Koloseanɛ 1 - Nyangbo New Testament

¹ Mɛ Paulo gɛinu anɔkpɛkpɛ ɔkɔ Yesu Kristo nɛ Owusoso Akaa tɛpɛpɛ ulũ, nɛ̀ Timoteo gɛenu bɔlɔ adzya,

² Bɔlɔ sɛsɛ eplukpa alɛ ɔkɔ ɔnɔ banɔ dadalɛ gɛenu bɔlɔ adzya alɛ nɛ Apaleteɛ mɛ pɛ nɔɖɔ kibui gbã nɛ Koloseɛ, Tibhui bhuibu nɛ̀ ishu yɔyɔ odenɔ Owusoso Akaa ɔkɔ kɔ ɔnɔ.

Ahɔɛhuhu Nɛ̀ Owusoso Akaa Tikukulu

³ Buuhù Owusoso Akaa gɛenu bɔlɔ Apalete Yesu Kristo Yɛakaa ahɔɛ kibe nyia be gɛ onupɛ bukulu Owusoso Akaa nɛ wɔnɔ ɛtakpu,

⁴ ɔmɔsɛ bulu wɔnɔ tɛyɛyɛkɛŋã nɛ Yesu Kristo abha nɛ̀ wɔnɔ tɛdɛdɛmɛ nɔ gɛ nɔlɔkɔ ɔkɔ banɔ dadalɛ petee,

⁵ tɛyɛyɛkɛŋã nɛ̀ tɛdɛdɛmɛ nɔ gɛide kidzo mɛ ɖiɖi ebuiɛ gɛ babalɛ elu akɔ ɔnɔ nɛ kititiɛ mɛ, asɛ kana gɛ nɔotilũ nɛ kibuiɛ gɛ kinu kibui gbã mɛ, gɛinu kibui gbangbã

⁶ gɛ ba ɔnɔ kɔ. Nɛ kanɔ nɔ̀ mɛ petee nɔ, kibui gbangbã ɛlɛ yù eyuyù kɛlɛ kishe tɔɖɔ, asɛ kana gɛ kɛbhɛtɛ nɛ wɔnɔɛshi odenɔ kiwui ɛlɛ nabha gɛ nɔolũ ɛlɛ pɛ nɔolũ Owusoso Akaa tibhui bhuibu nɛ̀ ɛlɛ kibui gbã petee esi.

⁷ Nɔ kpasɛ ɛlɛ odenɔ Epafro bɔlɔ adzya gɛ aadɛ axɔ̃ɛ aplɛnɔ ɔlɔ ɔkɔ, anɔ gɛ aɖɔ tɛyɛyɛkɛŋã ebui nɛ ɔlɔ ɛtakpu,

⁸ pɛ yɛetseɖe ɔlɔ wɔnɔ tɛdɛdɛmɔ nɔ nɛ Ɔfɔfuĩa nɔ mɛ.

⁹ Nɛ kibui ɛlɛ shu soɔ, odenɔ kiwuiɛ gɛ kɛlɛ abha bulũ wɔnɔ ɔdɔ̃ɔ, bɔkà yɔlɔ Owusoso Akaa tikukulu kɔ ɔnɔ pɛ bubisi Owusoso Akaa sɛ eyuku ɔnɔ mɛ nɛ̀ kibuititì nɛ yɛ tɛpɛpɛ ulũ ɔganà ɔfɔfuĩa mɛ bubuti nɛ̀ ebui esi lulũɔ petee mɛ.

¹⁰ Kɛlɛ bukulù Owusoso Akaa sɛ tɛ̀ nɔzã nɛkpã gɛ ɛshɔ̃ ɔkɔ Apaleteɛ pɛ lɛbàku yɛawɔ̃ nɛ kidzo ka nyia ka abha, tɛ̀ nɔoyu eyuyù nɛ kɛxɔ̃ɛ gbangbã ka nyia ka wɔawɔa mɛ̀, tɛ̀ nɔoshè nɛ Owusoso Akaa kibuititìɛ mɛ,

¹¹ tɛ̀ nɔzã gagalĩ nɛ̀ ohumi petee nɛ yɛ ohumi dadalɛ nulũ, sɛ tɛ̀ nɔmɔ kemi kpɛkpɛ nɛ̀ kitu esi lulu tɛ nozohu Akaa

¹² ahɔɛ nɛ̀ same, anɔ gɛ akɔ nɔ shɔnɔ sɛ nɔmɔ tili odenɔ banɔ dadalɛ kaŋãsiɛ gɛalɛ bukusi ɔŋãkɔ gɛ dalɛ.

¹³ Ɔmɔsɛ yɛebu ɔlɔ odenɔ otumũ mɛ kabha ŋaŋã esi, kɛlɛ agbanà ɔlɔ amana Yɛeyianyɛ gɛ adɛmɛnɔ bukusi ɔŋãkɔ,

¹⁴ anɔ gɛ yɛmɛ bebu ɔlɔ pɛ balɔkɔ ɔlɔ ebui kpa etsye ɔlɔ.

Kristoɔ Gɛadɛɛ

¹⁵ Yesu yɛakpasɛ Owusoso Akaa gɛ bɔtɛ mɔɔ tɛlɛlɛ mɛ, eyi gɛiputɔ gɛ bamɔ̃ pɛ aŋã bɔdɔ̃ bhɛbhɛtɛ petee abha.

¹⁶ Ɔmɔsɛ ɔganà yɛabha babhɛtɛ bɔdɔ̃ɔ petee, kititì ɔdɔ̃ nɛ̀ kesiakpa abha ɔyɛ, bɔgɛ bamɔ̃ nɛ̀ awuhũ nɛ̀ bɔgɛ batɛ amɔ̃, edzì asɛ beekusi ugbu alo ihumi elete alo beekusi alo ɔshakɔkɔ tsyɛ elo, yɛabhɛtɛ ɔdɔ̃ petee kɛlɛ bɔlɛ kɔɛ.

¹⁷ Yɛalɛ flogo pɛ bɔdɔ̃ petee babà, kɛlɛ yɛmɛ bɔdɔ̃ petee nyana agɔlɔ vunɔ.

¹⁸ Kɛlɛ yɛenu kɛtakpu akɔ ishudzyaa nɛ̀ ɔhaa, yɛenu kesi kpɛkpɛ nɛ̀ eyi gɛiputɔ gɛ bamɔ̃ pɛ ede bekpuɔ mɛ aba, sɛ tɛ̀ nɛ kɛka nyia ka mɛɛ, yɛabà amɔ̃ ohumi adɛ.

¹⁹ Ɔmɔsɛ samè eku Owusoso akaa asɛ yɛakpasɛ yɛmɛ,

²⁰ kɛlɛ ɔganà yɛabha tɛ̀ abhɛtɛ̀ yɛishu tenikpo nɛ̀ bɔdɔ̃ petee, edzì asɛ kesiakpa abha ɔdɔ̃ alo kititi ɔyɛ tsyɛ elo, tɛ̀ abhɛtɛ tenikpo ɔganà yɛ dzyosu nɔ gɛ babalɛ̀ nɛ butsi osiɛ shuɔ mɛ.

²¹ Gɛ noyidè nɛ Owusoso Akaa shu pɛ nɔodzì banɔ gɛ nɔtɛ ɔdɛmɛ nɛ yɛ nɛ wɔnɔ ekpeɖekpeɖe mɛ, nɛ wɔnɔ ɛkpã kpaa gɛ nɔodzi nɔ shu so.

²² Pɔ otsiɛ xɔnɔ, abhɛtɛ̀ ɔnɔ tenikpo nɛ̀ Kristo ishudzya ɔganà butsi mɛ, tɛ̀ abhɛtɛ wɔnɔ ishu lɛ dalɛ nɛ yɛamɛ, tɛ̀ batɛmɔ kihututũ nanà nɛ ɔnɔ shu tɛ̀ noboli odenɔ kɛpɔ bubu mɛ,

²³ onupɛ nɔzã ɛlɛ abha nɛ ɔnɔ tɛyɛyɛkɛŋã mɛ, pɛ nɔodzi gagalĩ, pɛ nɔgɛ shɛ nɛ wɔnɔ kidzo mɛ ɖiɖiɛ gɛlɛ kibui gbangbã mɛ shu. Kibui gbangbã ɛlɛ gɛ nɔolũɔ baɖɔ etseɖe kɛdɔ̃ bhɛbhɛtɛ ka nyia ka gɛ lɛ kitití niesi, pɛ kɛlɛ shu mɛ Paulo badzi axɔ̃ɛdɛ ɔkɔɔ.

Paulo Axɔ̃ɛ Wɔawɔa Ɔkɔ Ɔhaa

²⁴ Otsi alɛ ɛmɔ samɛ nɛ kɛgɛ ɛlɛ shu mɛtɔ ɔkɔ ɔnɔ, kɛlɛ mɛishu dzya mɛ yuku nɛ̀ kɛgɛ ma mɛahɔɛ nɛ Kristo ɔtɔ shuɔ, ɔmɔsɛ nɛ yɛishu dzya shu soɔ, gɛenu ɔhaa

²⁵ Ɛbadzì kɛlɛ axɔ̃ɛdɛ ɔganà kɛxɔ̃ɛ gɛ Owusoso Akaa akɔ mɛ sɛ ɛkpɛ ahɔɛ akɔ ɔnɔ gɛinu Owusoso Akaa ibuiɛ petee,

²⁶ gɛenu ebui kpukpũɔ gɛ balɔkɔ ekpũ agɔ kpekpè nɛ alɛ pɛ bɔmɔ̃ gelee bafala, pɔ otsi bebu ɛlɛ akasɛ banɔ dadalɛ.

²⁷ Balɛ Owusoso Akaa ebu elu asɛ bakɔ bagɛ etinu Yudanɛ etì nɛ ehoeyi ɔdɔ̃ dadalɛ gɛlɛ ebui kpukpũ alɛ shu, gɛenu Kristoɔ gɛ akpasɛ ɔnɔ mɛ, yɛabha bulũ awɔ̃ akɔ ebui dadalɛ.

²⁸ Bɔɖɔ yɛebuiɛ ɔkanà, kɛlɛ bɔlɔkɔ bubutì petee kpalà anɔ pɛ bɔkasɛ alɛ ɔdɔ̃, sɛ tɛ̀ bɔkɔ aka nyia aka ana nɛ Kristo mɛ.

²⁹ Ɔvɛnɔ kibui ɛlɛ ɔgɔgɔɛ ɔkɔɔ mɛɛtɔ, pɛ ɛwlɔ̃akɛ nɛ̀ yɛohumi nɔ petee, gɛ lɔwɔa axɔ̃ɛ gagalĩi nɛ mɛ mɛ̀.