Korintoanɛ 1 11 - Nyangbo New Testament

¹ Noɖi mɛ ɛkpã tɛ̀ nɔzã nɛ ɛlɛ ulũ, asɛ gɛ mɛtsyɛ lɔkɔ Kristo ɛkpã dzinɔ ana.

Bɔdɔ̃ Dadã Nɛ Kɛtakpu Nɛ Kɛtakpu Esi Kpɛkpɛ Mɛ

² Ɛkpɛ wɔnɔ kinyè nɛitití nɛ kɛbakà gɛ nɔbaka mɛ nɛ kɛka nyia ka mɛ, nɛ̀ kana gɛ nɔnyanã bɔdɔ̃ kakasɛ mɛ ovunɔ asɛ kɛkasɛ gɛ ɛkasɛ wɔnɔ ana.

³ Otsiɛnɔ, ɛpɛ sɛ nɔoti ɔsɛ̀ anɔnyɛ yɛ kɛtakpuɔ kɛlɛinu Kristo, kɛlɛ anɔdzɛ yɛ kɛtakpuɔ kɛlɛinu anɔnyɛ, kɛlɛ Kristoɔ tsyɛ yɛtakpúɔ kɛlɛinu Owusoso Akaa.

⁴ Anyɛ ka nyia ka gɛ adã bɔdɔ̃ nɛ kɛtakpu flogo pɛ ekulu Owusoso Akaa alo aɖɔ ebui elúɔ, atɛ yɛ kɛtakpuɔ gɛinu Kristoɔ elu esi.

⁵ Kɛlɛ anɔdzɛ ka nyia ka tsyɛ gɛ agɛnyã yɛtakpúɔ flogo pɛ ekulu Owusoso Akaa alo pɛ aɖɔ ebui eluɔ, atɛ yɛenyinè gɛenu yɛtakpúɔ elu esi, gɛ edzi asɛ onupɛ bashɛ yɛtakpúɔ ana.

⁶ Onupɛ anɔdzɛ agɛdã bɔdɔ̃ nɛ yɛtakpúɔ, akɔ batsɛ yɛ kɛtakpu tɛkãa, kɛlɛ onupɛ kinu kiwuĩ ɔkɔ anɔdzɛ sɛ tɛ batsɛ yɛ kɛtakpu tɛkãa, alo tɛ bashɛ kɛlɛ, adã bɔdɔ̃ nɛ kɛlɛ abha.

⁷ Kɛma sɛ tɛ anɔnyɛ xɔnɔ adã bɔdɔ̃ nɛ yɛtakpuɔ, ɔmɔsɛ akpasɛ Owusoso Akaa tɛzazã nɛ̀ yɛishu dadalɛ mɛ, pɔ anɔdzɛ xɔnɔ enu anyɛ yɛishu dadalɛ.

⁸ Ɔmɔsɛ anɔnyɛ egide koeyi nɛ anɔdzɛ mɛ, pɔ anɔdzɛ yɛ edekoeyì nɛ anɔnyɛ mɛ,

⁹ kana bagɛ bhɛtɛ anyɛ tsyɛ akɔ adzɛ, pɔ adzɛ bahɛtɛ akɔ anɔnyɛ.

¹⁰ Nɛ kibui ɛlɛshu, nɛ̀ baxɔ̃ɛdɛ shu soɔ, kɛlɛ sɛ tɛ̀ anɔdzɛ amɔ ohumi nɛ yɛ kɛtakpu tɛkã nabha.

¹¹ Nɛ Apaleteɛ mɛ tsyɛ, adzɛ ama yɛishu ahɔɛ mɛ nɛ anyɛ shu, kana anyɛ tsyɛ ama yɛishu ahɔɛ mɛ nɛ adzɛ shu.

¹² Ɔmɔsɛ kana gɛ anɔdzɛ edekoeyì nɛ anɔnyɛ mɛɛ, kidzo ɛlɛ nabha adzɛ tsyɛ yɛamɔ́ anyɛ. Pɔ kɛka nyia ka de Owusoso Akaa ɔkɔ.

¹³ Nɔobhui kibui mɛ ɔkɔ ishu ɔsɛ, kɛpɛ̃ ɔkɔ anɔdzɛ sɛ tɛ̀ eze kulu Owusoso Akaa gɛ agɛdã bɔdɔ̃ nɛ kɛtakpuɔ dza?

¹⁴ Kanunɔ kesi ɔkpɛkɔ ogitseɖe wɔnɔ sɛ onupɛ anɔnyɛ elú yɛ kɛtakpu tɛkã kisheɛ, kinu kiwuĩ kɔ yɛ,

¹⁵ kɛlɛ onupɛ anɔdzɛ kɛtakpu tɛkã dzeɛ, kinu ishu dadalɛ kɔ yɛ dza? Ɔmɔsɛ bakɔ yɛ kɛtakpu tɛkã dzlolo sɛ tɛ kɛdã yɛ kɛtakpuɔ.

¹⁶ Onupɛ anɔ teli apɛ asɛ tɛ̀ awlɔ̃akɛ kibui ɛlɛ, kibui nanà bha má bɔlɔ nɛ̀ Owusoso Akaa ɔhaa xɔnɔ ahɔɛ bɔɔ bhɛtɛ̀.

Apaleteɛ Ɔwlago bɔdɔ̃ ŋaŋã

¹⁷ Nɛ ebui gɛ ɛbabà tseɖe wɔnɔ otsiɛ nɔɔ, ɛtɛba kpɛ wɔnɔ kinyè nɛitití, ɔmɔsɛ wɔnɔ tɛtsyɔatsyɔa manà ebui kpa ɔdɛ agbangbã.

¹⁸ Putɔ nɔɔ, ilũ ɔsɛ onupɛ nɔba oshogò asɛ ɔhaa ana, ɔtɔbubú ɔkpasɛ wɔnɔɛishi, kɛlɛ nɛ ebuiteli shu soɔ, ɛyɛkɛ kɛlɛ abha ŋã.

¹⁹ Ɔmɔsɛ kɛlɛ sɛ tɛ̀ ɔtɔbubu ɔzã wɔnɔɛishi, tɛ̀ kɛkasɛ wɔnɔ mɛ anunɔ abha gɛ Owusoso Akaa atɔɖɔ ahɔɛ.

²⁰ Onupɛ nobo shogòɔ, gɛnɛ Apaleteɛ Ɔwlago Bɔdɔ̃ nɔŋã,

²¹ ɔmɔsɛ onupɛ nɔŋãa bɔdɔ̃ɔ, wɔnɔ mɛ aka nyia aka aŋã bɔlɛ eputɔnɔ gɛ etie po ananà. Anɔ teli gɛ bɔbhɛ yiyɛɛ, teli xɔnɔ atɛ wɔɛ ebuku.

²² Bapã mã wɔnɔ ahɔɛ gɛ nɔbɔ ŋã pɛ nɔbɔwɔɛ bɔdɔ̃ dza? Alo sɛ tɛ̀ nɔtɛ Owusoso Akaa ɔhaa olú, tɛ nɔtɛɛ bagɛ kɛdɔ̃ nanà má balɛ ahɔɛ olu kesiɛ dza? Kiɖe nɔpɛ ɔsɛ ɛɖɔ tseɖe wɔnɔ? Nɔsɛ ɛkpɛ wɔnɔ kinyè nɛitití nɛ alɛ nɛidi shu dza? Kɛma ɛlɛ mɛ ana ɖa!

²³ Ɔmɔsɛ kɛgɛ mɛ yɛkɛ odenɔ Apaleteɛ ɔkɔ mɛ ɛtsyɛ lɔkɔ kpɛ ahɔɛ ɛkɔ wɔnɔ. Elishi alɛ, gɛ bakpɛ Apalete Yesu ahɔɛ, alɔkɔ kifufulũ,

²⁴ kɛlɛ gɛ ehu ahɔɛ nɛ ɛlɛ ɛtakpuɔ ebekeɛ, ayá kifufulũɔ mɛ kɛlɛ aɖɔ asɛ, “Mɛishu dzya nɔ ɔlɛ, gɛ ɛlɔkɔ kɔ wɔnɔ, nɔbhɛtɛ kɛlɛ tɛ nɔlɔkɔ ɔbaka mɛ nɔ.”

²⁵ Nɛ kidzo ɛlɛ nabha gɛ baŋã bɔdɔ̃ ebekeɛ, aza alɔkɔ kayintse nɔ, kɛlɛ aɖɔ asɛ, “Kaiyintse alɛ kɛlɛ enu olugbũ nyanyã vɔvɔ gɛ ɛnyã nɛ wɔnɔ nɛ mɛ dzyosu nɔ mɛ, nɔbhɛtɛ kɛlɛ, kibe nyia be gɛ nɔwɔɛ nɛ kalɛ ulũɔ, tɛ nɔlɔkɔ ɔbaka mɛ nɔ.”

²⁶ Kibe nyia be gɛ nɔtã kifufulũ alɛ pɛ nɔwɔɛ nɛ kayintse alɛ nulũɔ, nɔ ɔɖɔɛ ɛlɛ ɔkanà nɛ Apaleteɛ yɛutsiɛ shu odiyinɔ sɛ etsyina aba.

²⁷ Klisoɔ anɔ ka nyia ka gɛ aatã kifufulũ ilɛ, alo pɛ aawɔ̃ɛ nɛ Apaleteɛ kayintse alɛ nulũɔ nɛ kidzoɔ gɛ kɛma ɛlɛ ɔzãkɔ abhaa, aatà esi nɛ Apaleteɛ yɛishudzya nɛ̀ dzyosu nɔ shu.

²⁸ Kɛlɛ sɛ anɔ avɛ yɛishu mɛ oɖì piapii flogo tɛ atã kifufulũ ilɛ, alo tɛ̀ awɔɛ nɛ kayintse alɛ ulũ.

²⁹ Ɔmɔsɛ anɔka nyia ka gɛ aŋã pɛ awɔɛ pɛ atɛ abakà Apaleteɛ yɛishudzya mɛeɖi piapii nɔ, atã kɛlɛ awɔɛ kebhu kukulu elu akɔ yɛishu.

³⁰ Kliso so pɛ wɔnɔ mɛ banɔ teli ebotsò pɛ baanyã, kɛlɛ wɔnɔ mɛ banɔ teli tsyɛ etsí.

³¹ Pɔ onupɛ bukulu kebhu nɛishuɔ, beze eke kulu kebhu nɛ bɔlɔ.

³² Onupɛ Apaleteɛ ekulu kebhu nɛ bɔlɔ, apɔ́ batɔ̃ akɔ bɔlɔ sɛ tɛ̀ beti bebu bɔlɔ ɛpɔ ɔplɛnɔ kanɔ nɔ̀.

³³ Mɛ adzya alɛ, kliso, onupɛ nobo oshogò pɛ nɔŋã bɔdɔ̃ɔ, nɔzãopo bagɔlɔ.

³⁴ Onupɛ bɔbhɛ yì wɔnɔ mɛ anɔ teliɛ, baŋã bɔdɔ̃ nɛ bɔpã mɛ, sɛ tɛ̀ onupɛ nɔbɔ tsyɔaa, kɛtɛbà tsyina dzì kebhu kukulu. Kɛlɛ onupɛ ɛzɛ ba wɔnɔ ɔbhaa tsyɛɛ, ɛba tseɖe wɔnɔ kɛgɛ nɔbɔ bhɛtɛɛ.