Korintoanɛ 2 2 - Nyangbo New Testament

¹ Kliso ɛbhɛtɛ mɛ ekpeɖekpeɖe mɛ sɛ ɛzaka ba wɔnɔ ɔbha nɛ ishumɛ pɔpɔɛ mɛ.

² Ɔmɔsɛ onupɛ ɛkpɛ wɔnɔ ɔmɔpɔɛ nɔ, afana gɛ alɛ pɛ abakɔ mɛmɔ same ɔdɛ wɔnɔ bagɛ ɛkpɛ ɔmɔpɔɛ nɛ wɔnɔ shuɔ dza?

³ Ɛfɔnɔ keplukpa asɛ kana gɛ ɛbhɛtɛ sɛ onupɛ ɛbaa, ɛtɛba nyɔnɔ awɔ nɛ bagɛ kɛlɛ sɛ bakpɛ mɛ sameɛ shu. Ɛyɛkɛ wɔnɔ petee abha ŋã, sɛ wɔnɔ nyɔ̃ɔ wɔnɔ ɔbɔmɔ samè ɔplɛnɛ mɛ.

⁴ Ɔmɔsɛ ɔwɔ̃nyɔnɔ gbagbla, kibui tɔtɔɖɔ anɔ abha nɛ̀ ɛwɔmɛ mɛ̀ mɛlɔkɔ fɔnɔ ebui alɛ kɔ wɔnɔ nɔ, gɛnɛ sɛ tɛ ɛkpɛ wɔnɔ ɔmɔpɔɛ nɔ, pɔ tɛ nɔmɔ mɛ tɛdɛdɛmɛ nɔ gbagbla ɔkɔ wɔnɔ.

Tɛlɔlɔkɔ Tsye Kibui kpa Bhɛbhɛtɛ Elete

⁵ Onupɛ anɔ teli amana ɔmɔpɔɛ nɔ, agɛ kpɛ mɛ ɔmɔpɔɛ asɛ kana gɛ akpɛ wɔnɔ petee ɔmɔpɔɛ nɔ, nɛ kidzo tili abhaa, ɛgɛ pɛ sɛ tɛ mɛvɛ kɛlɛ abha faanɔ.

⁶ Batɔ pɔpɔ gɛ banɔ kpekpèɛ atɛpɔ̃ kɔɛ nɔ ekpè akɔɛ.

⁷ Pɔ otsiɛnɔ, kɛlɛ sɛ tɛ nɔlɔkɔ otsye yɛ tɛ nɔyɔ yɛishu mɛ, sɛ tɛ ɔwɔ̃nyɔnɔ gbagbla ɔtɛbɔ ŋã yɛabha.

⁸ Kliso ɛkpalà wɔnɔ sɛ tɛ nɔkɔ wɔnɔ tɛdɛdɛmɛ nɔ ɔkɔɛ kpè tɔɖɔ.

⁹ Kibui nɔnɔ shu so pɛ ɛfɔnɔ kibui ɛlɛ kɔ wɔnɔ kɛlɛinu ɔsɛ tɛ̀ mɛiɖi sɛ nɔbɔ làzã tifefekeɖiɛ ulũ pɛ nobolũ batɔ̃ nɛ kɛka nyia ka mɛ dza.

¹⁰ Onupɛ nɔlɔkɔ tsye anɔ teliɛ, kɛlɛ mɛtsyɛ lɔkɔ tsye yɛ. Kɛlɛ kibui nɔnɔ gɛ ɛlɔkɔ tsyeɛ, onupɛ edzi asɛ kibui tili lɛ sɛ balɔkɔ etsye tsyɛ elo, ɛlɔkɔ kɛlɛ itsye nɛ Kristo amɛ nɛ wɔnɔ kɛtakpu so,

¹¹ sɛ tɛ Satana atɛ bàwɔɛ wɔnɔ. Ɔmɔsɛ butinyi kɛgɛ yɛatɔɖɔɔ.

Bagɛ Bawɔaxɔ̃ɛ Kɔ Olugbũnyanyã Vɔvɔɔ

¹² Kibeɛ gɛ ɛvɛ Troa tɛ mɛdɛɖɔ kibuiɛ nɛ Yesu shu pɛ ɛmɔ sɛ Apaleteɛ adalɛ kedulũ tieli akɔ mɛɛ,

¹³ mɛ ekpeɖekpeɖe mɛ agɛzã dɔ akɔ mɛ, ɔmɔsɛ ɛgɛ dɛ mɔ mɛadzya Tito nɛ ɛkɛlɛ. Kliso ibisi kidzo nɛ balɛ ɔkɔ pɛ ɛshɛ vɛ Makedonia.

¹⁴ Pɔ ahɔɛhuhu yɛenu Owusoso Akaa ayɛ, anɔ gɛ agbana bɔlɔ kibe nyia be sɛ tɛ bɔŋã kabha nɛ Kristo mɛ, kɛlɛ gana bɔlɔ abhaa yɛ bubutì kɛlɛɛ huhuhuɔ fu vɛ ɔkɔ nyia ɔkɔ.

¹⁵ Ɔmɔsɛ bɔlɛinu Kristo yɛ tɛlɔlɔ̃ huhuhuɔ ɔkɔ Owusoso Akaa asɛ nɛ bagɛ bayɛkɛ elu nɛkpã nɛ̀ bagɛ balɛ atɔwuiɛ ayala nɛishi ana.

¹⁶ Nɛ anɔ teliɛ amɛɛ, bɔlɛinu tɛlɔlɔ̃ gɛ mana butsí, kɛlɛ banɔ teli tsyɛ tɛlɔlɔ̃ ɛlɛ dzì ɛkpã ɔkɔ balɛ. Afana gɛ ashɔnɔ pɛ abalà kɛxɔ̃ɛ ɛlɛ awɔa?

¹⁷ Asɛ gɛ beteli abhɛtɛɛ, bɔlɔ xɔnɔɔ, bɔtɛwɔa Owusoso Akaa nɛxɔ̃ɛ tɛ̀ bɔlɔkɔ pɛ bɔdɔ̃ nɔ. Nɛ kidzo bhlatɔ abhaa, bɔɖɔ kibui gbã nɛ Kristo mɛ nɛ̀ Owusoso Akaa namɛ, asɛ banɔ gɛ bakpɛ odenɔ Owusoso Akaa ɔkɔ ana.