Korintoanɛ 1 1 - Nyangbo New Testament

¹ Mɛ Paulo gɛ bekulú asɛ tɛ idzì anɔkpɛkpɛ ɔkɔ Yesu Kristo nɛ Owusoso Akaa yɛ tɛpɛpɛ ulũɔ, nɛ̀ bɔlɔ adzya Sostenese yɛafɔnɔ keplukpa alɛ.

² Ɛfɔnɔ kalɛ sɛsɛ Owusoso Akaa ɔha gɛalɛ Korinto, nɛ̀ bagɛ badalɛ balɛishu nɛ Yesu Kristo mɛ pɛ balɛishu dalɛ, ɔlɔkɔ plɛnɔ bagɛ balɛ ɔkɔ nyia ɔkɔ pɛ beekulu Apalete Yesu Kristoɔ inyeɛ, anɔ gɛenu balɛ Apaleteɛ nɛ̀ bɔlɔ ayɛ.

³ Tibhui bhuibu nɛ̀ ishu yɔyɔ mɛpɛɛ kɔ wɔnɔ odenɔ Kititiayɛ gɛenu bɔlɔ Akaa nɛ̀ bɔlɔ Apalete Yesu Kristo ɔkɔ.

Ahɔɛhuhu

⁴ Iihu Owusoso Akaa yɛahɔɛ kibe nyia be nɛ wɔnɔ kɛtakpu, nɛ tibhui bhuibuɔ gɛ akɔ wɔnɔ nɛ Yesu Kristo mɛɛ shu.

⁵ Ɔmɔsɛ gana Kristo abha, nodzi ehoeyi elete nɛ kɛka nyia ka mɛ, nɛ wɔnɔ kaɖɔ ɖɔɖɔ nɛ kibui titì mɛ petee,

⁶ ɔmɔsɛ ebuiɛ gɛ bɔɖɔ nɛ Kristo shuɔ awɔɛ nɛ wɔnɔ ɛkpã mɛ.

⁷ Klisoɔ, nɔtɛ ɔpɛɛ ɔfɔfuĩa mɛ kɛdɔ̃ kɔkɔ nanà gɛ noɖì kidzo mɛ gagalĩi ɔkɔ bɔlɔ Apalete Yesu Kristo yɛ tibubu kasɛɛ.

⁸ Abakɔ nɔzã gagalĩ ɔvɛnɔ kiwui gɔgɔ nabha, kɛba kɔsɛ nɔtɛ bɔmɔ bamɛ tsitsí nɛ bɔlɔ Apalete Yesu Kristo yɛiwui nabha.

⁹ Owusoso Akaa gɛ yɛekulu wɔnɔ akɔ ɔhakpɛkpɛ nɛ̀ Yɛeyianyɛ Yesu Kristo gɛenu bɔlɔ Apaleteɛ, enu kibui gɛlɛ kɛlɛ ɔzãkɔ abhɛbhɛtɛ elete.

Ɔtɔbubu Nɛ Ɔha Mɛ

¹⁰ Mɛelé alɛ mɔ, ɛkɔɔ wɔnɔ kɛtakpu nɛ bɔlɔ Apalete Yesu Kristo yɛinye mɛ sɛ tɛ̀ wɔnɔ nyɔ̃ɔ nɔ ozolũ bagɔlɔ esi, tɛ̀ ɔtɔbubu nanà ɔtɔzã wɔnɔɛshi, tɛ̀ nɔbhɛtɛ tenikpo piapii nɛ ekpeɖekpeɖe nɛ̀ ebui tɔtɔɖɔ mɛ.

¹¹ Mɛelé alɛ mɔ, banɔ teli nɛ Kloe bɔpã mɛ akɔ mɛitì sɛ ebla ebui akpasɛ wɔnɔɛshi.

¹² Kɛgɛ mɛɖɔ kɛlɛinu ɔsɛ, wɔnɔ mɛ anɔ tenikpo aaɖɔ asɛ, “Paulo ede mɛlɛ.” Anɔ bhlatɔ tsyɛ asɛ, “Apolo ede mɛlɛ.” Teli tsyɛ asɛ, “Kefa ede mɛlɛ” kɛlɛ anɔbhlatɔ tsyɛ aɖɔ asɛ “Kristo ede mɛlɛ.”

¹³ Pɔ, bayɛɛ Kristoɔ mɛ akpɛ bɔwɔ̃pɛ mɛɛ dza? Paulo bakpalà nɛ butsi osiɛ shu akɔ wɔnɔ dza?, pɛnɔsɛ Paulo inye mɛ bakpɛ bulĩ akɔ wɔnɔ dza?

¹⁴ Ihú ahɔɛ ɔsɛ, ɛgɛ kpɛ bulĩ kɔ wɔnɔ mɛ anɔ nanà ɔdɛ Krispo nɛ̀ Gayo,

¹⁵ kliso anɔ nanà atɛbà làɖɔ asɛ mɛinye mɛ bakpɛ bulĩ akɔ wɔnɔ.

¹⁶ (Ee, ɛkpɛ bulĩ kɔ Stefana nɛ̀ yɛɔpã mɛ anɛ tsyɛ, nɛ kɛlɛ edeɛ, ɛgaa baka sɛ̀ ɛzɛkpɛ bulĩ kɔ anɔ nanà.)

¹⁷ Ɔmɔsɛ Kristo agɛkpɛ mɛasɛ tɛ̀ ɛdɛkpɛ bulĩ, pɔ tɛ̀ mɛdɛɖɔ kibui gbangbãa, gɛnɛ nɛ anɔdzyrame yɛ bubuti mɛ, onu gɛnanaa, Yesu butsi osiɛ ohumi nɔma kɛnanà mɛ.

Kristo Yɛenu Owusoso Akaa Bubuti Nɛ̀ Yɛohumi

¹⁸ Butsi osiɛ shu ebuiɛ enu bɔga ebui ɔkɔ bagɛ bayalàa, pɔ bɔlɔ bagɛ baayɛkɛ elu nɛkpã xɔnɔɔ, lɛenu Owusoso Akaa ohumi ɔkɔ bɔlɔ.

¹⁹ Ɔmɔsɛ bafɔnɔ elú asɛ, Ɛbazĩ bebuti eleteɛ balɛ bubutiɛ, ɛba futsù bagɛ eɖi asɛ bubutì lɛ balɛ ahɔɛ mɛ balɛ bubutiɛ mɛ kpɛ.”

²⁰ Fakɔ ebutinɛ alɛ? Fakɔ buplukpaeleteɛ alɛ. Fakɔ bagɛ apɛɛ obo kanɔ nɔ̀ bubutì idzoɔ alɛ dza? Owusoso Akaa egitsyina kanɔ alɛ mɛ bubutiɛ budzi bɔga dɔdɔ dza?

²¹ Nɛ Owusoso Akaa bubuti nulũ soɔ, kanɔ alɛ mɛ gana kalɛ bubutiɛ mɛ betinyi yɛ, bɔwɔaga kibuiɛ gɛ baɖɔ tɛ bebù bagɛ ayɛkɛ aŋã elu nɛkpã ku Owusoso Akaa nɔ awɔ ɔdɛ.

²² Yudanɛ ebisi atsyindzyeɛ ebui tɛ̀ bamɔ, kɛlɛ Helanɛ xɔnɔ atɔnɔ bubuti ede,

²³ pɔ bɔlɔ xɔnɔɔ, Kristoɔ gɛ bakpalà nɛ butsi osiɛ shu nɛibui bɔɖɔ, kibui gɛ kinu kɛdɔ̃ kpakpatà ɔkɔ Yudanɛ pɛ bɔga kibui kinu ɔkɔ bagɛ betinu Yudanɛ xɔnɔ,

²⁴ pɔ bagɛ Owusoso Akaa ekulu xɔnɔ, Yudanɛ nɛ̀ Helanɛ petee, Yesu yɛenu Owusoso Akaa yɛohumi nɛ̀ bubutì.

²⁵ Owusoso Akaa yɛ bɔgadɔdɔ nu bubutì ɔdɛ anɔdzyrame yɛubutì, kɛlɛ Owusoso Akaa tibobotsòɔ gagalĩ ɔdɛ banɔdzyrame ohumi.

²⁶ Mɛele alɛ mɔ, nɔbakà kɛzã gɛ nɔzã flogo pɛ bekulu wɔnɔ. Gɛnɛ wɔnɔ banɔ kpekpèɛ balɛ edzi bebutinɛ nɛ banɔdzyrame bɔdɔ̃ mɔmɔ ulũ, gɛnɛ banɔ gelee gɛazã wɔnɔɛshiɛ balɛ edzì bagɛ eku banɔ awɔ, gɛnɛ wɔnɔ banɔ gelee balɛ ede baapã gbangbã mɛ.

²⁷ Pɔɔ Owusoso Akaa alɔkɔ bɔga dɔdɔ ebuiɛ nɛ kanɔ nɔ̀ mɛ sɛ tɛ̀ alɔkɔ akpɛ bebutinɛ nawuĩ nɔ. Owusoso Akaa alɔkɔ bɔdɔ̃ gɛ bubotsoɔ akpɛ bɔgagalĩ nawuĩ nɔ.

²⁸ Alɔkɔ bɔdɔ̃ gɛmã kɛnanà mɛ nɛ kanɔ alɛ mɛ pɛ banɔ etie ɖi akpɛ kɛnanà mɛ, nɛ̀ ebuiɛ gɛ legi yi kɛdɔ̃ nanàa, ebù ebuiɛ gɛalɛ eyinɔ,

²⁹ sɛ tɛ̀ ananà etibe feke yɛishu nɛ yɛamɛ.

³⁰ Yɛ sopɛ nɔkpasɛ Yesu Kristo mɛ, anɔ gɛ yɛakɔ ɔlɔ bubuti odenɔ Owusoso Akaa ɔkɔ, gɛ kɛlɛinù bɔlɔ tɛzazã piapii, ishudadalɛ nɛ̀ bɔlɔ tibubuyinɔ odenɔ ebui kpa bhɛbhɛtɛ mɛ.

³¹ Kliso asɛ gɛ bafɔnɔ eluɔ, “Anunɔ gɛ asɛ efeke yɛishuɔ, tɛ efeke ɛlɛ nɛ Apaleteɛ mɛ.”