Korintoanɛ 2 4 - Nyangbo New Testament

Ehoeyi Bɔdɔ̃ Gɛ Kpasɛ Butsukpu Mɛ

¹ Klisoɔ, gɛ gana Owusoso Akaa ashagabui ɖiɖi mɛ bɔwɔa axɔ̃ɛ soɔ, bɔlɔ etúɔ ohuiɛ otio bhui.

² Pɔ, bɔtɛ badɛmɛ tɔɖɔ ebui kpukpũ nanà tɛɖɔɖɔ nɛ̀ awũi edzo abha, bɔgɛ lɔkɔ tɛwɔɛwɔɛ ebui, alo pɛ butsyina Owusoso Akaa yɛibuiɛ tũ. Pɔ nɛ kidzo ɛlɛ nabha, bɔlɔkɔ kibui gɛlɛ ɛlɛ ɔzãkɔ bɔlɔkɔ ɖɔ kitú mɛ kibui, nɛ Owusoso Akaa namɛ.

³ Kɛlɛ onupɛ kidzi asɛ badã kibui gbangbã nɔdɔ̃ tsyɛ elo, badã kɛlɛ bɔdɔ̃ ɔkɔ bagɛ balɛ ɛkpã yalaa.

⁴ Obo kanɔ nɔ̀ ibudiɛ pú awuhũ akɔ bagɛ agɛ yɛkɛ aŋã, sɛ tɛ batɛmɔ tɛdadalɛ gɛlɛ Kristo yɛibuiɛ shu, anɔ gɛ alɛ asɛ Owusoso Akaa ana.

⁵ Ɔmɔsɛ anɛ bɔlɔ shu kibui bɔɖɔ, pɔ Yesu Kristoɔ bɔlɔ Apaleteɛ shu bɔɖɔ kaɖɔɔ, kɛlɛ budzi asɛ baxɔ̃ɛdɛ akɔ Yesu ana.

⁶ Ɔmɔsɛ Owusoso Akaa aɖɔ asɛ, “Nɔkɔ kifu dɛkɛ nɛ otumũɔ mɛ,” nɔkɔ yɛifúɔ dɛkɛ nɛ bɔlɔ etúɔ mɛ, tɛ kɛdɛkɛ kɔ bɔlɔ asɛ bubuti kifù ana tɛ kɛkɔ Owusoso Akaa shu dalɛ nɛ Kristo amɛ.

⁷ Pɔ ehoeyi bɔdɔ̃ bɔlɛ lɛ ɔlɔ ahɔɛ gɛkpasɛ butsukpu mɛ tɛ kɛkasɛ sɛ ohumi ɔlɛ gɛ ɔdɛ ɔka nyia ka ogide bɔlɔkɔ, pɔ Owusoso Akaa ɔkɔ lode.

⁸ Bamɔnɔ bɔlɔ akpɛ gagalĩ nɛ kawɔ̃pɛ ka nyia ka mɛ, pɔ begihu bɔlɔ esi, kɛkpɛ ɔlɔ buluhũ pɔ bɔlɔ shu mɛ gɛgbã,

⁹ batɔnɔ ɔlɔ ede, pɔ bagɛ shɛnɛ ahɔɛ nɛ bɔlɔ shu, behu ɔlɔ esi pɔ bugitsí.

¹⁰ Bɔlɔkɔ Yesu butsiɛ kpɛ ɔlɔ ishuɔ mɛ ɛkanà bɔlɛ falanɔ kibe nyia be, sɛ tɛ bebu ɛkpã gɛ Yesu azã akasɛ nɛ bɔlɔ mɛ.

¹¹ Ɔmɔsɛ bɔlɔ bagɛ lɛ nɛkpã, butsi kpɛ bɔlɔ ɛkpã nɛifu nɛ Yesu kɛtakpu sɛ tɛ bebu yɛkpã zazãna mɛ akasɛ nɛ bɔlɔ ishupiɛ gɛbatsiɛ mɛ.

¹² Klisoɔ, butsí wɔa axɔ̃ɛ nɛ bɔlɔ mɛ, pɔ ɛkpã ɛlɛ wɔa axɔ̃ɛ nɛ wɔnɔ xɔnɔ mɛ.

¹³ Bafɔnɔ kɛlɛ elú asɛ, “Ɛyɛkɛŋã, kliso pɛ ɛɖɔ kaɖɔɔ.” Nɛ tɛyɛyɛkɛŋã ɔfɔfuĩa tonikpo ɔlɛ mɛɛ, bɔlɔ tsyɛ yɛkɛ ŋã kliso pɛ bɔɖɔ kaɖɔ,

¹⁴ ɔmɔsɛ bunyi sɛ agɛ yɛanyɛmɛ Yesu denɔ bekpuɔ mɛ yɛaba nyɛmɛ bɔlɔ aplɛnɔ Yesu kɛlɛ abagbana bɔlɔ nɛ̀ wɔnɔ avɛnɔ yɛamɛ.

¹⁵ Kɛlɛ petee lɛ ɔkɔ wɔnɔ tɛpɛpɛ̃ so, sɛ tɛ tibhui bhuibuɔ bavɛ banɔ kpekpèɛ ɔkɔ gɛ bamana ahɔɛhuhu gɛbà yuku gbangbã Owusoso Akaa tɛdadalɛ.

¹⁶ Kliso bɔlɔ kitúɔ tibhui. Nɛ ɔtɔ̃ɔ, bɔwɔɛ asɛ bɔlɔ ishudzya botso, pɔ nɛ bɔlɔ kɛmɛ xɔnɔɔ, bɔmɔ ɛkpã tsyitsyina vɔvɔ kiwui nyia wui.

¹⁷ Ɔmɔsɛ bɔlɔ bɔtɔ lɛ gidzi foele pɛ bɔfalà gulũi nɔ, bakɔ bɔlɔ̀ tɛdadalɛ gɛbazã tihɔɔ gɛ dɛ kɛka nyia ka.

¹⁸ Klisoɔ bɔtɛ ilu awɔ̃ nɛ kɛgɛ bamɔ nɛ̀ awuhũɔ nabha, pɔ buulu awɔ̃ nɛ bɔdɔ̃ gɛ batɛ amɔ nabha. Ɔmɔsɛ kɛgɛ bɔmɔ nɛ̀ anwuhũɔ tɛzã kibe dzlolo, pɔ kɛgɛ batɛmɔ nɛ̀ awuhũɔ kɛlɛ zã tihɔɔ.