Koloseanɛ 4 - Nyangbo New Testament

¹ Bapaleteɛ, nɔkɔ wɔnɔ anɔ dzidziɛ kɛgɛ shɔnɔ pɛ kɛpɛ̃ ɔsɛ nɔkɔ alɛ, ɔmɔsɛ nɔonyi ɔsɛ̀ wɔnɔ tsyɛ Apalete alɛ ɔnɔ ahɔɛ nɛititíɛ.

Buluhũ Huhuɔ Gɛ Aplɛnɔ Ɔkɔ Alɛ

² Nɔzã ɛlɛ abha tɛ nozo kulu Owusoso Akaa, nɔzã nɛ̀ awɔ̃ tɛ̀ nɔ ozohu ahɔɛ.

³ Kɛlɛ nɔ okulu Owusoso Akaa nɛ bɔlɔ tsyɛ ɛtakpu, sɛ tɛ̀ Owusoso Akaa adalɛ kedulũ ɔkɔ kibuiɛ gɛ bɔɖɔɔ, sɛ tɛ̀ bɔɖɔ Kristo yɛebui kpukpũɔ ɔkanà, kibuiɛ gɛ ɛlɛ shu mɛ kpasɛ ɛɖahuiɛ mɛ.

⁴ Nɔ okulu Owusoso Akaa sɛ tɛ̀ ɛlà ɖɔ kibuiɛ piapii asɛ kana gɛ kɛlɛ sɛ ɛɖɔ ɛlɛ.

⁵ Nɔotì bubutì idzoɔ gɛ nɔbɔ lɔkɔ ɔkpɛ ɔha nɛ̀ bagɛ agɛ yɛkɛ aŋãa, nɔwɔa kibè ka nyia ka gɛ nɔmɔ̃ shu ɛxɔ̃ɛ piapii.

⁶ Nɔkɔ ɔnɔ kaɖɔ ɖɔɖɔ akasɛ sɛ bebhui ɔnɔ ebu, kaɖɔ gɛ bɔmɔɛ kpasɛ alɛ mɛ, sɛ tɛ̀ nɔotì kana gɛ nɔ obobù kibui ulũ ɔkɔ aka nyia aka.

Bɔdɔ̃ Sɛsɛnɔ Gɔgɔɛ Nɔ

⁷ Tikikus ebètseɖɔ wɔnɔ ebuiɛ petee mɛ gɛ ɛgã. Enu adzya gbangbã, axɔ̃ɛwɔa gɛ ayɛkɛ aŋã pɛ aɖɔ kibui gbã pɛ ewlui enu axɔ̃ɛdɛ ɔplɛnɔ ɔlɔ nɛ Apaleteɛ mɛ.

⁸ Ɛsɛsɛ yɛ nɛ wɔnɔ ɔkɔ, sɛ tɛ akɔ wɔnɔ tititì nɛ bɔlɔ ɔtɔ shu tɛ alɔkɔ akpɛ wɔnɔ etúɔ emi nɔ.

⁹ Yɛ nɛ̀ Onesimo balɛ aba. Bɔlɔ adzya gbangbã nɛ tɛyɛyɛkɛŋã mɛ pɛ enu wɔnɔ mɛ anɔ tenikpo nɔ. Bebè tseɖe wɔnɔ kɛka nyia ka gɛ ba ɛlɛ mɛ nɛ ɛkɛlɛ̀.

¹⁰ Mɛɔhagbo Aristaxo gɛ blɔnii kpasɛ ɔɖavũɔ mɛ asɛnɛ wɔnɔ. Marko gɛenu elũdzyɔa ɔkɔ Banaba tsyɛ asɛnɛ wɔnɔ. (Nɔtɛ yɛkɛ ɔshakɔkɔ odenɔ yɛɔkɔ ɔbɔfala nɔ, kliso onupɛ aba wɔnɔ kɔɔ tɛ nɔyɛkɛ yɛ.)

¹¹ Yesuɔ gɛ bekulu asɛ Yustus tsyɛ asɛnɛ ɔnɔ sɛsɛ. Balɛ ete balɛ enu ɔhagbo Yudanɛ axɔ̃ɛwɔa gɛ awɔa axɔ̃ɛ ɔkɔ Owusoso Akaa ukusi ŋaŋãa, kɛlɛ bakɔ asɛ mɛishuɔ mɛ dɔ fɔ̃ɔ.

¹² Epafrodito gɛenu Kristo Yesu yɛaxɔ̃ɛdɛ pɛ ede wɔnɔ mɛ tsyɛ asɛnɛ wɔnɔ. Alɔkɔ kemi kpɛkpɛ ekulu Owusoso Akaa nɛ wɔnɔ ɛtakpu kibe nyia be, sɛ tɛ nɔzã gagalĩ nɛ Owusoso Akaa tɛpɛpɛ ulũ, asɛ anɔ gɛ nɔoshè pɛ bayɛkɛ ɔnɔ abha aŋã ana.

¹³ Kibui gbã kinu ɔsɛ awɔa axɔ̃ɛ gagalĩ akɔ wɔnɔ nɛ̀ bagɛ alɛ Ladokia nɛ̀ Hilapolisiɛ.

¹⁴ Bɔlɔ ɔbhia Luka gɛ bɔdɛmɛ nɔ, anɔ gɛenu awɔa bhɛtɛ, nɛ̀ Demas tsyɛ asɛnɛ wɔnɔ asɛsɛ.

¹⁵ Nɔsɛnɛ badzya gɛ alɛ Ladokia, nɛ̀ Nimpa nɛ̀ ɔhaa gɛalɛ yɛɔpã mɛ.

¹⁶ Onupɛ bakalà eplukpa alɛ akɔ ɔnɔ ebekeɛ, nɔoɖi ɛlɛ ɔkɔ ɔsɛ bakalà kalɛ nɛ Ladokianɛ ɔhaa tsyɛ mɛ, ɔsɛ tɛ̀ wɔ tsyɛ ɔkalà keplukpa onupɛ kede Ladokia ebeku wɔkɔɔ.

¹⁷ Nɔotseɖe Akipo ɔsɛ, “Ɖi ɛlɛ ɔkɔ ɔsɛ ɔwɔa kɛxɔ̃ɛ gɛ ɔyɛkɛ odenɔ Apaleteɛ ɔkɔ obeke.”

¹⁸ Mɛ Paulo, mɛ lɔkɔ mɛahɔɛ pɛ ɛfɔnɔ keplukpa alɛ. Nɔbakà ɛɖahuiɛ mɛ gɛ ɛkpasɛ. Tɛ Akaa tibhui bhuibuɔ zã plɛnɔ wɔnɔ.