Korintoanɛ 2 3 - Nyangbo New Testament

¹ Bɔzɛba wlui kpɛ bɔlɔ ishu nɛitití mɔɔ dza? Buplukpa bade banɔ teli ɔkɔ kɔ wɔnɔ tububu kasɛ alo bɔlɔkɔ, ɔkɔ wɔnɔ inyeɛ tɛkpɛkpɛ nɛititiɛ dza?

² Wɔnɔ onu bɔlɔ keplukpa gɛ bafɔnɔ nɛ bɔlɔ etúɔ nabha, gɛ aka nyia aka enyi pɛ akalàa.

³ Nɔkasɛ ɔsɛ Kristo keplukpa nɔonu, kɛgɛ kɔ sɛ bɔlɔ axɔ̃ɛ avɛ kabhaa, gɛ bagɛ fɔnɔ nɛ̀ ahɔɛ pɔ Owusoso Akaa Ɔfɔfuĩa nɔ balɔkɔ afɔnɔ kalɛ nɔ. Bagɛ fɔnɔ alɛ nɛ ɛklagbu abha, pɔ banɔdzyrame etú aklagbu nabha bafɔnɔ alɛ atɔɖɔ.

⁴ Banɔ abha yɛyɛkɛŋã alɛ nɛidiɛ nu bɔlɔ ayɛ ɔgana Kristo abha vɛnɔ Owusoso Akaa amɛ.

⁵ Etinu asɛ gɛ bɔna nɛ kɛxɔ̃ɛ dɛdɛ mɛ ɔsɛ tɛ bɔyɛkɛ kɛdɔ̃ nanà kɔ bɔlɔshu, pɔ Owusoso Akaa yɛakɔ bɔlɔ kɛxɔ̃ɛ gbangbã tɛwɔawɔa ɛlɛ nɛidi.

⁶ Yɛakɔ bɔlà kɛxɔ̃ɛ gbangbã wɔawɔa nɛ̀ olugbũ nyanyã vɔvɔ ɔlɛ, anɛ ɔsha keplukpa ɔkɔ kide, pɔ Ɔfɔfuĩa nɔ, ɔmɔsɛ keplukpa xɔnɔ eyì banɔ, pɔ Ɔfɔfuĩa nɔ xɔnɔ lɔkɔ ɛkpã.

Tɛdadalɛ Gɛlɛ Olugbũ Nyanyã Vɔvɔ Shu

⁷ Otsiɛ nɔ, onupɛ kɛxɔ̃ɛ wɔawɔa gɛ mana butsí, gɛ bafɔnɔ atɔɖɔ ɔsha buplukpa nɛ̀ kɛklagbu abhaa, ba nɛ̀ tɛdadalɛ sɛ tɛ Israelanɛ atɛlà eɖi Mose amɛ nɛ gɛ kitséɛ shu, gɛ kalɛ ulũ pɔ bafala flogo,

⁸ kidzi ana pɔ, bɔlɔ axɔ̃ɛ wɔawɔa gɛede Ɔfɔfuĩa nɔmɛ ishu taadalɛ ɔdɛ ana dza?

⁹ Onupɛ axɔ̃ɛ wɔawɔa gɛebu banɔ kɛpɔ shu dalɛɛ ana pɔ, kɛlɛ kɛxɔ̃ɛ wɔawɔa gɛ mana ishu dadalɛ pɔ ba zã dza?

¹⁰ Ɔmɔsɛ kɛgɛ buɖi sɛ kɛlɛishu dalɛ, tɛka lɛ ana, gɛ onupɛ bɔlɔkɔ shɔnɔ tɛdadalɛ gɛ bazã tihɔɔ nulũ.

¹¹ Kɛlɛ onupɛ kɛgɛ kɛlɛ ulũ bafalàa ba nɛ̀ tɛdadalɛ ɛlɛ nɛidiɛ pɔ, kɛlɛ tɛdãdalɛ gɛba zã tihɔɔ nɔ bazãa mɔɔ dza?

¹² Kliso gɛ buɖi kidzo mɛ ɔkɔ ebui alɛ, kifù tiyi bɔlɔ.

¹³ Bɔlɔ butidzi asɛ Mose ana, gɛ abalɔkɔ kɛpɔtɛ adã yɛamɛ asɛ tɛ̀ Israelanɛ atɛmɔ tɛdadalɛ gɛ ɛlɛ ulũ falàa nɛ yɛamɛ.

¹⁴ Pɔ babhɛtɛ balɛ ekpeɖekpeɖeɛ yɛazã yɔɔ, ɔmɔsɛ oboyinɔ otsiɛnɔ kɛpɔtɛ wɔ balɛ amɛ nɛ kibeɛ gɛ bakà akalà olugbũ nyanyã kukuɔ. Bagɛ tsɛ ɛlɛ nɛ balɛ amɛ, ɔmɔsɛ kristo mɛ ete babà tsɛ ɛlɛ ashɛnɔ.

¹⁵ Boyinɔ obuɔ onupɛ bakalà Mose ɔsha keplukpa, baka adã kɛpɔtɛ ɛlɛ nɛ alɛ etúɔ nabha.

¹⁶ Pɔ onupɛ anɔ teli tsyina avɛ Apaleteɛ ɔkɔɔ, kɛlɛ́ batsɛ kɛpɔtɛ ɛlɛ nɛ yɛamɛ.

¹⁷ Otsiɛ Apaleteɛ yɛenu Ɔfɔfuĩa nɔ, kɛlɛ ɛkɛlɛ gɛ Apaleteɛ Ɔfɔfuĩa nɔ lɛɛ, ɛkɛlɛ ishu ahɔɛmɛ zazã tsyɛ azã.

¹⁸ Kɛlɛ bɔlɔ gɛ bagɛ tɔɖɔ kɛpɔtɛ nɛ bɔlɔ amɛ butsé nɛ̀ Apaleteɛ tɛdadalɛ, betsyina bɔlɔ akpɛ yɛ tɛzazã mɛ, nɛ̀ tɛdadalɛ gɛikpè tɔɖɔ, gɛide Apaleteɛ ɔkɔ, anɔ gɛenu Ɔfɔfuĩa nɔ ɔkɔɔ.