Kibui Bubú Kasɛ 9 - Nyangbo New Testament

¹ Axɔ̃ɛdɛ trimiɛ abɔ yɛexoele nɔ, kɛlɛ ɛmɔ kɛwɔ̃ɛ tili gɛ wɔlɛ de ititíɛ pɛ kɛbadɔ esiakpa nabha. Balɔkɔ ozĩ dzudzu opupuiakɔ akpɛ ahɔɛ akɔ kɛwɔ̃ɛ.

² Gɛ adalɛ ozĩ dzudzu nulũɔ, ɔnyɔ̃ dodó toli ode okoeyi ɔmɔ asɛ kifu gɛtã nɛ̀ ɔɖɛklɛmɛ ana. Ɔnyɔ̃ gɛ odekoeyì nɛ ozĩɛ mɛɛ, ɔkɔ ɔsɛ kiwiɛ nɛ̀ kɛlɛ́ nɔ mɛ ku otumũ.

³ Ahɔaye ekoeyì ode ɔnyɔ̃ mɛ ezhi aba kesiakpa nabha, kɛlɛ bakɔ alɛ ohumi ɔmɔ asɛ esiakpa abha katabuiadzyɔ ɔyɛ ana.

⁴ Bagɛkɔ alɛidzo asɛ tɛ bezĩ tɛwɔa nanà, bɔdɔ̃eyi alo beesi nanà nɛ esiakpa nabha, pɔ bagɛ begitũ Owusoso Akaa ɛnyeɛ nɛ alɛ utuɔ ete.

⁵ Bagɛ kɔ alɛ ohumi ɔsɛ tɛ beyí alɛ, pɔ sɛ tɛ bawɔa alɛ ɔnyɔnyɔ̃ nɛ bewoele teti mɛ ete. Kɛlɛ ɔwɔ̃nyɔnɔ gɛ bamɔɔ, ɔzã asɛ ishu gɛtã anɔ onupɛ katabuiadzyɔ atá anɔ teli ana.

⁶ Nɛ kibe ɛlɛ banɔ abaapɛ butsí asɛ tɛ betsí, pɔ batɛ bamɔ ɔlɛ, baba pɛ asɛ tɛ betsí, pɔ butsí tɛba dɛmɛ ɔkɔ alɛ.

⁷ Ahɔaye nɔ azã ɔmɔ asɛ basɔ nɔ gɛ babálɛ alɛ àkɔ keyu tatá ana. Kɛdɔ̃ tili zã alɛ atakpuɔ ɔmɔ asɛ sikã ekusikutu bekumu ana, kɛlɛ balɛ amɛ azã ɔmɔ asɛ anɔdzyrame ayɛ ana.

⁸ Balɛ tɛkã dzi ɔmɔ asɛ adzɛ tɛkã, kɛlɛ balɛ eneɛ eyi dzyata ayɛ.

⁹ Bupiɛ nɛ balɛitéɛ mɛ zã asɛ ɔɖa apɛ nɛidi gɛ buyuelete atɔɖɔ kité mɛ ana, kɛlɛ ozĩɛ gɛ oyi ode balɛ ɔsɛɛ mɛɛ, oyi basɔ gelee tɛlɛlɛ̀ ozĩ, kɛlɛ ɔmɔ asɛ apaka ihu gɛ bege avɛnɔ keyutu.

¹⁰ Balɛ itseɛ nɛ̀ kiwuɔ gɛ batà anunɔ lɛ asɛ katabuiadzyɔ ɛyɛ ana, kɛlɛ balɔkɔ alɛ itseɛ gɛ ohumi ɔkpasɛ ɛlɛ mɛ awɔa ɔfɔ̃ nɛ̀ banunɔ nɛ bewoele teti mɛ.

¹¹ Ekusiɛ galɛ alɛ ahɔɛ yɛenu axɔ̃ɛdɛ galɛ ozĩ dzudzu nulũ. Nɛ Hebrianɛ uluhũɔ mɛɛ, bekului asɛ Abadon, kɛlɛ nɛ Helanɛ ɔyɛ mɛ pɔɔ, bekului asɛ Apolion.

¹² Bɔtɔ gagalĩɛ gɛiputɔ lũ bafala, pɔ bɔtɔ gagalĩ bhlatɔ tɔɔbha lɛ gɛzɛ babá.

¹³ Axɔ̃ɛdɛ hlomiɛ abɔ yɛexoele nɔ, kɛlɛ ilũ ozĩ oyi odenɔ asha galɛ sikãosubha gɛ ɔlɛ Owusoso Akaa namɛɛ mɛ.

¹⁴ Etseɖe axɔ̃ɛdɛ hlomiɛ gɛ evunɔ kexoele nɔ asɛ, “Boele baxɔ̃ɛdɛ talɛ̃ gɛ banyã elu nɛ Frat kelĩkekpu hohoe nɔ tɔ̃ɔ.”

¹⁵ Kɛlɛ beboele baxɔ̃ɛdɛ talɛ̃ gɛ babálɛ elu akɔ ɔɖatatá ɔlɛ, kiwui, woele nɛ̀ kɛgɔɔ mɛ sɛ bèyí banɔdzyrame kawɔ̃pɛ tramiɛ mɛ.

¹⁶ Ilũ sɛ bagɛ azã basɔ nabha akɔ keyu tatá tɛkakalà mɛ zã ihotu edi ihotu akpã taabha.

¹⁷ Bebu basɔ nɔ nɛ̀ agɛ azã alɛ abha akasɛ mɛ nɛ bɔlala mɛ anii. Balɛ itelũ ɔɖa dzã hanyãa, ɛkɔ tili kpɛ blu tutũ kɛlɛ ɛkɔ tili tsyɛ linu ɔkɔkɔbɔ. Basɔ nɔ atakpuɔ edzi ɔmɔ asɛ badzyata ayɛ, kɛlɛ kifu, ɔnyɔ̃ nɛ̀ iɖuaklagbu ekoeyì odenɔ balɛ ilugbũɔ mɛ.

¹⁸ Balɔkɔ banɔ yiyíudɔ̃ tɔɔta ɛlɛ̀ gɛinu kifu, ɔnyɔ̃ nɛ̀ kifu aklagbu gɛ ezekoeyì edenɔ basɔ nɔ ilugbũɔ mɛɛ, eyí banɔdzyrameɛ tɛkaklà bɔwɔ̃pɛ tɔɔta nɔ.

¹⁹ Ilugbũ nɛ̀ itseɛ mɛ ihumi nɔ zã ɔkɔ basɔ̃nɔ. Balɛ itseɛ zã ɔmɔ asɛ beblidzya, kɛlɛ atakpu nɛidi gɛzã alɛ ahɔɛ, bazalɔkɔ akpɛ ebi nɛ banɔdzyrameɛ shu nɔ.

²⁰ Banunɔ gɛ agɔ̃, pɛ banɔ yiyíudɔ̃ ɔlɛ giyí alɛ tsyɛ elo, begitsyina nɛ balɛ ahɔɛ ɔdɔ̃ bhɛbhɛtɛ niede. Bagɛ yɔlɔ ɛtakpu esi ukpɛ ɔkɔ ɛfɔfuĩa kpa, nɛ̀ ibudi gɛ balɔkɔ sikã, sikã fufu, ɔɖa dzadzã, aklagbu nɛ̀ isí abhɛtɛ nɔ—ibudiɛ gɛ lɛtɛlà mɔ̃ nɛ̀ awuhũ, alo lilũ, alo lɛgã.

²¹ Begitsyina etú mɛ nɛ banɔ yiyí niede, alo ihui yɛyɛkɛ ebui, ɔmamɛ dɛdɛ alo tizuzru mɛ.