Korintoanɛ 1 6 - Nyangbo New Testament

Bayɛyɛkɛŋã Kebhu Okulukɔ Dɛdɛ

¹ Onupɛ kibui ku wɔnɔ mɛ banɔ teli ishiɛ, atɛ lɔkɔ yɛavɛnɔ bagɛ etinyi Owusoso Akaa balɛ kebhu okulukɔ, pɔ alɔkɔ yɛavɛnɔ bayɛyɛkɛŋã ɔkɔ.

² Nɔotinyi ɔsɛ bagɛ enu bayɛyɛkɛŋã balɛ ebekulu kebhu nɛ kanɔ mɛ banɔ nɔɔ dza? Kɛlɛ onupɛ wɔnɔ obokulu kebhu nɛ̀ kanɔ nɔ̀ mɛ, nɔgɛ ná sɛ tɛ nokulu bubhu bhlui bhlui lɛ nɛidiɛ dza?

³ Nɔotinyi ɔsɛ bɔlɔ ba kulu kebhu nɛ̀ Akaa axɔ̃ɛdɛ dza? Kɛlɛ so pɛ kanɔ mɛ ebui alɛ bɔtalà okulu kebhu nɔ dza?

⁴ Klisoɔ, onupɛ ebela aba nɛ ebui alɛ nɛidi shuɔ, nɔlɔkɔ banɔ gɛ ɔzãkɔ ma balɛ ahɔɛ nɛ ɔhaa mɛ asɛ bebhukulu ana!

⁵ Ɛɖɔ ebui alɛ sɛ tɛ ɛlɔkɔ kpɛ wɔnɔ awuĩ nɔ. Kɛpɛ otsiɛ sɛ ebutinɛ nanà atɛzã wɔnɔ ɛshi gɛ abalà kebhu ekulu nɛ bayɛyɛkɛŋã nɛishi dza?

⁶ Pɔ, nɔlɔkɔ bagɔlɔ ɔvɛnɔ kebhu mɛ, kɛlɛ nɔbhɛtɛ alɛ nɛ bagɛ agɛ yɛkɛ aŋã amɛ!

⁷ Gɛ kɛgbã sɛ̀ nɔlɔkɔ bagɔlɔ ɔvɛnɔ kebhu soɔ, kɛtɛ kasɛ ɔsɛ baŋã wɔnɔ abha xɔɔ. Kiɖe so pɛ nɔtɔkɔ yɛabhɛtɛ kibui kpa nɛ wɔnɔ boŋ shu? Kiɖe so pɛ nɔtɔkɔ balɛ boŋ ete dzyini wɔnɔ akpɛɛ dza?

⁸ Nɛ kɛlɛ inye mɛɛ, wɔnɔ boŋ wono dzyini bagɔlɔ ɔkpɛ pɛ nɔbhɛtɛ ebui kpa, nɛ wɔnɔ adzya alɛ shu.

⁹ Nɔotinyi ɔsɛ atakpu mɛ gagalĩ eleteɛ atɛba vɛ Owusoso Akaa bukusi ɔŋãkɔɔ dza? Nɔtɛkɔ bawɔɛ wɔnɔ, bagɛ baŋã kɛgɔlɔ tsyɛ, ibudi eleteɛ, bagɛ badɛ ɔmamɛ, banyɛ gɛ bawɔsɔ̃ nɛ̀ balɛ banyɛ ɔhagbo alɛ,

¹⁰ nɛ bezĩɛ nɛ̀ bagɛ basɛ balɛ ete ko abaŋã nɛ beenuwɔɛ nɛ̀ bagɛ aɖɔ banɔ ishu tibuiɛ nɛ̀ bagɛ edzyinì banɔ akpɛɛ batɛ bavɛ Owusoso Akaa bukusi ɔŋãkɔ.

¹¹ Ebui alɛ wɔnɔ mɛ banɔ teli aza abhɛtɛ. Pɔ beplu wɔnɔ ishu, badalɛ wɔnɔ shu, kɛlɛ bebhui bɔtyɔa akɔ wɔnɔ nɛ Apalete Yesu Kristoɔ nɛ Owusoso Akaa Ɔfɔfuĩa nɛinyeɛ mɛ.

Kɛgɔlɔ Tɛŋaŋã

¹² “Bakɔ mɛ kidzo sɛ tɛ̀ ɛbhɛtɛ kɛka nyia ka,” pɔ gɛnɛ kɛka nyia ka kɛlɛ pɛ ɔkɔ anɔ. Bakɔ mɛ kidzo sɛ tɛ̀ ɛbhɛtɛ kɛka nyia ka,” pɔ ɛtɛbakɔ sɛ tɛ kɛka nyia ka dzi apalete nɛ mɛabha.

¹³ “Bɔŋaŋã lɛ kɔ kevũɔ, kɛlɛ kevũɔ tsyɛ alɛ kɔ́ bɔŋaŋã,” pɔ Owusoso Akaa ebezĩ balɛ taabha. Bagɛ bhɛtɛ ishudzyaa kɔ́ kɛgɔlɔ ŋaŋã ebui, pɔ Apaleteɛ babhɛtɛ ɛlɛ akɔ, kɛlɛ babhɛtɛ Apaleteɛ tsyɛ akɔ ishudzya.

¹⁴ Nɛ yɛ Ohumi nɔ mɛɛ, Owusoso Akaa efeke Apaleteɛ denɔ bekpuɔ mɛ, kana yɛebe feke bɔlɔ tsyɛ.

¹⁵ Nɔotinyi ɔsɛ wɔnɔ shudzyaa nu Kristoɔ ɔyɛ dza? Pɔ kɛpɛ̃ sɛ ɛlɔkɔ mɛ ishudzyaa gɛinu Kristoɔ ɔyɛ bhɛtɛ tenikpo nɛ kedulũ azazã eleteɛ dza? Kɛma ɛlɛ mɛ ana!

¹⁶ Nɔotinyi ɔsɛ anyɛ nɔnɔ gɛ abhɛtɛ tenikpo nɛ adzɛ gɛ azã kedulũɔ, abhɛtɛ tenikpo nɛ yɛ nɛ ishudzyaa mɛɛ dza? Ɔmɔsɛ baɖɔ ɛlɛ lú asɛ, “Balɛ taabha ebedzi ishudzya tenikpo.”

¹⁷ Pɔ anunɔ gɛ abhɛtɛ tenikpo nɛ Apaleteɛ, alɛ tenikpo nɛ yɛ nɛ ɔfɔfuĩa mɛ.

¹⁸ Nɔobu tɛtsɛɖɛ mɛ ɔshɛ nɛ kɛgɔlɔ ŋaŋã ebui shu. Ebui kpa ka nyia ka gɛ anɔ abhɛtɛ, abhɛtɛ alɛ nɛ ishupi niede, pɔ anunɔ gɛ abhɛtɛ kibui kpa odenɔ kɛgɔlɔ ŋaŋã mɛɛ xɔnɔɔ, abhɛtɛ kibui kpa nɛ yɛahɔɛ ishudzya shu.

¹⁹ Nɔotinyi ɔsɛ wɔnɔ ishupiɛ nu Owusoso Akaavũɔ ɔkɔ Ɔfɔfuĩa Gbangbã, gɛ lɔkpasɛ wɔnɔ mɛ, anunɔ gɛ nɔyɛkɛ odenɔ Owusoso Akaa ɔkɔɔ dza? Nɔma ɔkɔ wɔnɔ ishu,

²⁰ budzi bedzi wɔnɔ nɛ kedzi tieli. Klisoɔ, nɔkpɛ Owusoso Akaa nɛinye nɛ kititi nɛ wɔnɔ ishupiɛ.