Kibui Bubú Kasɛ 8 - Nyangbo New Testament

Adadã Gegenemiɛ Nɛ̀ Kilifi Sikãesugbaa

¹ Gɛ adalɛ adadã gegenemiɛ, kitití udɔ̃ mɛ nyɔ̃ɔ tatɔ̃ klananá ɔvɛnɔ asɛ ɔɖa tatá tonikpo egulũ ana.

² Kɛlɛ ɛmɔ baxɔ̃ɛdɛ tegegene gɛ balɔɛtití nɛ Owusoso Akaa otugbà kɛlɛ bakɔ alɛ buxoele tugegene.

³ Axɔ̃ɛdɛ bhlatɔ gɛ evunɔ sikã ilifi itsikpi nɔ tsyɛ aba, pɛ alɔɛtití nɛ bɔdɔ̃ pɔpɔɛ osubha shu. Bakɔɛ ilifi gelee sɛ tɛ alɔkɔ aplɛnɔ banɔ dadalɛ balɛ Akaa tikukulu, atɔɖɔ sikãosubha gɛ ɔlɛ ekusiegbuɔ otugbà nabha.

⁴ Kilifi ɔnyɔ̃, nɛ̀ banɔ dadalɛ Akaa tikukuluɔ wu ɔvɛ Owusoso Akaa otugbà gana axɔ̃ɛdɛ yɛahɔɛ mɛ.

⁵ Axɔ̃ɛdɛ alɔkɔ kilifi itsikpi nɔ, ebu kifu nɛ bɔdɔ̃ pɔpɔɛ osubha mɛ akpɛ itsikpi nɔ mɛ, kɛlɛ awãnya ɛlɛ akpɛ kesiakpa nabha. Kɛlɛ subha lɛlɛ́, subha gugũ, subha ifu bubú nɛ̀ kesiakpa tishushukù ba ɛlɛ mɛ.

Buxoele Tugegeneɛ Tɛbɔbɔ̀

⁶ Kɛlɛ baxɔ̃ɛdɛ tegegeneɛ ahɔɛ gɛ buxoele tugegeneɛ zãa, babálɛ ishu asɛ tɛ babɔ buxoele nɔ.

⁷ Gɛ axɔ̃ɛdɛ gɛeputɔ abɔ̀ yɛexoele nɔ, amɔklagbu nɛ̀ kifu gɛ batsa nɛ̀ dzyosu ezhi abalɛ esiakpa nabha. Kɛlɛ kanɔ nɔ̀ mɛ awɔ̃pɛ tramiɛ atã pɔɛ, beesi nɛ awɔ̃pɛ tramiɛ nɛ̀ tɛwɔa wɔwɔ pete tsyɛ tãpɔɛ.

⁸ Axɔ̃ɛdɛ bhalà abɔ yɛexoele nɔ, kɛlɛ kɛdɔ̃ tili gɛlɛ ɔmɔ asɛ butu hohoe gɛ bɔtã ana, awãnya akpɛ aƒuɔ mɛ. Aƒuɔ yɛawɔ̃pɛ tramiɛ etsyina edzi dzyosu,

⁹ bɔdɔ̃ gɛlɛ nɛ ɛkpã nɛ aƒuɔ mɛ awɔ̃pɛ tramɛ etsí, kɛlɛ kidzo ɛlɛ nabha kelĩabhahuɔ awɔ̃pɛ tramiɛ gɛzã ɛkɛlɛ lɛyɛ.

¹⁰ Axɔ̃ɛdɛ tramɛ abɔ̀ yɛexoele nɔ, kɛlɛ kɛwɔ̃ɛ hohoe tili gɛezebu ifu asɛ ɔbía nɔ obozhi oku bulĩkekpu nɛ̀ belĩɛ gɛ bedekoeyì nɛ ɛxɔa mɛɛ, ɛlɛ ɔwɔ̃pɛ tɔɔta,

¹¹ kɛwɔ̃ɛ nɛinye nu ɔsɛ, Osì Kɛtɛtɛ́. Belĩɛ ɔwɔ̃pɛ tɔɔta tsyina dzi belĩ kɛtɛtɛ́, kɛlɛ banɔ gelee etsí ɔgana belĩ alɛ titsyitsyina mɛ.

¹² Axɔ̃ɛdɛ lɛlɛ̃mɛ abɔ yɛexoele nɔ gɛ kalɛ ozĩɛ odihu kiwiɛ, woele nɔ nɛ̀ awɔ̃ɛ, alɛ ɔwɔ̃pɛ tramiɛ, gɛ kɛkɔ ɔsɛ balɛ ɔwɔ̃pɛ tramɛ ɛlɛ tsyina dzi otumũ. Nɛ kiwuiɛ awɔ̃pɛ tramɛ mɛɛ kiwi nyenye gɛzã, kɛlɛ elishiɛ awɔ̃pɛ tramɛ tsyɛ otumũɔ ozodo ɔtɔɖɔ.

¹³ Gɛ ilu awɔ̃ pɛ iɖiɛ, ilũ odi toli gɛ lozopruru ɔfala nɛ kɛlɛ́ nɔ mɛ pɛ lɔzɔɖɔ gagalĩi ɔsɛ, “Kɛba gagalĩ! Kɛba gagalĩ! Kɛba gagalĩ ɔkɔ wɔnɔ esiakpa abha anɛ, nɛ buxoele nɔ gɛ baxɔ̃ɛdɛ tatá gɔgɔɛ nɔ abàbɔ nɛ idegba shu so!”