Korintoanɛ 1 16 - Nyangbo New Testament

Bɔdɔ̃ yɛyɛkɛ Kɔ Owusoso Akaa Nɔnɔ

¹ Otsiɛ nɛ bɔdɔ̃yɛyɛkɛ ɔkɔ Owusoso Akaa nɔ shuɔ. Nɔbhɛtɛ kɛgɛ itseɖe Galiatia ɔhaa asɛ babhɛtɛ̀.

² Nɛ ɔgɔnɛ ka nyia ka ɔlɛ kiwui gɛiputɔ mɛ abhaa, anɔka nyia ka abalɛ ehoeyi teli elu edenɔ yɛɔdɔ mɔmɔ mɛ, azabalɛ alɛ elú, sɛ tɛ̀ onupɛ ɛbakuɔ bazaka yɛkɛ ehoeyi nɛ ananà ahɔɛ.

³ Klisoɔ onupɛ ɛbakuɔ, ɛbakɔ bagɛ nɔobuɔ olúɔ bɔdɔ̃ kakasɛ buplukpa, kɛlɛ ɛbakpɛ balɛ tɛ balɔkɔ bɔdɔ̃ kɔkɔ avɛnɔ Yerusalem.

⁴ Onupɛ kɛpɛ ɔkɔ mɛ tsyɛ sɛ tɛ̀ ɛvɛ nɛ alɛ, babà gbana mɛ avɛnɔ.

Kɛdɔ Bibisi Ɔkɔ Ishu

⁵ Onupɛ ɛgã koeyì nɛ Makedonia nɔ, ɛbaba wɔnɔ ɔkɔ, ɔmɔsɛ ɛdɛgã Makedonia mɛ koeyì.

⁶ Ogilu awɔ̃ɔ ɛbazã wɔnɔ ɔbha ɔvɛnɔ kibè tili, alo ɛbazã wɔnɔ ɔbha nɛ subhà ɛdɔbe, sɛ tɛ̀ nɔlà plɛnɔ mɛ nɛ mɛidzo gagã mɛ nɛ ɔkɔ nyia ɔkɔ gɛ ɛvɛɛ.

⁷ Ɛgɛ pɛ sɛ tɛ̀ ɛmɔ wɔnɔ otsiɛ, tɛ̀ iɖi wɔnɔ ete tɛ̀ ɛfala, ɛbapɛ sɛ tɛ̀ ɛbazã wɔnɔ ɔbha kɛbɔɛ gɛ onupɛ Apaleteɛ adɛmɛ.

⁸ Pɔ ɛbazã Efeso odiyinɔ Pentekoste kiwui nabha,

⁹ ɔmɔsɛ kidzò gbagbla tili dalɛ ɔkɔ mɛxɔ̃ɛ wɔawɔa, kɛlɛ banɔ kpekpè alɛ gɛ balɔɛtití nɛ mɛishu.

¹⁰ Onupɛ Timoteo abaa, nɔoɖi ɛlɛ kɔ ɔsɛ etisì kifu nɛ kibui nanà shu, nɛ kibeɛ gɛ alɛ wɔnɔ ɔbha, ɔmɔsɛ awɔa Apalete nɛxɔ̃ɛ asɛ mɛ ana.

¹¹ Ananà atɛɖɔ asɛ atɛa yɛkɛ yɛ. Nɔkpɛ yɛidzo sɛsɛ nɛ ishu yɔyɔ mɛ, sɛ tɛ̀ etsodzi aba mɛɔkɔ. Iɖì yɛ nɛ badzya idzomɛ.

¹² Otsiɛ nɛ bɔlɔ adzya Apolo shuɔ, ɛkpalà yɛ gagalĩi sɛ avɛ nɛ̀ wɔ nɛ̀ badzyaa. Tsyɛ alo agɛ pɛ asɛ tɛ̀ avɛ otsiɛ flogo, pɔ abavɛ gɛ onupɛ kibeɛ kɔ kidzoɔ.

¹³ Nɔoɖi wɔnɔ shu abha piapii, nɔzã gagalĩ nɛ tɛyɛyɛkɛŋã mɛ, nɔodzi banyɛ gɛ bakpɛ̀ kemi, nɔzã gagalĩ.

¹⁴ Nɔbhɛtɛ kɛka nyia ka nɛ tɛdɛdɛmɛ nɔ mɛ.

¹⁵ Nɔonyi ɔsɛ Stefana yɛɔpã mɛ anɛ balɛenu banɔ gɛ beputɔ pɛ etsyinà nɛ Axaya, kɛlɛ balɔkɔ balɛishu akpɛ banɔ dadalɛ axɔ̃ɛ wɔawɔa mɛ. Ɛkpalà wɔnɔ, badzya,

¹⁶ ɔsɛ tɛ̀ nɔkpɛ kɛtakpu esi asɛ banɔ alɛ nɛidi nɛ̀ anɔ aka nyia aka tsyɛ gɛ afala eku kɛxɔ̃ɛ wɔawɔa ɛlɛ mɛ pɛ aatɔ nɛ ɛlɛ shuɔ.

¹⁷ Same eku mɛ nɛ kibeɛ gɛ Stefana, Fortunato nɛ̀ Axaiko ebekuɔ, ɔmɔsɛ bakɔ wɔnɔ kɛgɛ nɔpɛ nɔ.

¹⁸ Ɔmɔsɛ bakɔ mɛ nɛ̀ wɔnɔ ɔfɔfuĩa nɔ ɔnyɛmɛ. Kɛlɛ sɛ bɔbakà banyɛ alɛ nɛidi.

Bɔdɔ̃ Sɛsɛnɔ Gɔgɔɛ Nɔ

¹⁹ Ɔhaa gɛ ɔlɛ Asia bɔdɔ̃ mɛ asɛnɛ wɔnɔ asɛsɛ. Akwila nɛ̀ Priskila basɛnɔ wɔnɔ piapii nɛ Apaleteɛ inyeɛ mɛ, kana ɔhaa gɛ baatsyɔa nɛ balɛ bɔpã mɛ tsyɛ asɛnɛ wɔnɔ.

²⁰ Badzya nɛ ɛkɛlɛ petee asɛnɛ wɔnɔ. Nɔsɛnɛ bagɔlɔ nɛ̀ ɔhɔɛ dadalɛ kpɛkpɛ nɛ bagɔlɔ oli.

²¹ Mɛ, Paulo mɛfɔnɔ bɔdɔ̃ sɛsɛnɔ ɔlɛ nɛ̀ mɛahɔɛ.

²² Onupɛ anɔ teli agɛ dɛmɛ nɔ nɛ Apaleteɛ, kibui ɖɔɖɔ ɔkpɛ anɔ zã yiede. O, Apalete, ba!

²³ Apalete Yesu yɛ tibhui bhuibuɔ zã ɔplɛnɔ wɔnɔ.

²⁴ Mɛ tɛdɛdɛmɛ nɔ zãplɛnɔ wɔnɔ petee nɛ Yesu Kristo mɛ. Amen.