Bìoball air-loidhne

Korintoanɛ 1 15 - Nyangbo New Testament

Yesu Tɛlɔlɔ Odenɔ Bekpuɔ Mɛ

¹ Klisoɔ otsiɛnɔ mɛadzya alɛ, ɛpɛsɛ bakà wɔnɔ nɛ kibui gbangbã gɛ ɛɖɔ tseɖe wɔnɔ shu, kibuiɛ gɛ nɔyɛkɛ pɛ nɔotsiɖi kɛlɛ abha.

² Ɔgana kibui gbangbã ɛlɛ mɛ bebú wɔnɔ ɛkpã, gɛ onupɛ nɔnyanã kibuiɛ gɛ itseɖe wɔnɔ mɛ vunɔ gagalĩ. Onu gɛnanaa, wɔnɔ tɛyɛyɛkɛŋã ma kɛnanà mɛ.

³ Ɔmɔsɛ kɛgɛ mɛyɛkɛ kɛlɛ mɛtsyɛ etseɖe wɔnɔ asɛ kibui gɛiputɔ kɛdzã kiwuhũ ana, sɛ Kristoɔ ebetsí nɛ bɔlɔ ebui kpa bhɛbhɛtɛ nɛtakpu nɛ ebuiɛ gɛ bafɔnɔ nulũ,

⁴ kɛlɛ bavɔbɔ yɛ, kɛlɛ befeke yɛ nɛ kiwui tramɛ nabha nɛ ebuiɛ gɛ bafɔnɔ nulũ,

⁵ Kɛlɛ ebu yɛishu akasɛ Petro nɛ̀ banɔ lɔfɔ nɛ̀ taabha.

⁶ Nɛ kɛlɛ niedeɛ, ebu yɛishu akasɛ badzya gɛ bekpè adɛ akpã teti nɛ kibè tinikpo mɛ, beeteli nɛ balɛ mɛ akalɛ nɛkpã, pɔ beteli xɔnɔ etitsí.

⁷ Kɛlɛ ebu yɛishu akasɛ Yakobo, nɛ̀ banɔkpɛkpɛ petee,

⁸ kɛlɛ gɔgɔɛ nɔ ebebú yɛishu akasɛ mɛ gɛ bamɔ asɛ anɔ gɛ agɛzã piapii ana.

⁹ Ɔmɔsɛ mɛinù banɔkpɛkpɛ balɛ agɔgɔɛ nɔ gɛ ɛgɛ shɔnɔ ɔsɛ bekulu mɛ asɛ anɔkpɛkpɛ flogo, ɔmɔsɛ ɛzɛtɔnɔ Owusoso Akaa yɛɔhaa niede.

¹⁰ Pɔ nɛ kana gɛ Owusoso Akaa ebhui mɛ ebuɔ shu soɔ, idzi kɛdɔ̃ nɔnɔ gɛ kɛlɛ mɛinu oboɔ, kɛlɛ yɛ tibhui bhuibuɔ wɔa axɔ̃ɛ. Oo, ɛwɔa axɔ̃ɛ gagalĩ ɔdɛ balɛ petee, pɔ gɛnɛ mɛ, Owusoso Akaa tibhui bhuibuɔ kɛlɛ zã ɔplɛnɔ mɛ so.

¹¹ Kidzi asɛ mɛ alo balɛ tsyɛ, kibui ɛlɛ bɔɔɖɔ, kɛlɛ kibui ɛlɛ abha nɔyɛkɛ ɔŋã.

Bɔnɔ tsitsíɛ Tɛlɔlɔ

¹² Pɔ onupɛ baɖɔ kibuiɛ sɛ befeke Kristoɔ edenɔ bekpuɔ mɛ, kiɖuwoe so pɛ wɔnɔ beteli ɔbɔɖɔ sɛ tɛlɔlɔ denɔ bekpumɛ ma dza?

¹³ Onupɛ banɔ tsitsiɛ tɛlɔlɔ ma, kɛlɛ begi feke kristoɔ tsyɛ edenɔ bekpuɔ mɛ.

¹⁴ Kɛlɛ onupɛ begi feke Kristoɔ tsyɛ edenɔ bekpuɔ mɛ, kɛlɛ bɔlɔ kibui ɖɔɖɔ nɛ̀ wɔnɔ tɛyɛyɛkɛŋã ma kɛnanà mɛ.

¹⁵ Ɔlɔkɔ ɔplɛnɔ ɔdɛ ana, budzì banɔ gɛ bɔɖɔ kɛsɛnɛ ibui nɛ Owusoso Akaa shu. Ɔmɔsɛ bɔɖɔ kaɖɔ nɛ Owusoso Akaa shu sɛ efeke Kristo edenɔ bekpuɔ mɛ. Pɔ egifeke yɛ odenɔ bekpuɔ mɛ, gɛgbã bekpuɔ azalɔ.

¹⁶ Pɔ onupɛ bagɛ kɔ bekpuɔ alɔɔ, kɛlɛ begi feke Kristoɔ tsyɛ edenɔ bekpuɔ mɛ.

¹⁷ Kɛlɛ onupɛ begi feke Kristoɔ denɔ bekpuɔ mɛɛ, wɔ tɛyɛyɛkɛŋã ma kɛnanà mɛ, nɔkɔ kpasɛ wɔnɔ ebui kpa bhɛbhɛtɛ mɛ.

¹⁸ Kɛlɛ banɔ nɔ nyɔ̃ɔ gɛ betsí nɛ Kristoɔ mɛ tsyɛ ayala.

¹⁹ Onupɛ kanɔ alɛ mɛ ete shu so pɛ bulũ awɔ nɛ Kristo abhaa, kɛlɛ bunù ashagabui elete ɔdɛ anɔnyianɔ.

²⁰ Pɔ kibui gbã kinu ɔsɛ befeke Kristoɔ edenɔ bekpuɔ mɛ, yɛedzì anɔ gɛiputɔ gɛ alɔ akɔ bagɛ betsiɛ petee.

²¹ Pɔ asɛ kana gɛ butsì gã anɔ abha baa, tɛlɔlɔ denɔ bekpuɔ mɛ tsyɛ gã anɔ abha ba.

²² Asɛ kana gɛ denɔ Adam mɛ bɔlɔ nyɔ̃ɔ tsiɛɛ, kidzo ɛlɛ nabha gana Kristo abha banɔ nɔ nyɔ̃ɔ tsyɛ bamɔ ɛkpã.

²³ Pɔ anɔ nyia anɔ nɛ yɛibè gɛ batɔɖɔ akɔɛ. Kristo gɛenu anɔ gɛiputɔ, gɛ onupɛ etsodzi aba ebefeke bagɛ benu yɛayɛ.

²⁴ Kɛlɛɛ́ kibè gɔgɔɔ babà, gɛ onupɛ ashɛnɛ ahɔɛ nɛ bukusi ŋaŋã shu akɔ Owusoso Akaa gɛenu Yɛakaa nɛ kibeɛ gɛ ayɛɛ bukusiɛ petee, ɔshaeleteɛ nɛ̀ ohumi balɛ bukusi ɔŋãkɔ.

²⁵ Ɔmɔsɛ kɛlɛ sɛ tɛ̀ aŋã bukusi ɔvɛnɔ kibeɛ gɛ edzu ɔtsɛɖɛ nɛ bagɛ batɛ adɛmɛ yɛibuiɛ petee abha.

²⁶ Kɛdɔ̃ kpa gɔgɔɛ nɔ gɛ ebezĩɛ kɛlɛinu butsí.

²⁷ Ɔmɔsɛ “atɛkpɛ kɛka nyia ka nɛ yɛtsɛɖɛ esi.” Otsiɛnɔ onupɛ kibuiɛ ɖɔ sɛ bakpɛ “kɛka nyia ka” nɛ yɛesiɛ, kɛlɛ, kɛlɛ mɛ dalɛ ɔsɛ Owusoso Akaa gɛ akpɛ kɛka nyia ka nɛ Kristo esiɛ ama kɛlɛ mɛ.

²⁸ Onupɛ abhɛtɛ ɛlɛ ana, kɛlɛ Yɛeyianyɛ akpɛ kɛka nyia ka nɛ yɛesiɛ abazã yɛesi, sɛ tɛ̀ Owusoso Akaa edzì kɛtakpu akɔ kɛka nyia ka.

²⁹ Kliso otsiɛ onupɛ tɛlɔlɔ denɔ bekpumɛ kɛma, kɛlɛ so pɛ bakpɛ bulĩ akɔ alɛ nɛ banɔ tsitsíɛ nɛtakpu? Onupɛ begi feke bekpuɔ, kɛlɛ so pɛ bakpɛ bulĩ akɔ alɛ?

³⁰ Kɛlɛ bɔlɔ xɔnɔ, kɛliso pɛ bɔkpɛ ishu nɛ kibui zizĩ mɛ ɔɖatata ka nyia ka mɛ dza?

³¹ Ɛtɔnɔ butsí kibe nyia be-mɛadzya alɛ kibui gbã mɛɖɔ-asɛ kana gɛ ɛmɔ same nɛ wɔnɔ kɛtakpu nɛ bɔlɔ Apalete Yesu Kristo mɛ.

³² Onupɛ ɛta keyu nɛ̀ bagãhoe nɛ Efeso nɛ anɔdzyrame ebui shu tsyɛ elo, kiɖe mɛmɔ odenɔ ɛlɛ mɛ? Gɛ onupɛ begifeke bekpuɔ, “Nɔkɔ bɔŋã tɛ̀ bɔwɔɛ, ɔmɔsɛ kivũ ko butsi.”

³³ Nɔtɛkɔ bawɔɛ wɔnɔ, “Ɔhakpa tɛkpɛkpɛ zĩ ɛkpã zazãna gbangbã.”

³⁴ Nɔotsodzi ɔba wɔnɔ ekpeɖekpeɖe mɛ asɛ gɛ kɛlɛ sɛ nɔbhɛtɛ, tɛ̀ nɔyɔlɔ ebui kpa tɛbhɛbhɛtɛ, ɔmɔsɛ banɔ teli etinyi asɛ Owusoso Akaa alɛ-ɛɖɔ kibui ɛlɛ kpɛ wɔnɔ kiwũi nɔ.

Tɛlɔlɔ Denɔ Bekpuɔ Mɛ

³⁵ Pɔ anɔ teli xɔnɔ ebebisì asɛ, “Kidzo ɖuwoe abha befeke bekpuɔ dza? Ishupi ɖuwoe edì babà lɔkɔ amana dza?”

³⁶ Bɔga kibui ɖuwoe di nɛ ɔlɛ! Kɛnanà ma gɛ ɔɖa pɛ kɛgi tsiɛ pɛ kɛbà zã nɛkpã.

³⁷ Onupɛ nɔɖa kɛdɔ̃, nɔtɛɔ ɖa ishupiɛ gɛ bazã, pɔ kɛdɔ̃yi ete kinu, asɛ agɔ̃lɛ alo kɛdɔ̃ɛyi ka nyia ka ɛdi ana.

³⁸ Pɔ Owusoso Akaa ɔkɔ ɛlɛ ishupi asɛ gɛ apɛ ana, kɛlɛ akɔ kɛdɔ̃ɛyi ka nyia ka nɛ̀ kɛlɛ ishupi.

³⁹ Ishupiɛ petee gɛshɔ̃, ishupi tinikpo ɛdi lɛ banɔdzyrame ahɔɛ, bagã tsyɛ ayɛkɛ bɔbhlatɔ ɛdi, bɔzhɔɛ nɔ tsyɛ yɛkɛ tuli idi kɛlɛ akpa nɔ tsyɛ ayɛkɛ bɔbhlatɔ.

⁴⁰ Kititì ishupi lɛ, kɛlɛ kesiakpa abha ishupi tsyɛ lɛ, pɔ tɛpɔpɔɖiɛ gɛlɛ kititì ishupiɛ shuɔ nu tinikpo ɛdi, kɛlɛ tɛpɔpɔɖiɛ gɛlɛ kesiakpa abha ishupiɛ tsyɛ shuɔ nu bɔbhlatɔ.

⁴¹ Tɛpɔpɔɖi tili idi lɛ kiwuiɛ ahɔɛ, kɛlɛ tɛpɔpɔɖi bhlatɔ lɛ woele nɔ tsyɛ ahɔɛ nɛ̀ awɔɛ, kɛlɛ kɛwɔɛ gã ɔtɔ ɔkɔ kɛwɔɛ gɛ tɛpɔpɔɖi lɛ ɛlɛ ahɔɛ.

⁴² Kana kɛbazã nɛ tɛlɔlɔ denɔ bekpuɔ mɛ shu. Ishudzya gɛ baɖa nu kɛdɔ̃ tsɔtsɔmɔ̃, pɔ bebe feke ɛlɛ gɛ kɛzakà tsɔmɔ̃,

⁴³ baɖa ɛlɛ nɛ awuĩ mɛ, kɛlɛ befeke ɛlɛ nɛ ishudadalɛ mɛ, baɖa ɛlɛ nɛ tibobotsò mɛ, kɛlɛ befeke ɛlɛ nɛ ohumi mɛ,

⁴⁴ baɖa ɛlɛ asɛ ishudzya ana, pɔ befeke ɛlɛ nɛ ɔfɔfuĩa mɛ. Onupɛ ishudzya lɛɛ, kɛlɛ ɔfɔfuĩa tsyɛ ɔlɛ.

⁴⁵ Asɛ gɛ bafɔnɔ elu asɛ, “anyɛ gɛiputɔ gɛedzì adam abazã nɛkpã”, Adam gɔgɔɛ nɔ yɛedzì-ɔfɔfuĩa gɛ lɔkɔ ɛkpã.

⁴⁶ Ɔfɔfuĩa mɛ anunɔ egiputɔ ba, pɔ ishupiɛ ɛlɛ putɔ flogo pɛ ɔfɔfuĩa nɔ ba.

⁴⁷ Anyɛ gɛiputɔ edzì osubhududu odenɔ kesiakpa mɛ, kɛlɛ anyɛ abhalà ede kititì aba.

⁴⁸ Kana gɛ kesiakpa abha anyɛ azã, kana bagɛ betsiɖì kesiakpa nabha tsyɛ alɛ, kɛlɛ asɛ kana gɛ kititì anyɛ edziɛ, kana bagɛ balɛ kititiɛ tsyɛ alɛ.

⁴⁹ Asɛ kana gɛ bamɔ bɔlɔ budzì asɛ kesiakpa abha anɔ nɔ̀ɔ, kana bɔbà zã asɛ anunɔ gɛ ede kititiɛ.

⁵⁰ Mɛadzya alɛ, ɛkɔ notì ɔsɛ ishupi ɛlɛ nɛ̀ dzyosu atɛba mɔ Owusoso Akaa bukusi bɔpã, pɛnɔsɛ kɛdɔ̃ gizĩɛ bamɔ ɔŋãkɔ odenɔ kɛdɔ̃ gitiziɛ ɔkɔ.

⁵¹ Nɔtaatɔ̃ tɛ̀ mɛitseɖe wɔnɔ kibui kpukpũ ɛlɛ. Bɔlɔ nyɔ̃ɔ tɛbàtsí, pɔ bebètsyina bɔlɔ nyɔ̃ɔ,

⁵² nɛ odunu mɛ, nɛ tɛwɔsɛ tɛdadã mɛ, gɛ babɔ̀ kexoele gɔgɔɛ nɔ. Ɔmɔsɛ kexoele nɔ abàbɔ, babà nyɛmɛ bekpuɔ gɛ bezeke tsì eɖi, kɛlɛ bebètsyina bɔlɔ.

⁵³ Ɔmɔsɛ kɛlɛ sɛ kɛdɔ̃ gɛbaziɛ lɔkɔ kɛgɛ tɛbàziɛ akpɛkpɛ akpɛ, kɛlɛ tɛ̀ ishupiɛ gɛbàtsɔmɔ lɔkɔ ɛgɛ tɛbatsɔmɔ akpɛkpɛ ɔkpɛ.

⁵⁴ Onupɛ balɔkɔ ishupiɛ gɛtɛ bàtsɔmɔ akpɛkpɛ akpɛ akɔ ishupiɛ gɛbà tsɔmɔ̃ɔ, pɛ balɔkɔ ishupiɛ gɛbàzã tihɔɔ akpɛkpɛ akpɛ kɔ ishupiɛ gɛtɛ bàzã tihɔɔ nɔ, kɛlɛ kibuiɛ gɛ bafɔnɔ elúɔ babà kɛlɛ mɛ ɔsɛ, “Bamɛnɔ butsi edenɔ kabhaŋaŋã mɛ.”

⁵⁵ Oo butsí, fakɔ wɔ kabhaŋaŋã alɛɛ dza? Oo butsí, fakɔ kɛgɛ ɔlɔkɔ ɔtá banunɔ lɛ dza?

⁵⁶ Kɛgɛ butsì lɔkɔ ɔtà banɔ nɔ kɛlɛinu kibui kpa bhɛbhɛtɛ, kɛlɛ kibui kpa kɛlɛ ohumi nɔ ɔlɛ onù ɔsha.

⁵⁷ Pɔ ahɔɛ huhu yɛenu Owusoso Akaa ayɛ! Yɛakɔ bɔlɔ kabhaŋaŋã ɔganà Apalete Yesu Kristo abha.

⁵⁸ Klisoɔ, mɛadzya alɛ mɔ, nɔzã gagalĩ. Nɔtɛkɔ kɛnanà tii wɔnɔ. Nɔlɔkɔ wɔnɔ ishu petee ɔkɔ Apalete nɛxɔ̃ɛ wɔawɔa, ɔmɔsɛ nɔonyi ɔsɛ wɔnɔ kɛxɔ̃ɛ wɔawɔa ɔkɔ Apaleteɛ tɛbàdzì kɛlɛɛ etee.

« Roimhe

Air adhart »

Lean sinn:

Ceanglaichean taic

Sanasan