Bìoball air-loidhne

Korintoanɛ 1 3 - Nyangbo New Testament

Ɔtɔbubu Nɛ Ɔhamɛ Shu

¹ Mɛelé alɛ mɔ, ɛtɛɖɔ kaɖɔ ɔkɔ wɔnɔ asɛ ɔfɔfuĩa mɛ anɔ, pɔ asɛ anɔdzyrame ana, asɛ beyì vɔvɔ gɛ akpasɛ Kristo mɛ ana.

² Ɛkɔ wɔnɔ kɛmɔlĩ, gɛnɛ bɔŋaŋã, ɔmɔsɛ nɛɔko oshè pɛ nɔbɔ ŋã bɔlɛ, kibui gbã nɛɔkɔ balɛ otsiɛ ɔkɔ bɔlɛ tɛŋaŋã.

³ Kanɔ mɛ banɔ ete nonu. Gɛ kiwuhũ dzadzã nɛ̀ ebela ebui akpasɛ wɔnɔɛishiɛɛ, kɛlɛ kanɔ mɛ anɔ nonuɔ dza? Nɔtɛ ɔbhɛtɛ ebui ɔmɔ asɛ kanɔ nɔ̀ mɛ banɔ nɔ ete dza?

⁴ Kliso onupɛ anɔ teli aɖɔ asɛ, “Paulo ayɛ mɛinu,” pɛ anɔ bhlatɔ tsyɛ aɖɔ asɛ, “Apolo ayɛ mɛinuɔ pɔ,” kɛlɛ anɛ kanɔ mɛ banɔ ete nonuɔ dza?

⁵ Alɛ petee niedeɛ pɔ, afana gɛenu Apolo? Kɛlɛ afana tsyɛ gɛenu Paulo? Baxɔ̃ɛdɛ ete gɛ balɛ akɔ asɛ nɔyɛkɛ ɔŋã asɛ kɛkpɛ gɛ Apaleteɛ akpɛ kɛxɔ̃ɛ nɛ balɛ ɔmayɛmɛ aka nyia aka ahɔɛ ana.

⁶ Mɛɖa bɔdɔ̃eyiɛ, Apolo yɛakpɛ bulĩ nɛ bɔlɛ shu, pɔ Owusoso Akaa yɛakɔ bushè.

⁷ Klisoɔ gɛnɛ agɛ yɛaɖa bɔdɔ̃eyiɛ pɛnɔsɛ agɛ yɛakpɛ bulĩɛ nɛ bɔlɛ shuɔ yɛabhɛtɛ̀ kɛnanà, pɔ Owusoso Akaa yɛakɔ bɔdɔ̃eyiɛ eshè.

⁸ Tɛtɔtɔɖɔ tinikpo kɛlɛ ɛlɛ anunɔ gɛ yɛaɖaa bɔdɔ̃ nɛ̀ agɛ yɛakpɛ bulĩɛ nɛ bɔlɛ shuɔ ahɔɛ, kɛlɛ babà buia kɛbhɛ kɔ aka nyia aka nɛ yɛ kɛxɔ̃ɛ wɔawɔa shu.

⁹ Ɔmɔsɛ bɔlɔ nyɔ̃ɔ nu Owusoso Akaa kɛxɔ̃ɛ tinikpo awɔawɔa, kɛlɛ wɔnɔ onu Owusoso Akaa yɛɔyà, nɛ yɛ̀ buvũɔ.

¹⁰ Nɛ kibhuiɛ gɛ Owusoso Akaa ebhui mɛebuɔ, mɛkpɛ buvũ niesi asɛ buvũdzudzu gbangbã elete ana, kɛlɛ anɔbhlatɔ yɛaba bhɔ bɔlɛ atɔɖɔ. Pɔ anɔ nyia anɔ eɖi piapii nɛ̀ kɛbhɔ gɛ abhɔɔ yɛuvũɔ.

¹¹ Ɔmɔsɛ ananà azakalà buvũ vɔvɔ kesi akpɛ ɔdɛ bɔgɛ batɛ kpɛ bɔlɛ esi eluɔ, gɛenu Yesu Kristo.

¹² Onupɛ anɔ teli alɔkɔ sikãɛkpã, sikãfufu, aklagbu gɛ layɛkɛ kedzi, osi, ekeɖè alo bushìi abhɔ ɔlɛ atɔɖɔɔ,

¹³ yɛxɔ̃ɛ bakasɛ kɛgɛ yɛalɔkɔ abhɔ bɔlɛ nɔ, ɔmɔsɛ Kiwuiɛ babu ɛlɛ kasɛ. Bebebù ɛlɛ akasɛ nɛ̀ kifú, kɛlɛ kifúɔ badalɛ aka nyia aka yɛ ɛxɔ̃ɛ wɔawɔa shu.

¹⁴ Onupɛ kɛgɛ yɛabhɔ eluɔ zã nɛ̀ ɛkpãa, aba yɛkɛ yɛbhɛ babuia.

¹⁵ Onupɛ kɛtãa, yɛbhɛ tã, yɛxɔnɔ babà yɛkɛ yɛ elu nɛ̀ ɛkpã, pɔ kɛbazã asɛ anɔ gɛebu tɛtsɛɖɛmɛ ekoeyì odenɔ kifù mɛ ana.

¹⁶ Nɔotinyi ɔsɛ Owusoso Akaavũɔ nɔonu pɛ Owusoso Akaa Ɔfɔfuĩa nɔ kpasɛ wɔnɔ mɛ dza?

¹⁷ Onupɛ anɔ teli ayɛɛ Owusoso Akaavũɔ, Owusoso Akaa ebezĩ yɛ tsyɛ, ɔmɔsɛ Owusoso Akaavũɔ shu dalɛ, kɛlɛ wɔnɔ onu Owusoso Akaavũ lɛ.

¹⁸ Nɔtɛ̀ wɔɛ wɔnɔshu. Onupɛ abhɛtɛ wɔnɔ mɛ anɔ teli asɛ enyi kibui nɛ obo kanɔ alɛ mɛ bubutì ulũɔ, etsyina edzì “awɔaga” sɛ tɛ̀ ebedzi ebutinɛ.

¹⁹ Ɔmɔsɛ kanɔ mɛ bubuti ɛlɛ nu bɔga dɔdɔ nɛ Owusoso Akaa namɛ. Asɛ gɛ bafɔnɔ elú asɛ, “Eevũ bagɛ eɖi asɛ benyi kibuiɛ nɛ balɛ bɔshɛ̃ ebui bhɛbhɛtɛ mɛ”

²⁰ kana bewlui aɖɔ asɛ, “Apaleteɛ enyi asɛ bagɛ eɖi asɛ benyi kibuiɛ bubutiɛ ma kɛnanà mɛ.”

²¹ Kliso ananà ete feke yɛishu! Bɔdɔ̃ petee wɔnɔ ɔyɛ bunù,

²² onupɛ edzi asɛ Paulo, Apolo pɛnɔsɛ Kefa tsyɛɛ, kanɔ mɛ alo ɛkpã alo butsí alo obo kanɔ nɔ̀ pɛnɔsɛ kagɛ kabàa, bɔlɛ petee wɔnɔ ɔyɛ bunù,

²³ kɛlɛ Kristo ayɛ nonu, kɛlɛ Kristoɔ tsyɛ enu Owusoso Akaa ayɛ.

« Roimhe

Air adhart »

Lean sinn:

Ceanglaichean taic

Sanasan