Bìoball air-loidhne

Petro 2 1 - Nyangbo New Testament

¹ Mɛ Simon Petro, gɛinu Yesu Kristo yɛaxɔ̃ɛdɛ nɛ̀ anɔkpɛkpɛ, Mɛ fɔnɔ keplukpa alɛ sɛsɛ, bagɛ ɔganà ebui gbangbã bhɛbhɛtɛ mɛ ɔkɔ bɔlɔ Owusoso Akaa nɛ̀ Yesu Kristoɔ gɛebu ɔlɔ bayɛkɛ tɛyɛyɛkɛŋã ɛlɛ gɛ yɛkɛ edzi asɛ bɔlɔ ɛyɛ ana.

² Tibhui bhuibu nɛ̀ ishu yɔyɔ kɔ wɔnɔ nɛ tikpekpè mɛ ɔganà Owusoso Akaa nɛ̀ bɔlɔ Apalete Yesu kibui titìɛ mɛ̀.

Bhɛtɛ Wɔ Tikukuluɔ Nɛ̀ Tibubuɔ Tɛ Kɛzã Ɛlɛ Ɔzãkɔ

³ Yɛohumi nɔ ɔkɔ ɔlɔ kɛka nyia ka gɛ bɔɔpɛ ɔkɔ ɔlɔ ɛkpã nɛ̀ Akaa mɛ tɛzazã, ɔganà kanà gɛ bɔbatì yɛ gɛ ekulu ɔlɔ amanà yɛishu dadalɛ nɛ̀ yɛebui gbangbã mɛ.

⁴ Ɔganà alɛ mɛɛ, akɔ ɔlɔ yɛɔdɔ̃ gbagbla nɛ̀ bɔgbangbã gɛ atɔɖɔ elu akɔ ɔlɔ, sɛ tɛ̀ ɔganà bɔlɛ mɛɛ, ɔbàzã yɛohumi nɔ mɛ, tɛ̀ kɛkɔ ɔsɛ nɔobu tɛtsɛɖɛ mɛ ɔshɛ̃ nɛ kanɔ mɛ ebui tsɔtsɔmɔ̃ gɛide kalɛ bɔdɔ̃ pɛpɛ nɔ mɛ.

⁵ Kibui ɛlɛ shu soɔ, nɔga kidzo ka nyia ka abha tɛ̀ nɔlɔkɔ kibui gbangbã plɛnɔ tɛyɛyɛkɛŋã tɛ̀ ebui gbangbã tsyɛ plɛnɔ kibuititì,

⁶ kɛlɛ tɛ̀ kibuititiɛ plɛnɔ ishu abha ŋaŋã, ishu abha ŋaŋã, kemi kpɛkpɛ, tɛ̀ kemi kpɛkpɛ aplɛnɔ Akaa mɛ tɛzazã,

⁷ tɛ̀ Akaa mɛ tɛzaã plɛnɔ ɛyamɛ gbangbã bhɛbhɛtɛ ɔkɔ adzya, tɛ̀ ɛyamɛ gbangbã ɔkɔ adzya plɛnɔ tɛdɛdɛmɛ nɔ nɛ̀ anɔ.

⁸ Ɔmɔsɛ onupɛ ɛkpã gbangbã ɛlɛ nɛidi lɛ wɔnɔ ahɔɛ nɛ tikpekpè mɛɛ, kɛbà kɔ ɔsɛ wɔnɔ axɔ̃ɛ wɔawɔa avɛ kabha nɛ bɔlɔ Apalete Yesu Kristo yɛibui titìɛ mɛ.

⁹ Pɔ onupɛ ɛkpã ɛlɛ nɛidi ma anɔ teli ahɔɛ, enu anɔ gɛ atɛ amɔ piapii kɛlɛ enu awuhũpú, pɛ adzɛkɛ asɛ betiplu yɛebui kpa gɛ abhɛtɛ abafala nɔ.

¹⁰ Klisoɔ, mɛadzya alɛ mɔ, nɔ owlui ɔkpɛ emi gagalĩ tɛ kɛkasɛ ɔsɛ wɔnɔ tikukuluɔ nɛ̀ tibubuɔ lɛ ɛlɛ ɔzakɔ. Ɔmɔsɛ onupɛ nɔbhɛtɛ̀ ana, nɔtɛ bɔdɔ̃ oboe oɖi,

¹¹ kɛlɛ nɔbɔ mɔ tɛtsyatyanà gbangbã otsoku ɔlɔ Apalete Yesu Kristoɔ gɛ ebu ɔlɔ yɛukusi ŋaŋã tihɔɔ nɔ mɛ.

Kibuiɛ Gɛ Baɖɔ Elúɔ

¹² Klisoɔ ɛba zɛbakà wɔnɔ kibè nyia bè nɛ ebui alɛ shu, gɛ nɔonyi alɛ pɛ nɔkpɛ igu nɛ kibui gbã gɛ nɔyɛkɛ mɛ tsyɛ flogo.

¹³ Nɛ kibeɛ gɛ ɛkà lɛ nɛkpã nɛ ishupi ɛlɛ mɛ koɔ kɛpɛ ɔsɛ ɛzɛ nyɛmɛ ɔnɔ nɛ ebui alɛ shu,

¹⁴ ɔmɔsɛ inyi ɔsɛ ezedzè pɛ ɛbà lɔkɔ ɛlɛ lù kɛwɔ̃a, asɛ gɛ Apalete Yesu Kristo adalɛ ɛlɛ mɛ kɔ mɛ ana.

¹⁵ Kliso ɛbà bhɛtɛ kɛka nyia ka tɛ mɛiɖi ɛlɛ ɔkɔ ɔsɛ onupɛ ɛba shɛɛ, nɔbɔ zɔbakà ebui alɛ kiwui nyia iwui.

¹⁶ Anɛ ɛdzɛdzɛ gɛ bafatɛ ede bɔza pɛ bɔɖɔ Apalete Yesu Kristo ohumi nɛ̀ yɛ tɛbaba shu ebui tseɖe ɔnɔ, pɔ bɔza pɛ bɔmɔ yɛohumi nɔ nɛ̀ awuhũ.

¹⁷ Ɔmɔsɛ ayɛkɛ kinye kpɛkpɛ nɛitití nɛ̀ ishu dadalɛ odenɔ Owusoso Akaa ɔkɔ nɛ kibeɛ gɛ ozĩ oyì odenɔ Ohumi Ishudadalɛ Eleteɛ ɔkɔ ɔsɛ, “Mɛeyianyɛ nɛ alɛ, yɛibui mɛdɛmɛ, yɛ shu mɛmɔ same.”

¹⁸ Bɔlɔ atɔ elũ kaɖɔ alɛ gɛeyì odenɔ ititiɛ nɛ kibeɛ gɛ bɔzã Yesu ɔbhà nɛ butu dadalɛ nabha.

¹⁹ Kɛkɔ ɔsɛ bɔba mɔ sɛ ebuiɖɔluanɛ ebuiɛ gɛ baɖɔ eluɔ akpasɛ ɛlɛ mɛ, klisoɔ nɔ olu awɔ̃ piapii nɛ kibuiɛ gɛ baɖɔ eluɔ shu, asɛ kitséɛ gɛ kifu tsè nɛ otumũ mɛ ɔvɛnɔ olizatɔɔ, pɛ kɛvɔlɔ ɛwɔ̃ɛ tsyɛ kpaa tsé nɛ wɔnɔ etúɔ mɛ.

²⁰ Kɛgɛ dɛ alɛ petee kɛlɛinu ɔsɛ, kibui ɖɔɖɔlu nanà ma gɛ ebuiɖɔluanɔ aɖɔ nɛ balɛishu ahɔɛ mɛ.

²¹ Ɔmɔsɛ kibui gɛ baɖɔ eluɔ tide anɔ nanà tɛpɛpɛ ulũ, banɔ aɖɔaɖɔ odenɔ Owusoso Akaa ɔkɔ gɛ onupɛ Ɔfɔfuĩa Gbangbã gbanà alɛ kanà.

« Roimhe

Air adhart »

Lean sinn:

Ceanglaichean taic

Sanasan