Korintoanɛ 2 6 - Nyangbo New Testament

¹ Asɛ Owusoso Akaa ɔhaxɔ̃ɛwɔa anaa, bɔkpalà wɔnɔ sɛ nɔtɛ yɛkɛ Owusoso Akaa tibhui bhuibuɔ asɛ kɛlɛ́ɛ mɛdɔ̃ ana.

² Ɔmɔsɛ aɖɔ asɛ, “Nɛ kibeɛ gɛ kɛlɛ sɛ ɛbhɛtɛ ɛyamɛ gbangbã kɔ wɔnɔ, ilũ wɔnɔ atɔ̃, kɛlɛ nɛ anɔ tibubu iwui nabhaa, ɛplɛnɔ wɔnɔ.” Itseɖe wɔnɔ sɛ kibe ɛlɛ kɛlɛinu Owusoso Akaa ɛyamɛ gbangbã bhɛbhɛtɛ kiwuiɛ, otsiɛ ɔlɛ onu tibubú kiwuiɛ.

Bɔtɔɔ Gɛ Paulo Amɔɔ

³ Bugilu kɛdɔ̃ kpakpata nɛ anɔ nanà kidzo mɛ, ɔsɛ tɛ bɔlɔ axɔ̃ɛ wɔawɔa etibedzi kɛlɛɛ ete.

⁴ Pɔ asɛ Owusoso Akaa axɔ̃ɛdɛ ana, bɔlɔkɔ bɔlɔshu kɔ nɛ kidzo ka nyia ka abha, nɛ̀ kemi kpɛkpɛ gbagbla, bɔtɔ nɛ̀ ɔwɔ̃nyɔnɔ mɛ,

⁵ nɛ tihuhuisi mɛ, ɔɖavũmɛ zazã nɛ̀ ebelà ebui mɛ, nɛ kɛxɔ̃ɛ gagalĩ tɛwɔawɔa mɛ̀, elishi taɖa madɔ madɔ nɛ bɔbhɛ mɛ,

⁶ nɛ ekpeɖekpeɖe gbangbã mɛ, ebui esi lulũ, kitú esi lulu nɛ̀ ɛyamɛ gbangbã tɛbhɛbhɛtɛ mɛ, nɛ Ɔfɔfuĩa Gbangbã mɛ tɛzazã nɛ̀ tɛdɛdɛmɛ nɔ gidzuɔ mɛ̀,

⁷ nɛ kibui gbã tɛɖɔɖɔ mɛ nɛ̀ Owusoso Akaa yɛohumi nɔ mɛ, tɛ bɔlɔkɔ kibui gbangbã bhɛbhɛtɛ keyutadɔ̃ nɛ kɛŋã nɛ̀ kɛblɛkpɛ mɛ̀,

⁸ ɔgana ishu dadalɛ nɛ̀ awũi ebui mɛɛ, kibui kpa tɛɖɔɖɔ nɛ̀ kibui gbangbã tɛɖɔɖɔ nɛ anɔ shu mɛ, bɔna pɔ balɔkɔ bɔlɔ asɛ butinu anunɔ gɛ yɛ bɔɖɔ sɛ yɛ bunuɔ,

⁹ benyi bɔlɔ pɔ babhɛtɛ asɛ betinyi bɔlɔ ana, abhɛtɛ asɛ butsi pɔ bɔlɛ nɛkpã, behuisi bɔlɔ pɔ begiyì bɔlɔ,

¹⁰ ɔwɔ̃nyɔnɔ kpasɛ bɔlɔ mɛ, pɔ bɔmɔ same kibe nyia be, bɔdɔ̃ kitsyui, pɔ bɔkɔ banɔ kpekpèɛ amɔ ehoeyi bɔdɔ̃, kɛdɔ̃ nanà ma bɔlɔ ahɔɛ, pɔ kɛka nyia ka lɛ bɔlɔ ahɔɛ.

¹¹ Bɔdalɛ ishumɛ ɖɔ kaɖɔ nɛ̀ wɔnɔ Korintoanɛ, kɛlɛ bɔdalɛ bɔlɔ etúɔ mɛ petee kɔ wɔnɔ.

¹² Bɔgɛ nyanã bɔlɔ tɛdɛdɛmɛ nɔ ɔkɔ wɔnɔ ovunɔ, pɔ wɔnɔ xɔnɔ ɔnyana wɔnɔ tɛdɛdɛmɛ nɔ ovunɔ nɛ bɔlɔ shu.

¹³ Tɛ itiɖì banɔ amɛɛ, ɛɖɔ kaɖɔ kɔ wɔnɔ asɛ mɛeyi alɛ ana, kliso wɔnɔ tsyɛ nɔdalɛ wɔnɔ etúɔ mɛ.

Nɔtɛkɔ Bakpɛ Kakɔ Nɛ Wɔnɔ Oli Ɔplɛnɔ Bagɛ Agɛ Yɛkɛ Aŋã

¹⁴ Nɔtɛkɔ bakpɛ kakɔ nɛ wɔnɔ oli ɔplɛnɔ bagɛ agɛ yɛkɛ aŋã. Ɔmɔsɛ tenikpo bhɛbhɛtɛ ɖuwoe gɛ akpasɛ kibui gbangbã nɛ̀ kibui kpa bhɛbhɛtɛ ishi? Pɛnɔsɛ tenikpo bhɛbhɛtɛ ɖuwoe gɛ akpasɛ kifu nɛ̀ otumũ ishi?

¹⁵ Tenikpo bhɛbhɛtɛ ɖuwoe gɛ akpasɛ Kristo nɛ̀ anɔzizĩ ishi? Tenikpo bhɛbhɛtɛ ɖuwoe gɛ akpasɛ agɛ ayɛkɛ aŋã nɛ̀ anɔ gɛ agɛ yɛkɛ aŋã ishi dza?

¹⁶ Kibui nyanyã ɖuwoe gɛ kpasɛ Owusoso Akaavũɔ nɛ̀ ibudi ishi? Bɔlɛinu buvũɔ ɔkɔ Owusoso Akaa enunuɔ. Asɛ kana gɛ Owusoso Akaa aɖɔ asɛ, “Ɛbazã plɛnɔ balɛ kɛlɛ ɛbagã nɛ balɛishi, kɛlɛ ɛbadzi balɛ Owusoso Akaa, kɛlɛ bebèdzi mɛ banunɔ.”

¹⁷ Klisoɔ nokoeyi nɛ balɛishi tɛ nobu ɔtɔ, kana Apaleteɛ aɖɔ. Nɔoti hunu kɛnanà gɛ kɛlɛishu gɛdalɛ, kɛlɛ ɛbayɛkɛ wɔnɔ.”

¹⁸ “Ɛbadzi Akaa ɔkɔ wɔnɔ kɛlɛ nɔ obodzi mɛeyianyɛ nɛ̀ beyiadzɛ alɛ, kana Apaleteɛ gɛenu Ohumi petee eleteɛ aɖɔ.”