Kibui Bubú Kasɛ 3 - Nyangbo New Testament

Ɔklasɔ̃ Ɔkɔ Sardis Ɔha

¹ “Fɔnɔ ebui alɛ ɔsɛsɛ axɔ̃ɛdɛ nɛ Sardis ɔha mɛ. Anɔ nɔ̀ gɛ yɛanyana Owusoso Akaa Ɛfɔfuĩa tigegene nɛ̀ awɔ̃ɛ tegegeneɛ evunɔɔ, yɛebuiɛ nɛ alɛ. Inyi wɔebui bhɛbhɛtɛ ɔsɛ, ɔyɛkɛ kinye ɔsɛ, ɔlɛ nɛ̀ ɛkpã, pɔ anɔ tsitsí wonu.

² Nyɛmɛ! Nyana kɛgɛ gɔ̃ nɛ wɔahɔɛ pɛ kɛɛvɛ otsikɔ mɛ ovunɔ gagalĩi, ɔmɔsɛ wɔaxɔ̃ɛ wɔawɔa akaná ebeke nɛ mɛ Owusoso Akaa namɛ.

³ Kliso bakà kɛgɛ olũ pɛ ɔyɛkɛɛ, lũ atɔ̃ ɔkɔ ɛlɛ tɛ otsyina itú mɛ. Pɔ ɔgɛ nyɛmɛɛ, ɛbàba asɛ ezĩ ana, kɛlɛ oti botì kibeɛ gɛ ɛbaba yi nɛ̀ wɔɔ.

⁴ Pɔ banɔ asasà teli alɛ Sardis, gɛ alɛ xɔ̃nɔ egi tuturu alɛ akpɛkpɛɛ. Babàzã alɛ akpɛkpɛ frɛrɛ mɛ pɛ babàgã nɛ mɛ, ɔmɔsɛ balɛ tɛzazã mɛ ku awɔ̃.

⁵ Anunɔ gɛ aŋã abhaa, yɛtsyɛ abazã bakpɛkpɛ frɛrɛ mɛ asɛ balɛ ana. Ɛtɛba xoele yɛinye nɛ ɛkpã eplukpa mɛ ɖi ɖa, pɔ ɛbabui kasɛ nɛ Mɛakaa nɛ̀ yɛaxɔ̃ɛdɛ namɛ.

⁶ Anunɔ gɛ batɔ̃ alɛ yɛɛ, tɛ elũ kɛgɛ Ɔfɔfuĩa nɔ ɔɖɔ etseɖe bahá.

Ɔklasɔ̃ Ɔkɔ Filadelfia Ɔha

⁷ “Fɔnɔ ebui alɛ ɔsɛsɛ axɔ̃ɛdɛ nɛ Filadelfia ɔha mɛ. Ebui alɛ enu anunɔ gɛ yɛenu anɔ dadalɛ, pɛ aɖɔ kibui gɛlɛ ɛlɛ ɔzãkɔ, pɛ yɛevunɔ David ukusiupã opupuiakɔɔ. Kɛgɛ adalɛɛ, anɔ nanà atɛ kalà ɛlɛ adã, kɛlɛ kɛgɛ adãa anɔ nanà atɛ kalà adalɛ ɛlɛ.

⁸ Inyi wɔaxɔ̃ɛ wɔawɔa. Ɖio, ɛlɔkɔ opupuɔ gɛ ɔdalɛ odziɛ ilu wotugbàa, gɛ anɔ nanà atɛ balà ɔlɛ adã. Gɛ inyi sɛ ohumi bhlui toli ko ɔlɛ lɛ wɔahɔɛ pɔ tsyɛ elo, ɔnyana mɛibuiɛ mɛ ovunɔ kɛlɛ ogitso dzi nɛ miede.

⁹ Bagɛ benu Satana yɛɔtsyɔakɔanɔ pɛ balɔkɔ ishu asɛ Yudanɛ benu, pɔ anɛ balɛ benu, pɔ asɛnɛ elete benuɔ-ɛbakɔ ɔsɛ bebèdzu ekluisi esi nɛ wòtugba tɛ bamɔ asɛ, ɛdɛmɛ nɛ wɔ.

¹⁰ Gɛ ɔkpɛ emi olu itú esi pɛ ɔbhɛtɛ mɛɔsha nabha soɔ, mɛ tsyɛ ɛbabu wɔ odenɔ tifefekeɖi ibe gagalĩɛ gɛbàba kanɔ nɔ̀ mɛ pete abhaa mɛ, sɛ tɛ befeke bagɛ alɛ kanɔ nɔ̀ mɛɛ eɖiɛ.

¹¹ Ɛbàba otsiɛ tsĩɔɔ. Nyana kɛgɛ lɛ wɔahɔɛ mɛ ovunɔ, sɛ tɛ anɔ nanà atɛ yɛkɛ wɔekusikutuɔ nɛ wɔahɔɛ.

¹² Anunɔ gɛ aŋã abhaa, ɛbakɔ yɛedzi bubhiashaka nɛ mɛ Owusoso Akaavũɔ mɛ. Ezekoeyì nɛ ɛkɛlɛ eɖi ɖa. Ɛbafɔnɔ mɛ Owusoso Akaa inyeɛ, nɛ̀ yɛɔma gbagbla gɛonu Yerusalem vɔvɔ, gɛ ezhi ede itití odenɔ mɛ Owusoso Akaa ɔkɔɔ, ɔlɔkɔ ɔplɛnɔɔ, ɛbafɔnɔ mɛinye vɔvɔ tsyɛ nɛishu.

¹³ Anunɔ gɛ batɔ̃ alɛ yɛɛ, tɛ elũ kɛgɛ Ɔfɔfuĩa nɔ ɔɖɔ etseɖe aháa.

Ɔklasɔ̃ Ɔkɔ Ladokia Ɔhaa

¹⁴ “Fɔnɔ ebui alɛ ɔsɛsɛ axɔ̃ɛdɛ nɛ Ladokia ɔhaa mɛ. Anɔ nɔ̀ gɛ yɛakɔ ebuiɛ aba ɛlɛ mɛ, gɛenu agɛ aɖɔ kibui gbã, nɛ̀ kibui mɛ adadalɛelete, pɛ yɛaŋã ukusi nɛ Owusoso Akaa yɛanɔ mɛ ɔdɔ̃ nulũɔ, yɛebui nɛ ɛlɛ.

¹⁵ Inyi wɔaxɔ̃ɛ wɔawɔa. Ɔgɛyɔ loo ovuifu. Mɛ tɛpɛpɛ tadzi ɔsɛ tɛ odzi anɔ yɔyɔ loo anɔ gɛ evũifu!

¹⁶ Kliso, gɛ ɔlɛ ete pɛ ɔgɛyɔ loo ovuifu soɔ, ɛbàpí wɔ tɛ bu nɛ mɛolugbũ mɛ.

¹⁷ Ɔɖɔ ɔsɛ, ‘Inu ehoeyielete, gɛ ɛmɔ ehoeyiudɔ̃ gɛ ɛtɛpɛ ɛdɔ̃ nanà.’ Pɔ ɔgɛmɔ wɔshu ɔsɛ onu ahɔɛ kpaelete, ashagabuielete, etsyuitsyui, awuhũpu nɛ̀ ɛdɔ̃ makpɛ makpɛ nɛishu anɔ.

¹⁸ Ihu uluhũ kɔ wɔ ɔsɛ tɛ odzi sikã gɛ bewoese nɛ ifu mɛɛ, sɛ tɛ ɔlà otsyina odzi ehoeyielete. Dzi apɔtɛ fufu tɛ ɔdã, tɛ ɔlɔkɔ obu wɔ ɛdɔ̃ makpɛ makpɛ iwuĩ nɔ nɛishu, nɛ̀ awuhũ bɔwa tɛ ɔkpɛ nɛ awuhũɔ mɛ tɛ ɔzɔmɔ piapii.

¹⁹ Bagɛ ɛdɛmɛ nɔɔ, balɛ mɛitseɖe nɔ pɛ ɛpɔ̃ atɔ̃ ɔkɔ. Kliso nɔkpɛ emi tɛ notsyina etú mɛ.

²⁰ Mɛ nɛ alɛ! Ili itití nɛ edulũɔ pɛ ibho opupuɔ. Onupɛ anɔ teli elũ mɛɔdɔ̃ pɛ adalɛ opupuɔ, ɛbatsoku buvũɔ mɛ kɛlɛ ɛbaŋã ɔdɔ̃ nii, kɛlɛ yɛtsyɛ abaŋã nɛ̀ mɛ.

²¹ Anunɔ gɛ aŋã abhaa, ɛbakɔ yɛidzo yɛazã aplɛnɔ mɛ nɛ mɛekusiegbu nabha, ɔmɔ asɛ kɛŋã gɛ ɛŋã abha, pɛ izhidzi plɛnɔ Mɛakaa, nɛ yɛekusiegbu nabha.

²² Anɔ gɛ atɔ̃ alɛ yɛ, tɛ elũ kɛgɛ Ɔfɔfuĩa nɔ ɔɖɔ otseɖe baháa.