Korintoanɛ 2 9 - Nyangbo New Testament

¹ Kɛbha ma ɔsɛ tɛ ɛfɔnɔ keplukpa kɔ wɔnɔ nɛ axɔ̃ɛ wɔawɔa ebui alɛ nɛ banɔ dadalɛ shu.

² Ɔmɔsɛ inyi kana gɛ nɔpɛ ɔsɛ tɛ nɔplɛnɔ, kɛlɛ itũ ahɔɛ kitelũ nɛ kɛlɛishu ɔkɔ Makedonianɛ, pɛ itseɖe balɛ̀ sɛ̀, denɔ kɛgɔanàa wɔnɔ bagɛ nɔlɛ̀ Axaya ɔpɛ ɔsɛ tɛ̀ nɔkɔ banɔ bɔdɔ̃, kɛlɛ kana gɛ nɔpɛ ɔsɛ tɛ nɔkɔ bɔdɔ̃ɔ abhɛtɛ akɔ asɛ banɔ kpekpèɛ tsyɛ apɛ asɛ tɛ bakɔ kɛdɔ̃.

³ Pɔ ɛɛkpɛ badzyaa sɛsɛ tɛ bɔlɔ ahɔɛ gɛ butũ kitelũ nɛ wɔnɔ shu nɛ kibui ɛlɛ mɛɛ tìdzi kɛlɛɛ, pɔ nɔbalɛ olu asɛ kana gɛ itsèɖe balɛ nɛ wɔnɔ shuɔ, itseɖe alɛ sɛ nɔbɔ balɛ olu.

⁴ Ɔmɔsɛ onupɛ Makedonia eyì teli atɔnɔ mɛ aba ɛkɛlɛ pɛ abamɔ wɔnɔ ɔsɛ nɔgɛ balɛ̀ oluɔ, bɔlɔɔ xɔnɔ bɔtɛ baɖɔ kibui nanà nɛ wɔnɔ shu, ɔmɔsɛ kiwũi bayi bɔlɔ nɛ kana gɛ bɔyɛkɛ wɔnɔ abha ŋãa shu.

⁵ Klisoɔ aabhɛtɛ mɛasɛ kɛpɛ sɛ bɔkpalà badzya tɛ bebèɖi wɔnɔ kpɛ otugbà tɛ̀ bakpɛ kɛka nyia ka nɛ kɛlɛ ɔzãkɔ ɔkɔ bɔdɔ̃ kɔkɔ gɛ nɔtɔɖɔ olúɔ. Kɛlɛ bɔdɔ̃ kɔkɔ kibeɛ bana, batɛbà akɔ ɔlɛ nɛ amumu mɛ.

Bɔdɔ̃ Ɖaɖa Nɛ̀ Ɛyamɛ Gbangbã

⁶ Nɔbakà kibui ɛlɛ ɔsɛ, anɔ gɛ aɖá bɔdɔ̃ bhlui nɔ, kɛdɔ̃ bhlui yɛaba apɔ̃. Kɛlɛ anunɔ gɛ aɖa bɔdɔ̃ nɛ ɛyamɛ gbangbã abapɔ bɔdɔ̃ nɛ̀ ɛyamɛ gbangbã

⁷ Kɛlɛ sɛ anɔ ka nyia ka akɔ kɛgɛ atɔɖɔ asɛ akɔ edenɔ yitúɔ mɛ̀, gɛnɛ gana kibui tɔtɔɖɔ ɔkɔ banɔ abha, ɔmɔsɛ Owusoso Akaa adɛmɛ nɛ̀ anɔ gɛ akɔ kɛdɔ̃ nɛ̀ same.

⁸ Kɛlɛ Owusoso Akaa abalà kɔ wɔnɔ tibhui bhuibuɔ kpè tɔɖɔ, sɛ tɛ̀ nɛ ebuiɛ pete mɛ nɛ kibè ka nyia ka mɛɛ, gɛ kɛka nyia ka gɛ nɔpɛ nɔ lɛ wɔnɔ ahɔɛ soɔ, nɔbɔ lɔkɔ wɔnɔshu ɔkpɛ kɛxɔ̃ɛ gbangbã ka nyia ka wɔawɔa mɛ.

⁹ Asɛ gɛ bafɔnɔ elú asɛ, “Apɔ̃ɛ yɛɔdɔ̃ kɔkɔ mɛ akanà asɛsɛ bètsyuitsyuiɛ, yɛ kibui gbangbã tɛbhɛbhɛtɛ lɛ tihɔɔ.”

¹⁰ Otsi nɔ, anɔ nɔ̀ gɛ yɛalɔkɔ bɔdɔ̃eyi akɔ anɔ gɛ yɛahɔɛ bɔdɔ̃eyi nɛ̀ kɛŋaŋã gɛ baŋã, yɛabakɔ asɛ wɔnɔ kibui gbangbã bhɛbhɛtɛ bɔdɔ̃eyi ɔbalɛ ɔkɔ ɔnɛ̀ɛ ɔtɔɖɔ, kɛlɛ abakɔ asɛ wɔnɔ tɛzazã piapi nɔ tsyɛ ba gbogblo ɔtɔɖɔ.

¹¹ Babà bhɛtɛ wɔnɔ nobodzì ehoeyielete nɛ kidzo ka nyia ka abha sɛ tɛ̀ wɔnɔ tsyɛ wɔnɔ ɛyamɛ pɛ̃ kibè nyia bè, kɛlɛ gana bɔlɔ abhaa, wɔnɔ bɔdɔ̃ kɔkɔ badzi ahɔɛhuhu akɔ Owusoso Akaa.

¹² Axɔ̃ɛ alɛ gɛ nɔɔdɛ atɛakɔ bagɛ balɛenu Owusoso Akaa anɔ nɔ̀ ete bɔdɔ̃, pɔ buyuku balɛ gɛ balɔkɔ ehu Owusoso Akaa ahɔɛ nɔ.

¹³ Nɛ axɔ̃ɛ gɛ alɛishu nɔkpɛ kemiɛ pɛ nobu ishu kasɛ, banɔ abakpɛ̀ Owusoso Akaa nɛinye nɛitití nɛ wɔnɔ batɔ̃ lulũɔ gɛ akpà plɛnɔ wɔnɔ ebuimɛ dadalɛ nɛ Kristo shu, nɛ̀ wɔnɔ ɛyamɛ gbangbã gɛ nɔlɔkɔ ɔkɔ alɛ nɛ anɔ ka nyia ka.

¹⁴ Kɛlɛ nɛ balɛ Owusoso Akaa tikukulu nɛ wɔnɔɛtakpu soɔ, balɛ etúɔ mɛ abazã wɔnɔ shu, nɛ tibhui bhuibuɔ gɛdɛ kɛka nyia ka gɛ Owusoso Akaa alɔkɔ akɔ wɔnɔ shu so.

¹⁵ Ahɔɛhuhu yɛenu Owusoso Akaa ayɛ nɛ yɛɔdɔ kɔkɔ gɛ bɔtɛ balà ɖɔ kaɖɔ nɛ bɔlɛ shuɔ.