Korintoanɛ 2 7 - Nyangbo New Testament

¹ Mɛ ɔbhia alɛ gɛ ɛdɛmɛnɔ, gɛ batɔɖɔ ebui alɛ elú akɔ bɔlɔ soɔ, nɔkɔ bɔdalɛ bɔlɔ shu odenɔ kɛka nyia ka gɛ kɛkpɛ̀ kibò nɛ bɔlɔ ishudzya nɛ̀ ɔfɔfuĩa nɔ shu, tɛ bɔlɔ shu dalɛ tɔɖɔ nɛ kɛtakpu esi kpɛkpɛ ɔkɔ Owusoso Akaa mɛ.

Paulo Yɛ Same Mɔmɔ

² Nɔbhɛtɛ ɔzãkɔ ɔkɔ bɔlɔ nɛ wɔnɔ etúɔ mɛ. Bɔgɛ bhɛtɛ kibui kpa nɛ anɔ nanà shu, bugi tuturu ananà, bugi dzyini ananà tsyɛ ɔkpɛ.

³ Ɛtɛɖɔ kibui ɛlɛ tɛ̀ ɛlɔkɔ bù wɔnɔ kɛpɔ nɔ, ɛtɛɖɔ ɛlɛ ɖi sɛ ɔzãkɔ ɔlɛ nɛidi ɔlɛ wɔnɔ ahɔɛ nɛ bɔlɔ etúɔ mɛ gɛ bakɔ sɛ bɔzã nɛkpã alo tɛ̀ butsì plɛnɔ wɔnɔ.

⁴ Ɛyɛkɛ wɔnɔ abha aŋã, kɛlɛ itũ mɛitelũ nɛ wɔnɔ kɛtakpu. Kemi kpɛkpɛ gbagbla alɛ mɛahɔɛ sɛ nɛ bɔlɔ bɔtɔ gelee mɛ tsyɛ, ɔtɔ̃kɔ nanà ma ɔkɔ mɛ samè mɔmɔ.

⁵ Ɔmɔsɛ gɛ bɔba Makedonia nɔ, bɔlɔ ishudzya ɛlɛ gimoele ɖi, pɔ bazã kpɛ bɔlɔ buluhũ nɛ kɛka nyia ka bhɛbhɛtɛ shu, ebela pɛpɛ ebui nɛ ɔtɔ̃ɔ, kɛmana kifu sisi nɛ bɔlɔ etúɔ mɛ.

⁶ Pɔ Owusoso Akaa gɛ ayɔ ishumɛ akɔ agɛ yɛ bezhini akpɛ kesiɛ, alɔkɔ Tito tɛbaba ayɔ bɔlɔ ishumɛ nɔ,

⁷ kɛlɛ gɛnɛ yɛtɛbaba ete, pɔ nɛ ishumɛ yɔyɔ gɛ nɔlɔkɔ ɔkɔɛ shu so. Etseɖe bɔlɔ kana gɛ nɔpɛ ɔsɛ tɛ nɔmɔ mɛɛ, wɔnɔ ɔwɔ̃nyɔnɔ gbagblaa, kanà gɛ nɔbhɛtɛ ekpeɖekpeɖe mɛ nɛ mɛishuɔ, sɛ tɛ̀ mɛ samɛ mɔmɔ ekpè adɛ kana gɛ azã.

⁸ Onupɛ nɔmɔ ɔwɔ̃nyɔnɔ ebui nɛ keplukpa gɛ ɛfɔnɔ sɛsɛ wɔnɔ mɛ tsyɛ elo, kɛgɛ tɔɖɔ mɛabha. Gɛ kɛtɔɖɔ mɛabha flogo tsyɛ elo-ɛmɔsɛ mɛ keplukpa mɛ ebuiɛ apɔɛ wɔnɔ, pɔ kɛba zãna ɔkɔ kibè gulũi ete-

⁹ pɔ otsi alɛ xɔnɔ same eeku mɛ, gɛnɛ sɛ gɛ kɛtɔɖɔ wɔnɔ abha so, pɔ gɛ wɔnɔ ɔwɔ̃nyɔnɔ gbana wɔnɔ ɔkpɛ etú titsyitsyina ebuiɛ mɛ so. Ɔmɔsɛ nɔbɔ mɔ ɔwɔ̃nyɔnɔ asɛ kana gɛ Owusoso Akaa atɔɖɔ ɛlɛ, klisoɔ gɛnɛ bɔlɔ bhɛtɛ kibui gɛ kɛkpɛ kibì nanà nɛ wɔnɔ shu.

¹⁰ Ɔwɔ̃nyɔnɔ mɔmɔ gɛode Owusoso Akaa mɛɛ, lɔmana kitú mɛ tsyitsyina gɛ gbana anɔ ɔkpɛ kɛtɔwui bubu mɛ gɛ kitinu kibui gɛ dɛ mɛulũ, pɔ kanɔ mɛ ɔwɔ̃nyɔnɔ xɔnɔ lɔmana butsí.

¹¹ Noɖi kɛgɛ ɔwɔ̃nyɔnɔ nɛ Owusoso Akaa mɛ ɔbhɛtɛ nɛ wɔnɔ ɛkpã mɛ, akɔ asɛ nɔkpɛ kemi nɛ kibui shu ɔdɛ, akɔ asɛ nɔpɛ ɔsɛ tɛ wɔnɔ shu dalɛ, akɔ asɛ nɔkpɛ ɔmɔpɔɛ nɛ kɛgɛ gɛpɛ̃ɛ shu, akɔ asɛ notisi kifù, akɔ asɛ noɖi kidzo mɛ ɔkɔ ebui teli, akɔ asɛ nɔlɔkɔ tili nɛebui mɛ, akɔ asɛ nɔpɛ ɔsɛ tɛ bapɔ̃ batɔ̃ akɔ anɔ gɛ atɛa bhɛtɛ kibui gbangbã. Nɛ ebuiɛ alɛ petee mɛɛ, nɔkasɛ ɔsɛ wɔnɔ shu dalɛ nɛ alɛ shu.

¹² Kliso gɛ ɛfɔnɔ keplukpa kɔ wɔnɔ tsyɛ elo, gɛnɛ anɔ gɛ abhɛtɛ kibui kpa shu so alo anunɔ gɛ babhɛtɛ kibui kpa nɛishuɔ so, pɔ sɛ tɛ nɛ Owusoso Akaa namɛ, tɛ nɔlà mɔ ebuiɛ ɔkɔ ishu nɛ kana gɛ nɔmɔ kibè ɔkɔ bɔlɔɔ.

¹³ Nɛ ebui alɛ nyɔ̃ɔ mɛ, bɔmɔ kemi kpɛkpɛ. Ɔlɔkɔ ɔplɛnɔ bɔlɔ kemikpɛkpɛ, kɛzã bɔlɔ uli nɛ kɛmɔ gɛ Tito tsyɛ amɔ sameɛ shu, ɔmɔsɛ wɔnɔ petee nɔkɔ yɛ ɔfɔfuĩa nɔ lodzi ɔvɔvɔ.

¹⁴ Itũ mɛishu kitelũ nɛ wɔnɔ kɛtakpu kɔɛ, kɛlɛ nɔgɛ kpɛ mɛ buluhũ. Pɔ asɛ kana gɛ kɛka nyia ka gɛ butseɖe wɔnɔ lɛ kɛlɛ ɔzãkɔɔ, kidzo ɛlɛ nabha kitelũɔ gɛ butũ nɛ wɔnɔ shu ɔkɔ Tito nɔ, kasɛ sɛ kinu kibui gbã.

¹⁵ Kɛlɛ yɛ tɛdɛdɛmɛ nɔɔ ɔkɔ wɔnɔ zɛbà gbogblo dɛ gɛ onupɛ abakà ɔsɛ wɔnɔ nyɔ̃ɔ olũ batɔ̃, pɛ nɔyɛkɛ yɛ nɛ̀ kifusisi nɛ̀ tishushukù mɛ.

¹⁶ Same eku mɛ, kɛlɛ ɛbalà yɛkɛ wɔnɔ abha ŋã.