Kibui Bubú Kasɛ 7 - Nyangbo New Testament

Banɔ Kɛkpã Zɛzɛ Nɛ̀ Afɛtalɛ Nɛ̀ Talɛ Gɛ Bebu Eluɔ

¹ Nɛ kɛlɛ niɛdeɛ, ɛmɔ baxɔ̃ɛdɛ talɛ gɛ bazã kitití nɛ esiakpa idekrekpu tɛlɛ nabha, gɛ badã idzo akpɛ esiakpa abha alɛɛ́ nɔ asɛ tɛ letifu afala nɛ esiakpa, aƒu alo, busi nanà abha.

² Kɛlɛ ɛmɔ axɔ̃ɛdɛ bhlatɔ gɛ ede kiwiɛ otukɔ aba, gɛ evunɔ agɛ Owusoso Akaa enunuɔ alɔkɔ etũ inye nɔ. Akpɛ ozĩ gagalĩ ekulu baxɔ̃ɛdɛ talɛ gɛ bakɔ ohumi asɛ tɛ bezĩ esiakpa nɛ̀ aƒuɔ asɛ,

³ “Notɛ ozĩ esiakpa alo aƒuɔ alo besiɛ ɔvɛnɔ kibeɛ gɛ bedere adadã nɛ bɔlɔ Owusoso Akaa axɔ̃ɛdɛ nɛutukpe nɔ.”

⁴ Kɛlɛ ilũ banɔ tɛkakalà mɛ nɔnɔ́ gɛ betũ inye nɛ alɛ abha gɛenu banɔ ihotu kɛkpã zɛzɛ̀ nɛ̀ afɛtalɛ nɛ̀ talɛ (144,000) gɛ bebu edenɔ Israelanɛ egbogboɔ pete mɛ.

⁵ Banɔ ihotu lɔfɔ nɛ̀ tɛɛbha betũ enye akɔ odenɔ Yuda igbogboɔ mɛ, bebu banɔ ihotu lɔfɔ nɛ̀ tɛɛbha odenɔ Ruben igbogboɔ mɛ, denɔ Gad igbogboɔ mɛɛ bebu banɔ ihotu lɔfɔ nɛ̀ tɛɛbha,

⁶ Aser igbogboɔ mɛɛ, bebu banɔ ihotu lɔfɔ nɛ̀ tɛɛbha, nɛ Naftali igbogboɔ mɛɛ, bebu banɔ ihotu lɔfɔ nɛ̀ tɛɛbha, nɛ Manase igbogbɔ mɛɛ, bebu banɔ ihotu lɔfɔ nɛ̀ tɛɛbha,

⁷ nɛ Simɔn igbogboɔ mɛɛ, bebu banɔ ihotu lɔfɔ nɛ̀ tɛɛbha, nɛ Levi igbogboɔ mɛɛ, bebu banɔ ihotu lɔfɔ nɛ̀ tɛɛbha, nɛ Issaka igbogboɔ mɛɛ, bebu banɔ ihotu lɔfɔ nɛ̀ tɛɛbha,

⁸ nɛ Zebulon igbogboɔ mɛɛ, bebu banɔ ihotu lɔfɔ nɛ̀ tɛɛbha, nɛ Yosef igbogboɔ mɛɛ bebu banɔ ihotu lɔfɔ nɛ̀ tɛɛbha, nɛ Benyamin igbogboɔ mɛɛ bebu banɔ ihotu lɔfɔ nɛ̀ tɛɛbha.

Banɔɛza Kpekpè Tili Nɛ Bakpɛkpɛ Dzlolo Frɛrɛ Mɛ

⁹ Nɛ kɛlɛ niedeɛ ɛmɔ banɔɛza kpekpè tili gɛ anɔ nanà atɛ balà akalà nɛ mɛotugbà, bede ɛmadi ka nyia ka, egbogbo, banɔ edi edi nɛ̀ beluhũ ka nyia ka mɛ, pɛ balɔ itití nɛ ekusiegbuɔ nɛ̀ Obhoshieyiɛ otugbà. Bakpɛ akpɛkpɛ dzlolo frɛrɛ, pɛ bevunɔ trɛwɔ̃a nɛ balɛ ahɔɛ mɛ.

¹⁰ Bakpɛ ozĩ gagalĩ asɛ, “Tibubu de bɔlɔ Owusoso Akaa ɔkɔ, anunɔ gɛedzi ekusiegbu nabha, nɛ̀ Obhoshieyiɛ.”

¹¹ Baxɔ̃ɛdɛ pete alɔɛtití akana ekusiegbuɔ, banɔ sheshèɛ nɛ̀ bagã talɛɛ. Bakpɛ amɛ esi nɛ ekusiegbuɔ otugbà kɛlɛ bazakpɛ kɛtakpu esi akɔ Owusoso Akaa,

¹² baɖɔ asɛ, “Amen! Kinye kpɛkpɛ nɛitití nɛ̀ ishu dadalɛ bubuiti, ahɔɛ huhú nɛ̀inye tɛkpɛkpɛ nɛitití ohumi nɛ̀ bupu onu bɔlɔ Owusoso Akaa yɛ denɔ otsiɛ ɔvɛnɔ tihɔɔ. Amen!”

¹³ Kɛlɛ banɔ sheshèɛ mɛ anɔ tenikpo ebisi mɛasɛ, “Banɔ alɛ gɛ bakpɛ akpɛkpɛ fufu dzlolo alɛ pɔ, fakɔ anɛ benu kɛlɛ fakɔ bedeɛ dza?”

¹⁴ Ibuiliulũ asɛ, “Apalete, wonyi.” Kɛlɛ aɖɔ asɛ, “Balɛ enu banunɔ gɛ bagã ekoeyì nɛ bɔtɔ gagalĩɛ mɛ, pɛ beplu balɛ akpɛkpɛ dzloloɔ, pɛ babhɛtɛ alɛ befuli frɛrɛrɛ nɛ Obhoshieyiɛ dzyosu nɔ mɛ.

¹⁵ Kliso pɛ, balɛ Owusoso Akaa ekusiegbuɔ otugbà pɛ badɛ yɛaxɔ̃ɛ nɛ yɛuvũɔ mɛ kemuze nɛ̀ elishi, kɛlɛ anunɔ gɛ edzi ekusiegbu nabha ebefe yɛpɔtɛ agba nɛ balɛ abha.

¹⁶ Bɔbhɛ zaayi alɛ oɖi, oluwɔ̃ɛ ozoyi alɛ oɖi. Kiwi zɛbanye tã alɛ, kɛlɛ kɛkpɛkpɛ nanà tsyɛ zakpɛ alɛ ɔtɔ.

¹⁷ Ɔmɔsɛ Obhoshieyiɛ gɛ ɔlɛ ekusiegbu nabha nɛ kɛma nɛishiɛ, ɔlɛ obodzi balɛ agbagbana, abagbana alɛ avɛnɔ ɛkpã ulĩ gɛ ikoeyi ɔmɔ asɛ Kahɔɛ ana shu. Kɛlɛ Owusoso Akaa ebetsuru ɛwɔ̃mɛ ka nyia ka nɛ balɛ amɛ.”