Bìoball air-loidhne

Petro 1 3 - Nyangbo New Testament

Banyɛedzini Nɛ̀ Badzɛenyine

¹ Banyɛedzini mɔ, nɛ kidzo ɛlɛ nabha, nɔozhinì wɔnɔ ishu esi ɔkɔ wɔnɔ enyine alɛ sɛ tɛ̀, onupɛ balɛ ɔmaɛyɛmɛ teli agɛ yɛkɛ kibui nabha ŋãa tsyɛ elo, tɛ bè tsyina ɔganà wɔnɔ ɛkpã zazãna mɛ,

² gɛ onupɛ bamɔ ɛkpã dadalɛ nɛ̀ kɛtakpu esi kpɛkpɛ nɛ balɛ ɛkpã shu.

³ Wɔnɔ bubite yiyiɛ tìde ishupi tiwoewoese mɛ, asɛ kɛtakpù yuyu nɛ̀ sikã ɔdɔ kpɛkpɛ nɛ̀ apɔtɛ ɔdɔ̃ gbangbã kpɛkpɛ mɛ.

⁴ Pɔ nɔkɔ wɔnɔ bubite yiyìɛ dè kitúɔ mɛ, bubite yiyiɛ gɛ bɔtɛ balà bele gɛide ɔfɔfuĩa nɔ gɛɔtɔ ɖɔaɖɔ mɛ̀ pɛ lɔtɛ ɖɔaɖɔ mɛ, gɛ kɛyɛkɛ kedzì hohoe nɛ Owusoso Akaa namɛ.

⁵ Ɔmɔsɛ kidzo ɛlɛ abha badzɛ dadalɛ gɛ atɛzã afala pɛ beeɖi otugbà mɛ akɔ Owusoso Akaa alɔkɔ ewoese balɛishu nɔ. Bezhinì ishu esi akɔ balɛ enyine alɛ,

⁶ adzɛ asɛ Sara, gɛ elũ atɔ̃ akɔ Abraham pɛ ezekulu yɛasɛ yɛapalete. Wɔnɔ onù yɛeyi adzɛ alɛ onupɛ nɔbhɛtɛ kibuiɛ gɛlɛ ɛlɛ ɔzãkɔ pɛ nɔgɛ kɔ kifù sisi idzoɔ.

⁷ Badzɛenyine mɔ, nɛ kidzo ɛlɛ abhaa, wɔnɔ tsyɛ nɔolũ ebui esi ɔkɔ wɔnɔ edzinì alɛ nɛ kibeɛ gɛ nɔlɛ ɔplɛnɔ alɛ, tɛ nɔgbanà alɛ nɛ̀ kɛtakpu esi kpɛkpɛ ɔkɔ alɛ asɛ ohumi bhlui elete ana gɛ wɔnɔ nɛ alɛ ɔbɔ mɔ kaŋãsiɛ nɛ̀ tibhui bhuibu idɔ kɔkɔ ɔkɔ ɛkpã, sɛ tɛ kɛdɔ̃ nanà tɛbà kɔ nɔyɔlɔ Owusoso Akaa tikukulu.

Bɔtɔ Mɔmɔ Denɔ Kibui Gbangbã Tɛbhɛbhɛtɛ Mɛ

⁸ Gɔgɔɛ nɔ mɔ, wɔnɔ petee, nɔzã tenikpo nɛ̀ bagɔlɔ, nɔobì ɔkɔ bagɔlɔ, nɔdɛmɛ nɛ̀ anɔ asɛ baadzya ana, nɔoɖi ashagabui tɛ nɔozhinì wɔnɔ ishu esi.

⁹ Nɔtɛ lɔkɔ kibui kpa ɔlɔkɔ buia kɛbhɛ ɔkɔ kibui kpa nɔ, alo nɔtsɛɖakɛ̀ aklɔatu, pɔ nɔoyulà ɔkɔ bagɔlɔ, ɔmɔsɛ kibui ɛlɛ shu so pɛ bekulu wɔnɔ sɛ tɛ̀ nɔbɔmɔ tiyuyulà.

¹⁰ Ɔmɔsɛ, “Anunɔ gɛ abadɛmɛ nɛ̀ ɛkpãa tɛ amɔ ewui gbangbãa kɛlɛ sɛ ebu yɛinekeɛ eyinɔ nɛ ebui kpa ɖɔɖɔ shu nɛ̀ tɛ ebu olugbũ odenɔ kaɖɔ ɖɔɖɔ gɛawɔɛ banɔ shu.

¹¹ Kɛlɛ sɛ etsyinà edenɔ kibui kpa shu tɛ̀ abhɛtɛ kɛgbangbã, kɛlɛ sɛ apɛɛ ishu yɔyɔ tɛ abhɛtɛ ɛlɛ abha.

¹² Ɔmɔsɛ Apaleteɛ yɛawuhũɔ etsiɖì banɔ dadalɛ nabha kɛlɛ ataatɔ̃ nɛ̀ balɛ Owusoso Akaa tikukulu, pɔ Apaleteɛ namɛ alɔɛtití nɛ̀ bagɛ babhɛtɛ̀ ebui kpa shu.”

¹³ Afana gɛ abà bhɛtɛ kizizĩ nɛ̀ wɔ gɛ onupɛ ɔpɛɔsɛ tɛ̀ ɔbhɛtɛ kibui gbangbã dza?

¹⁴ Pɔ onupɛ edzi asɛ kɛlɛ sɛ ɔmɔ bɔtɔ nɛ kibui gɛpɛ tɛbhɛbhɛtɛ shu tsyɛ elo, beyulà ɔkɔ wɔnɔ. “Nɔotɛ osifù nɛ̀ kɛgɛ kɛlɛ besì kifù nɔɔ, nɔtɛkɔ kifù yi wɔnɔ.”

¹⁵ Pɔ nɛ wɔnɔ etúɔ mɛɛ, nɔlɔkɔ Kristo asɛ wɔnɔ Apalete. Nɔbalɛ kibe nyia be tɛ̀ nɔobu kibui ulũ ɔkɔ aka nyia aka gɛ ebisì wɔnɔ kibui sɛ tɛ̀ nɔɖɔ kɛnɔnɔ shu sopɛ nɔoɖì kidzo mɛ ɔkɔ ebui alɛ. Pɔ nɔbhɛtɛ alɛ nɛ tɛdɔdɔ fɔ̃ɔ nɛ̀ kaɖɔ gbangbã tɛɖɔɖɔ mɛ,

¹⁶ tɛ̀ ɔkɔ wɔnɔ etúɔ mɛ ebuiɛ adalɛ piapi, sɛ tɛ̀ kiwũi yi bagɛ balɛ aɖɔaɖɔ kpa pɛ beezhinì olugbũ esi nɛ wɔnɔ ɛkpã gbangbã tɛzazãna nɛ Kristo mɛ shu.

¹⁷ Apɛ adɛ gɛ onupɛ kinu Owusoso Akaa tɛpɛpɛɛ́, sɛ tɛ̀ nɔtɔ̀ ɔkɔ kibui gbangbã tɛbhɛbhɛtɛ ɔdɛ kibui zizĩ bhɛbhɛtɛ̀.

¹⁸ Ɔmɔsɛ Kristo etsí butsì tunikpo akɔ ɔlɔ ebui kpa, anɔ gbangbã ebetsí akɔ ebui kpa bhɛbhɛtɛ eleteɛ sɛ tɛ̀ agbanà wɔnɔ amana Owusoso Akaa ɔkɔ. Beyíi nɛ ishudzya mɛ, pɔ ɔfɔfuĩa nɔ ɔkɔ yɛazã nɛ ɛkpã,

¹⁹ ɔfɔfuĩa gɛ ganà ɔlɛ abha, yɛavɛ adɛ ɖɔ kibuiɛ etseɖe ɔfɔfuĩa nɔ gɛkpasɛ ɔɖavũɔ mɛ

²⁰ ɔfɔfuĩa nɔ gɛ lɛgagalĩ batɔ̃ mɛ kibe dzlolo nɛlɛ gɛ Owusoso Akaa adɔ yɔɔ nɛ Noa ibèɛ gɛ azafatɛ aɖakaohu hohoeɛ. Banɔ kasasà tieli balɛ azã aɖakaohu hohoeɛ mɛ, banɔ tasɛ balɛ bayɛkɛ odenɔ bulĩɛ mɛ,

²¹ kɛlɛ bulĩ ɛlɛ kasɛ bulĩkpɛkpɛ nɛ kɛtakpu ɔkɔ anɔ gɛ ayɛkɛ wɔnɔ elu nɛkpã otsiɛ. Gɛnɛ sɛ tɛ̀ bebù kibò nɛ anɔ shu, pɔ kibui tɔtɔɖɔ lu ɔganà kitú mɛibui gbangbã nɛ Owusoso Akaa shu. Kɛlɛ yɛkɛ ɔkɔ wɔnɔ ganà Yesu Kristo yɛ̀ tɛlɔlɔ odenɔ bekpuɔ mɛ,

²² anɔ gɛavɛ kititiɛ pɛ avɛ Owusoso Akaa kɛŋã mɛ, ɔplɛnɔ baxɔ̃ɛdɛ, ɔshaeleteɛ nɛ̀ ihumieleteɛ tɛ bezhinì balɛ ishu esì akɔɛ.

« Roimhe

Air adhart »

Lean sinn:

Ceanglaichean taic

Sanasan