Korintoanɛ 1 5 - Nyangbo New Testament

Nɔobú Adzya Gɛaŋã Kɛgɔlɔ Oyinɔ Nɛ Wɔnɔɛshi

¹ Bakɔ bɔlɔ tititì nɛ wɔnɔ shu sɛ kɛgɔlɔ ŋaŋã ebui akpasɛ wɔnɔ mɛ, kibui gɛ ibudi elete tsyɛ atɛ abhɛtɛ. Anyɛ teli ayɛkɛ yɛakaa edzini.

² Kɛlɛ nofeke wɔnɔ ishu! Gɛnɛ ɔwɔ̃nyɔnɔ boŋ ɔlɔtɔzã wɔnɔ mɛ pɛ notobu anyɛ gɛ abhɛtɛ kibui ɛlɛ oyinɔ nɛ wɔnɔ ɛshiɛ dza?

³ Gɛ ɛma wɔnɔ ɛshi nɛ ishudzya mɛ tsyɛ elo, ɛlɛ wɔnɔ ɔbha nɛ ɔfɔfuĩa mɛ. Kɛlɛ itiputɔ kulu kebhu nɛ̀ anunɔ gɛ yɛabhɛtɛ kibui ɛlɛ, asɛ gɛ ɛbabhɛtɛ gɛ onupɛ ɛlɛ ɛkɛlɛ ana.

⁴ Onupɛ noshogò nɛ bɔlɔ Apalete Yesu kinyeɛ mɛ, pɛ ɛkpasɛ wɔnɔɛ ishi nɛ ɔfɔfuĩa nɔ mɛɛ, pɛ bɔlɔ apalete Yesu ohumi nɔ tsyɛ ɔlɛ wɔnɔɛ shiɛ,

⁵ nɔlɔkɔ anyɛ alɛ ɔkpɛ ahɔɛ ɔkɔ Satana, sɛ tɛ̀ ezĩ yɛ ushudzya tɛ̀ bayɛkɛ yɛ ɔfɔfuĩa nɔ olu nɛkpã nɛ bɔlɔ Apalete Yesu kiwui nabha.

⁶ Wɔnɔ ishuɔ gɛ nofekeɛ gɛ pɛ. Nɔoti nyi ɔsɛ amɔwɔ tsɔtsɔ̃mɔ bhlui teli yɛakɔ avɔvɔ gɛ ekpéɛ tsyɛ atsɔmɔ̃ɔ dza?

⁷ Nɔlɔkɔ amawɔ kuku tsɔtsɔ̃mɔ ɔtɛɛ sɛ tɛ nɔodzi amɔwɔ vɔvɔ gɛ kɛdɔ̃ tsɔtsɔmɔ̃ ma yɛmɛ, asɛ kidziɛ gɛ nodziɛ. Ɔmɔsɛ balɔkɔ Kristoɔ gɛenu Tɛdɔdɔ fala obhoshi eyiɛ abhɛtɛ bɔdɔ̃ pɔpɔɛ nɔ.

⁸ Klisoɔ nɔkɔ bɔbhɛtɛ tɔɖɔ kiwui ŋaŋã nabha, gɛnɛ kɛdɔ̃ tsɔtsɔmɔ̃ kiyi kukuɔ, kiyiɛ gɛ manà ebui kpa bhɛbhɛtɛ nɛ̀ kɛtakpu mɛ gagalĩ bhɛbhɛtɛ ebui, pɔ nɔzã asɛ kifufulũ gɛ bagɛ kpɛ kɛdɔ̃ tsɔtsɔmɔ̃ kiyi nɛ kɛlɛ mɛ, kifufulũ gɛ bagɛ kpɛ kɛdɔ̃ tsɔtsɔmɔ̃ nɛ yɛ mɛ pɛ kinu kibui gɛ kɛlɛ ɛlɛ ɔzãkɔ tɛbhɛbhɛtɛ.

⁹ Ɛfɔnɔ ɔsɛsɛ wɔnɔ nɛ mieplukpa mɛ ɔsɛ, nɔtɛ kpɛ ɔha nɛ banɔ nɔ̀ gɛ baŋã agɔlɔ,

¹⁰ gɛnɛ asɛ kanɔ alɛ mɛ anunɔ gɛ balɔkɔ ishu akɔ kɛgɔlɔ ŋaŋã, mɛ ete tɛpɛpɛ elete, bagɛ edzyinì banɔ akpɛ alo ibudi elete ana. Nɛ kibui ɛlɛ nɛidi shuɔ, kɛlɛ sɛ tɛ nɔshɛnɛ ahɔɛ nɛ kanɔ alɛ shu.

¹¹ Pɔ, otsiɛnɔ ɛfɔnɔ kɔ wɔnɔ sɛ, kɛma sɛ tɛ nɔkpɛ ɔha nɛ anunɔ gɛ ekulu yɛishu sɛ adzya yɛenu flogo pɛ aka aŋã kɛgɔlɔ apɛ yɛ ete tɛpɛpɛ, anɔ gɛ eshu ibudi ɔkɔ̀ alo anɔ gɛ ezĩ banɔ shu, enuwɔ̃ɛ alo anɔ gɛ edzyinì banɔ akpɛ. Nɔtɛŋã bɔdɔ̃ ete tsyɛ nɛ banɔ alɛ nɛidi.

¹² Kitinu mɛ kɛxɔ̃ɛ sɛ tɛ̀ ikulu kebhu nɛ bagɛ bama ɔha mɛɛ. Gɛnɛ bagɛ alɛ ɔhaa mɛɛ kɛlɛ sɛ tɛ ikulu kebhuɔ nɔ dza?

¹³ Owusoso Akaa yɛebe kulu kebhu nɛ bagɛ ama ɔha mɛ. “Nɔkakà atakpu mɛ gagalĩ eleteɛ nɔ wɔnɔ ɛshi.”