Bìoball air-loidhne

Korintoanɛ 1 2 - Nyangbo New Testament

¹ Mɛelé alɛ mɔ, gɛba wɔnɔ ɔbha, ɛgɛba asɛ anɔ gɛenyi kaɖɔ ɖɔɖɔ piapii alo asɛ anɔ gɛ yɛ bubutì vɛ otugbà ana, nɛ kibeɛ gɛ itseɖe wɔnɔ ebuiɛ gɛ ɛzɛ mɔ nɛ Owusoso Akaa shu.

² Ɔmɔsɛ gɛzã wɔnɔ ɛshiɛ, ɛbhɛtɛ mɛishu asɛ itinyí kɛnanà ɔdɛ Yesu Kristo, nɛ̀ kana gɛ bakpalà yɛ nɛ butsi osiɛ shu.

³ Ɛba wɔnɔ ɔkɔ nɛ tibobotsò nɛ̀ kifusisi mɛ, nɛ̀ tishushukù gbagbagbà mɛ.

⁴ Mɛ ebuiɛ gɛ ɛɖɔ nɛ Owusoso Akaa shuɔ, etinu bubutì nɛ̀ ebui gɛ batɛ elũ alɛ esi, pɔ lenu ebui gɛ Owusoso Akaa Ɔfɔfuĩa nɔ ohumi nɔ obu ɔkasɛ,

⁵ sɛ tɛ̀ wɔnɔ tɛyɛyɛkɛŋã tɛbà zã banɔdzyrame bubuti abha, pɔ tɛ lɔzã Owusoso Aka yɛohumi nabha boŋ.

Bubutiɛ Gide Ɔfɔfuĩa Nɔ Mɛ

⁶ Bɔkaaɖɔ bubuti ebui alɛ nɛ bagɛ batɛ kpɛ iguɔ nɛishi, pɔ gɛnɛ obo kanɔ alɛ mɛ bubuti alo bagɛ baaŋã bukusì nɛ kalɛ mɛ, gɛ beti bedzi kɛdɔ̃ nanà.

⁷ Oo, Owusoso Akaa bubutiɛ gɛ bukpũɔ shu bɔɖɔ kaɖɔ, bubutìɛ gɛ bekpũ bɔlɛ pɛ Owusoso Akaa abalɛ elú akɔ bɔlɔ shu dadalɛ flogo pɛ kanɔ nɔ̀ abakpɛ kesi.

⁸ Kanɔ alɛ mɛ beekusi nanà egilũ bɔlɛ esi, ɔmɔsɛ pɛ otɛ ɔsɛ belũ bɔlɛ kesiɛ tsyɛ alo, bagɛ takpalà Apaleteɛ gɛ yɛishu dalɛ nɛ butsi osiɛ shu.

⁹ Asɛ kana gɛ bafɔnɔ elu asɛ, “Ebuiɛ gɛ awuhũ nanà akamɔ eɖiɛ, pɛ batɔ̃ eke elũ eɖiɛ, pɛ kɛka ba ananà ekpeɖekpeɖe mɛ tsyɛ eɖiɛ, alɛ Owusoso Akaa abalɛ elu akɔ bagɛ badɛmɛ yɛibuiɛ”

¹⁰ pɔ Owusoso Akaa ebu alɛ akasɛ bɔlɔ xɔnɔ ganà yɛ Ɔfɔfuĩa nɔ mɛ. Ɔfɔfuĩa ɔpɔ̃ɛ ebuiɛ petee mɛ, Owusoso Akaa yɛebui dzudzuɔ mɛ tsyɛ.

¹¹ Afana gɛ akpasɛ banɔishi pɛ ebeti kɛnɔnɔ gɛ kɛkpasɛ anɔ bhlatɔ yɛ ekpeɖekpeɖe mɛ ɔdɛ ɔfɔfuĩa nɔ gɛ ɔlɔ kpasɛ yɛ mɛɛ dza? Kidzo ɛlɛ nabha ananà etinyi kɛnɔnɔ gɛ kpasɛ Owusoso Akaa yɛekpeɖekpeɖe mɛ ɔdɛ Owusoso Akaa Ɔfɔfuĩa nɔ ete.

¹² Gɛnɛ ɔfɔfuĩa nɔ gɛode kanɔ nɔ̀ mɛ bɔyɛkɛ, pɔ ɔfɔfuĩa nɔ gɛode Owusoso Akaa ɔkɔ bɔyɛkɛ, sɛ tɛ̀ bulũ kɛgɛ Owusoso Akaa akɔ bɔlɔ kɛbhɛ mabuia mabuia niesi.

¹³ Ebui alɛ bɔɖɔ, gɛnɛ banɔdzyrame ebui nɛ̀ bubutì balɔkɔ akasɛ bɔlɔ ɔdɔ̃ nɔ, pɔ gana ebuiɛ gɛ Ɔfɔfuĩa nɔ kasɛ bɔlɔ abha, gɛ ladalɛ ɔfɔfuĩa mɛ ebuiɛ gɛ lakpasɛ alɛ mɛ ɔganà ɔfɔfuĩa ebuiɖɔɖɔ mɛ.

¹⁴ Anunɔ gɛ Ɔfɔfuĩa nɔ ma yɛmɛɛ, atɛyɛkɛ ebuiɛ gɛ alɛ ede Owusoso Akaa Ɔfɔfuĩa nɔ mɛ, ɔmɔsɛ lenu kɛwɔaga ibui ɔkɔɛ, kɛlɛ atɛ balà elũ alɛ esi ɔmɔsɛ ɔfɔfuĩa balɔkɔ elũ alɛ esi nɔ.

¹⁵ Anunɔ gɛ akpasɛ Ɔfɔfuĩa nɔ mɛɛ, ekulu kebhu nɛ ebuiɛ petee shu, pɔ yɛxɔnɔ ananà atɛlà kebhu ekulu niyɛ.

¹⁶ “Ɔmɔsɛ afana gɛenyi kɛgɛ Apaleteɛ atɔɖɔ pɛ abalà kasɛ yɛɔdɔ̃ɔ dza?” Bɔlɔ xɔnɔ, Kristo yɛibui tɔtɔɖɔ kɛlɛ kpasɛ bɔlɔ mɛ.

« Roimhe

Air adhart »

Lean sinn:

Ceanglaichean taic

Sanasan