Kibui Bubú Kasɛ 6 - Nyangbo New Testament

Badadã Tegegeneɛ

¹ Gɛ ilu awɔ̃ pɛ iɖiɛ, ɛmɔ Obhoshieyiɛ gɛ ɔzadalɛ badadã tegegeneɛ gɛeputɔ. Kɛlɛ ilũ bagã talɛ ɔmayɛmɛ tenikpo gɛ azaɖɔ kaɖɔ ɔmɔ asɛ subha gɛ alɛ́ɛ asɛ, “Ba!”

² Kɛlɛ tɛ mɛiɖiɛ, ɔmɔ ɛsɔ fufu teli nɛ mɛotugbà. Bɔnyɔ̃ zã anunɔ gɛ azã yɛabha ahɔɛ kɛlɛ bakɔɛ ekusikutu tili. Kɛlɛ ekoeyì nɛ̀ ɛsɔ nɔ asɛ kabha ŋaŋãelete gɛ avɛ adɛŋã abha nɛ keyutu ana.

³ Gɛ Obhoshieyiɛ adalɛ adadã bhalàa, ilũ gɛ agã bhalà aɖɔ asɛ, “Ba!”

⁴ Kɛlɛ ɛsɔ bhlatɔ ekoeyì aba, gɛ adzã hanyã. Bakɔ anunɔ gɛ etsiɖi yɛabha ohumi asɛ tɛ ebu ishu yɔyɔ nɛ kesiakpa nabha tɛ kɛkɔ ɔsɛ tɛ banɔ bezeyí bagɔlɔ. Kliso balɔkɔ bɛtɛ̀ hohoe teli akpɛ yɛahɔɛ.

⁵ Gɛ Obhoshieyiɛ adalɛ adadã tramɛɛ, ilũ gɛ agã tramɛ aɖɔ asɛ, “Ba!” kɛlɛ gɛ iɖiɛ, ɛmɔ ɛsɔ tutũ. Anɔ nɔ̀ gɛ yɛazã yɛabha anyana buyintse tɔɔbha gɛ badɛ ɔdɔ̃ nɔ̀ evunɔ nɛ ahɔɛ mɛ

⁶ Kɛlɛ izilũ ozĩ toli gɛ ɔmɔ asɛ bagã talɛɛ nɛishi loyi odenɔ pɛ baɖɔ asɛ, “Agɔ̃lɛ bɔna kayintse tienikpo tɛdɛdɛ ayɛkɛ kiwui zɛzɛ ɛxɔ̃ɛ wɔawɔa ɛbhɛ, kɛlɛ nikpèe bɔna buyintse tɔɔta bɔyɛkɛ kiwui zɛzɛ ɛxɔ̃ɛ wɔawɔa ɛbhɛ gɛinu sikã ɛhoeyi tinikpo. Kɛlɛ notizĩ bɔbɔ́ nɛ̀ wain!”

⁷ Gɛ Obhoshieyiɛ adalɛ adadã lɛlɛ̃mɛɛ, ilũ kaɖɔ odenɔ agã lɛlɛ̃mɛ ɔkɔ ɔsɛ, “Ba!”

⁸ Gɛ iɖiɛ ɛmɔ ɛsɔ teli gɛ azã pɔlɔ̃ɔ. Anɔ nɔ̀ gɛ azã yɛabha nɛinye nu Butsí, kɛlɛ bekpuɔ azã yɛede aba kpakpa mii. Bakɔ alɛ ohumi nɛ kanɔ nɔ̀ kalɛ awɔ̃pɛ lɛlɛ̃mɛ ɔsɛ tɛ balɔkɔ bɛtɛ̀, bɔbhɛ, banyã kpa nɛ̀ bagãhoeɛ nɛ kesiakpa nabhaa, tɛ beyí banunɔ.

⁹ Gɛ adalɛ adadã trimiɛ, ɛmɔ bagɛ beyí nɛ Owusoso Akaa ibui nɛtakpu, nɛ̀ bagɛ anyana yɛibui dadalɛ mɛ evunɔ, balɛ atɔwuiɛ nɛ bɔdɔ̃ pɔpɔɛ osubha niesi.

¹⁰ Bakpɛ ozĩ gagalĩ pɛ bebisi asɛ, “Apalete Ekusi Dadalɛ nɛ̀ kibui gɛlɛ ɛlɛ ɔzãkɔelete, kibe ɖuwoelu wobòkulu ebhu nɛ̀ kesiakpa abhaeleteɛ pɛ obobisi ulɔ dzyosu nɔ gɛ babàlɛ nɛibui ɔkɔ ɔlɔɔ dza?”

¹¹ Kɛlɛ balɔkɔ akpɛkpɛ dzlolo fufu akɔ balɛ mɛ anɔ nyia anɔ, kɛlɛ betseɖe alɛ asɛ, bewlui adɔfɔ̃ kɛbɔɛ ɔvɛnɔ kibeɛ gɛ beyí balɛ ɔhagbo baxɔ̃ɛdɛ nɛ̀ balɛ adzya alɛ gɔgɔ̃ɛ nɔ gɛ batɔɖɔ asɛ bebèyíɛ ebeke.

¹² Izilu awɔ̃ ɖi gɛ adalɛ adadã hlomiɛ. Kesiakpa eshuku gagalĩ. Kiwiɛ tsyina nɔ tututũ ɔmɔ asɛ ɔkpɛtɛ gɛ balɔkɔ epidzya tutũ tɛkã ɛpɔtɛ akamɛ ɔlɛ nɔ ana. Kɛlɛ woele nɔ pɔ etsyina adzã ɔmɔ asɛ dzyosu ana,

¹³ kɛlɛ awɔ̃ɛ awɔlɛ ede ititíɛ abadɔ nɛ esiakpa asɛ kɛzã gɛ kɛzã onupɛ kɛlɛ́ gagalĩ fu pɛ kamɔtɔ̃síyuyu awɔlɛ̀ ana.

¹⁴ Kititíɛ yalá ku kɛlɛ́ nɔ mɛ ɔmɔ asɛ kɛkã gɛ bakã eplukpa ewunɔ itití ana, kɛlɛ butu nɛ̀ kelĩ mɛ etukpɔ ka nyia ka agazã alɛ ɔzãkɔ.

¹⁵ Kɛlɛ kesiakpa abha ekusi, bekusieyi, keyuta agbagbla, ehoeyielete, ohumielete, banɔ dzidzi nɛ̀ bagɛ alɛ alɛishu ahɔɛ mɛ nyɔ̃ɔ bebè kpũ ishu nɛ izĩ nɛ̀ aklagbuɔ galɛ butu shuɔ nɛishi.

¹⁶ Bekulu etseɖe betuɔ nɛ̀ aklagbuɔ asɛ, “Nɔwɔlɛ ɔdɔ ɔlɔ abha, tɛ nokpũ ɔlɔ sɛ tɛ anunɔ gɛ edzi ekusiegbu nabha atɛmɔ ɔlɔ tɛ Obhoshieyiɛ ɔmɔpɔɛ ɔtɛba ɔlɔ abha!

¹⁷ Ɔmɔsɛ balɛ ɔmɔpɔɛ kpa ɛkpɛbe iwuiɛ na, kɛlɛ wɔafana gɛ ɔbɔlàzã ɔlɛ ulũ?”