Korintoanɛ 1 9 - Nyangbo New Testament

Banɔkpɛkpɛ Ohumi Nɛ̀ Axɔ̃ɛdɛdɛ

¹ Itinu anɔ gɛ alɛ mɛishu ahɔɛ mɛɛ dza? Itinu anɔkpɛkpɛ dza? Ɛgɛ mɔ Yesu gɛenu bɔlɔ Apaleteɛ tsyɛ dza? Gɛnɛ wɔnɔ onu kɛdɔ̃ gidekoeyì nɛ mɛ axɔ̃ɛ wɔàwɔa nɛ Apaleteɛ mɛ dza?

² Onupɛ gɛnɛ anɔkpɛkpɛ mɛinu ɔkɔ babhlatɔ ete tsyɛɛ, inu anɔkpɛkpɛ kɔ wɔnɔ xɔnɔ! Ɔmɔsɛ wɔnɔ onu kɛdɔ̃ gɛ balɔkɔ adã nɛ anɔkpɛkpɛ kɛxɔ̃ɛ gidzì nɛ Apaleteɛ mɛ nulũ.

³ Bulũbubuɔ gɛ lɛ mɛahɔɛ ɔkɔ bagɛ azã kesi nɛ kebhu mɛ nimɛ nɛ alɛ.

⁴ Bɔgɛ mɔ kidzo sɛ tɛ̀ bɔŋã bɔdɔ̃ alo tɛ bɔwɔɛ bɔdɔ̃ dza?

⁵ Bɔgɛ mɔɛdzo sɛ tɛ̀ bɔgbanà bɔlɔ edzini nɔnɔ gɛ ayɛkɛ aŋã ovunɔ ɔplɛnɔ bɔlɔ asɛ kana gɛ banɔkpɛkpɛ gɔgɔɔ nɛ̀ Apaleteɛ yɛadza alɛ nɛ Kefa abhɛtɛɛ ɛlɛ dza?

⁶ Pɛnɔsɛ mɛ nɛ Barnaba ete kɛlɛ sɛ tɛ̀ bɔwɔa axɔ̃ɛ tɛ̀ bɔpɛ kɛŋaŋã ɔkɔ ishuɔ dza?

⁷ Keyuadɛ ɖuwoelu gɛ awɔa kɛxɔ̃ɛ pɛ azabuia kɛbhɛ akɔ ishu dza? Afana gɛ adɛ wain bɔyɛ pɛ atɛ aŋã yɛ eyuyuɔ dza? Afana gɛ elú ibhoshì pɛ atɛ awɔ̃ɛ ɛlɛ kɛmɔlĩɛ dza?

⁸ Ɛɖɔ ebui alɛ ete nɛ anɔdzyrame yɛɔdɔ mɔmɔ ulũ dza? Gɛnɛ alɛ nɛidi ɔshaa tsyɛ ɖɔ dza?

⁹ Bafɔnɔ ɛlɛ elú nɛ Mose ɔshaa mɛ, “Tɛnyã olugbũ ɔkɔ nɛntsyɔɛ enyè nɔnɔ gɛ ehuisi amɔ.” Nɛntsyɔɛ nyè bui kɛlɛ dzã kiwuhũ ɔdɛ Owusoso Akaa?

¹⁰ Kibui gbã bɔlɔ yɛaɖɔ ebui alɛ etseɖe? Kibui gbã, bɔlɔ bafɔnɔ ebui alɛ elú akɔ, ɔmɔsɛ onupɛ ayadɛ nɛ̀ agɛ yɛetù amɔ ebetu amɔ́ɔ, kɛlɛ ɔsɛ babhɛtɛ ana sɛ tɛ aka nyia aka amɔ ɔŋãkɔ nɛ kɛxɔ̃ɛ wɔawɔa mɛ.

¹¹ Onupɛ bɔɖa ɔfɔfuĩa mɛ eyí kpɛ wɔnɔ ɛshiɛ, gɛpɛ falanɔ kifu gɛ onupɛ bɔmɔ bɔdɔ̃ denɔ wɔnɔkɔ dza?

¹² Onupɛ bɔkɔ banɔ bhlatɔ amɔ tɛpɛplɛnɔ kidzo ɛlɛ nɛidi denɔ wɔnɔkɔ, kɛlɛ pɛ bɔtaamɔ kɛlɛ dɛ ana dza? Pɔ bɔgɛ gã kidzo ɛlɛ nɛidi abha. Nɛ kɛlɛ shuɔ, bɔyɛkɛ kɛka nyia ka ɔkɔ ishu sɛ tɛ̀ kidzo tɛdã ɔkɔ Kristo yɛibui gbangbã.

¹³ Nɔotinyi ɔsɛ bagɛ awɔa axɔ̃ɛ nɛ Owusoso Akaavũɔ mɛ bamɔ bɔŋaŋã edenɔ ɛkɛlɛ dza, kɛlɛ osubha gɛ ɔlɛ abha banɔ nɔ apɔɛ bɔdɔ̃, gɛnɛ ɛkɛlɛ baŋã bɔdɔ̃ edenɔɔ dza?

¹⁴ Nɛ kidzo ɛlɛ nabha, Apaleteɛ akɔ alɛ ɔsha sɛ bagɛ baɖɔ kibui gbangbã bamɔ balɛ ɔŋãkɔ odenɔ kibui gbangbã mɛ.

¹⁵ Pɔ mɛxɔnɔ gɛ wɔa ohumi ɔlɛ nanà shu kɛxɔ̃ɛ. Kɛlɛ ɛtɛ fɔnɔ kibui lɛ sɛ tɛ̀ nɔbhɛtɛ ebui alɛ nɛidi ɔkɔ mɛ. Kɛbapɛ ɔkɔ mɛ sɛ tɛ̀ mɛitsí ɔdɛ sɛ tɛ anɔ teli ayɛkɛ kɛdɔ̃ gɛ kɛlɛishu mɛifeke ishuɔ nɛ̀ mɛahɔɛ.

¹⁶ Pɔ onupɛ ɛɖɔ kibui gbangbã, ɛtɛ balà feke mɛishu, ɔmɔsɛ batɔɖɔ ɛlɛ akɔ mɛ ɔsɛ tɛ ɛɖɔ Owusoso Akaa ibuiɛ. Abagagalĩ akɔ mɛ gɛ onupɛ ɛgɛ ɖɔ kibui gbangbã.

¹⁷ Onupɛ ɛlɛkɔ mɛishu kɔ kibuiɛ tɛɖɔɖɔ, kɛbhɛ babuia bazã kɛlɛ mɛ ɔkɔ mɛ, onupɛ gɛnɛ mɛishu mɛlɔkɔ ɔkɔ kibuiɛ tɛɖɔɖɔ, kibuiɛ gɛ bakpɛ mɛ ahɔɛ sɛ ɛbhɛtɛ ete mɛbhɛtɛ.

¹⁸ Kiɖuwoe gɛinu mɛ kɛbhɛ babuia nɔɔ dza? Kɛlɛ̀ ete ɔsɛ, tɛ̀ onupɛ ɛɖɔ kibui gbangbã, ɛtɛ bayɛkɛ kɛbhɛ babuia nanà, kɛlɛ ɛtɛba yɛkɛ kɛnanà nɛ kɛlɛ tɛɖɔɖɔ mɛ, kliso ɛgɛ lɔkɔ mɛ ohumi nɔ gɛɔlɛ mɛahɔɛ kpɛ kibuiɛ tɛɖɔɖɔ mɛ.

¹⁹ Ɛlɛ mɛishu ahɔɛ mɛ, kɛlɛ gɛ ɛma ananà esi tsyɛ elo, ɛlɔkɔ mɛishu asɛ anɔ dzidzi ɔkɔ aka nyia aka, sɛ tɛ̀ ɛkɔ banɔ kpekpèɛ amɔ ɛkpã.

²⁰ Onupɛ ɛlɛ Yudanɛ nɛishiɛ, ɛbhɛtɛ mɛishu asɛ Yudaeyi sɛ tɛ̀ ibu alɛ. Nɛ bagɛ akpasɛ Mose ɔsha niesi soɔ, ɛbhɛtɛ mɛishu asɛ anɔ gɛ akpasɛ ɔsha niesi, (pɔ mɛxɔnɔ ma ɔsha niesi flogo) sɛ tɛ̀ ibu bagɛ akpasɛ ɔsha niesi so.

²¹ Nɛ bagɛ ama ɔsha niesi nɛishiɛ, ɛbhɛtɛ ishu asɛ balɛ mɛ anɔ teli, (ɛma Mose ɔsha gɛinu Owusoso Akaa ɔsha niesi tyɛ elo, ɛkpasɛ Kristo ɔsha niesi), sɛ tɛ mɛibu bagɛ akpasɛ ɔsha niesi.

²² Onupɛ ɛkpasɛ bagɛ ebotso nishiɛ, ɛzã asɛ balɛ sɛ tɛ ibu alɛ. Idzi kɛdɔ̃ ka nyia ka ɛdi kɔ anɔ ka nyia ka sɛ tɛ gana kidzo ka nyia ka abha tɛ mɛibu balɛ banɔ teli.

²³ Nɛ kibui gbangbã nɛtakpu so ɛbhɛtɛ alɛ nyɔ̃ɔ, sɛ tɛ̀ mɛtsyɛ ɛmɔ tiyuyula nɛ kɛlɛ mɛ.

²⁴ Nɔ otinyi ɔsɛ nɛ tɛtsɛɖɛmɛ tibubu mɛɛ, banɔ nɔ nyɔ̃ɔ ebu tɛtsɛɖɛmɛ, pɔ anɔ tenikpo ko yɛaŋã kabha dza? Nɔobu tɛtsɛɖɛmɛ nɛ kidzoɔ gɛ kɛlɛ abha nɔbɔmɔ kabha ŋaŋã.

²⁵ Anɔ ka nyia ka gɛ apɛ asɛ tɛ̀ awlɔ̃akɛ nɛ bɔwufu lɛ nɛidi mɛɛ, akpasɛ bɔlɛ piapii. Babhɛtɛ alɛ sɛ tɛ̀ bayɛkɛ kikutuɔ gɛtɛ bazã tihɔɔ nɔ, pɔ bɔbhɛtɛ alɛ nyɔ̃ɔ sɛ tɛ̀ bɔyɛkɛ kikutuɔ gɛ bazã tihɔɔ nɔ.

²⁶ Klisoɔ, itibu tɛtsɛɖɛmɛ asɛ anɔ gɛ tɛtɔtɔɖɔ nanà ma yɛahɔɛ, kɛlɛ ɛtɛta ekpili tsyɛ asɛ anɔ gɛ ehuisi kɛlɛɛ nɔ ana.

²⁷ Kɛmaɛlɛ mɛ ana, ɛkpɛ mɛ ishupiɛ bɔtɔ pɛ ɛbhɛtɛ ishu asɛ anɔ dzidzì ana, sɛ tɛ̀ onupɛ ɛɖɔ kibui gbangbã ɔkɔ banɔ nɔ̀ bekeɛ, betibè bumɛ eyinɔ ɔsɛ ɛgɛ na ɔsɛ tɛ̀ ɛyɛkɛ kikutuɔ.