Bìoball air-loidhne

Petro 1 1 - Nyangbo New Testament

¹ Mɛ Petro anɔ gɛenu Yesu Kristo yɛanɔkpɛkpɛ, mɛ fɔnɔ keplukpa alɛ sɛsɛ bagɛ Owusoso Akaa ebu luɔ, pɛ bunu bafafala nɛ kanɔ nɔ̀ mɛ, pɛ bapɔɛ akanà nɛ Ponto, Galatia, Kapadokia, Asia nɛ̀ Bitania, ɔdɔ̃ mɛ

² banɔ gɛ bebu alɛ nɛ Owusoso Akaa gɛenu bɔlɔ Akaa ekpeɖekpeɖeɛ gɛ abhɛtɛ akpɛ otugbà nulũ, ɔganà Ɔfɔfuĩa nɔ gɛ ɔlɛ axɔ̃ɛ wɔawɔa adalɛ, ɔkɔ batɔ̃ lulũ ɔkɔ Yesu Kristo nɛ yɛ dzyosu hɔɛhɔ̃ɛ niesi. Tibhui bhuibu nɛ̀ ishu yɔyɔ kɔ wɔnɔ nɛ tikpekpè mɛ.

Owusoso Akaa Nɛinye Kpɛkpɛ Nɛitití Ɔkɔ Ɛkpã Gɛ Buɖi Kidzo Mɛ Ɔkɔ

³ Bɔkpɛ Owusoso Akaa gɛenu Akaa ɔkɔ bɔlɔ Apalete Yesu Kristo nɛinyè nɛitití! Nɛ yɛ ashagabui ɖiɖi gbagbla mɛɛ, akɔ bedzinì ɔlɔ amɔ̃ avɔvɔ akpɛ ɛkpã gɛ buɖì kidzo mɛ ɔkɔ ɔgana Yesu Kristo yɛ tɛlɔlɔ odenɔ bekpuɔ mɛ,

⁴ nɛ̀ kaŋãsiɛ gɛetibe belè ɖìɛ mɛ, gɛ ketìbezĩ alo pɛ kalɛ ulũ bafalàa, kalɛ babalɛ nɛititíɛ elu akɔ wɔnɔ

⁵ banɔ gɛ ɔgana tɛyɛyɛkɛŋã mɛ balɔkɔ Owusoso Akaa ohumi nɔ akpɛ ɔkã nɛ wɔnɔ shu, ɔvɛnɔ kibeɛ gɛ anɔ tibubuɔ gɛ babalɛ elu akɔ nɛ ewui gɔgɔɛ mɛ babà.

⁶ Nɛ alɛ mɛ nɔmɔ same hohoe, pɔ otsiɛ nɔ, agɔ kibè gulũi gɛ nɔbɔ mɔ̃ ɔwɔ̃nyɔnɔ nɛ tifefekeɖi ediedi mɛ.

⁷ Ebui alɛ aba ɛlɛ mɛ ana sɛ tɛ̀ wɔnɔ tɛyɛyɛkɛŋã, gɛ kigbogbolo ɔdɛ sikãɛkpã gɛ bazĩ, gɛ balɔkɔ kifù adalɛ ɛlɛ shu nɔ pɔ flogo. Tɛ babhɛtɛ ɛlɛ kidzi kibui ɛgbã gɛ babakpɛ ɛlɛ inye nɛitití, pɛ ishu dadalɛ nɛ̀ inyè gbangbã tsyɛ bazã ɛlɛ shu gɛ onupɛ Yesu Kristo ebekoeyìɛ.

⁸ Nɔkɔ mɔ yɛoɖì pɔ, pɔ nɔdɛmɛ yɛibui, kɛlɛ gɛ nɔtɛ ɔmɔ yɛ otsiɛ tsyɛ elo, nɔyɛkɛ yɛabha ɔŋã kɛlɛ nɔtɛ bɔlà ɖɔaɖɔ nɛ same mɔmɔ hohoe alɛ shu.

⁹ Ɔmɔsɛ nɔyɛkɛ tɛtɔtɔɖɔ gɛ ɛlɛ shu so pɛ nɔyɛkɛ ɔŋã, gɛinu wɔnɔ atɔwuiɛ tibubu.

¹⁰ Nɛ atɔwui tibubu kibui ɛlɛ shuɔ, ebuiɖɔluanɛ, gɛ baɖɔaɖɔ nɛ tibhui bhuibuɔ gɛ babaa ɔkɔ ɔnɔ shuɔ, kibui gɛ belu awɔ̃ eɖi ɛlɛ piapii pɛ beɖi ɛlɛ abha piapii,

¹¹ gɛ baapɛ asɛ tɛ̀ betì kibeɛ nɛ̀ ebui nɔnɔ gɛ alɛishu Yesu Ɔfɔfuĩa nɔ gɛ ɔkpasɛ alɛ mɛ ɔzɔ ɖɔaɖɔ, aɖɔ Yesu bɔtɔ mɔmɔ akpɛ otugbà elu, nɛ̀ tɛdadalɛ gɛ babà nɛ̀ kɛlɛ idegbaa.

¹² Bebu ɛlɛ akasɛ alɛ sɛ gɛnɛ balɛishu baakpɛ kɛtakpu esi akɔ pɔ wɔ, nɛ kibeɛ gɛ baɖɔaɖɔ nɛ ebuiɛ gɛ bagɛ baɖɔ Owusoso Akaa ibuiɛ etitseɖe wɔnɔ ɔganà Ɔfɔfuĩa Gbangbã gɛ basɛsɛ ɔnɔ odenɔ kititiɛ mɛ. Baxɔ̃ɛdɛ tsyɛ apɛ asɛ tɛ̀ bapɔɛ ebui alɛ mɛ eɖi.

Kɔ Wɔshu Dalɛ

¹³ Klisoɔ, nɔ balɛ wɔnɔ ekpeɖekpeɖeɛ ɔkɔ kɛxɔ̃ɛ wɔawɔa, nɔŋã wɔnɔ shu abha tɛ nozoɖì kidzo mɛ ɔkɔ tibhui bhuibuɔ gɛ babà kɔ wɔnɔ gɛ onupɛ Yesu Kristo ebè ekoeyìɛ.

¹⁴ Asɛ beyi gɛ belũ atɔ̃ ana, nɔtɛ̀ dɛmɛ ɔtɔɖɔ abosam yɛebuiɛ gɛ lazã wɔnɔ mɛ nɛ kibeɛ gɛ nɔzã matì matiɛ mɛ.

¹⁵ Pɔ asɛ gɛ agɛ yɛekulu wɔnɔ shu dalɛ anaa, kana nɔkɔ wɔnɔ tsyɛ shu dalɛ nɛ kɛka nyia ka gɛ nɔbhɛtɛ mɛ,

¹⁶ ɔmɔsɛ bafɔnɔ elu asɛ, “Nɔkɔ wɔnɔ shu dalɛ̃, ɔmɔsɛ mɛishu dalɛ̃.”

¹⁷ Gɛ nokulu Akaa gɛ ekulù kebhu nɛ̀ anɔ nyia anɔ axɔ̃ɛ wɔawɔa pɛ etiɖì banɔ amɛɛ soɔ, nɔzã nɛ̀ wɔnɔ ɛkpã asɛ bafafala ana nɛ ishu esi zhizhini nɛ̀ kifusisi mɛ̀.

¹⁸ Ɔmɔsɛ nɔonyi ɔsɛ gɛnɛ bɔdɔ̃ gɛ bɔbàzĩ asɛ sikãfufù nɛ̀ sikãɛkpã shu so pɛ bebú wɔnɔ odenɔ kɛlɛ́ɛ mɛ ɛkpã zazãna gɛ wɔnɔ ashuĩ alɛ alɔkɔ elu akɔ wɔnɔ mɛ.

¹⁹ Pɔ nɛ Kristo dzyosu dadalɛ gɛenu obhoshi eyiɛ gɛ ɔkɔ nanà ogizĩ nɛ ɔlɛ shuɔ mɛ.

²⁰ Bebu yɛelu flogo pɛ babà bhɛtɛ kanɔ nɔ̀ mɛ, pɔ bebu yɛakasɛ nɛ ewui gɔgɔ alɛ mɛ nɛ wɔnɔ ɛtakpu.

²¹ Gana yɛabha nɔyɛkɛ Owusoso Akaa nabha ɔŋã, anɔ gɛ yɛefeke yɛedenɔ bekpuɔ mɛ pɛ akɔ yɛ ishu dadalɛ, klisoɔ wɔnɔ tɛyɛyɛkɛŋã nɛ̀ otugbà mɛ gɛ nɔoɖiɛ ɔlɛ Owusoso Akaa mɛ.

²² Otsiɛ gɛ nɔoplu ishu pɛ nɔolũ atɔ̃ ɔkɔ kibui gbã, sɛ tɛ nɔdɛmɛ nɔ nɛ̀ wɔnɔ adzya alɛ, tɛ nɔdɛmɛ nɔ nɛ bagɔlɔ denɔ kitúɔ mɛ piapii.

²³ Ɔmɔsɛ bedzinì wɔnɔ amɔ, gɛnɛ denɔ busi eyuyuɔ gɛebetsíɛ mɛ, pɔ denɔ busi eyuyuɔ gɛ etibè etsì ɖiɛ mɛ, ganà Owusoso Akaa ibuiɛ gɛ lɛ nɛkpã pɛ kɛlɛ ulu tɛ fala mɛ.

²⁴ Ɔmɔsɛ, “Banɔ petee edzì asɛ tɛwɔa ana, kɛlɛ balɛ ishu dadalɛ petee dzì asɛ osiefufù nɛ ayakpa mɛ ana, tɛwɔa tãpɔɛ kɛlɛ efufùɔ awɔlɛ,

²⁵ pɔ Apaleteɛ nɛibuiɛ lɛ tihɔɔ.” Kɛlɛ inu kibuiɛ gɛ baɖɔ etseɖe wɔnɔ.

« Roimhe

Air adhart »

Lean sinn:

Ceanglaichean taic

Sanasan