Korintoanɛ 1 10 - Nyangbo New TestamentBetseɖe Nɛ̀ Anɔ Nɛ Ibudi Ɔkɔ Dɛdɛ Shu 1 Mɛ adzya alɛ mɔ, pɔ ɛgɛpɛ sɛ tɛ̀ kɛzã tikpukpũ mɛ ɔkɔ wɔnɔ sɛ, bɔlɔ ashuĩ alɛ petee azã ɔmɔlɔ niesi, kɛlɛ balɛ petee agã aƒuɔ mɛ ekoeyì. 2 Bakpɛ bulĩ akɔ alɛ asɛ Mose ede azazã ana nɛ ɔmɔlɔ̃ nɔ nɛ̀ aƒuɔ mɛ. 3 Balɛ petee aŋã ɔfɔfuĩa mɛ bɔŋaŋã lɛ tunikpo 4 kɛlɛ bawɔɛ ɔfɔfuĩa mɛ bɔdɔ̃ tunikpo ɔlɛ, ɔmɔsɛ bawɔɛ bɔlɛ edenɔ ɔfɔfuĩa mɛ kɛklagbuɔ gɛgbanà alɛ vunɔɔ mɛ, kɛklagbu ɛlɛ kɛlɛinu Kristoɔ. 5 Kɛkpasɛ ɛlɛ mɛ ana pɔ, Owusoso Akaa agɛmɔ samɛ nɛ balɛ mɛ anɔ kpekpèɛ teli shu, balɛ ishudzya petee pɔɛ kanà nɛ oxuiɛ mɛ. 6 Ebui alɛ aba ɛlɛ mɛ ana ɔsɛ tɛ̀ kidzì kibui mɔmɔlu, tɛ kɛkɔ ɔsɛ bɔtakà lɔkɔ bɔlɔ etúɔ tɔɖɔ ebui kpa bhɛbhɛtɛ abha asɛ gɛ babhɛtɛ ana. 7 Nɔotidzì ibudielete, asɛ gɛ balɛ mɛ banɔ teli dzi ana, asɛ kana gɛ bafɔnɔ elu asɛ, “Banunɔ azã kesi sɛ tɛ̀ baŋã tɛ̀ bawɔɛ kɛlɛ babhɛtɛ ibudielete ebui. 8 Nɔtɛ bhɛtɛ kɛgɔlɔ ŋaŋã ebui, asɛ kana gɛ balɛ mɛanɔ teli abhɛtɛɛ ana, pɛ balɛ mɛ anɔ ihotu afɛtaabha nɛ̀ tata etsi nɛ kiwui tinikpo abha. 9 Kɛma ɔsɛ tɛ̀ bufeke Apaleteɛ eɖi, asɛ gɛ balɛ mɛ anɔ teli abhɛtɛ pɛ beblidzya atá alɛ betsiɛ. 10 Kɛlɛ nɔtɛzɔ kpamɛ ishu, asɛ kana gɛ balɛ mɛanɔ teli abhɛtɛ pɛ Owusoso Akaa axɔ̃ɛdɛ gɛezĩ bɔdɔ̃ ebeyi alɛ ana. 11 Ebui alɛ aba balɛ abha sɛ tɛ balɔkɔ amɔ elu, kɛlɛ bafɔnɔ alɛ elú sɛ tɛ balɔkɔ etseɖe nɔ nɛ bɔlɔ, bɔlɔ bagɛ ebuiɛ gɛ bafɔnɔ eluɔ aba bɔlɔ abha. 12 Klisoɔ, onupɛ abhɛtɛ wɔ asɛ ɔyɛkɛ ɔŋã piapii nɔ, ɖi piapii ɔsɛ tɛ ɔtɛdɔ oboe. 13 Kibui nanà tifeke wɔɖi ɔdɛ kibui nɔnɔ gɛŋã anɔ ka nyia ka abha. Pɔ Owusoso Akaa xɔnɔ abhɛtɛ kibui gbã, atɛ bakɔ tifefekeɖi nɔnɔ gɛ kɛbà dɛwɔ ba wɔabha. Pɔ onupɛ befeke wɔ eɖiɛ, abapɛ kidzo nɔnɔ abha gɛ ɔbɔgã pɛ obokoeyì nɛ kɛlɛ mɛ. Obudi Bɔdɔ̃ Nɛ̀ Apaleteɛ Bɔdɔ̃ ŋaŋã 14 Klisoɔ mɛɔbhia alɛ, nɔobu tɛtsɛɖɛmɛ nɛ ibudi ebui shu. 15 Ɛɖɔ kaɖɔ ɔkɔ wɔnɔ asɛ bebutinɛ ana, nɔokulu kebhu ɔkɔ ishu nɛ̀ kɛgɛ mɛɖɔɔ. 16 Ahɔɛhuhu kayintse nɔ gɛ bɔlɔkɔ huahɔɛ nɔ pɔ, gɛnɛ gɛ bɔlɔkɔ tili nɛ Yesu dzyosu nɔ mɛ soɔ dza? Bɔŋaŋã gɛ bɔya tsyɛ pɔ, butinu tili gɛ bɔlɔkɔ nɛ Kristo ishupiɛ shuɔ so dza? 17 Ɔmɔsɛ gɛ bùkpèe, pɛ kifufulũ tenikpo pɔ kɛlɛ lɛɛ, so budzi ishupi tunikpo, pɛ bɔlɔ petee tã kifufulũ tinikpo alɛ. 18 Nɔolu awɔɖi Israelanɛ. Gɛnɛ bagɛ bawɔa axɔ̃ɛ nɛ bɔdɔ̃pɔpɔɛ osubha nabha balɛ aŋã bɔdɔ̃ pɔpɔɛ nɔ nɛ ɔlɛ abha dza? 19 Bɔɖɔ mɛɖɔ sɛ bɔdɔ̃ gɛ bapɔɛ akɔ ibudiɛ nu kɛdɔ̃ tili, pɛnɔsɛ kɛdɔ̃ tili obudiɛ onuɔ dza? 20 Gɛnɛ ana, pɔ ibudi eleteɛ bɔdɔ̃ pɔpɔɛ nɔ ɛfɔfuĩa zizĩ balɔkɔ ɛlɛ akɔ, gɛnɛ Owusoso Akaa balɔkɔ ɔlɛ akɔ, kɛlɛ ɛgɛ pɛ sɛ tɛ nɔ ɔkpɛ ahɔɛ nɛ ɛfɔfuĩa zizĩ ebui mɛ. 21 Otibɔ la ɔwɔɛ nɛ Apaleteɛ kayintse nulũ nɛ ɔfɔfuĩa zizĩ tsyɛ kayintse nulũ, kana otibɔ là ɔzã Apaleteɛ ɔkpɔlɔ̃ nɔ shu pɛ ɔzɔbɔ zã ɛfɔfuĩa zizĩ ɛlɛ ɔkpɔlɔ̃ nɔ tsyɛ ishu. 22 Bɔpɛ ɔsɛ tɛ Apaleteɛ alɔkɔ kabhã wawlãkɛ dza? Bɔgagalĩ ɔdɛ yɛ dza? Bayɛyɛkɛŋã Ishu Ahɔɛmɛ Zazã 23 “Bakɔ kibui ka nyia ka shu kidzo,” pɔ gɛnɛ kɛka nyia ka kɛlɛ vɛnɔ anɔ nɛ otugbà. “Bakɔ kibui ka nyia ka shu kidzo-pɔ gɛnɛ kɛka nyia ka kɛlɛ pɛ̃kɔ anɔ. 24 Ananà atɛpɛ yɛ tenikpo tɛpɛpɛ̃, pɔ apɛ kɛgbangbã akɔ babhlatɔ tsyɛ. 25 Nɔŋã kɛdɔ̃ ka nyia ka gɛ baadɛ nɛ kedziɛ mɛ, pɔ nɔtɛ kɔ kɛkpɛ wɔnɔ bulũhũ tɛ nodi bisi kɛliesi olũ, 26 Ɔmɔsɛ kesiakpa nɛ kɛka nyia ka gɛ kpasɛ kalɛ mɛ nu Apaleteɛ ɛyɛ. 27 Onupɛ anɔ teli gɛetinu anɔ gɛ ayɛkɛ aŋã ekulu wɔnɔ sɛ nɔbɔ ŋã bɔdɔ̃ pɛ nɔpɛ ɔsɛ ɔvɛɛ, nɔŋã kɛka nyia ka gɛ bedzu wɔnɔ otugbà tɛ̀ nɔtɛ kɔ kɛkpɛ wɔnɔ bulũhũ tɛ nodi bisi kɛlɛ esi olũ. 28 Pɔ onupɛ anɔ teli etseɖe wɔnɔ asɛ, “Balɔkɔ kɛdɔ̃ ɛlɛ akpɛ ahɔɛ akɔ obudiɛ, kɛlɛ nɔtɛ ŋã, tɛ kɛtɛ bakpɛ anunɔ gɛ yɛetseɖe wɔnɔ kibuiɛ nɛ̀ wɔnɔ ekpeɖekpeɖe mɛ buluhũ, 29 tɛ kɛtɛ bakpɛ anɔ bhalà ekpeɖekpeɖe mɛ uluhũ gɛnɛ wɔ ɔyɛ. Pɔ kiɖeso pɛ kɛlɛ ɔsɛ tɛ anɔ bhlatɔ alɔkɔ yɛekpeɖekpeɖeɛ ekulu kebhu nɛ̀ mɛishu ahɔɛmɛ zazãa dza? 30 Onupɛ ɛŋã bɔdɔ̃ nɛ̀ ahɔɛhuhuɔ pɔ, kɛlɛ so pɛ bebumɛ kɛpɔ nɛ kɛdɔ̃ gɛ kɛlɛ takpu mɛihu Owusoso Akaa ahɔɛ nɛ kɛlɛ takpuɔ shuɔ dza? 31 Klisoɔ, onupɛ nɔŋã bɔdɔ̃ alo bɔwɔɛ alo kɛka nyia ka gɛ nɔbhɛtɛ, nɔbhɛtɛ kɛlɛ ɔkɔ sɛ tɛ̀ bakpɛ Owusoso Akaa nɛinyè nɛitití. 32 Nɔtɛ kɔ sɛ anɔ nanà akpatà bɔdɔ̃, edzi asɛ Yudanɛ o, Helanɛ, pɛnɔsɛ Owusoso Akaa yɔhaa 33 asɛ gɛ ɛpɛ sɛ tɛ mɛiku aka nyia aka awɔ̃ nɛ kidzo ka nyia ka abhaa. Gɛnɛ mɛ ete tɛpɛpɛ̃ mɛpɛɛ, pɔ banɔ kpekpèɛ tɛpɛpɛ̃, ɔsɛ tɛ bayɛkɛ alɛ elù nɛkpã. |
© (Active), Ghana Institute of Linguistics, Literacy and Bible Translation. All rights reserved.