Kibui Bubú Kasɛ 4 - Nyangbo New Testament

Ekusiegbu Nɛititíɛ

¹ Kidegbaa, ilu awɔ̃ ɖi kɛlɛ ɛmɔ opupu toli gɛ ɔdalɛ ɔzã nɛ kititíɛ. Kɛlɛ kaɖɔ gɛ itilũ putɔ ɔmɔ asɛ exoele olimɛ ana, lɔzɔɖɔ ɔsɛ, “Wù ɔba ɛkɛlɛ tɛ mɛibu kɛgɛ bàba ɛlɛ mɛ nɛ ɛlɛ̀ niedeɛ kasɛ wɔ.”

² Tsĩɔ ɔlɛ koɔ, Ɔfɔfuĩa nɔ otsoku mɛ mɛ̀ kɛlɛ mɛmɔ ekusiegbu tieli nɛititíɛ gɛ anɔ teli azã kalɛ abha.

³ Kɛlɛ anunɔ gɛ azã ekusiegbu nabha shu dalɛ asɛ yaspa nɛ̀ sardis aklagbu dadalɛ ana. Enegèɛ gɛ azã asɛ ɛklagbu gɛitse ana kana ekusiegbuɔ shu ɔfala nɔ.

⁴ Bukusiugbu afɛtaabha nɛ̀ tɔlɛ bhlatɔ tuli tsyɛ zɛ kana kalɛ, kɛlɛ banɔ sheshè afɛtaabha nɛ̀ talɛ gɛ akpɛ akpɛkpɛ fufu pɛ bekumũ sikã ekusiekutuɔ nɛ alɛ atakpuɔ zã bɔlɛ abha.

⁵ Denɔ ekusiegbuɔ mɛɛ, subhaɛfu ezeboele, ɛkɛlɛ ozogũ kɛlɛ subha azalɛ́ɛ. Efu tegegene azatã nɛ ekusiegbuɔ otugbà. Alɛ enu Owusoso Akaa yɛfɔfuĩa tigegeneɛ.

⁶ Nɛ ekusiegbuɔ otugbàa, kɛdɔ̃ tili tsyɛ lɛ ɔmɔ asɛ aƒu gɛ edzi asɛ ahuhɔ̃ɛ dadalɛ teli idi, gɛ yɛmɛ adalɛ eli lĩalĩalĩa. Nɛ kɛmamɛ gɛ ekusiegbuɔ azãa, bagã talɛ azã gɛ beyi awuhũ nɛ otugbà nɛ̀ kedeɛ.

⁷ Agã gɛ eputɔ azã asɛ dzyata, abhalà eyi nɛtsyɔɛnye, atramɛ namɛ eyi anɔdzyrame ayɛ, kɛlɛ alɛlɛmɛ asɛ odì gɛ opruɖu ana.

⁸ Bɔsɛ tuxlo zã bagã talɛ alɛ aka nyia aka shu, kɛlɛ awuhũ gelee azã balɛishu ɔkɔ nyia ɔkɔ, ɔlɔkɔ plɛnɔ bɔsɛ niesi tsyɛ. Kɛlɛ kibe nyiɛ be bazaɖɔ asɛ, “Tɛdadalɛ, tɛdadalɛ, tɛdadalɛ yɛenu Apalete Owusoso Akaa Ohumieleteɛ, gɛ atɛzã eɖi, pɛ alɛ, pɛ azabàbaa.”

⁹ Kibe nyiɛ be gɛ bagã alɛ alɔkɔ ishu dadalɛɛ, kɛtakpu esi kpɛkpɛ nɛ̀ ahɔɛ huhu akɔ anunɔ gɛ alɛ ekusiegbu nabha pɛ alɛ nɛ ɛkpã tihɔɔ nɔɔ,

¹⁰ kɛlɛ banɔ sheshè afɛtaabha nɛ̀ talɛɛ bedzu ekluisi esi akɔ anunɔ gɛ alɛ ekusiegbu nabha pɛ bakpɛ ɛtakpu esi akɔ anunɔ gɛ alɛ nɛ ɛkpã odenɔ tihɔ ɔvɛnɔ tihɔɔ nɔ. Batsɛ balɛ ekusiekutuɔ elu ekusi egbuɔ otugbà pɛ baɖɔ asɛ,

¹¹ “Bɔlɔ Apalete nɛ̀ Owusoso Akaa, wɔ kɛshɔnɔ ɔsɛ, tɛ ɔyɛkɛ tɛdadalɛ, tɛ kpɛkpɛ nɛitití nɛ̀ ohumi ɔmɔsɛ wɔbhɛtɛ kanɔ mɛɔdɔ̃ nyɔ̃ɔ, kɛlɛ gana wɔ tɛpɛpɛ ulũɔ babhɛtɛ kɛka nyia ka kɛlɛ wɔkɔ ɔsɛ bɔlɛ.”