Koloseanɛ 3 - Nyangbo New Testament

Ɔsha Gɛ Lɛ Ɔkɔ Ɛkpã Dadalɛ Zazãna

¹ Gɛ befeke ɔnɔ nɛ̀ Kristo soɔ, nɔlɔkɔ ɔnɔ etúɔ ɔtɔɖɔ kititì ɔdɔ̃ nabha, nɛ ɛkɛlɛ gɛ Kristo azã esi nɛ Owusoso Akaa nɛŋã mɛɛ.

² Nɔlɔkɔ wɔnɔ ekpeɖekpeɖeɛ ɔtɔɖɔ ɔdɔ̃ gɛide ititíɛ nabha, pɔ anɛ kesiakpa ɔdɔ̃ nabha.

³ Ɔmɔsɛ nɔotsí, kɛlɛ otsi alɛ balɔkɔ ɔnɔ ɛkpã ekpũ nɛ Kristoɔ gɛ akpasɛ Owusoso Akaa mɛ.

⁴ Onupɛ Kristoɔ gɛenu ɔnɔ ɛkpã ebe koeyiɛ, kɛlɛ wɔnɔ tsyɛ obokoeyì ɔplɛnii nɛ ishu dadalɛ mɛ.

⁵ Klisoɔ nɔŋã kanɔ alɛ mɛ kɛka nyia ka idi gɛ kpasɛ ɔnɔ mɛ nabha. Gɛinu asɛ ɔmamɛdɛdɛ, atsɔ̃bui, ishumɛ tɛlɔlɔ nɛ adzɛ shu, ebui zizĩ tɛtɔtɔɖɔ, nɛ̀ mɛ ete tɛpɛpɛ̃ gɛinu ibudi ebui.

⁶ Nɛ ebui alɛ shu soɔ, Owusoso Akaa ɔmɔpɔɛ ɔbɔba.

⁷ Nɔzɔ ɔgã nɛ edzo alɛ abha, nɛ ɛkpã gɛ nɔtɛzã oɖiɛ mɛ.

⁸ Pɔ otsi alɛ xɔnɔ kɛlɛ sɛ nɔobu ebui alɛ ɔtɛɛ, ebui asɛ, ɔmɔpɔɛ zizĩ kpɛkpɛ, ɔmɔpɔɛ zizĩ gɛɔmana ebela, banɔ shu zizĩ, kaɖɔ kpa ɖɔɖɔ nɛ anɔ shu, nɛ̀ atsɔ̃bui gɛide wɔnɔ olugbũ mɛ.

⁹ Nɔtɛ̀ sɛ asɛnɛ otseɖe agɔlɔ, ɔmɔsɛ nɔtɛ shɛnɛ ahɔɛ nɛ ɛkpã gɛ nɔtɛ zã oɖiɛ nɛ̀ alɛ ebui bhɛbhɛtɛ shu

¹⁰ pɛ nɔlɔkɔ ɛkpã vɔvɔ ɔkpɛ, gɛ babhɛtɛ ɛlɛ avɔvɔ nɛ̀ kibuititì nɛ agɛ yɛabhɛtɛ kanɔ nɔ̀ kedzi avɔvɔ tɛzazã mɛ.

¹¹ Nɛ ɛkɛlɛ Helaeyi alo Yudaeyi nanà ama, kɛhɔ̃a bhui bhui alo kɛhɔ̃a mabhui mabhui ma. Anɔ gɛ ehu buluhũ gɛ betielũ ɔlɛ mɛ tsyɛ ama, alo anɔ gɛ yɛ awuhũ agɛ kpà, anɔ dzidzì alo anɔ gɛ alɛ yɛishu ahɔɛ mɛ, pɔ tenikpo balɛ nɛ Kristo mɛ, kɛlɛ Kristo yɛalɛ alɛ petee mɛ.

¹² Kliso asɛ banɔ gɛ Owusoso Akaa ebu elù, gɛ balɛishu dalɛ pɛ adɛmɛ nɛ alɛ ana, nɔlɔkɔ ashagabui ɖiɖi, ɛyamɛ gbangbã tɛbhɛbhɛtɛ, ishu esi zhizhini, ishu nyanyana ovunɔ nɛ̀ kitu esi lulu ɔkpɛ asɛ akpɛkpɛ.

¹³ Nɔolũ agɔlɔ esi tɛ̀ nɔlɔkɔ ɔmɔpɔɛ ebui nɔnɔ gɛ ɔkpasɛ wɔnɔ ɛshiɛ otsye agɔlɔ. Nɔlɔkɔ tsye asɛ kana gɛ Apaleteɛ tsyɛ alɔkɔ etsye ɔnɔ ana.

¹⁴ Nɛ ebui piapi alɛ nyɔ̃ɔ edeɛ, nɔlɔkɔ tɛdɛdɛmɛ nɔ gɛ ɛlɛ nyanà ebuiɛ petee ovunɔ nɛ tenikpo bhɛbhɛtɛ gɛ apɛ̃ mɛ.

¹⁵ Nɔkɔ Kristo ishu yɔyɔ ŋã wɔnɔ etúɔ nabha, ɔmɔsɛ asɛ banɔ gɛede ishupi tunikpo mɛ ana, bekulu ɔnɔ avɛnɔ ishu yɔyɔ mɛ. Kɛlɛ nɔlɔkɔ ahɔɛhuhu.

¹⁶ Nɔkɔ Kristo ibuiɛ zã wɔnɔ mɛ nɛ kedzi yɛyɛkɛ mɛ nɛ kibeɛ gɛ nɔkasɛ ɔdɔ̃ pɛ nohu buluhũ ɔkɔ agɔlɔ nɛ bubutì petee mɛ, nɛ kibeɛ gɛ nɔɔkalà ɛdzɛ zhazhã eplukpa pɛ nɔzhã ɛfɔfuĩa mɛ ɛdzɛɛ nɛ̀ ahɔɛhuhu nɛ wɔnɔ etúɔ mɛ ɔkɔ Owusoso Akaa.

¹⁷ Kɛlɛ kɛka nyia ka gɛ nɔbhɛtɛɛ tsyɛɛ, onupɛ kibui ɖɔɖɔ alo ebui bhɛbhɛtɛ mɛ tsyɛ elo, nɔbhɛtɛ alɛ petee nɛ Apalete Yesu inyèɛ mɛ, tɛ nɔlɔkɔ ahɔɛ huhu ɔkɔ Owusoso Akaa ɔganà yɛabha.

Ɔsha Gɛ Gbanà Kristo Bɔpamɛanɛ

¹⁸ Banyɛ edzinì mɔ, nɔozhinì ishu esi ɔkɔ wɔnɔ enyine alɛ, asɛ gɛ kɛshɔnɔ nɛ Apaleteɛ mɛ ana.

¹⁹ Badzɛ enyineɛ, nɔdɛmɛ nɔ nɛ̀ wɔnɔ edzinì alɛ, kɛlɛ nɔdɔ fɔ̃ɔ kɔ alɛ.

²⁰ Bunuvɔɛ nɔ, nɔolũ atɔ̃ ɔkɔ wɔnɔ elĩ nɛ̀ wɔnɔ akaalɛ nɛ kɛka nyia ka mɛ, ɔmɔsɛ kɛlɛ ku Apalete nawɔ̃.

²¹ Beyiakaa tsyɛ, nɔtɛ ɔkpɛ wɔnɔ eyi alɛ ɔmɔpɔɛ, onu gɛnɛ anaa kemikpɛkpɛ atɛ bazã alɛ mɛ.

²² Banɔ dzidziɛ, nɔolũ atɔ̃ ɔkɔ wɔnɔ kesiakpa abha apaleteɛ nɛ kɛka nyia ka mɛ, nɔtɛ bhɛtɛ ɛlɛ sɛ gɛ balɛ awuhũɔ etsiɖi wɔnɔ abha tɛ nɔoku alɛ awɔ̃ so, pɔ nɔbhɛtɛ ɛlɛ odenɔ ɛyamɛ nɛ̀ kitu gbangbã mɛ tɛ nɔlɔkɔ ɔkpɛ kɛtakpu esi ɔkɔ Apaleteɛ nɔ.

²³ Kɛka nyia ka gɛ nɔbhɛtɛ, nɔbhɛtɛ ɛlɛ nɛ wɔnɔ kitúɔ petee mɛ, asɛ axɔ̃ɛ wɔawɔa ɔkɔ Apaleteɛ ana, gɛnɛ ɔkɔ banɔdzyrame

²⁴ ɔmɔsɛ nɔonyi ɔsɛ nɔbɔmɔ kaŋãsi odenɔ Apaleteɛ ɔkɔ asɛ kɛbhɛ babuia ana. Apalete Yesu nɔ ɔkpɛ ɛtakpu esi ɔkɔ.

²⁵ Aka nyia aka gɛ abhɛtɛ kibui kpa, babà buia kɛlɛ bhɛ̃ akɔɛ, kɛlɛ bamɛ ɖiɖi nanà mã ɛlɛ mɛ.