Petro 1 2 - Nyangbo New Testament

¹ Klisoɔ nɔobu ishu oyinɔ odenɔ banɔ shu zizĩ nɛ̀ banɔ wɔɛwɔɛ mɛ, asɛnɛ sɛsɛ, kawɔ̃kpɛ nɛ̀ banɔ ishutibui tɛɖɔɖɔ ka nyia ka ɛdi mɛ.

² Asɛ beyì vɔvɔ gɛ bamɔ ana, nɔobisi ɔfɔfuĩa mɛ kɛmɔlĩ gbangbã, sɛ tɛ nɛ bɔlɛ mɛɛ nɔobo shè oku wɔnɔ tibubuɔ mɛ,

³ kibè ɛlɛ gɛ nɔtɛ omini oɖi sɛ Apaleteɛ apɛ.

Kɛklagbuɔ Gɛlɛ Nɛkpã Nɛ̀ Banunɔ Gɛ Bebú Eluɔ

⁴ Asɛ gɛ nɔba yɛɔbha, kɛklagbuɔ gɛlɛ nɛkpã, pɛ banɔ nɔ agɛ yɛkɛ ɛlɛ pɔ Owusoso Akaa xɔnɔ ebu ɛlɛ gɛ kɛyɛkɛ edzi kɔɛ-

⁵ wɔnɔ tsyɛ, asɛ aklagbu gɛalɛ nɛkpã ana, balɔkɔ ɔnɔ abhɔ ɔfɔfuĩa mɛ buvũ tɛ̀ budzi bukusi ɔŋãkɔ gɛ dalɛ, gɛ bɔkɔ ɔfɔfuĩa mɛ̀ bɔdɔ̃ pɔpɔɛ gɛ Owusoso Akaa adɛmɛ tɔɖɔ bɔlɛ abha ɔganà Yesu Kristo abha.

⁶ Ɔmɔsɛ ebui fɔfɔnɔ aɖɔ asɛ, “Ɖio, idzu kɛklagbu nɛ Zion, odekrekpui iklagbuɔ gɛ bebu pɛ kɛyɛkɛ kedziɛ, kɛlɛ̀ anunɔ gɛ ayɛkɛ yɛabha ŋã batɛ bàkpɛ̀ yɛ kiwũi eɖi.”

⁷ Otsiɛ nɔ wɔnɔ bagɛ ɔyɛkɛ ɔŋãa, kɛklagbu ɛlɛ yɛkɛ kedzi ɔkɔ ɔnɔ. Pɔ bagɛ agɛ yɛkɛ ɔŋã xɔnɔ, “Kɛklagbuɔ gɛ bevũbhɔ atɛɛ elúɔ kɛlɛ badzì odekrekpu kɛklagbuɔ,

⁸ kɛlɛ “Kɛklagbuɔ gɛkɔ asɛ bɔnɔ akpatà nɛ̀ ɔxɔa gɛɔkɔ asɛ baadɔ oboeɛ.” Bakpatà bɔdɔ̃ ɔmɔsɛ bagɛ yɛkɛ kibuiɛ, kibuiɛ gɛ babalɛ elu asɛ kɛba alɛ abha.

⁹ Pɔ nɔonu banɔ gɛ bebú elú, bukusi ɔŋakɔ gɛ nɔonu ekusi, kɛmadi gɛdalɛ, banɔ gɛ benu Owusoso Akaa ayɛ, sɛ tɛ nɔɖɔaɖɔ ɔkpɛ anunɔ gɛ ekulu wɔnɔ yɛinyeɛ nɛitití, anunɔ gɛ ebu wɔnɔ eyinɔ odenɔ otumũɔ mɛ amana tɛdadalɛ gɛ bhɛtɛ ibiɛ mɛ.

¹⁰ Kibè tili bafala gɛ nɔ ogi dzi anɔ, pɔ otsiɛ xɔnɔ nɔonu Owusoso Akaa anɔ, kibè tili begiɖì wɔnɔ ashagabui, pɔ otsiɛ xɔnɔ beɖi wɔnɔ ashagabui.

¹¹ Ɛbhia gɛ ɛdɛmɛ nɔ, ɛɛkpalà wɔnɔ, wɔnɔ asɛ beefù ana nɛ̀ bafafala nɛ kanɔ nɔ̀ mɛ, sɛ tɛ̀ nɔobu wɔnɔ ishu oyinɔ odenɔ tɛdɛdɛmɛ nɔ ebui kpa, gɛ laatà keyù nɛ̀ wɔnɔ atɔwuiɛ.

¹² Nɔzã nɛ̀ ɛkpã gbangbã ɛlɛ nɛidi nɛ bagɛ agɛ yɛkɛŋã nɛishi, sɛ gɛ bebu wɔnɔ kɛpɔ sɛ nɔbhɛtɛ ebui kpa tsyɛ elo, babàmɔ wɔnɔ ebui gbangbã tɛbhɛbhɛtɛ kɛlɛ babà dalɛ Owusoso Akaa nɛinyeɛ shu nɛ kiwui ɛlɛ nabha gɛ ababa ebeɖi ɔlɔ.

Ishu Esi Zhizhinì Ɔkɔ Beekusiɛ Nɛ̀ Bapaleteɛ

¹³ Nɛ Apaleteɛ nɛtakpu soɔ nɔozhinì wɔnɔ ishu esi ɔkɔ ɔsha ka nyia ka gɛ bakpɛ nɛ banɔishi, ezedzi asɛ ekusiɛ gɛ yɛeɖi ɔsha gbagbla nabha o,

¹⁴ alo amadi ekusiɛ, gɛ ekusiɛ akpɛ asɛ apɔ̃ batɔ̃ kɔ bagɛ abhɛtɛ ebui kpa tɛ akpɛ ebui gbangbã bhɛbhɛtɛ elete nɛitití.

¹⁵ Ɔmɔsɛ kinu Owusoso Akaa tɛpɛpɛ ɔsɛ ganà kibui gbangbã tɛbhɛbhɛtɛ mɛɛ, tɛ̀ nɔkɔ bawɔaga gɛ baɖɔ matì matì kaɖɔ ataatɔ̃.

¹⁶ Nɔzanà ɛkpã asɛ banɔ gɛ balɛishu ahɔɛ mɛ ana, pɔ nɔtɛ̀ lɔkɔ wɔnɔ ishu ahɔɛ mɛ zazã ɔlɔkɔ ɔdã wɔnɔ ebui kpa bhɛbhɛtɛ nulũ, pɔ nɔzã nɛkpã asɛ Owusoso Akaa axɔ̃ɛdɛ ana.

¹⁷ Nɔkpɛ kɛtakpu esi gbangbã ɔkɔ aka nyia aka. Nɔdɛmɛ nɔ nɛ̀ bayɛyɛkɛŋã balɛ kɛdzya bhɛbhɛtɛ, nɔosì Owusoso Akaa nɛifù, tɛ nɔkpɛ ɛtakpu esi ɔkɔ ekusiɛ.

¹⁸ Banɔ dzidzi mɔ, nɔozhinì wɔnɔ ishu esi ɔkɔ wɔnɔ bapaleteɛ nɛ kɛtakpu esi kpɛkpɛ petee mɛ, gɛnɛ banɔ alɛ gɛapɛ pɛ beeɖì banɔ ashagabui ete, pɔ nɔbhɛtɛ ɛlɛ ɔkɔ bagɛ bagbanà wɔnɔ nɛ tɛgagalĩɛ mɛ tsyɛ.

¹⁹ Ɔmɔsɛ baɖɔaɖɔ gbangbã nɛ anɔ gɛ akpɛ kemi azã bɔtɔ nɔnɔɛdi gɛ kɛma sɛ azã bɔliesi pɔ aza bɔlɛ esiɛ shu, nɛ gɛ elu awɔ̃ nɛ Owusoso Akaa nabha so.

²⁰ Kɛbhɛ babuia ɖuwoe nɔbɔ mɔ onupɛ behuisi wɔnɔ nɛ wɔnɔ kibui kpa bhɛbhɛtɛ takpu pɛ nɔkpɛ kemi nɛ kɛlɛ mɛ? Pɔ onupɛ nɔmɔ bɔtɔ nɛ kibui gbangbã bhɛbhɛtɛ ɛtakpu pɛ nɔkpɛ kemi nɛ ɛlɛ shuɔ, kinu ishu dadalɛ nɛ Owusoso Akaa namɛ.

²¹ Kibui ɛlɛ shu so pɛ bekulu wɔnɔ, ɔmɔsɛ Kristo atɔ nɛ wɔnɔ ɛtakpu, kɛlɛ abhɛtɛ kɛlɛ akasɛ wɔnɔ, ɔsɛ tɛ̀ wɔnɔ tsyɛ ɔgã asɛ gɛ agã ana.

²² “Agɛ bhɛtɛ kibui kpa nanà, kɛlɛ begi lu banɔ wɔɛwɔɛ ibui nanà nɛ yɛolugbũ mɛ.”

²³ Kibeɛ gɛ baza kwɔalà yɛɛ tsyɛ elo, egibu kɛlɛilũ, gɛ azamɔ bɔtɔɔ, agɛkã ɔkɔ ananà. Pɔ alɔkɔ yɛishu ɔkɔ agɛ yeekulù kebhu gbangbãa.

²⁴ Yɛalɔkɔ bɔlɔ ebui kpa akpɛ yɛishuɔ mɛ̀ nɛ busiɛ shu, sɛ tɛ butsì ɔkɔ kibui kpa bhɛbhɛtɛ tɛ̀ bɔzã nɛkpã ɔkɔ kibui gbangbã tɛbhɛbhɛtɛ, ganà yɛapɔ̃ mɛ bebu banyã akɔ wɔnɔ.

²⁵ Ɔmɔsɛ nɔzã asɛ ibhoshi gɛ ɛzɛ tsaɖakɛ idzo ana, pɔ otsiɛ xɔnɔɔ, nozotsyina ba ibhoshi agbagbana eleteɛ nɛ̀ agɛ yɛeɖi wɔnɔ atɔwuiɛ nabha ɔkɔ.