Korintoanɛ 1 4 - Nyangbo New TestamentKristo Yɛanɔkpɛkpɛ 1 Klisoɔ, kɛlɛ sɛ aka nyia aka alɔkɔ bɔlɔ asɛ Kristo yɛanɔkpɛkpɛ ana, nɛ̀ asɛ bagɛ balɔkɔ Owusoso Akaa yɛebui kpũkpũɔ akpɛ ahɔɛ akɔ alɛ ana. 2 Kliso bebisì edenɔ bagɛ balɛ ahɔɛ balɔkɔ, ebuiɛ akpɛ asɛ tɛ bamɔ alɛ sɛ babhɛtɛ kibui gɛlɛ kɛlɛ ɔzãkɔ. 3 Ɛgɛ lɔkɔ nɛ kɛlɛ mɛ gɛ onupɛ wɔnɔ, alo anɔdzyrame kebhu okulukɔ toli okulu kebhu nɛ̀ mɛ, kibui gbã itikulù kebhu nɛ mɛishu. 4 Mɛ kitúɔ mɛ dalɛ, pɔ kɛgɛ kasɛ ɔsɛ anɔ gbangbã mɛinu. Apaleteɛ yɛebe kulu kebhu nɛ̀ mɛ. 5 Kliso nɔoti kulu kebhu kpɛ otugbà flogo tɛ̀ kibeɛ ba na, nɔzã opo odiyinɔ ɔsɛ Apaleteɛ aba. Yɛaba ebu ebui kpukpũ nɔnɔ gɛ akpasɛ otumũɔ mɛ oyinɔ amana ɔtɔ̃, kɛlɛ ebebu ebuiɛ gɛ lakpasɛ anɔdzyrame yɛitùɔ mɛ akasɛ. Nɛ kibe ɛlɛ Owusoso Akaa aba kpɛ bagɛ kɛlɛ sɛ akpɛ nititíɛ. 6 Mɛdzya alɛ mɔ, mɛ nɛ̀ Apolo lɔkɔ ebui alɛ kɔ wɔnɔ nɛ wɔnɔ tɛpɛpɛ̃ shu, ɔsɛ tɛ nɔkpasɛ bɔdɔ̃ odenɔ bɔlɔkɔ tɛ nolũ ebui alɛ niesi ɔsɛ “Nɔtɛ bhɛtɛ ɔfalanɔ kɛgɛ bafɔnɔ eluɔ shu.” Sɛ tɛ notibo feke anana owunɔ kabha ɔdɛ yɛɔhagbo. 7 Ɔmɔsɛ afana gɛ abhɛtɛ wɔ pɛ ɔgã ɔtɔ nɛ banɔ bhlatɔ shu? Kiɖe gɛlɛ wɔ ahɔɛ pɛ gɛnɛ bɔyɛkɛ wɔ yɛkɛ ɛlɛɛ dza? Kɛlɛ onu pɛ ɔyɛkɛ ɛlɛɛ, kiɖe so pɛ ofeke ishu ɔmɔ asɛ gɛnɛ bɔkɔ bakɔ wɔɔ dza? 8 Putɔnɔ kɛka nyia ka gɛ nɔpɛɛ nɔ lɛ wɔnɔ ahɔɛ xɔɔ! Kɛlɛ nɔotsyina odzi ehoeyielete! Nɔodzi bekusi, gɛ bɔlɔ ahɔɛ tsyɛ akpasɛ ɛlɛ mɛ. Ɛtapɛ ɔsɛ tɛ̀ nodzi bekusi kɛgbã tɛ bɔŋã bukusiɛ plɛnɔ wɔnɔ! 9 Kidzì kɔmɛ xɔnɔ asɛ Owusoso Akaa agbana bɔlɔ banɔkpɛkpɛ amana ɔmɔ asɛ banɔ gɔgɔɛ nɛ banɔdzyrame ishi ana, asɛ banɔ gɛ bebu alɛ ɛpɔ asɛ tɛ̀ beyi alɛ nɛ bɔdɔ̃ oɖikɔ ana. Babhɛtɛ bɔlɔ budzì bɔdɔ̃ gɛ kanɔ nɔ̀ mɛ nyɔ̃ɔ eɖi, nɛ Owusoso Akaa axɔ̃ɛdɛ nɛ̀ banɔdzyrameɛ amɛ. 10 Budzi baaga nɛ Kristo ɛtakpu, pɔ bebutinɛ nɔonu nɛ Kristo mɛ! Bubotsò, pɔ wɔnɔ xɔnɔ ɔgagalĩ. Baakpɛ wɔnɔ kinyè nɛitití, pɔ bɔlɔ xɔnɔ batɛ̀ɛ ɔlɔ lu esi! 11 Boyinɔ otsiɛ nɔ, bɔbhɛ nɛ olũwɔɛ oyi ɔlɔ xɔnɔ, bɔdɔ̃ tsatsã mɛ bɔkpasɛ, beehuisi ɔlɔ, kɛlɛ bɔpã tsyɛ mã ɔlɔ ahɔɛ. 12 Bɔwɔa axɔ̃ɛ gagalĩ nɛ̀ bɔlɔ ahɔɛ. Onu baɖɔ kibui akpɛ bɔlɔɔ, bɔlɔ xɔnɔ yula tutu esi kɔ alɛ, onupɛ batɔnɔ bɔlɔ ɛkpã niedeɛ, bɔkpɛ kemi nɛ kɛlɛishu, 13 onupɛ banɔ aɖɔaɖɔ kpa nɛ ɔlɔ shuɔ, bubù ebui mɛ kɔ alɛ nɛ̀ eyamɛ gbangbã. Boyinɔ oboɔ, budzì kɛtɔ abha ɔdɔ̃ nɛ̀ kanɔ mɛ tɛwɔnɔ̃. 14 Ɛtɛɛ́ fɔnɔ ebuiɛ alɛ kɔ ɔnɔ ɔsɛ tɛ ɛlɔkɔ kpɛ wɔnɔ awuĩ nɔ, pɔ tɛ̀ ɛlɔkɔ kpalà wɔnɔ, ɔmɔ asɛ mɛeyi alɛ gɛ ɛdɛmɛ nɔ ana. 15 Gɛ banɔ asɛ ihotu lɔfɔ lɛ wɔnɔ ahɔɛ nɛ Kristo mɛ tsyɛ elo, wɔnɔ akaa alɛ egikpè, ɔmɔsɛ nɛ Yesu Kristoɔ mɛ, ɛbadzì akaa ɔkɔ wɔnɔ ɔgana kibui gbangbã mɛ. 16 Kliso ɛkpalà wɔnɔ ɔsɛ tɛ nɔkpasɛ mɛ. 17 Nɛ kibui ɛlɛ shuɔ ɛsɛsɛ Timoteo nɛ wɔnɔ ɔkɔ, mɛ eyianyɛ gɛ ɛdɛmɛ nɔ, anɔ gɛ abhɛtɛ kibui gɛlɛ ɛlɛ ɔzãkɔ nɛ Apaleteɛ mɛ. Yɛaba abaka wɔnɔ nɛ kɛzã gɛ ɛzã nɛkpã nɛ Kristo Yesu mɛ, gɛ kɛshɔnɔ kɛgɛ ɛkasɛ wɔnɔ nɛ ɔkɔ nyia ɔkɔ nɛ ɔhaa ka nyia ka mɛ. 18 Wɔnɔ mɛ beteli ezefeke balɛishu, asɛ gɛ onupɛ ɛka bà wɔnɔ ɔbha oɖi ana. 19 Ɛbaba wɔnɔ ɔbha nɛ kibè gulũi mɛ gɛ onupɛ Apaleteɛ adɛmɛ, kɛlɛ ɛbatì kaɖɔ nɔnɔ ɛdi gɛ banɔ alɛ gɛ befeke balɛishuɔ aɖɔ, nɛ̀ ohumi nɔnɔ gɛ ɔlɛ balɛ ahɔɛ. 20 Ɔmɔsɛ Owusoso Akaa bukusi ŋaŋã ma kaɖɔ ɖɔɖɔ mɛ, pɔ ohumi mɛ bɔlɛ. 21 Kiɖuwoe nɔpɛ ɔdɛ? Ɛba wɔnɔ ɔkɔ nɛ̀ kishìi, tɛ ɛba ehuisi wɔnɔ, pɛnɔsɛ ɛba nɛ tɛdɛdɛmɛ nɔ nɛ̀ ɔfɔfuĩa gɛ ɔlɛ ishumɛ yɔɔ dza? |
© (Active), Ghana Institute of Linguistics, Literacy and Bible Translation. All rights reserved.