Korintoanɛ 2 13 - Nyangbo New Testament

Titsetseɖenɔ Gɔgɔɛ Nɔ

¹ Kɛlɛ badzi bɔtramɛ gɛ ɛba wɔnɔ ɔbha. “Nɛ kibui ka nyia ka tɛyɛyɛkɛ mɛɛ, kɛlɛ sɛ banɔ taabha alo tata aɖɔaɖɔ adalɛ kɛlɛ shu flogo.”

² Ɛti tseɖe nɛ̀ wɔnɔ bafala nɔ nɛ kibeɛ gɛ ɛba wɔnɔ ɔkɔ bɔbhalà. Ɛka wlui ɖɔ ɛlɛ nɛ kibeɛ gɛ ɛma wɔnɔ ɔbha. Onupɛ itsyina ba, ɛtɛba bi bagɛ abhɛtɛ ebui kpa bafala nɔ nɛ̀ bagɔgɔɛ tsyɛ ashagabui,

³ gɛ nɔpɛ ɔsɛ oti kɛgbã sɛ Kristo aɖɔaɖɔ ɔgana mɛabha. Kristo egi botso nɛ kɛnanà bhɛbhɛtɛ nɛ wɔnɔ, pɔ ohumi ɔlɛ yɛahɔɛ nɛ wɔnɔɛshi.

⁴ Tɛ kɛzã tititì mɛ, bakpalɛ yɛ nɛ butsi osi shu nɛ tibobotsò mɛ, pɔ alɛ nɛkpã nɛ Owusoso Akaa ohumi mɛ. Kidzo ɛlɛ nabha bɔlɔ tsyɛ bubotso nɛ yɛ mɛ, pɔ nɛ Owusoso Akaa ohumi mɛ bɔbàza plɛni tɛ bɔdɛ axɔ̃ɛ kɔ wɔnɔ.

⁵ Nɔvɛ wɔnɔ ishumɛ oɖi sɛ nɔlɛ wɔnɔ tɛyɛyɛkɛŋã mɛ dza, nɔ ofeke wɔnɔ ishu oɖi. Nɔtɛɔ mɔ ɛlɛ ɔsɛ Yesu Kristo akpasɛ wɔnɔ mɛ, pɛnɔsɛ nofeke wɔnɔ shu oɖi pɛ nɔmɔ ɔsɛ nɔgɛ naa dza?

⁶ Kɛlɛ ɛyɛkɛ ŋã sɛ nɔmɔ ɛlɛ ɔsɛ bɔŋã kabha nɛ tifefekeɖiɛ mɛ.

⁷ Otsi nɔ bukulu Owusoso Akaa sɛ nɔtɛ bɔbhɛtɛ kibui kpa nanà. Gɛnɛ gɛ banɔ abamɔ̃ asɛ bɔŋã kabha nɛ tifefekeɖiɛ mɛ so, pɔ sɛ tɛ nɔbhɛtɛ kibui nɔnɔ gɛpɛ̃ onupɛ edzi asɛ bɔgɛ ŋã kabha tsyɛ.

⁸ Ɔmɔsɛ bɔtɛ balà bhɛtɛ kibui nanà gɛlɔ kititi nɛ kibuiɛ gɛlɛ ɛlɛ ɔzãkɔ shu, pɔ kɛgɛ lɛ ɛlɛ ɔzãkɔ ete.

⁹ Same eku ɔlɔ gɛ onupɛ bubotsoɔ, pɔ wɔnɔ xɔnɔ ɔgagalĩ, kɛlɛ bɔlɔ Owusoso Akaa tikukulu lɛ ɔkɔ wɔnɔ tɛpɛpɛ̃.

¹⁰ Kibui ɛlɛ shu so pɛ ɛfɔnɔ ebui alɛ kɔ wɔnɔ nɛ kibeɛ gɛ ɛma wɔnɔ ɔbha, sɛ tɛ onupɛ ɛbaa, ɛtɛba lɔkɔ ɔsha tũ kibui kpɛ kɔ wɔnɔ nɔ, ɔsha gɛ Apaleteɛ akɔ mɛ asɛ tɛ ɛlɔkɔ bhɔ wɔnɔ wunɔ kabha nɔ, gɛnɛ tɛ ɛlɔkɔ ɔlɛ zhini wɔnɔ kpɛ kesi nɔ.

Bɔdɔ̃ Sɛsɛnɔ Gɔgɔɛ Nɔ

¹¹ Otsi alɛ mɛ adzya alɛ, ɛshɛ mɔ̃ o. Nɔoɖi kɛgɛ bakɔ nɔbɔ pɛ ɔtɔɖɔ ɔkɔ, nɔolũ mɛibuiɛ gɛ ibisi denɔ wɔnɔ ɔkɔ, nɔzã ekpeɖekpeɖe tenikpo mɛ, nɔzã ishu yɔyɔ mɛ. Kɛlɛ Owusoso Akaa gɛ alɛ ɔkɔ tɛdɛdɛmɛ nɔ nɛ̀ ishu yɔyɔ mɛɛ abazã plɛnɔ wɔnɔ.

¹² Nɔsɛnɔ bagɔlɔ nɛ ahɔɛ kpɛkpɛ nɛ bagɔlɔ oli gɛ adalɛ.

¹³ Kristoanɛ petee asɛnɛ ɔnɔ asɛsɛ.

¹⁴ Tɛ̀ Apalete Yesu Kristo tibhui bhuibuɔ, Owusoso Akaa tɛdɛdɛmɛ nɔ, nɛ̀ ɔhakpɛkpɛ nɛ̀ Ɔfɔfuĩa Gbangbã ɔzã ɔplɛnɔ ɔnɔ petee.