Korintoanɛ 1 13 - Nyangbo New TestamentTɛdɛdɛmɛ Nɔ 1 Onupɛ ihu beluhũ vɔvɔ petee gɛ banɔdzyrameɛ nɛ̀ baxɔ̃ɛdɛ tsyɛ ehuɔ, pɛ tɛdɛdɛmɛ nɔ nɛ̀ anɔ ama mɛahɔɛ, kɛlɛ mɛ kaɖɔ ɖɔɖɔ edzi asɛ ɔgã alo kesipɛ̃ kpá gɛ kalɛ tiyiyi pɔɛ banɔ atɔ̃ mɛ ana. 2 Onupɛ kibuiɖɔlu kɛdɔ̃ kɔkɔ gɛbalà ebui kpukpũ nɛ bubutì ebui bukasɛ lɛ mɛahɔɛ, kɛlɛ tɛyɛyɛkɛŋã gɛbalà betu akpa ebu lɛ mɛahɔɛ, pɛ tɛdɛdɛmɛ nɔ ma mɛahɔɛ elo, itinu kɛdɔ̃ nanà. 3 Onupɛ ɛlɔkɔ mɛ bɔdɔ̃ petee gɛlɛ mɛahɔɛ kɔ́ bahɔɛkpà eleteɛ pɛ ɛlɔkɔ mɛishu kɔ bapɔɛ awɔwɔɔ tsyɛ, pɛ tɛdɛdɛmɛ nɔ ɔmá mɛahɔɛ, ɛtɛba mɔ kɛdɔ̃ nanà. 4 Tɛdɛdɛmɛ nɔ tɛdɔ fɔ̃ɔ, tɛdɛdɛmɛ nɔ nu ɛyamɛ gbangbã bhɛbhɛtɛ. Tɛdɛdɛmɛ nɔ tɛkpɛ̀ anɔ awɔ̃, tɛdɛdɛmɛ nɔ titũ ahɔɛ nɛ kitelũ, tɛdɛdɛmɛ nɔ tifeke ishu. 5 Tɛdɛdɛmɛ nɔ tɛbhɛtɛ̀ awuĩ ebui, tɛtɛ pɛ mɛ ete yɛ tɛpɛpɛ, tɛtɛ kpɛ ɔmɔpɔɛ nɛ̀ anɔ, tɛtɛ balɛ ebui kpa lu ɔkɔ anɔ. 6 Tɛdɛdɛmɛ nɔ tɛkpɛ same nɛ kibui kpa bhɛbhɛtɛ shu, pɔ tɛ kpɛ samɛ nɛ kibui gbã shu. 7 Tɛplɛnɔ anɔ, tɛkɔ bayɛkɛ anɔ abha aŋã, tiɖi kidzo mɛ ɔkɔ kibui gbangbã, tɛkpɛ kemi. 8 Tɛdɛdɛmɛ nɔ tɛ wɔɛ anɔ. Pɔ ɛkɛlɛ gɛ ebuiɖɔlu ebuiɛ alɛ, alɛ ulũ bafala, ɛkɛlɛ gɛ beluhũ vɔvɔ huhu alɛɛ, alɛ ulũ bazɔkɔ yɔlɔ, ɛkɛlɛ gɛ kibuititì tsyɛ lɛɛ, kɛlɛ ulũ bafala. 9 Ɔmɔsɛ ebui bhlui ete bunyi, kɛlɛ ebui kawɔ̃pɛ ete bɔɖɔ lu, 10 pɔ onupɛ ebuiɛ gɛaná ebekoeyìɛ, agɛ agɛna abayalà. 11 Kibeɛ gɛ idzi anuvɔ, ɛzɛɖɔ kaɖɔ asɛ anuvɔ ana, ɛzɛ bhɛtɛ mɛebui tɔtɔɖɔ asɛ anuvɔ ana, ɛzɛ bhɛtɛ mɛ ekpeɖekpeɖe mɛ tsyɛ asɛ anuvɔ ana. Kibeɛ gɛ ɛbadzì anɔ sheshèɛ, ɛshɛnɛ ahɔɛ nɛ bunuvɔme ebuiɛ shu lu. 12 Otsi buɖi ebuikukuɔ asɛ ahuhɔ̃ɛ gɛeɖì ɔlɔ pɛ bɔlɔ tsyɛ iɖì yɛanà, kɛlɛ bɔbàɖi bamɛ nɛ̀ bamɛ. Otsiɛ ebuiɛ kawɔ̃pɛ ete mɛinyi, kɛlɛ ɛbàtì alɛ petee, asɛ kana gɛ benyi mɛtsyɛ ana. 13 Kliso otsiɛ nɔ ebui tatá alɛ alalɛ, tɛyɛyɛkɛŋã, kidzo mɛɖiɖi nɛ̀ tɛdɛdɛmɛ nɔ. Pɔ kɛgɛ gbogbolo ɔdɛ nɛ alɛ nɛishiɛ kɛlɛinu tɛdɛdɛmɛ nɔ. |
© (Active), Ghana Institute of Linguistics, Literacy and Bible Translation. All rights reserved.