Petro 1 5 - Nyangbo New Testament

Owusoso Akaa Ibhoshiɛ

¹ Mɛ asɛ ɔhamɛ sheshè ana, ɛɛkɔ wɔnɔ ɔhamɛ esheshèɛ gɛ alɛ wɔnɔ ɛshiɛ ɛtakpu, asɛ anɔ gɛazã amɔ Kristo yɛɔtɔ nɛ̀ anɔ tsyɛ gɛ aba mɔ ishu dadalɛ gɛ bebebu akasɛ.

² Nɔodzì ibhoshì agbagbana elete ɔkɔ Owusoso Akaa ibhoshiɛ gɛ bakpɛ nɛ wɔnɔ ahɔɛ, asɛ baxɔ̃ɛdɛ gɛeɖi bɔdɔ̃ abha ana, gɛnɛ sɛ kibui gɛ batɔɖɔ akɔ wɔnɔ, pɔ kibui gɛ nɔdɛmɛ ɔsɛ nɔbɔ bhɛtɛ̀ asɛ kana gɛ Owusoso Akaa apɛ asɛ nɔbhɛtɛ ɛlɛ ana, gɛnɛ tɛ̀ nɔpɛ ehoeyi ɔkɔ ishu, pɔ tɛ̀ nɔdɛmɛ ɔsɛ ɔbɔ ɔdɛ kɛxɔ̃ɛ,

³ gɛnɛ tɛ̀ nɔodzì bapalete ɔkɔ bagɛ bakpasɛ wɔnɔ esiɛ, pɔ tɛ̀ ibhoshiɛ ɖi wɔnɔ ɛkpã tɛ̀ bazã balɛ ɛyɛ nɛ ɛlɛ ulũ.

⁴ Kɛlɛ onupɛ Ibhoshiɛ Agbagbana Ekusiɛ ebekoeyìɛ, nɔbɔ yɛkɛ ishu dadalɛ ɛkpã kikutuɔ gɛ ɛtɛbà zĩ ɖiɛ.

⁵ Bayisɔ̃ mɔ, nɛ kidzo ɛlɛ nabha wɔnɔ tsyɛ nɔozhinì wɔnɔ ishu esi ɔkɔ bagɛ eshè adɛ ɔnɔ. Wɔnɔ petee nɔozhinì ishu esi ɔkɔ bagɔlɔ, ɔmɔsɛ, “Owusoso Akaa alɔɛtití nɛ bagɛ beefeke balɛishuɔ shu pɛ ebhui bagɛ bezhinì balɛ ishu esiɛ xɔnɔ ebú.”

⁶ Nɔozhinì wɔnɔ ishu esi nɛ Owusoso Akaa Ohumieleteɛ ahɔɛ niesi, sɛ tɛ̀ efeke wɔ ewunɔ kabha nɛ kibè gulũi mɛ.

⁷ Nɔlɔkɔ wɔnɔ ɔwɔ̃nyɔnɔ petee ɔtɔɖɔ yɛabha ɔmɔsɛ, yɛeɖì wɔnɔ abha.

⁸ Nɔŋã wɔnɔ ishu abha tɛ̀ nɔzã nɛ̀ awɔ. Agɛ atɛadɛmɛ wɔnɔ ɛbui gɛenu abosamuɔ aafala asɛ dzata gɛ aadzɔ̀ pɛ apɛ anɔ asɛ tɛ̀ evũ atã.

⁹ Nɔlɔɛtití nɛishu, tɛ̀ nɔzã gagalĩ nɛ tɛyɛyɛkɛŋã mɛ, ɔmɔsɛ nɔonyi ɔsɛ wɔnɔ adzya alɛ nɛ kanɔ nɔ̀ mɛ petee tsyɛ bagã bɔtɔ ɔlɛ nɛidi mɛ.

¹⁰ Kɛlɛ Owusoso Akaa gɛenu tibhui bhuibu eleteɛ petee nɔ, anɔ gɛ yɛekulu wɔnɔ amana Kristo yɛ sameɛ gɛ etibeleɛ mɛɛ, gɛ onupɛ nɔmɔ bɔtɔ̀ ebekeɛ nɛ kibè gulũi lɛ, yɛabàkɔ nɔzã gagalĩi pɛ nɔ otɛbɔ hɔa.

¹¹ Yɛahɔɛ ohumi ɔlɛ denɔ otsiɛ vɛnɔ tihɔɔ. Amen.

Bɔdɔ̃ Sɛsɛnɔ Gɔgɔɛ

¹² Denɔ Sila anɔ gɛ ɛlɔkɔ yɛasɛ anɔ gɛ ɛyɛkɛŋã, denɔ yɛ tɛpɛplɛnɔ mɛ ɛfɔnɔ keplukpa alɛ gulũi kɔ wɔnɔ pɛ̀ ɛkpɛ wɔnɔ kemi tɛ̀ ɛɖɔ kaɖɔ dalɛ kɛlɛ mɛ sɛ, kɛlɛ kɛlɛinu Owusoso Akaa tibhui bhuibu gɛlɛ ɛlɛ ɔzãkɔ. Nɔzã gagalĩ nɛ kɛlɛ mɛ̀.

¹³ Ɔhaa gɛ ɔlɛ Babilonia pɛ bebu aplɛnɔ wɔnɔ tsyɛ asɛnɛ wɔnɔ, kana mɛeyianyɛ Marko tsyɛ asɛnɔ wɔnɔ.

¹⁴ Nɔlɔkɔ tɛdɛdɛmɛ nɔ ɔsɛnɛ bagɔlɔ nɔ. Ishuyɔyɔ ɔkɔ wɔnɔ bagɛ nɔkpasɛ̀ Kristoɔ mɛ petee.