɛ̀ ɔsha bha mabhɛtɛ mabhɛtɛ ebuiɛ gɛ azamɔ pɛ elũɔ shu),

⁹ onupɛ ana kɛlɛ́ɛ, kɛlɛ notì ɔsɛ Apaleteɛ enyi ibu gɛ ebebù bagɛ adɛmɛ nɛ̀ Owusoso Akaa odenɔ tifefekeɖi mɛ, bagɛ atɛ abhɛtɛ ebui gbã nɛ kebhu kukulu iwui nabha, nɛ kibeɛ gɛ batɔ̃ pɔpɔ̃ kɔ alɛ ɛtsiɖi ɛlɛ abha avɛ.

¹⁰ Kibui ɛlɛ inu kɛgbã ɔkɔ banɔ nɔ̀ gɛ bazana ɛkpã kpa nɛ alɛ tɛpɛpɛ ulu pɛ bagɛ lɔkɔ ɔsha niesi gɛ balɛ akpɛ kɛnanà mɛ betielũ atɔ̃ ɔkɔ ɔsha. Nɛ kitè kpɛkpɛ nɛ̀ ishu fefeke mɛɛ, balà ɖɔaɖɔ kpa nɛ kititì banɔ nɔ shu

¹¹ gɛ Akaa axɔ̃ɛdɛ gɛ agagalĩ adɛ pɛ benu ohumi elete tsyɛ elo, batɛ aɖɔaɖɔ alɔkɔ ebhui kititì anɔ alɛ nɛidi ulũ nɛ Apaleteɛ amɛ.

¹² Pɔ banɔ alɛ aaɖɔ atsɔ̃bui nɛ ebui nɔnɔ gɛ̀ begilũ alɛ esi mɛ. Bedzi asɛ kifutù mɛ bagãhoe, gɛ bamɔ alɛ sɛ tɛ̀ bevu alɛ eyí, kɛlɛ balɛ tsyɛ ebetsì asɛ bagãhoe ana.

¹³ Babà mɔ ɔtɔ odenɔ bɔtɔ gɛ balɛ tsyɛ akɔ anɔ bhlatɔ shu. Kɛgɛ bapɛ nɔ kɛlɛinu ɔsɛ sɛ tɛ̀ bawɔ̃ɛ tɛ̀ bebukù gɛ nɛ kiwui nyenyé hrɛrɛrɛ mɛ. Benu banɔ gɛ babhɛtɛ̀ awuĩ ebui nɛ̀ ebui kpɛnɛ̀ kpɛnɛ̀ gɛ bamɔ̃ samè nɛ ɛkpã ŋaŋã kibeɛ gɛ baŋã bɔdɔ̃ nɛ̀ wɔnɔ.

¹⁴ Balɛ awuhũɔ etsiɖi ɔmamɛ dɛdɛ shu, kliso batɛ balà yɔlɔ ebui kpa bhɛbhɛtɛ. Bawɔɛ bagɛ agɛ kpɛ iguɔ, bedzi beyì gɛ baɖɔ kibui akpɛ!

¹⁵ Bashɛ̀ nɛ kidzoɔ gidzì tĩi nabha pɛ betsyina atɔnɔ̃ Balam gɛenu Boa yɛeyianyɛ edzoɔ niede, anɔ gɛ adɛmɛ kɛbhɛ babuia nɛ̀ kɛtakpu mɛ gagalĩ ebui.

¹⁶ Pɔ etukusɔ ete yɛetseɖe nii nɛ yɛ ebui kpa bhɛtɛ bhɛbhɛtɛ shu, agãhoe gɛ atɛaɖɔaɖɔ, yɛaɖɔ anɔdzyrame aɖɔ pɛ agɛ dɛmɛ atɔɖɔ ebuiɖɔluanɔ egugu dɔdɔ ibuiɛ nabha.

¹⁷ Banɔ alɛ edzi asɛ bulĩ ahɔ gɛiti ku ulĩ, nɛ̀ ɔmɔlɔ̃ gɛ kɛlɛ́ɛ lɔkɔ ɔlɛ vɛnɔɔ. Otumũɔ gɛ ɔlɔ ɔnɔ ɔdɛɛ babalɛ elú akɔ alɛ.

¹⁸ Pɔ baaɖɔ kɛlɛ́ɛ mɛ ebui alɔkɔ ahɔɛ etũ etelũ nɔ, kɛlɛ balɔkɔ balɛ ishupiɛ nɛ̀ ebui kpa gɛ badɛmɛ nɔ, awɔɛ bagɛ akpɛ esi ebù tɛtsɛɖɛ̀ mɛ ashɛ nɛ bagɛ azanà ɛkpã kpa ɔbha.

¹⁹ Asɛnɛ ɔdɔ̃ kakasɛ alɛ atɔɖɔ ishu ahɔɛmɛ zazã elu kɔ anɔ, gɛ balɛ pɔ enu banɔ dzidzi ɔkɔ kɛtakpu mɛ gagalĩ ebui, ɔmɔsɛ̀ anɔdzyrame edzì anɔ dzidzì akɔ kibui nɔnɔ gɛ kɛŋã yɛabha.

²⁰ Onupɛ bebu tɛtsɛɖɛ mɛ ashɛ nɛ kanɔ alɛ mɛ ebui kpa bhɛbhɛtɛ shu pɛ bebetì Apalete Yesu pɛ banyana yɛ mɛ evunɔ gagalĩ pɛ bezetsodzì avɛ ɛkpã kpa gɛ ɛlɛ batɛzã mɛɛ eɖi pɛ lɛŋã alɛ abha, kidegba ɛkpã gɛ babà zanàa bazĩ ɔdɛ ɛgɛ batɛzã bafala nɔ.

²¹ Kɛtapɛ̃ ɔkɔ alɛ ɔdɛ sɛ begitì edzo dadalɛ, ɔdɛ sɛ betì ɛlɛ pɛ bewlui tsyina ede kpɛ ɔsha dadalɛ gɛ bakɔ alɛ.

²² Buluhũ sheshèɛ gɛ behu nɛ alɛ shu sɛ, “Ebú etsodzì avɛ̀ yɛoyukukùɔ shu, kɛlɛ ɛhàa gɛ bewulunɔ piapii nɔ tsyɛ eze etsyina avɛ̀ edi wulu nɛ apɔtɔ mɛ̀.”