Koloseanɛ 2 - Nyangbo New Testament

¹ Ɛpɛ sɛ nɔotì kana gɛ ɛwlɔãkɛ ɔkɔ ɔnɔ nɛ̀ bagɛ alɛ Ladokia nɔ, nɛ̀ banɔ nɔ petee gɛ akamɔ mɛ eɖiɛ.

² Kɛgɛ ɛtɔɖɔ kɛlɛinu ɔsɛ tɛ̀ bamɔ̃ kemikpɛkpɛ nɛ alɛ etúɔ mɛ tɛ̀ babhɛtɛ tenikpo nɛ tɛdɛdɛmɛ nɔ mɛ, sɛ tɛ bamɔ ehoeyi ɔdɔ̃ petee nɛ ebui esi lulũ mɛ, sɛ tɛ̀ betì Owusoso Akaa ebui kpukpũɔ gɛ bekulu asɛ Kristoɔ,

³ gɛ yɛ mɛ bekpũ bubutì mɛ ehoeyi ɔdɔ̃ gɛinu bubutì nɛ̀ kibuititìɛ.

⁴ Itseɖe ɔnɔ kibui ɛlɛ sɛ tɛ ananà atɛ bawɔɛ ɔnɔ, nɛ̀ ebui wawlɔakɛ gɛ lawɔ̃ɛ asɛ lapɛ̃ɛ.

⁵ Ɛma ɔnɔ ɔbha nɛ ishupi mɛ tsyɛ elo, ɛlɛ wɔnɔ ɔbha nɛ ɔfɔfuĩa xɔnɔ mɛ, kɛlɛ ɛpɛ sɛ mɛitì kɛlɛ gɛ wɔnɔ tɛyɛyɛkɛŋã lɛ gagalĩ nɛ Kristoɔ mɛ.

Ishu Ahɔɛmɛ Zazã Odenɔ Banɔdzyrame Ɔsha Kɔkɔ Ɔganà Ɛkpã Zazãna Nɛ Kristo Mɛ

⁶ Klisoɔ, asɛ kana gɛ nɔ yɛkɛ Yesu Kristo asɛ Apalete ana, nɔvɛ̀ ɛlɛ abha tɛ̀ nɔzã yɛ mɛ,

⁷ nɔkpɛ̀ igu tɛ̀ nɔbhɔ tɔɖɔ kabha nɛ yɛ mɛ, nɔzã gagalĩ nɛ tɛyɛyɛkɛŋã mɛ asɛ kana gɛ bakasɛ ɔnɔ ana, tɛ̀ nɔkɔ ɔnɔ ahɔɛhuhu eyuku gbagbà.

⁸ Nɔoɖi ɛlɛ ɔkɔ sɛ ananà agɛmɔ idzo nanà pɛ alɔkɔ asɛnɛ bubuti ebui alɔkɔ awɔɛ wɔnɔ nɔ, ebui gɛ lakpà plɛnɔ banɔdzyrame ɛkɔɔ nɛ̀ kanɔ mɛ ɛkpã zazãna ebui ɔdɛ Kritoɔ.

⁹ Ɔmɔsɛ Kristoɔ mɛ, Ɔfɔfuĩa nɔ ɔlɛ ɛkpã bazã nɛ ishudzya mɛ,

¹⁰ kɛlɛ balɔkɔ Kristo akɔ ɔnɔ petee, anɔ gɛ yɛenu kɛtakpu akɔ ohumi nɛ̀ ɔsha kɔkɔ ka nyia ka.

¹¹ Yɛmɛ bebhui kɛhɔ̃a akɔ ɔnɔ, gɛ nɔ shɛnɛ ahɔɛ nɛ wɔnɔ ebui kpa bhɛbhɛtɛ shu, gɛnɛ kɛhɔ̃a gɛ bebhui nɛ̀ banɔdzyrame ahɔɛ, pɔ kɛhɔ̃a gɛ Kristo ebhui,

¹² gɛ bavɔbɔ wɔnɔ aplɛnɔ yɛ nɛ bulĩ kpɛkpɛ mɛ pɛ befeke wɔnɔ aplɛnɔ yɛ nɛ wɔnɔ tɛyɛyɛkɛŋã mɛ, ɔganà Owusoso Akaa yɛohumi nɔ mɛ, anɔ gɛ yɛefeke yɛ edenɔ bekpuɔ mɛ.

¹³ Kibeɛ gɛ nɔotsí nɛ wɔnɔ ebui kpa bhɛbhɛtɛ mɛ, gɛ beke bhui kɛhɔ̃a akɔ ɔnɔ pɛ nɔzã ebui kpa bhɛbhɛtɛ mɛ tyɛ elo, Owusoso Akaa akɔ nɔzã nɛkpã nɛ̀ Kristo. Alɔkɔ ebui kpa etsye ɔlɔ petee,

¹⁴ gɛ batsà odì akpɛ ebui fɔfɔnɔ kukuɔ nɛ̀ alɛ ɔsha gɛ lɔɛtití nɛ ɔlɔ shuɔ mɛɛ, alɔkɔ alɛ ashɛnɔ adɛ kpalà nɛ butsì osiɛ shu.

¹⁵ Kibeɛ gɛ ayɛkɛ keyutadɔ̃ nɛ̀ ihumi nɔ nɛ̀ bekusiɛ petee ahɔɛɛ, ebui ɛlɛ akasɛ nɛ banɔɛshi, gɛ alɔkɔ butsí osiɛ amɔ kabhaŋaŋã nɛ alɛ shuɔ.

¹⁶ Klisoɔ nɔtɛkɔ anɔ nanà ekulu kebhu nɛ̀ ɔnɔ nɛ kɛgɛ nɔɔŋã alo pɛ nɔwɔ̃ɛ shu, alo nɛ kibui tili gɛ kpa plɛnɔ ɔhamɛ iwui ŋaŋã shu, asɛ woele vɔvɔ iwui ŋaŋã alo nɛ Sabat kimoelewuiɛ shu.

¹⁷ Ebui alɛ enu kɛtɔwui ɔkɔ ebuiɛ gɛ alɛ otugbà abaa, ebuiɛ gɛenu ebui gbã, Kristoɔ mɛ bamɔ̃ alɛ.

¹⁸ Nɔtɛkɔ anɔ nanà gɛ adɛmɛ ezhini ishu esi nɛ asɛnɛ mɛ, pɛ aakpɛ kɛtakpu esi ɔkɔ baxɔ̃ɛdɛ abhɛtɛ akɔ nɔtɛ mɔ kɛbhɛ̃ babuia nɔ. Anɔ alɛ nɛidiɛ anyɔ̃ ebui mɛ nɛ ebuiɛ gɛ amɔ̃ shu, kɛlɛ yɛ ekpeɖekpeɖeɛ gɛ ama ɔfɔfuĩa nɔ mɛ akɔ efeke yɛishu nɛ kɛgɛ ma kɛnanà mɛ shu.

¹⁹ Ayala idzoɔ gɛ kpasɛ yɛ nɛ agɛ yɛenu Kɛtakpuɔ nɛishi, anunɔ gɛ yɛ mɛ ishudzya petee nyana agɔlɔ ovunɔ pɛ lɛkpɛ tsà nɛ̀ tɛzɛ̃ɛ, pɛ lishe asɛ kana gɛ Owusoso Akaa abhɛtɛ asɛ lisheɛ.

²⁰ Gɛ nɔotsí ɔplɛnɔ Kristoɔ nɛ kanɔ alɛ mɛ ɛkpa zazãna shuɔ, kiɖe so pɛ nɔbhɛtɛ asɛ gɛ onupɛ nɔkɔ ɔkpasɛ kanɔ nɔ̀ mɛɛ dza? Nɔkɔɔ ɔkpɛ kɛtakpu esi ɔkɔ ɔsha ɛlɛ gɛ bakpɛ asɛ,

²¹ “Nɔtɛ vɛnɔ ahɔɛ nɛ ɛdɔ̃ ɛlɛ shu! Nɔoti minì kɛɛlɛ̀ oɖi! Nɔotì hunu kɛɛlɛ̀ tsyɛ oɖi!”

²² Babhɛtɛ alɛ nyɔ̃ɔ asɛ lɛezĩ odenɔ alɛ ishu axɔ̃ɛ wɔawɔa mɛ, ɔmɔsɛ lakpà ɔplɛnɔ banɔdzyrame ɔsha kpɛkpɛ nɛ̀ bɔdɔ̃ kakasɛ.

²³ Ɔsha ɛlɛ nɛidi wɔ̃ɛ asɛ bubutì ebui lɛinu, nɛ kanà gɛ lɛitũ kibui kpɛ sɛ bakpɛ ɛtakpu esi akɔ ɛlɛ, asɛnɛ ishu esi zhizhini kɔ ɛlɛ, nɛ̀ kana gɛ lɛɛbhɛtɛ̀ ebui gbudugbudù nɛ̀ ishupiɛ, pɔ kɛgɛ bakɔ ɔsɛ beyi ide nɛ ishudzya mɛ ebui pɛpɛ nɔ ma alɛ ahɔɛ.