Korintoanɛ 2 5 - Nyangbo New Testament

Bɔlɔ Kititì Ɔzãkɔ

¹ Otsi alɛ bunyi sɛ onupɛ bezĩ kesiakpa abha kagbaa gɛ kalɛ mɛ bɔkpasɛ, ɔzãkɔ ɔlɛ bɔlɔ ahɔɛ nɛ Owusoso Akaa ɔkɔ, bɔpã tihɔɔ, gɛ anɛ anɔdzyrame ahɔɛ balɔkɔ edzu bɔlɛ nɔ.

² Pɔ otsiɛ nɔ atɛatsɔ akɔ bɔlɔ tɛ bakɔ bɔlɔ kititì ɔzãkɔ

³ ɔmɔsɛ onupɛ balɔkɔ bɔlɛ akɔ ɔlɔ, bɔtɛ bazã kɛdɔ̃ makpɛ makpɛ.

⁴ Pɔ otsiɛ xɔnɔ gɛ bɔkpasɛ kagba alɛ mɛɛ, atɛatsɔ akɔ bɔlɔ, kɛlɛ kɛtɔɖɔ bɔlɔ abha, ɔmɔsɛ bɔtɛpɛ sɛ tɛ bebu kɛdɔ̃ kpɛkpɛ ginu bɔlɔ ɔzãkɔ nɛ bɔlɔ shu, pɔ tɛ bakpɛ kɛpɔtɛ ginu kititì ɔzãkɔ nɛ bɔlɔ shu sɛ tɛ̀ ɛkpã ŋã kɛdɔ̃ gitsíɛ nabha.

⁵ Otsiɛ nɔ, Owusoso Akaa yɛabhɛtɛ bɔlɔ akɔ kibui tɔtɔɖɔ ɛlɛ kɛlɛ akɔ bɔlɔ Ɔfɔfuĩa alɔkɔ elú tɛ̀ kɛkasɛ kidzo ɔkɔ kɛgɛ babaá.

⁶ Klisoɔ buɖi kidzo mɛ kibe nyia be, kɛlɛ bunyi tsyɛ sɛ gɛ bɔkpasɛ ishudzya bɔpãlɛ mɛɛ soɔ, bɔlɛ odzlolo ɔkɔ nɛ Apaleteɛ shu.

⁷ Tɛyɛyɛkɛŋã mɛ bɔlɔkɔ dzi nɛ ɛkpã nɔ, anɛ nɛ kɛdɔ̃ ɖiɖi ulũ.

⁸ Ɛɖɔ ɛlɛ sɛ bɔyɛkɛ bɔlɔ shu abha ŋã, kɛlɛ bɔba pɛ sɛ tɛ bukoeyi nɛ ishudzya ɛlɛ mɛ tɛ bɔdɛzã Apaleteɛ bɔpã mɛ.

⁹ Klisoɔ, kinu kibui gɛ bɔtɔɖɔ sɛ bɔpɛ sɛ tɛ buku yɛawɔ, gɛ onupɛ edzi asɛ bɔkpasɛ bɔpãlɛ ginu ishudzya alo onupɛ bɔma bɔlɛ mɛ tsyɛ.

¹⁰ Ɔmɔsɛ kɛlɛ sɛ bɔlɔ petee ba Kristo kebhu kuklu kegbu namɛ, sɛ tɛ aka nyia aka ayɛkɛ kɛgɛ kɛlɛ sɛ bakɔɛ, nɛ̀ kɛgɛ yɛabhɛtɛ kibeɛ gɛ azã ishudzya mɛ, onupɛ kinu kibui gbangbã pɛnɔsɛ kibui kpa tsyɛ.

Kɛxɔ̃ɛ Wɔawɔa Ɔkɔ Tenikpo Bhɛbhɛtɛ

¹¹ Denɔ kibe ɛlɛ gɛ bɔbatì sɛ kɛlɛ sɛ busi Apaleteɛ nɛifu soɔ, bɔpɛ sɛ tɛ bubu ebui mɛ kɔanɔ. Owusoso Akaa enyi kɛgɛ bunùɔ, kɛlɛ inyi tsyɛ sɛ kɛlɛ mɛ dalɛ ɔkɔ wɔnɔ ebuesilulũ.

¹² Bɔtɛ pɛ sɛ tɛ̀ bɔɖɔ kaɖɔ nɛ bɔlɔ shu kɔ wɔnɔ, pɔ bɔpɛ sɛ nɔmɔ kidzo tɛ nofeke ishu nɛ bɔlɔ kɛtakpu. Sɛ tɛ nɔlà bu kibui ulũ ɔkɔ bagɛ befeke ishu nɛ kɛgɛ bamɔ shu ɔdɛ kɛgɛ kpasɛ kitúɔ mɛ.

¹³ Onupɛ bɔlɔ ekpeɖekpeɖe mɛ ama piapii tsyɛ elo, Owusoso Akaa shu so pɛ kɛlɛ ana, onupɛ bɔlɔ ekpeɖekpeɖeɛ mɛ alɛ piapii nɔ, bɔlɛ ana kɔ wɔnɔ.

¹⁴ Ɔmɔsɛ Kristoɔ tɛdɛdɛmɛ nɔ tĩi bɔlɔ, ɔmɔsɛ kɛlɛ mɛ dalɛ kɔ bɔlɔ sɛ anɔ tenikpo etsí kɔ bɔlɔ petee, klisoɔ bɔlɔ petee tsí.

¹⁵ Kɛlɛ etsí akɔ bɔlɔ petee, sɛ tɛ bagɛ alɛ nɛkpã atakazã nɛkpã akɔ balɛishu pɔ tɛ̀ bàzã nɛkpã akɔ agɛ yɛetsí nɛ balɛ kɛtakpuɔ pɛ beze feke yɛ edenɔ bekpuɔ mɛ.

¹⁶ Kliso denɔ otsiɛ ɔvɛnɔɔ, bɔtɛ kaɖì ananà nɛ kanɔ mɛ ɔdɔ̃ ɖiɖi ulũ. Kɛkpasɛ ɛlɛ mɛ ɔsɛ, butiɖi Kristo ana oɖi, pɔ bɔtɛka bhɛtɛ ɛlɛ ana.

¹⁷ Klisoɔ, onupɛ anɔ teli akpasɛ Kristo mɛɛ, enu kɛdɔ̃ bhɛbhɛtɛ vɔvɔ, kɛdɔ̃ kukuɔ tɛba fala, kɛvɔvɔ ba otsi alɛ!

¹⁸ Alɛ petee ede Owusoso Akaa ɔkɔ, anɔ gɛ yɛabhɛtɛ tenikpo nɛ̀ bɔlɔ ɔgana Kristo abha kɛlɛ akɔ bɔlɔ kɛxɔ̃ɛ wɔawɔa, gɛ mana tenikpo bhɛbhɛtɛ,

¹⁹ sɛ Owusoso Akaa abhɛtɛ tenikpo nɛ kanɔ nɔ̀ mɛ ɔgana Kristo abha, gɛ atɛa kalà banɔdzyrame ebui kpa bhɛbhɛtɛ kɔ alɛ. Kɛlɛ asɛsɛ bɔlɔ kibuiɛ gɛ bamana tenikpo bhɛbhɛtɛ.

²⁰ Klisoɔ bunu Kristo yɛanɔkpɛkpɛ, gɛ Owusoso Akaa agã bɔlɔ abha pɛ aɖɔaɖɔ etseɖe wɔnɔ. Kliso bubisi denɔ wɔnɔkɔ nɛ Kristo kinye mɛ sɛ tɛ̀ nɔbhɛtɛ tenikpo nɛ̀ Owusoso Akaa.

²¹ Owusoso Akaa bhɛtɛ anɔ nɔ gɛ yɛishu kibui kpa ma sɛ tɛ edzi kibui kpa nɛ bɔlɔ kɛtakpu, sɛ tɛ gana yɛabhaa, budzi Owusoso Akaa anɔ dadalɛ.