Korintoanɛ 2 8 - Nyangbo New Testament

Kɛmi Kpɛkpɛ Kristoanɛ Tɛbakɔ Anɔ Ɔdɔ̃

¹ Mɛ adzya alɛ, otsiɛ nɔ bɔpɛ sɛ tɛ̀ notì gibhuiɛ gɛ Owusoso Akaa ebhui Makedonia ɔhaa ebuɔ.

² Ɔganà tifefekeɖi gagalĩ gɛ dɛ mɛɛ, balɛ sameɛ gɛ bamɔ nɛ balɛ ahɔɛ kɛdɔ̃ mazamazã mɛ tsyɛ elo, badalɛ ɛyamɛ pɛ bakɔ bɔdɔ̃.

³ Ɔmɔsɛ ɛdalɛ kɛlɛ mɛ sɛ bakɔ bɔdɔ̃ nɛ kɛlà gɛ babalà akɔ nulũ, kɛlɛ bazakɔ adɛ kana gɛ babalàa. Bɔdɔ̃ kɔkɔ ɔlɛ petee de balɛ ahɔɛ mɛ,

⁴ bakɔ bɔlɔ kɛtakpu odunu ɔlɛ sɛ bɔkɔ balɛ tsyɛ kidzo tɛ̀ balɛ tsyɛ amɔ tili edenɔ bɔlɔ bɔdɔ̃ kɔkɔ ɔkɔ banɔ nɔ gɛ balɛishu dalɛ mɛ̀

⁵ Kɛlɛ bagɛ bhɛtɛ asɛ gɛ bɔpɛ nɔ, pɔ beputɔ alɔkɔ balɛishu akɔ Apaleteɛ nɛ bɔlɔ nɛ Owusoso Akaa tɛpɛpɛ ulũ.

⁶ Kliso bɔkpɛ Tito Kemi ɔmɔsɛ yɛatɛkpɛ kɛxɔ̃ɛ niesi sɛ tɛ̀ alɔkɔ kɛlɛ amana kɛlɛ ɔtɔ̃kɔ soɔ avɛ kɛlɛ abha tɛ awɔa kɛlɛ ebeke.

⁷ Pɔ asɛ kana gɛ nɔmɔ otugbà vɛvɛ nɛ kɛka nyia ka mɛɛ-nɛ tɛyɛyɛkɛŋã mɛ̀, kaɖɔ ɖɔɖɔ mɛ̀, bubutì mɛ̀, nɛ̀ tɛpɛplɛnɔ ɔkɔ kɛxɔ̃ɛ nɛ kɛdɛmɛɛ gɛ nɔdɛmɛ bɔlɔ kibuiɛ-noɖi kɛlɛ ɔkɔ ɔsɛ nɔbhɛtɛ ɔdɛ nɛ tibhui bhuibu bɔdɔ̃ kɔkɔ kɛxɔ̃ɛ ɛlɛ mɛ.

⁸ Gɛnɛ ɔsha mɛkɔ wɔnɔ, pɔ ɛpɛsɛ tɛ̀ mifeke wɔnɔ tɛdɛdɛmɛ nɔ ɖi sɛ kɛlɛ ɛlɛ ɔzãkɔ dza, kliso pɛ ɛlɔkɔ banɔ bhlatɔ kibui gbangbã tɛbhɛbhɛ shɔnɔ bagɔgɔ ɛyɛ nɔ.

⁹ Ɔmɔsɛ nonyi kibhuiɛ gɛ Apalete Yesu ebhui bɔlɔ ebuɔ, pɔ gɛ edzi ehoeyi elete tsyɛ elo wɔnɔ shu so pɛ ebedzi etsyuitsyui, sɛ tɛ nɔmɔ ehoeyi bɔdɔ̃ ɔgana yɛitsyui dɔdɔ mɛ.

¹⁰ Mɛuluhũɔ gɛ ɛbà hu nɛ kɛgɛ pɛ̃ɔdɛ ɔkɔ wɔnɔ nɛ kibui ɛlɛ mɛ nɛ alɛ. Kɛgɔanàa wɔnɔ odzì banɔ gɛiputɔ, anɛ sɛ tɛ nɔkɔ kɛdɔ̃ ete, pɔ kide wɔnɔ kitú mɛ ɔsɛ tɛ nɔkɔ bɔdɔ̃ɔ.

¹¹ Otsiɛ nɔwɔa kɛxɔ̃ɛ obekè, tɛ kanà gɛ nɔpɛ ɔsɛ ɔwɔa ɛlɛ kɔ ɔsɛ nɔwɔa ɛlɛ obekè, odenɔ kɛgɛ lɛ wɔnɔ ahɔɛ mɛ.

¹² Ɔmɔsɛ onupɛ tɛpɛpɛ ɔkɔ kɛdɔ̃ kɔkɔ lɛɛ, baba yɛkɛ kɛgɛ ɔlàkɔ nɛ kɛgɛ lɛ wɔahɔɛ mɛ, gɛnɛ kɛgɛ ma wɔahɔɛ pɛ ɔtɛbɔlà kɔ shu.

¹³ Bɔlɔ tɛpɛpɛɛ kɛinu ɔsɛ tɛ bagɔgɔ atɛ̀ lɔkɔ kɛnanà nɛ kɛlɛ mɛ, pɛ wɔnɔ xɔnɔ ebui atɔɖɔ wɔnɔ abha, pɔ bɔpɛ ɔsɛ tɛ̀ kɛka nyia ka shɔ̃ piapii.

¹⁴ Nɛ kibe ɛlɛ mɛ, wɔnɔ bɔdɔ̃ kɔkɔ kpekpèɛ banà kɔ alɛ, sɛ tɛ balɛ tsyɛ akɔ wɔnɔ kɛgɛ nɔpɛ nɔ. Kɛlɛ ebuiɛ petee abashɔ̃,

¹⁵ asɛ gɛ bafɔnɔ elú ana asɛ, “Anunɔ gɛ yɛeshogo bɔdɔ̃ gelee nɔ bɔdɔ̃ gelee tɛzã yɛahɔɛ, kɛlɛ anunɔ gɛ yɛeshogo bɔdɔ̃ ɛbɔɛ nɔ, anɛ bɔdɔ̃ ɛbɔɛ bɔlɛ zã yɛahɔɛ.”

Bakpɛ Tito Nɛ Korinto

¹⁶ Ihu Owusoso Akaa ahɔɛ, anɔ gɛ yɛakpɛ kɛgɛ mɛpɛ kɔ wɔnɔ nɛ̀ Tito tsyɛ yɛituɔ mɛ.

¹⁷ Ɔmɔsɛ gɛnɛ bɔlɔ kibuiɛ ete Tito amana wɔnɔ, pɔ aaba wɔnɔ ɔkɔ nɛ̀ kemikpɛkpɛ gbagbla nɛ yɛahɔɛ mɛ ebui teli tsyɛ shu.

¹⁸ Kɛlɛ bɔɔkpɛ adzya teli plɛnii gɛ ɔhaa petee adɛmɛ nɔ nɛ yɛ kibui gbangbã axɔ̃ɛ wɔawɔa shu so.

¹⁹ Kɛgɛ zɛdɛɛ, ɔhaa yɛebú yɛ asɛ tɛ atɔnɔ bɔlɔ nɛ kibeɛ gɛ bɔlɔkɔ bɔdɔ̃kɔkɔ vɛnɔɔ, bɔdɔ̃ gɛ bɔdɛkɔ tɛ̀ bɔkpɛ̀ Apaleteɛ kinyè nɛitití, nɛ̀ tɛ bɔkasɛ ɔsɛ bɔpɛ sɛ tɛ̀ bɔplɛnɔ.

²⁰ Bɔgɛ pɛ sɛ tɛ baɖɔ kibui kpa nanà nɛ kana gɛ bɔkɔ ɛyamɛ gbangbã bɔdɔ̃ ɔlɛ shu.

²¹ Ɔmɔsɛ bɔkpɛ kemi pɛ bɔbhɛtɛ̀ kɛgɛ pɛ nɔ, gɛnɛ nɛ Apaleteɛ namɛ ete, pɔ nɛ banɔdzyrame tsyɛ amɛ.

²² Ɔlɔkɔ ɔplɛnɔɔ, bɔɔkpɛ̀ bɔlɔ adzya gɛ abhɛtɛ akɔ bɔmɔ sɛ apɛ asɛ tɛ̀ awɔa kɛxɔ̃ɛ asɛsɛ, kɛlɛ otsiɛ nɔ akapɛ asɛ tɛ̀ awɔa kɛlɛ atɔɖɔ ɔmɔsɛ ayɛkɛ wɔnɔ abha aŋã.

²³ Tito xɔnɔɔ, enu mɛɔbhia gɛenu mɛ axɔ̃ɛwɔa ɔhagbo nɛ wɔnɔɛishi, bɔlɔ badzya alɛ xɔnɔɔ, benu banɔ gɛ ɔhaa akpɛ asɛ tɛ bazã balɛ inye mɛ tɛ bakpɛ̀ Kristo kinyeɛ nɛitití.

²⁴ Klisoɔ, nɔkasɛ banɔ alɛ ɔsɛ nɔdɛmɛnɔ nɛ alɛ, nɛ kɛgɛ kɛlɛishu so pɛ butũ ahɔɛ nɛ kitelũ nɛ wɔnɔ kɛtakpuɔ tɛ̀ ɔhaa balà amɔ ɛlɛ.