Bìoball air-loidhne

Korintoanɛ 1 14 - Nyangbo New Testament

Bɔdɔ̃ kɔkɔ Gɛinu Kibuiɖɔlu Nɛ̀ Beluhũvɔvɔ Tihuhu

¹ Nɔtɔnɔ tɛdɛdɛmɛ nɔ kidzoɔ ede gagalĩ, tɛ̀ nɔpɛ ɔfɔfuĩa mɛ bɔdɔ̃ kɔkɔ, asɛ kibuiɖɔlu bɔdɔ̃ kɔkɔ ana.

² Ɔmɔsɛ anɔka nyia ka gɛ ehu beluhũ vɔvɔ, gɛnɛ banɔ yɛehu bɔlɛ akɔ pɔ Owusoso Akaa. Kibui gbã, ananà etielũ kɛgɛ yɛaɖɔ niesi, aɖɔ ebui gɛ labhɛtɛ kibì nɛ̀ yɛ ɔfɔfuĩa nɔ ohumi.

³ Pɔ anɔka nyia ka gɛ aɖɔ kibui elu xɔnɔ, aɖɔaɖɔ akɔ banɔ sɛ tɛ̀ akpɛ balɛ ohumi, tɛ̀ akpɛ balɛ kemi nɛ̀ tɛ ayɔ balɛ ishumɛ.

⁴ Anunɔ gɛ ehu beluhũvɔvɔ xɔnɔ, yɛishu ete shu yɛabhɔ ewunɔ kabha, pɔ anunɔ gɛ aɖɔ kibui elu xɔnɔɔ, ɔhaa yɛabhɔ ewunɔ kabha.

⁵ Ɛbapɛ sɛ tɛ̀ wɔnɔ mɛ aka nyia aka ezehu beluhũ vɔvɔ, pɔ kɛbapɛ ɔkɔ mɛ ɔdɛ gɛ onupɛ nɔɖɔ kibui olu boŋ. Anunɔ gɛ aɖɔ kibui elùɔ egbogblo adɛ anunɔ gɛ eehu beluhũ vɔvɔ, ɔdɛ ɔsɛ ebu kɛgɛ yɛaɖɔ niesi sɛ tɛ̀ alɔkɔ abhɔ ɔhaa ewunɔ kabha nɔ.

⁶ Mɛadzya alɛ, otsiɛnɔ onupɛ ɛba wɔnɔ ɔbhà pɛ ihu beluhũ vɔvɔɔ, kɛgbangbã ɖuwoe mɛbadzì ɔkɔ wɔnɔ, ɔdɛ ɔsɛ ɛmanà wɔnɔ kibui tili gɛ bebu akasɛ mɛ alo kibuititì alo kibui gɛ baɖɔ eluɔ alo kibui gɛ baɖɔ alɔkɔ akpalà banɔ nɔ dza?

⁷ Nɛ bɔdɔ̃ gɛ ɛkpã ma bɔlɛ mɛ, pɛ bɔɔkpɛ ozĩ asɛ baabe nɛ̀ sangũ tsyɛ, afana gɛbetì ɔdzɛ nɔnɔ gɛ beebhoɔ onupɛ iliɛmɛ ediedi gibu ɔdzɛ kasɛ gikoeyiɛ dza?

⁸ Kidzo ɛlɛ nabha, onupɛ kexoele nɔ tsyɛ oliɛmɛ ɔgɛ dalɛ, afana gɛ aba balɛ asɛ avɛ keyuɔ dza?

⁹ Kana kibui ɛlɛ ɛlɛ wɔnɔ kawɔ̃pɛ mɛ. Odiyinɔ sɛ nɔlɔkɔ kinekeɛ ɖɔ bubutì ebui nɔ, afana gɛ ebelũ kɛgɛ nɔɖɔ niesiɛ dza? Kɛlɛɛ́ nɔ mɛ ete wɔbɔzɔɖɔ kaɖɔ kpɛ xɔɔ.

¹⁰ Kibui gbã kinu sɛ beluhũ ediedi alɛ kanɔ nɔ̀ mɛ xɔnɔ, pɔ buluhũ nanà ma gɛ kesilulũ ama akɔ bɔlɛ.

¹¹ Klisoɔ onupɛ igilũ kibui tili esi gɛ anɔ teli aɖɔɔ, efu ete mɛinu ɔkɔ agɛ yɛaɖɔaɖɔ, kɛlɛ yɛtsyɛ enu efu akɔ mɛ ana.

¹² Kana kibui ɛlɛ ɛlɛ wɔnɔ kawɔ̃pɛ mɛ. Gɛ nɔpɛ ɔsɛ tɛ̀ nɔyɛkɛ ɔfɔfuĩa mɛ bɔdɔ̃ kɔkɔ soɔ, nɔkpɛ kemi tɛ̀ wu kabha nɛ bɔdɔ̃kɔkɔ nɔnɔ gɛ bɔbà bhɔ ɔhaa wunɔ kabha mɛ.

¹³ Nɛ kibui ɛlɛshu soɔ, anunɔ gɛ yɛehu beluhũvɔvɔ, ekulu Owusoso Akaa sɛ tɛ̀ alabù kɛgɛ yɛaɖɔ niesi.

¹⁴ Ɔmɔsɛ onupɛ ɛɖɔ kaɖɔ nɛ beluhũvɔvɔ mɛ, mɛ ɔfɔfuĩa nɔ ɔlɔ kulu Owusoso Akaa, pɔ mɛ ekpeɖekpeɖeɛ xɔnɔ atɛamɔ eyuyù nanà denɔ kɛlɛ mɛ.

¹⁵ Kliso kiɖe mɛbabhɛtɛ dza? Ɛbalɔkɔ mɛ ɔfɔfuĩa nɔ kulu Owusoso Akaa nɔ, kɛlɛ iwlui bakulù Owusoso Akaa nɛ̀ mɛ ekpeɖekpeɖeɛ tsyɛ, ɛbazhã ɔdzɛ nɛ̀ mɛ ɔfɔfuĩa nɔ, kɛlɛ iwlui bazhã ɔdzɛ nɛ̀ mɛ ekpeɖekpeɖeɛ tsyɛ.

¹⁶ Onupɛ ɔɔkpɛ̀ Owusoso Akaa nɛinye nɛitití nɛ wɔ ɔfɔfuĩa nɔ, kiɖe anunɔ gɛ akpasɛ bagɛ begilũ kɛliesi mɛ abaɖɔ sɛ “Amen” ɔkɔ ahɔɛ gɛ ohuɔ, nɛ kibeɛ gɛ egilũ kibui nɔnɔ gɛ kɛlɛ wɔɖɔ niesiɛ dza?

¹⁷ Obozohu ahɔɛ piapii xɔnɔ, pɔ ɔgɛbhɔ anɔbhla xɔnɔ ewunɔ kabha.

¹⁸ Ihu Owusoso Akaa ahɔɛ ɔsɛ iihu beluhũ vɔvɔ ɔdɛ wɔnɔ nyɔ̃ɔ.

¹⁹ Pɔ nɛ ɔhaa xɔnɔ mɛɛ, ɛbapɛ sɛ tɛ̀ mɛɖɔ bubutì ebui teti tɛ̀ ɛlɔkɔ kpalà bagɔgɔɛ nɔ nɔ ɔdɛ ebui ihotù lɔfɔ ɖɔɖɔ nɛ beluhũ vɔvɔ mɛ.

²⁰ Mɛadzya alɛ, nɔyɔlɔ ekpeɖekpeɖe mɛ tɛbhɛbhɛtɛ asɛ bunuvɔɛ ana. Nɛ ebui kpa tɛbhɛbhɛtɛ shu xɔnɔ, nɔzã asɛ bunuvɔɛ ana, pɔ nɛ wɔnɔ ekpeɖekpeɖe bhɛbhɛtɛ mɛ xɔnɔ nɔzã asɛ banɔ sheshè ana.

²¹ Nɛ ɔshamɛ, bafɔnɔ elú asɛ, “Ɔgana beefu gɛ beehu beluhũ vɔvɔ abhaa, kɛlɛ odenɔ beefu olugbũɔ mɛ ɛbaɖɔaɖɔ ɔkɔ banɔ alɛ, pɔ nɛ kɛlɛ mɛ tsyɛ, batɛbà taatɔ̃ nɛ mɛ,” kana Apaleteɛ aɖɔ.

²² Beluhũvɔvɔ xɔnɔ, kibui bubukasɛ kinu, gɛnɛ kɔ bagɛ ayɛkɛ aŋã, pɔ ɔkɔ bagɛ agɛ yɛkɛ aŋã, kibuiɖɔlu xɔnɔ, kɛlɛ ɔkɔ bagɛ ayɛkɛ aŋãa, gɛnɛ bagɛ agɛ yɛkɛŋãa.

²³ Kliso onupɛ ɔhaa petee ebeshogòɔ pɛ aka nyia aka ehu beluhũvɔvɔ, pɛ bagɛ betielũ kɛlɛ esiɛ, alo pɛ bagɛ agɛ yɛkɛŋãa teli ebekoeyìɛ pɔ, batɛ baɖɔ sɛ nɔmà piapii dza?

²⁴ Pɔ onupɛ anɔ gɛ agɛ yɛkɛŋã, alo anunɔ gɛ etielũ buluhũ niesi ebekoeyì nɛ kibeɛ gɛ anɔ ka nyia ka aaɖɔ kibui elu xɔnɔɔ, ebelũ ɛlɛ esi ɔsɛ ebui kpa bhɛbhɛtɛ elete yɛenu kɛlɛ babalɔkɔ ebui alɛ petee ekulu kebhu nii nɔ̀,

²⁵ kɛlɛ ebui kpukpũɔ gɛ akpasɛ yɛitúɔ mɛ ebebu alɛishu kasɛ. Klisoɔ ebezhi nì ekluisi esi pɛ abakpɛ Owusoso Akaa nɛitití nɛ̀ ozĩ asɛ, “Owusoso Akaa akpasɛ wɔnɔɛishi kɛgbã!”

Kidzo Nabha Gɛ Bakpɛ̀ Kɛtakpu esi

²⁶ Mɛadzya alɛ mɔ, kiɖe buwlui zɛbaɖɔ dza? Onupɛ nobo shogòɔ, ɔdzɛ zhazhã ɔlɛ aka nyia aka ahɔɛ alo kibui gɛ balɔkɔ akpalà anɔ, kibui bubu kasɛ, beluhũ vɔvɔ tihuhu nɛ̀ bɔlɛ esi bubu lɛ aka nyia aka ahɔɛ. Kɛlɛ sɛ babhɛtɛ alɛ nyɔ̃ɔ tɛ ledzi ohumi kpɛkpɛ ɔkɔ ɔhaa.

²⁷ Onupɛ anɔ teli aɖɔaɖɔ nɛ beluhũ vɔvɔ mɛɛ, banɔ taabha, alo pɛ bekpè ana tataa-betihu buluhũɔ nɛ kibè tinikpo mɛ, kɛlɛ tɛ̀ anɔ bhlatɔ ebu kɛlɛ esi.

²⁸ Onupɛ agɛ yɛebebu kɛlɛ esi ama, anunɔ gɛ yɛaɖɔaɖɔ ataatɔ̃ nɛ ɔhaa mɛ tɛ̀ aɖɔaɖɔ ɔkɔ yɛishu nɛ̀ yɛ Owusoso Akaa ete.

²⁹ Ebuiɖɔluanɛ asɛ taabha alo tata baɖɔaɖɔ, kɛlɛ tɛ̀ bagɔgɔ banyɔ kibuiɛ gɛ kɛlɛ yɛaɖɔ shu piapii.

³⁰ Kɛlɛ onupɛ bebu kibui tili kasɛ anunɔ gɛ edzi kesiɛ, anɔ gɛiputɔ gɛ yɛaɖɔaɖɔ azɔkɔ yɔlɔ.

³¹ Ɔmɔsɛ wɔnɔ nyɔ̃ɔ ɔbɔlà ɖɔ kibui olu, sɛ tɛ̀ aka nyia aka amɔ kibui denɔ kɛlɛ mɛ plɛnɔ kemikpɛkpɛ.

³² Ebuiɖɔluanɛ ɔfɔfuĩa nɔ ɔkpasɛ ebuiɖɔluanɛ niesi.

³³ Ɔmɔsɛ Owusoso Akaa etinu Akaa gɛ efutsù pɔ ishu yɔyɔ anɔ yɛenu. Asɛ gɛ kɛlɛ banɔ dadalɛ ɔha petee mɛ ana,

³⁴ baadzɛ ataatɔ̃ nɛ ɔhaa mɛ. Bagɛ kɔ balɛidzo asɛ tɛ̀ baɖɔaɖɔ, pɔ bezhinì balɛ ishu esi, asɛ gɛ Ɔsha ɔɖɔ ana.

³⁵ Onupɛ bapɛ asɛ tɛ̀ bebisi kibui tili mɛelũɔ, bebisi balɛ enyine alɛ nɛ bɔpã mɛ, ɔmɔsɛ kinu kiwũi ɔkɔ anɔdzɛ asɛ tɛ̀ aɖɔaɖɔ nɛ ɔha mɛ.

³⁶ Wɔnɔ ɔkɔ Owusoso Akaa kibuiɛ de baa dza? Pɛnɔsɛ wɔnɔ ete ɔkɔ kɛtɛba kuɔ dza?

³⁷ Onupɛ abhɛtɛ anɔ teli asɛ enu ebuiɖɔluanɔ alo ayɛkɛ ɔfɔfuĩa mɛ kɛdɔ̃ kɔkɔɔ, nɔkɔ yɛetì asɛ kibuiɛ gɛ ɛfɔnɔ kɔ wɔnɔ nu Apaleteɛ ɔsha kpɛkpɛ.

³⁸ Onupɛ agɛ yɛkɛ kibui ɛlɛ, batɛbà yɛkɛ yɛtsyɛ.

³⁹ Klisoɔ, mɛadzya alɛ mɔ, nɔkpɛ kemi tɛ̀ nɔɖɔ kibui elú, kɛlɛ nɔtɛ zɔkɔ kaɖɔɖɔ ɔyɔlɔ nɛ beluhũ vɔvɔ mɛ tsyɛ.

⁴⁰ Pɔ nɔbhɛtɛ kɛka nyia ka tɛ̀ kɛshɔ kɛlɛ nɔbhɛtɛ ɛlɛ nɛ kidzoɔ gɛ bashɔrɔ elúɔ nabha.

« Roimhe

Air adhart »

Lean sinn:

Ceanglaichean taic

Sanasan