Kibui Bubú Kasɛ 5 - Nyangbo New Testament

Keplukpa Nɛ̀ Obhoshieyiɛ

¹ Nɛ kɛlɛ niedeɛ, ɛmɔ anunɔ gɛ azã esi nɛ ekusiegbu nabha yɛevunɔ keplukpa nɛ yɛŋã ahɔɛ mɛ gɛ bɔdɔ̃ fɔfɔnɔ zã kalɛ ɛmɛ nɛ̀ kedeɛ nyɔ̃ɔ, kɛlɛ bedere alɛ amɔnɔ nɛ̀ badadã tegegene.

² Kɛlɛ ɛmɔ axɔ̃ɛdɛ gagalĩ teli gɛ akpɛ ɛlɛ amana nɛ ozĩ asɛ, “Afana gɛ ashɔnɔ asɛ tɛ ayɛɛ badadã alɛ tɛ adalɛ eplukpaa dza?”

³ Pɔ anɔ nanà ama ititíɛ alo kesiakpa nabha alo kesiakpa niesi gɛ abalà adalɛ eplukpa mɛ pɛ abalà eɖi alɛ mɛ ete tsyɛ.

⁴ Ibi yoyo popopo ɔmɔsɛ bagɛ mɔ anɔ nanà pɛ ashɔnɔ asɛ tɛ adalɛ eplukpa alo tɛ eɖi alɛ mɛ.

⁵ Kɛlɛ anɔ sheshèɛ tenikpo etseɖe mɛasɛ, “Tɛ obi yoyo! Ɖio, Dzyata gɛede Yuda igbogboɔ mɛ pɛ enu David yɛeshui nɔɔ, aŋã abha. Yɛabalà eplukpa adalɛ nɛ̀ badadã tegegeneɛ.”

⁶ Kɛlɛ ɛzɛmɔ obhoshieyi, gɛ ɔmɔ asɛ bebhui ɔlɛ, pɛ loli bagã talɛ nɛ̀ banɔ sheshèɛ gɛ ebu kɛma akpɛ ekusiegbuɔ nɛishi. Asha tegegene nɛ̀ awuhũ tegegene lɔkpɛ. Gɛenu Owusoso Akaa Ɛfɔfuĩa tigegeneɛ gɛ akpɛ asɛsɛ kanɔ nɔ̀ mɛ peteɛ.

⁷ Aba kɛlɛ abayɛkɛ eplukpa edenɔ anunɔ gɛ azã ekusiegbu nɛ ŋãmɛ ahɔɛ.

⁸ Kɛlɛ gɛ ayɛkɛ eplukpaa ebekeɛ, bagã talɛ nɛ̀ anɔ sheshè afɛtaabha nɛ̀ talɛ akpɛ bamɛ esi nɛ Obhoshieyiɛ otugbà. Ohuisaŋgũ nɛ̀ sikãesugba azã balɛ mɛ anɔ ka nyia ka ahɔɛ gɛ beyuku nɛ̀ aɖuɖo huhuhudɔ̃. Kɛlinu banɔ dadalɛ balɛ Owusoso Akaa tikukuluɔ.

⁹ Kɛlɛ bazhã ɔdzɛ vɔvɔ asɛ, “Wonu anunɔ gɛ ɔshɔnɔ ɔsɛ tɛ bɔlɔkɔ eplukpa kɔ tɛ ɔdalɛ kalɛ adadã, Ɔmɔsɛ wɔ bebhui, kɛlɛ wɔdzyosu nɔ, wɔlɔkɔ odzi banunɔ ɔkɔ Owusoso Akaa odenɔ egbogboɔ nyɔ̃ɔ mɛ, beluhũ, banɔdzyrameeyi nɛ̀ ɛmadi.

¹⁰ Ɔbhɛtɛ alɛ sɛ tɛ bedzi ekusiupã nɛ̀ banɔlũazazã sɛ tɛ badɛ axɔ̃ɛ akɔ ɔlɔ Owusoso Akaa, kɛlɛ babàŋã ukusi nɛ esiakpa nabha.”

¹¹ Gɛ iɖi pɛ ilũ baxɔ̃ɛdɛ ihotu, ihotu gelee ozĩ kpɛkpɛ nɛ̀ alɛ ihotu lɔfɔ edi lɔfɔ. Bebu kɛma akana ekusiegbuɔ, bagã nɛ̀ banɔ sheshèɛ.

¹² Bazazhã ɔdzɛ nɛ̀ ozĩ asɛ, “Obhoshieyiɛ gɛ beyiɛ, ɔlɛ ɔshɔnɔ ɔsɛ, tɛ lɔyɛkɛ ohumi, ehoeyiudɔ̃, bùbuti, nɛ̀ bupu kinye kpɛkpɛ nɛitití, tɛdadalɛ nɛ̀ same kpɛkpɛ!”

¹³ Kɛlɛ ilũ idɔ̃ bhɛbhɛtɛ ka nyia ka nɛitití nɛ̀ esiakpa, kesiakpa niesi nɛ̀ aƒu nabha, nɛ̀ kɛka nyia ka gɛlɛ alɛ mɛɛ bazazhã ɔdzɛ asɛ, “Anɔ nɔ̀ gɛ edzi ekusiegbu nabha nɛ̀ Obhoshieyiɛ kinye kpɛkpɛ nɛitití, tɛdadalɛ, ishu dadalɛ nɛ̀ ohumi, odenɔ tihɔ ɔvɛnɔ tihɔɔ!”

¹⁴ bagã talɛ aɖɔ asɛ, “Amen,” kɛlɛ banɔ sheshè akpɛ bamɛ esi pɛ bakpɛ ɛtakpu esi akɔ Akaa.