Korintoanɛ 2 10 - Nyangbo New Testament

Paulo Awlɔ̃akɛ Yɛaxɔ̃ɛ Wɔawɔa Nɛtakpu

¹ Gana mɛishu esi zhizhinɔ nɛ Kristo mɛɛ, ibisi ɛlɛ denɔ wɔnɔ ahɔɛ mɛ, mɛ Paulo ɛbhɛtɛ ebui asɛ “anɔ gɛ esi kifú” nɛ wɔnɔ bamɛ pɔ ɛkpɛ kité gɛ onupɛ ɛlɛ kitsí nɛ wɔnɔ ɔbha.

² Ɛkɔ wɔnɔ kɛtakpu sɛ onupɛ ɛbaa, ɛtɛ pɛ sɛ tɛ̀ ibú mɛishu kasɛ wɔnɔ asɛ anɔ gɛ etisì kifù tɛ ɛyɛkɛ̀ mɛishu abha ŋã. Pɔ abhɛtɛ wɔnɔ mɛayɛmɛ teli asɛ kanɔ alɛ mɛ bubùti bɔlɔkɔ bhɛtɛ̀ ebuiɛ nɔ.

³ Gɛ kanɔ nɔ̀ mɛ bɔlɛ tsyɛ elo, bɔtɛ lɔkɔ keyù asɛ kana gɛ kanɔ nɔ̀ mɛ anɛ abhɛtɛ̀ɛ.

⁴ Keyuta ɔdɔ̃ gɛ bɔɔtà keyuɔ nɔɔ butinu kanɔ mɛ keyuta ɔdɔ̃. Nɛ kidzo bhlatɔ abhaa, ɔfɔfuĩa mɛ ohumi ɔlɛ balɛ ahɔɛ ɔsɛ tɛ balɔkɔ ayɛɛ ɔfɔfuĩa mɛ ebui gagalĩ nɔ.

⁵ Butũ ɔtsɛɖɛ kpɛ kawlɔ̃akɛ nɛ̀ asɛnɛ ebuiɛ gɛ alɔɛtití nɛ Owusoso Akaa yɛubutiɛ shuɔ mɛ. Kɛlɛ bɔŋã ekpeɖekpeɖe nɔnɔ gɛ atɛakɔ pɛ bɔbàlũ atɔ̃ ɔkɔ Kristoɔ nabha.

⁶ Kliso bɔbazã nɛ̀ awɔ sɛ tɛ bɔpɔ̃ batɔ̃ ɔkɔ batɔ̃mɛ gagalĩ ebui bhɛbhɛtɛ ka nyia ka ɛdi, gɛ onupɛ wɔnɔ batɔ̃lulũ aba anaa.

⁷ Wɔnɔ xɔnɔ kabha ebuiɛ ete nooɖì. Onupɛ anɔ teli ayɛkɛ yɛishu abha aŋã sɛ enu Kristoɔ ayɛ, ewlui eɖi kɛlɛ mɛ tɛ̀ amɔ asɛ bɔlɔ tsyɛ lɛ Kristo mɛ asɛ kɛlɛ gɛ alɛ ana.

⁸ Onupɛ itũ ahɔɛ itelũ nɛ ohumi nɔ gɛ Apaleteɛ akɔ bɔlɔ gɛ bɔlɔkɔ bhɔ wɔnɔ wunɔ kabha ɔdɛ sɛ tɛ buzhini wɔnɔ esiɛ, kiwũi tɛba yimɛ nɛ ɛlɛ shu.

⁹ Ɛgɛ pɛ sɛ tɛ abhɛtɛ asɛ ɛkpɛ wɔnɔ kifù nɛ̀ mɛ buplukpaa.

¹⁰ Ɔmɔsɛ beteli aɖɔ asɛ, “Bupù kpasɛ yɛ buplukpa mɛ kɛlɛ butũ kibui ɔkpɛ banɔ ulũ, pɔ nɛ yɛɔkɔɔ xɔnɔ atɛ akpɛ̀ banɔ kemi kɛlɛ yɛebuiɖɔɖɔ tsyɛ atɛ avɛ ɔkɔ nanà.”

¹¹ Kɛlɛ sɛ banɔ alɛ nɛidi etì asɛ ebui nɔnɔ gɛ bɔɖɔ nɛ bɔlɔ buplukpa mɛ gɛ onupɛ bɔmaa ɛkɛlɛ, bɔbà bhɛtɛ̀ alɛ abha gɛ onupɛ bɔlɛ wɔnɔ ɔbhaa.

¹² Bɔtɛ pɛ sɛ tɛ̀ lɔkɔ bɔlɔshu shɔnɔ beeteli gɛ bakpɛ balɛishu nɛitití ana. Onupɛ balɔkɔ balɛishu asɛ banɔ gbagbla pɛ balɔkɔ balɛishu ashɔnɔ ishuɔ, betinu bebutinɛ.

¹³ Bɔlɔ xɔnɔɔ, tɛbàtũ ahɔɛ nɛ etelũ falanɔ kifú, bɔbà lɔkɔ etelũɔ gɛ butũɔ kpɛ kɛxɔ̃ɛ nɔnɔ gɛ Owusoso Akaa akpɛ ahɔɛ akɔ bɔlɔ mɛ, axɔ̃ɛ wɔawɔa gɛ leku wɔnɔ kɔɔ tsyɛ.

¹⁴ Bɔtɛbà tũ etelũ falanɔ kifú faanɔ, asɛ gɛ kɛbà ba ɛlɛ mɛ gɛ onupɛ bɔgɛ ba wɔnɔ ɔbha ana, ɔmɔsɛ bɔlɔ lɔkɔ Kristo kibui gbangbã mana wɔnɔ.

¹⁵ Buti tũ ahɔɛ bɔlɔ etelũ falanɔ kifù faanɔ nɛ kɛxɔ̃ɛ gɛ banɔ bhlatɔ awɔa shu. Kɛgɛ buɖi kidzo mɛ kɔ kɛlɛinu ɔsɛ, kibeɛ gɛ wɔnɔ tɛyɛyɛkɛŋã bakpe tɔɖɔɔ, bɔlɔ axɔ̃ɛ wɔawɔa nɛ wɔnɔɛishiɛ tsyɛ banɛɛ tɔɖɔ.

¹⁶ Sɛ tɛ bɔla ɖɔ Owusoso Akaa nɛibuiɛ nɛ busiakpa gɛ lɛ wɔnɔ kede ɔkɔ ɔlɛ. Ɔmɔsɛ bɔtɛpɛ sɛ tɛ butũ ahɔɛ etelũ nɛ axɔ̃ɛ nɔnɔ gɛ banɔ bhlatɔ awɔa nɛ busiakpa bhlatɔ abha.

¹⁷ Pɔ “Anunɔ gɛ apɛ asɛ tɛ etũ ahɔɛ nɛ etelũɔ, etũ ahɔɛ etelũ nɛ Apaleteɛ mɛ.”

¹⁸ Ɔmɔsɛ gɛnɛ anunɔ gɛ aɖɔaɖɔ akpɛ yɛishu nɛititíɛ yɛabha batɔɖɔ ahɔɛ, pɔ anunɔ gɛ Apaleteɛ aɖɔaɖɔ nɛishuɔ.