Korintoanɛ 1 8 - Nyangbo New Testament

Bɔdɔ̃ Kakasɛ Nɛ Bɔŋaŋã Gɛ Batɔkɔ Akɔ Ibudi Shu

¹ Otsiɛ nɛ bɔŋaŋãa gɛ batɔ akɔ ibudiɛ shuɔ, bunyi ɔsɛ kɛlɛ tititì mɛ ɔkɔ ɔlɔ petee. Bubutì kɔ befeke ishu, pɔ tɛdɛdɛmɛ nɔ xɔnɔ bhɔ banɔ ewunɔ kabha.

² Anunɔ gɛ abhɛtɛ yɛ asɛ enyi kibui tiliɛ, eketì kɛlɛ asɛ kana gɛ kɛlɛ sɛ etiɛ.

³ Pɔ Owusoso Akaa enyi anunɔ gɛ adɛmɛ nɔ nɛ yɛ.

⁴ Kliso nɛ bɔŋaŋã gɛ batɔ akɔ ibudi shuɔ, bunyi ɔsɛ obudì otinu kɛdɔ̃ nanà nɛ kanɔ nɔ̀ mɛ, kɛlɛ Owusoso Akaa nanà abha ma ɔdɛ tenikpo alɛ ete.

⁵ Onupɛ edzì asɛ-baaka teli alɛ gɛ bekulu balɛ nɛ kititiɛ alo nɛ kesiakpa nabha (asɛ gɛ kɛkpasɛ ɛlɛ mɛ sɛ “baaka” nɛ̀ “baapalete” kpekpè teli alɛ ana),

⁶ pɔ nɛ bɔlɔkɔ xɔnɔ, Owusoso Akaa tenikpo yɛalɛ, Akaa, gɛ denɔ yɛabha kɛka nyia ka de koeyì, pɛ yɛ bɔlɛ nɛ ɛkpã ɔkɔɔ, pɛ kana Apalete tenikpo tsyɛ yɛalɛ gɛenu Yesu Kristo, gɛ gana yɛabha kɛka nyia ka de koeyì pɛ ganà yɛabha bɔlɛ nɛ ɛkpã.

⁷ Pɔ gɛnɛ aka nyia aka yɛenyi kibui ɛlɛ ana. Banɔ teli gɛ ibudi ebui akakpasɛ balɛ mɛ, gɛ onupɛ baŋã bɔdɔ̃ lɛ nɛidi gɛ batɔ akɔ obudiɛ, pɔ gɛ ebuiɛ gɛ akpasɛ balɛ etúɔ mɛ ebotso soɔ, bakpɛ bɔŋaŋãa nɔtsɔ̃.

⁸ Pɔ bɔŋaŋã tɛ gbana bɔlɔ mana Owusoso Akaa bha, bɔgɛ ŋã bɔdɔ̃ɔ, kigizĩ kɛnana nɛ bɔlɔ shu, kana onupɛ bɔŋã tsyɛɛ, bɔgɛ pɛ dɛ ananà.

⁹ Nɔoɖi piapii, sɛ tɛ̀ wɔnɔ ishu ahɔɛ mɛ zazã gɛ nɔmɔɔ tidzì kɛdɔ̃ kpakpatà ɔkɔ bagɛ bakakpɛ iguɔ.

¹⁰ Ɔmɔsɛ onupɛ anɔ teli gɛ akakpɛ igu nɛ yɛitúɔ mɛ abamɔ wɔanɔ gɛ bubuti lɛ wɔahɔɛ pɛ ɔŋã bɔdɔ̃ nɛ ibudi bɔkã mɛɛ, kɛtɛ bakɔ sɛ yɛ tsyɛ avɛ adɛ ŋã bɔdɔ̃ lɛ gɛ batɔ akɔ ibudi nɛ ishu fefekeɛ mɛɛ dza?

¹¹ Klisoɔ ozĩ adzya alɛ gɛ ebotsoɔ yɛkpã nɛ̀ wɔbutiɛ, gɛ yɛtakpu sopɛ Kristoɔ ebetsíɛ.

¹² Onupɛ ɔbhɛtɛ kibui kpa nɛ wɔadzya alɛ shu nɛ kidzo ɛlɛ nabhaa, pɛ ɔkpɛ kɛpɔ nɛ balɛ kitúɔ gɛ kibotsoɔ shuɔ, ɔbhɛtɛ kibui kpa nɛ Kristo shu.

¹³ Klisoɔ, onupɛ kɛgɛ ɛŋãa kɔ sɛ tɛ̀ mɛadzya ezhi eku kibui kpa bhɛbhɛtɛ mɛɛ, ɛzakatã kɛdzya ɖi, sɛ tɛ̀ ɛtɛ bakɔ yɛadɔ oboe.