Korintoanɛ 2 1 - Nyangbo New Testament

¹ Paulo gɛedzi anɔkpɛkpɛ akɔ Yesu Kristo nɛ Owusoso Akaa tɛpɛpɛ ulũɔ, nɛ̀ Timoteo gɛenu bɔlɔ adzyaa, Mɛ sɛsɛ Korintoanɛ ɔhaa keplukpa alɛ ɔlɔkɔ plɛnɔ bagɛ bayɛkɛ aŋã nɛ Axaya petee asɛ,

² Tibhui bhuibu nɛ̀ ishu yɔyɔ ode Owusoso Akaa nɛ̀ Apalete Yesu Kristo ɔkɔ kɔ wɔnɔ.

Owusoso Akaa gɛ Ayɔ Banɔ Nyɔɔ Ishumɛ

³ Nɔkpɛ Owusoso Akaa gɛenu Apalete Yesu Yɛakaa nɛinye nɛitití, Akaa gɛ ebi ashagabui nɛ̀ Owusoso Akaa gɛ ayɔ banɔ nyɔ̃ɔ ishumɛ,

⁴ anɔ gɛ yɛayɔ bɔlɔ ishumɛ odenɔ bɔlɔ bɔtɔ petee gɛ bɔmɔ mɛ, sɛ tɛ bɔlɔ tsyɛ lɔkɔ ishumɛ yɔyɔ gɛ bɔmɔ denɔ Owusoso Akaa ɔkɔ yɔ ishumɛ ɔkɔ bagɛ bamɔ bɔtɔ.

⁵ Kɛba gɛ Kristo yɛ bɔtɔ ba bɔlɔ ɛkpã mɛɛ, kidzo ɛlɛ nabha gana Kristo abhaa, ishumɛ yɔyɔ ɔkɔ bɔlɔ yuku balɛ.

⁶ Onupɛ kibui tɔɖɔ bɔlɔ abhaa, kinu wɔnɔ ishumɛ yɔyɔ nɛ̀ tibubú, onupɛ bayɔ bɔlɔ kitúɔ mɛɛ, wɔnɔ bayɔ kitúɔ mɛ akɔ, gɛ kɛmana tɛdɔdɔ fɔ̃ɔ, kemikpɛkpɛ odenɔ bɔtɔ tunikpo ɔlɛ gɛ bɔtɔ mɛ.

⁷ Bɔlɔ kidzo mɛ ɖiɖi ɔkɔ wɔnɔ ɔlɛ gagalĩ, ɔmɔsɛ bunyi sɛ kana gɛ nɔmɔ bɔtɔ ɔplɛnɔ bɔlɔɔ, kidzo ɛlɛ nabha nɔmɔ ishumɛ yɔyɔ tsyɛ ɔplɛnɔ bɔlɔ.

⁸ Mɛadzya alɛ mɔ, bɔpɛ sɛ nɔotì ebui alɛ, nɛ bɔtɔ gɛ bɔmɔ nɛ Asia bɔdɔ̃ mɛ shu. Bɔgã bɔtɔ gbagbla tuli mɛ gɛ fala bɔlɔ kemikpɛkpɛ, gɛ kɛkɔ ɔsɛ ɛkpã zazãna batɔ̀ bɔlɔ.

⁹ Kibui gbã, nɛ bɔlɔ etúɔ mɛɛ, bɔmɔ ɛlɛ asɛ butsí bɔtsyɔa bebhui akɔ ɔlɔ. Pɔ kɛba ɛlɛ mɛ ana ɔsɛ tɛ̀ butì sɛ bɔtɛ balà ishu ahɔɛ mɛ zã ɔdɛ Owusoso Akaa ahɔɛ mɛ, agɛ yɛakɔ bekpuɔ alɔ edenɔ bekpù mɛ.

¹⁰ Ebú bɔlɔ odenɔ butsí ɛlɛ nɛidì mɛ̀, kɛlɛ ezebè bu ɔlɔ. Yɛabha bulu awɔ̃ sɛ abàzã kɛlɛ abha pɛ ebebu bɔlɔ,

¹¹ asɛ gɛ nɔplɛnɔ bɔlɔ nɛ wɔnɔ Owusoso Akaa tikukulu mɛ̀ ana. Kɛlɛ́ banɔ kpekpè ebehu ahɔɛ nɛ bɔlɔ kɛtakpu nɛ tibhui bhuibu gbangbã gɛ ebhui bɔlɔ ebuɔ nɛ banɔ kpekpèɛ gɛ bekulu Owusoso Akaa nɛ bɔlɔ kɛtakpu so.

Paulo Etsyina Yɛibui Tɔtɔɖɔ

¹² Pɔ otsiɛ nɔ butũ kitélũ ɔsɛ, bɔlɔ kitú mɛ ebui etseɖe bɔlɔ ɔsɛ bɔnyãna bɔlɔ shu piapii nɛ kanɔ nɔ̀ mɛ, asɛ kana gɛ bɔkpɛ ɔha nɛ̀ wɔnɔ, nɛ tɛdadalɛ kibui gɛlɛ kɛlɛ ɔzãkɔ tɛɖɔɖɔ kide Owusoso Akaa ɔkɔ. Gɛnɛ kesiakpa abha bubutì bɔlɔkɔ bhɛtɛ ebui alɛ nɔ, pɔ nɛ Owusoso Akaa tibhui bhuibu mɛ boŋ.

¹³ Ɔmɔsɛ bɔtɛ fɔnɔ kibui nɔnɔ gɛ nɔtɛ bɔlà ɔkalàa, alo pɛ nɔtɛ bɔlà kɛlɛ esi ulũɔ ɔsɛsɛ ɔnɔ. Kɛlɛ ɛyɛkɛŋã ɔsɛ,

¹⁴ asɛ kana gɛ nɔolũ ɔlɔ esi nɛ ebuiɛ teli mɛɛ, nobolũ alɛ petee esi pɛ nobotũ etelũ nɛ bɔlɔ ɛtakpu asɛ kanà gɛ bɔlɔ tsyɛ tũ etelũ nɛ Apalete Yesu kiwuiɛ nabha.

¹⁵ Kliso ɛyɛkɛ kɛlɛ abha ɔŋã, ɛtɔɖɔ ɛlɛ sɛ tɛ ɛbaɖí wɔnɔ putɔnɔ sɛ tɛ nɔmɔ ebui gbangbã taabha odenɔ kɛlɛ mɛ.

¹⁶ Ɛtɔɖɔ kɛlɛ sɛ tɛ ɛbaɖí wɔnɔ nɛ kibeɛ gɛ ɛvɛ Makedonia nɔ, tɛ mitsodzi bà wɔnɔ ɔbha gɛ ide Makedonia nɔ baa, tɛ nɔkpɛ mɛidzo mɛvɛ Yudea.

¹⁷ Kibeɛ gɛ ɛtɔɖɔ kibui ɛlɛ, kibui ete mɛtɔɖɔ dza? Pɛnɔsɛ ɛbhɛtɛ tɛtɔtɔɖɔ ɛlɛ asɛ kanɔ mɛ anɔ ana gɛ aɖɔ asɛ “Ee, ee,” pɛnɔsɛ “Oo, oo nɔɔ dza”?

¹⁸ Pɔ asɛ kana gɛ Owusoso Akaa aɖɔ kibui gbãa, kana bɔlɔ kibui ɖɔɖɔ ɔkɔ wɔnɔ tsyɛ itinu “Ee nɛ̀ Oo.”

¹⁹ Ɔmɔsɛ Owusoso Akaa Yɛeyi Yesu Kristoɔ gɛ yɛibui mɛ nɛ̀ Silvano nɛ̀ Timoteo bɔɖɔɔ tinu ɔsɛ “Ee” alo “Oo” pɔ odenɔ yɛmɛ, kibe nyia beɛ kɛka nyia ka lɛ ɔsɛ “Ee.”

²⁰ Kikpè gɛ Owusoso Akaa ebui ɖɔɖɔ luɔ zikpè kɔ ɔlɔ tsyɛ elo, lɛenu “Ee” nɛ Kristo mɛ. Kliso ɔgana yɛabhaa, bɔɖɔ “Amen” ɔkɔ Owusoso Akaa nɛinye shu tɛdadalɛ.

²¹ Otsi nɔ, Owusoso Akaa yɛabhɛtɛ ɔlɔ pɛ budzi gagalĩ nɛ Kristo mɛ. Asra bɔbɔ akɔ ɔlɔ,

²² alɔkɔ adadã gɛ akasɛ asɛ yayɛ bunuɔ adã bɔlɔ ulũ nɔ, kɛlɛ alɔkɔ yɛ Ɔfɔfuĩa nɔ akpɛ bɔlɔ etúɔ mɛ̀ asɛ kɛdɔ̃ gɛ alɔkɔ atɔɖɔ kɛklagbu nɛ kɛgɛ baba nabha.

²³ Ikulu Owusoso Akaa asɛ anɔ gɛ akpɛ abhalà akɔ mɛ, sɛ kitinu mɛ tɛpɛpɛ ɔsɛ ibhui wɔnɔ bho nɛ kibeɛ gɛ itsyina ba Korinto nɔ.

²⁴ Gɛnɛ sɛ buutũ kɛlɛ kpɛ wɔnɔ ulũ ɔsɛ nɔyɛkɛ ɔŋã, pɔ bɔwɔa axɔ̃ɛ plɛnɔ wɔnɔ ɔkɔ wɔnɔ samè mɔmɔ, ɔmɔsɛ tɛyɛyɛkɛŋã kɛlɛ bakɔ ɔsɛ tɛ nɔzã gagalĩ.