Korintoanɛ 2 11 - Nyangbo New TestamentPaulo Nɛ̀ Asɛnɛ Anɔkpɛkpɛ 1 Iɖi kidzo mɛ sɛ nɔbɔ kpɛ kemì nɛ mɛ bɔgadɔdɔ ɔlɛ shu kɛbɔɛ, pɔ nɔvɛlɔ bhɛtɛ ɛlɛ. 2 Ɛlɔkɔ Owusoso Akaa mɛ tɛzazã wɔlãkɛ kabhã nɛ wɔnɔ shu. Ɛtɔɖɔ ɛlɛ lu kɔ wɔnɔ sɛ nɔzanà anyɛ tenikpo gɛenu Kristoɔ, sɛ tɛ ɛlɔkɔ wɔnɔ kpɛ ahɔɛ kɔɛ asɛ adzɛ gɛ etinyi anyɛ ana. 3 Pɔ kifu yimɛ sɛ asɛ kana gɛ eblidzya alɔkɔ bɔshɛ edzo awɔɛ Eva nɔ, babà tsyina wɔnɔ tsyɛ ekpeɖekpeɖe mɛ ashɛnɛ nɛ wɔnɔ kibui gbangbã tɛbhɛbhɛtɛ nɛ̀ wɔnɔ ishu tɛlɔlɔkɔ ɔkɔ Kristoɔ shu. 4 Ɔmɔsɛ onupɛ anɔ teli aba wɔnɔ ɔkɔ pɛ abaɖɔ kibui nɛ Yesu teli shu ɔdɛ agɛ yɛ shu bɔɖɔ kaɖɔɔ, alo onupɛ nɔyɛkɛ ɔfɔfuĩa bhlatɔ ɔdɛ ɔgɛ ɔlɛ nɔtɛyɛkɛ shuɔ, alo kibui gbangbã bhlatɔ gɛ kɛgã ɔtɔ denɔ kɛgɛ kɛlɛ nɔtɛ yɛkɛ shuɔ, kɛlɛ notsyina tsiɔ̃ faanɔ. 5 Pɔ batɛbà lɔkɔ mɔzãkɔ ɔlɔ ashɔnɔ bagɛ nokulù ɔsɛ “Banɔkpɛkpɛ alɛ gɛ balɛ ɔzãkɔ ɔɖama.” 6 Itinu anɔ gɛ kpasɛ kaɖɔ ɖɔɖɔ piapii, pɔ kibuititì xɔnɔ lɛ mɛahɔɛ. Bɔkɔ sɛ kibui ɛlɛmɛ dalɛ̃ kɔ wɔnɔ piapii nɛ kidzo ka nyia ka abha. 7 Kibui kpa kinu ɔkɔ mɛ ɔsɛ tɛ̀ izhinì mɛishu esi tɛ ɛbhɛtɛ wɔnɔ nowu kabha ɔganà Owusoso Akaa kibuiɛ gbangbã tɛɖɔɖɔ otseɖe wɔnɔ kɛbhɛ mabuia mabuia mɛ dza? 8 Gana tɛpɛplɛnɔ gɛ ɛyɛkɛ denɔ ɔhaa bhlatɔ mɛɛ ɛlɔkɔ ba plɛnɔ wɔnɔ nɔ. 9 Kɛlɛ kibeɛ gɛ ɛzã wɔnɔ ɔbha pɛ ɛzɛpɛ kɛdɔ̃ tiliɛ, igidzi bɔtɔ ɔkɔ ananà, ɔmɔsɛ badzya gɛede Makedonia nɔ bakɔ mɛ mɛɔdɔ̃ pɛpɛ nɔ. Ɛgɛpɛ sɛ tɛ mɛidzì bɔtɔ ɔkɔ wɔnɔ nɛ kidzo nanà abha, kɛlɛ ɛbazã kɛlɛ abha zɛbhɛtɛ ana. 10 Gɛ kibui gbã Kristo kibui gɛlɛ ɛlɛ ɔzãkɔ kpasɛ mɛmɛ soɔ, anɔ ka nyia ka gɛede Axaya bɔdɔ̃ mɛ atɛ balà aɖɔ asɛ kibuiɛ gɛ itũ ahɔɛ nɛ mɛitelũɔ ɖɔ ma ɛlɛ mɛ. 11 Kiɖe so? Pɛnɔsɛ ɛgɛ dɛmɛ nɛ wɔnɔ ibui soɔ dza? Owusoso Akaa xɔnɔ enyi asɛ ɛdɛmɛ wɔnɔɛ ibui! 12 Kɛlɛ ɛbazã ɛlɛ abha zɛbhɛtɛ kɛgɛ ɛlɛ mɛbhɛtɛɛ, ɔsɛ tɛ̀ mɛibu bagɛ bapɛ kidzo asɛ tɛ̀ balɛ nɛ bɔlɔ shɔ nɛ ebuiɛ gɛ alɛ shu butũ ahɔɛ nɛ ɔlɔ ɛtelũɔ yinɔ. 13 Ɔmɔsɛ banyɛ alɛ nɛidi enu basɛnɛ Kristo banɔkpɛkpɛ, baxɔ̃ɛwɔa gɛ bawɔɛ banɔ, gɛ babhɛtɛ balɛishu asɛ Kristo yɛanɔkpɛkpɛ benu ana. 14 Kɛlɛ kɛgɛ bhɛtɛ kibi, ɔmɔsɛ Satana tsyɛ abhɛtɛ̀ yɛishu asɛ axɔ̃ɛdɛ dadalɛ ana. 15 Klisoɔ kɛgɛ bhɛtɛ ibì gɛ onupɛ yɛaxɔ̃ɛdɛ abhɛtɛ balɛishu asɛ baxɔ̃ɛdɛ gbangbã ana. Babà yɛkɛ kɛgɛ shɔnɔ asɛ bayɛkɛ nɛ balɛ axɔ̃ɛdɛdɛ alɛ niede. Paulo Etũ Ahɔɛ Yɛetelũ Nɛ Yɛɔtɔ Shu 16 Ɛkaɖɔ sɛ, Ananà atɛ lɔkɔ mɛasɛ awɔaga mɛinu. Pɔ onupɛ nɔbhɛtɛ ɛlɛ ana, kɛlɛ nɔyɛkɛ mɛ asɛ gɛ nɔbɔbhɛtɛ ɔkɔ awɔaga ana, sɛ tɛ ɛlà tũ ahɔɛ mɛitelũɔ kɛbɔɛ. 17 Nɛ ishu abha ɛlɛ gɛ ɛyɛkɛŋã nɛ mɛitelũɔ gɛ itũ shuɔ, ɛtɛɖɔ kaɖɔ asɛ gɛ Apaleteɛ abaɖɔ, pɔ asɛ awɔaga ana. 18 Gɛ banɔ kpekpèɛ etũ ahɔɛ nɛetelũ asɛ kanɔ mɛ elete ana soɔ, mɛtsyɛ batũ ahɔɛ nɛ mɛitelũ. 19 Nɔlɔkɔ same ɔzã plɛnɔ bawɔaga ɔmɔsɛ bebutinɛ nonu so! 20 Nɛ kibui gbã mɛɛ, nɔzã ɔplɛnɔ bagɛ abhɛtɛ wɔnɔ asɛ banɔ dzidziɛ kura tsyɛ, pɛ bedzyinì wɔnɔkpɛ alo pɛ bamɔ̃ kidzo nɛ wɔnɔ shu so, alo pɛ bafala eputɔ pɛ amanà wɔnɔ kɛdɔ nɛ bamɛ. 21 Kiwũi kinu ɔkɔ mɛ tɛ ɛdɛmɛ tɔɖɔ ɛlɛ abha sɛ buzhi esi ana popopo! Kibui ka nyia ka gɛ anɔ teli alà etũ ahɔɛ etelũ akɔɔ, mɛxɔnɔ ɖɔ ɛlɛ asɛ awɔaga ana, mɛtsyɛ balà tũ kitelũ nɛlɛ shu. 22 Anɛ Yudaeyi benuɔ dza? Yudaeyi mɛtsyɛ inu. Anɛ Israelanɛ benuɔ dza? Israeleyi mɛtsyɛ inu. Anɛ Abraham yɛeshui alɛ benuɔ dza? Abraham Yɛeshui mɛtsyɛ inu. 23 Kristo yɛaxɔ̃ɛdɛ benuɔ dza? (Ɛɖɔ kaɖɔ asɛ kɛtakpu tsitsí elete ana.) pɔ igbogblo dɛ alɛ. Ɛwɔa axɔ̃ɛ gagalĩ ɔdɛ balɛ, ɛzã ɛɖa buvũ mɛ gelee ɔdɛ balɛ, behuisi mɛ ɖɔtɔɖɔtɔ dɛ balɛ, kɛlɛ ɛzakɔ butsi kibe nyia be. 24 Buhuisi titì behuisi mɛ gɛ ɛyɛkɛ bushi afɛata nɛ̀ tuzhita odenɔ Yudanɛ ahɔɛ mɛ. 25 Buhuisi tɛtà behuisi mɛ nɛ̀ ɔɖaɛshi, bututinikpo behu mɛ aklagbu, bɔyɛɛ tɛtà kelĩabha ohu ɔyɛɛ nɛ mɛ, ɛzã aƒu nabha kiwui tinikpo nɛ̀ elishi tenikpo, 26 ɛzã kidzo gagã abha kibe nyia be. Ɛzã butsi nɛ ɛkpã ishi, odenɔ bulĩukekpù mɛ, banɔ kpa, ɛzã butsi nɛ̀ ɛkpã ishi odenɔ mɛahɔɛ banɔ nɔ tɛhɔɛ mɛ, nɛ̀ bagɛ betinu Yudanɛ tsyɛ tɛhɔɛ mɛ, ɛzã butsi nɛ̀ ɛkpã ishi odenɔ ɔma gbagbla mɛ, nɛ̀ bayàa mɛ, nɛ aƒu nabha, nɛ̀ badzya gɛenu basɛnɛ elete mɛ. 27 Ɛwɔa axɔ̃ɛ gagalĩ, kɛlɛ ɛmɔ bɔtɔ, kɛlɛ ɛzɛ gbã tɛwɔnɔ̃, ɛzanà bɔbhɛ nɛ̀ oluwɔɛ, kɛlɛ ɛzɛ fala kɛdɔ̃ maŋamaŋã, bɔbɔlɔ ziyi mɛ kɛlɛ ɛzã kɛdɔ̃ makpɛ makpɛ. 28 Nɛ alɛ petee edeɛ, ɔhaa ebuiɛ akɔ ɛgɛzɛ mɔ ɔhɔɛ nanà. 29 Afana gɛ ebotsò pɛ mɛ xɔnɔ gɛibotsoɔ dza? Afana bagbana akpɛ kibui kpa mɛ pɛ kɛtɛ pɔɛ mɛishuɔ mɛɛ dza? 30 Onupɛ kɛlɛ ɔsɛ itũ ahɔɛ nɛ mɛitelũɔ, ɛbatũ ahɔɛ nɛitélũ nɛ ebuiɛ gɛ akasɛ ɔsɛ ibotsoɔ shu. 31 Owusoso Akaa gɛenu Akaa ɔkɔ Apalete Yesuɔ, agɛ yɛ kɛlɛ ɔsɛ bakpɛ yɛinye nɛitití tihɔɔ nɔ enyi ɔsɛ ɛtɛ sɛ asɛnɛ. 32 Nɛ Damasko, kɛmadi ekusiɛ gɛ akpasɛ ekusi gbagbla Aretas esiɛ akɔ sɛ bazãepo Damasene ɔmagbagbla sɛ tɛ bevũ mɛ so. 33 Pɔ balɔkɔ mɛ akpɛ kashɔ mɛ pɛ bezhinì mɛ aganà kedulũ bhlui nɔ gɛ akpasɛ kigiliɛ mɛ. |
© (Active), Ghana Institute of Linguistics, Literacy and Bible Translation. All rights reserved.