Korintoanɛ 1 12 - Nyangbo New Testament

Ɔfɔfuĩa Mɛ Kɛdɔkɔkɔ

¹ Mɛ adzya alɛ, otsiɛ nɛ ɔfɔfuĩa mɛ kɛdɔ̃ kɔkɔ shuɔ, ɛgɛ pɛ sɛ tɛ̀ kɛzã tikpukpũ mɛ kɔ wɔnɔ.

² Nɔonyi ɔsɛ gɛ nodzì ibudi eleteɛ, bawɔɛ wɔnɔ agbanà avɛnɔ ibudiɛ gɛ lɛtɛ ɖɔ kaɖɔɔ ɔkɔ.

³ Klisoɔ, itseɖe wɔnɔ sɛ anɔ nanà gɛ aɖɔaɖɔ nɛ̀ Owusoso Akaa ɔfɔfuĩa nɔ atɛ baɖɔ asɛ, “Baɖɔ kibui akpɛ Yesu,” kɛlɛ ananà tsyɛ atɛbàla aɖɔ asɛ, “Yesu yɛenu Apaleteɛ,” ɔdɛ sɛ Ɔfɔfuĩa Gbangbã ɔkpasɛ yɛ mɛ.

⁴ Bɔdɔ̃ kɔkɔ lɛ ediedi, pɔ Ɔfɔfuĩa nɔ xɔnɔ tonikpo lonu.

⁵ Axɔ̃ɛdɛdɛ ediedi alɛ, pɔ Apaleteɛ xɔnɔ tenikpo.

⁶ Axɔ̃ɛ wɔawɔa ediedi tsyɛ alɛ, pɔ Owusoso Akaa xɔnɔ tenikpo yɛ awɔa alɛ nɛ banɔ nɔ petee mɛ.

⁷ Otsiɛnɔ anɔka nyia ka bakɔɛ Ɔfɔfuĩa nɔ axɔ̃ɛ wɔawɔa ɔkɔ kɛgbangbã tɛbhɛbhɛtɛ.

⁸ Anɔ teli bakɔɛ bubutì kaɖɔɖɔɖɔ ɔganà Ɔfɔfuĩa nɔ mɛ, anɔbhlatɔ tsyɛ bakɔɛ kibuititì ɔganà Ɔfɔfuĩa nɔ mɛ,

⁹ anɔbhlatɔ tsyɛ tɛyɛyɛkɛŋã ɔganà Ɔfɔfuĩa ɔlɛ mɛ, anɔ teli tsyɛ bɔnyã bubu kɔanɔ nɛ Ɔfɔfuĩa tonikpo ɔlɛ mɛ,

¹⁰ anɔ teli tsyɛ bakɔɛ ohumi gɛ lɔbhɛtɛ ebui gɛ labhɛtɛ kibì, teli tsyɛ kibui ɖɔɖɔlu, teli tsyɛ tɛ̀ amɔ Ɛfɔfuĩa nɔ gɛinu ɛgbangbã nɛ̀ ɛkpa, teli tsyɛ kaɖɔɖɔɖɔ nɛ beluhũ bhlatɔ mɛ, kɛlɛ teliɛ tsyɛ tɛ ebu beluhũ vɔvɔ huhuɔ niesi.

¹¹ Alɛ nyɔ̃ɔ enu Ɔfɔfuĩa ɔlɛ tonikpo ɔlɛ axɔ̃ɛ wɔawɔa, kɛlɛ akɔ anɔka nyia ka nɛ kana gɛ apɛ nulũ.

Ishupi Tunikpo, Bɔwɔ̃pɛ Xɔnɔ Kpè

¹² Ishupiɛ ɛlɛ tinikpo, pɔ babhɛtɛ ɔlɛ akpɛ bɔwɔ̃pɛ ediedi mɛ, kɛlɛ gɛ bɔlɛ bɔwɔ̃pɛ gelee mɛ tsyɛ elo, bunu ishupi tunikpo. Kana kɛlɛ nɛ Kristo mɛ.

¹³ Ɔmɔsɛ Ɔfɔfuĩa tonikpo balɔkɔ akpɛ bulĩ akɔ bɔlɔ nɔ, edzì asɛ Yudaeyi alo Helaeyi, anɔ dzidzì alo anɔ gɛ alɛ yɛishu ahɔɛ mɛ tsyɛ elo, Ɔfɔfuĩa tonikpo ɔlɛ bakɔ bɔlɔ nyɔ̃ɔ ɔsɛ bɔwɔ̃ɛ.

¹⁴ Klisoɔ ishupiɛ ma tenikpo, pɔ bɔwɔ̃pɛ gelee balɔkɔ abhɛtɛ ɔlɛ nɔ.

¹⁵ Onupɛ ɔtsɛɖɛ ɔɖɔ sɛ, “Gɛ itinu ɔhɔɛ soɔ, ɛma ɔkɔ ishupiɛ,” gɛnɛ kibui ɛlɛ tɛɖɔɖɔ shu so pɛ, ɔhɔɛ obobu ɔtɔ nɛ ishupiɛ shu.

¹⁶ Kɛlɛ onupɛ batɔ̃ aɖɔ asɛ, “Gɛ itinu kiwuhũ soɔ, ɛma ɔkɔ ishupiɛ,” gɛnɛ kibui ɛlɛ tɛɖɔɖɔ shu so pɛ batɔ̃ ebebu ɔtɔ nɛ ishupiɛ shu.

¹⁷ Onupɛ ishupiɛ petee tsyina dzi asɛ kiwuhũ ana pɔ, fakɔ kɛgɛ kɔ belũ bɔdɔ̃ bazã dza? Kɛlɛ onupɛ ishudzya petee lɛ asɛ batɔ̃ ana pɔ, fakɔ kɛgɛ ɛkɔ belũ bɔdɔ̃ bazã mɔɔ dza?

¹⁸ Pɔ nɛ kibui gbã mɛ, Owusoso Akaa alɔkɔ bɔwɔ̃pɛ ɔwɔ̃pɛ abhɔ ishupiɛ nɔ, bɔlɛ mɛ ɔkɔ nyia ɔkɔ, nɛ kana gɛ apɛ asɛ tɛ̀ bɔzã nulũ.

¹⁹ Onupɛ bɔlɛ nyɔ̃ɔ nu kawɔ̃pɛ tienikpo nɔ pɔ, fakɔ ishupiɛ bazãa dza?

²⁰ Asɛ kana gɛ kɛlɛ, bɔwɔ̃pɛɛ kpè, pɔ ishupi tunikpo.

²¹ Kiwuhũɔ tɛbalà tseɖe ɔhɔɛ ɔsɛ, “Ɛtɛ pɛɛ wɔ!” Kɛlɛ kɛtakpuɔ tsyɛ tɛbalà tseɖe ɛtsɛɖɛ ɔsɛ, “Ɛtɛ pɛɛ wɔ!”

²² Kana nɛ kidzo ɛlɛ nabha, batɛ balà shɛnɛ ahɔɛ nɛ ishupi bɔwɔ̃pɛ ɛlɛ gɛibotsoɔ shu,

²³ kɛlɛ sɛ bɔbhɛtɛ bɔwɔ̃pɛ ɛlɛ gɛ abhɛtɛ̀ bɔlɔ asɛ bɔma kɛnanà mɛɛ tɛ bɔlɛ tsyɛ zã piapii. Kɛlɛ tɛ bɔlɔkɔ nɛ tilì mɛ ɔkɔ bɔwɔ̃pɛ ɛlɛ tsyɛ gɛibotsoɔ,

²⁴ gɛ bɔgɛ lɔkɔ kabha ɖiɖi idi nanà ɔkɔ ishupiɛ ɛkɔ tili tsyɛ elo, Owusoso Akaa xɔnɔ eshogo ishup ɛlɛ gɛibotsoɔ pɛ akpɛ ɛlɛ nɛitití,

²⁵ sɛ tɛ̀ ɔtɔbubu ɔtɛbɔzã ishupiɛ mɛ, pɔ sɛ tɛ̀ bɔwɔ̃pɛ petee lɔkɔ tili nɛ kɛlɛ mɛ ɔkɔ bagɔlɔ.

²⁶ Onupɛ kawɔ̃pɛ tienikpo tieli amɔ bɔtɔɔ, bɔwɔ̃pɛ petee mɔ bɔtɔ ɔplɛnɔ kalɛ, onupɛ bakpɛ kawɔ̃pɛ tienikpo nɛititíɛ, bɔwɔ̃pɛ petee mɔ samè ɔplɛnɔ kalɛ.

²⁷ Otsiɛnɔ wɔnɔ onu Ishupiɛ ɔkɔ Kristoɔ, kɛlɛ wɔnɔ petee onu kawɔ̃pɛ tieli ɔkɔ ɛlɛ.

²⁸ Kɛlɛ nɛ ɔhaa mɛ tsyɛ, Owusoso Akaa eputɔ ebu banɔkpɛkpɛ, babhalà balɛenu ebuiɖɔluanɔ, batramɛ balɛenu badɔkasɛ, flogo pɛ bagɛ abhɛtɛ̀ ebui gɛ abhɛtɛ̀ ibì, ɔplɛnɔ bagɛ bɔnyã bubu nɛ̀, baagɛ aplɛnɔ banɔ, bagɛ bazã banɔ ulũ nɛ̀ bagɛ behu beluhũ vɔvɔ.

²⁹ Pɔ banɔkpɛkpɛ balɛ petee enuɔ dza? Ebuiɖɔluanɔ balɛ petee enuɔ dza? Ebui gɛ labhɛtɛ kibì balɛ petee enuɔ dza?

³⁰ Balɛ nyɔ̃ɔ bakɔ bɔnyã tibubu ɛdɔ̃ kɔkɔɔ dza? Balɛ nyɔ̃ɔ ehu beluhũ vɔvɔ dza? Balɛ nyɔ̃ɔ balɛ ebu beluhũ vɔvɔ niesiɛ dza?

³¹ Pɔ nɔpɛ kɛdɔ̃ kɔkɔ gigboglo ɔdɛ. Kɛlɛ otsiɛnɔ ɛbakasɛ wɔnɔ kidzoɔ gɛ pɛ ɔdɛ.