Kibui Bubú Kasɛ 22 - Nyangbo New Testament

Ɛkpã Kelĩkekpuɔ

¹ Kɛlɛ axɔ̃ɛdɛ akasɛ mɛ kelĩkekpuɔ gɛ kalɛ mɛ ulĩ kɔ ɛkpãa. Bulĩɛ mɛ dalɛ ɔmɔ asɛ ahuhɔ̃ɛ ana, kɛlɛ bɔkpɛ odenɔ Owusoso Akaa nɛ̀ Obhoshieyiɛ ekusiegbuɔ mɛ.

² Bɔkpɛ gã ɔma ɔlɛ tipɔ hohoe nɛishi tɛbha. Nɛ kelĩkekpuɔ ogbogbò ka nyia kaa, ɔbɔmɔ busiɛ gɛ akɔ ɛkpã tonikpo. Gɛ eyu eyuyu lɔfɔ nɛ̀ taabha tɔɖɔ nɛ woele ka nyia ka mɛ. Kɛlɛ busiɛ awɔlakpa enu bɔwa akɔ ɛmadiɛ.

³ Kibui ɖɔɖɔ kpɛ anɔ nanà zaazã. Owusoso Akaa nɛ̀ Obhoshieyiɛ ekusiegbuɔ abazã ɔma mɛ kɛlɛ yɛaxɔ̃ɛdɛ abaadɛ axɔ̃ɛ akɔɛ.

⁴ Baba mɔ yɛamɛ kɛlɛ yɛinye bazã balɛ utukpe nɔ.

⁵ Elishi azaazã. Ananà azapɛ kifu gɛkɔ tɛdadalɛ alo kiwi nyenye, ɔmɔsɛ Owusoso Akaa yɛabakɔ alɛ tɛdadalɛ. Kɛlɛ babà ŋã bukusi ɔvɛnɔ tihɔ, tihɔ.

⁶ Axɔ̃ɛdɛ etseɖe mɛasɛ, “Ebui alɛ, lalɛ alɛ ɔzãkɔ kɛlɛ lɛenu ebui igbã. Apalete, Owusoso Akaa gɛenu ɛfɔfuĩa ɔkɔ ebuiɖɔluanɛ, yɛasɛsɛ yɛaxɔ̃ɛdɛ asɛ tɛ akasɛ bagɛ adɛ yɛaxɔ̃ɛ ebui nɔnɔ gɛ ababà alɛ mɛ gulũi nɔ.”

Yesu Aaba

⁷ “Noɖio ɛɛba otsiɛ tsĩɔɔ! Beyulà anunɔ gɛ anyana ebuiɛ gɛ baɖɔ elu nɛ eplukpa alɛ mɛ evunɔ.”

⁸ Mɛ, Yohanes, mɛinu anunɔ gɛ ilũ pɛ ɛmɔ ebui alɛ. Kɛlɛ gɛ ilũ pɛ ɛmɔ alɛɛ, izhi kumu sɛ tɛ mɛkpɛ ɛtakpu esi nɛ axɔ̃ɛdɛ gɛ ezebu ebui alɛ akasɛ mɛ otugbà.

⁹ Pɔ etseɖe mɛasɛ, “Tɛbhɛtɛ ana! Wɔhagbo axɔ̃ɛdɛ ete mɛinu ɔplɛni wɔ nɛ̀ wɔadzya alɛ ebuiɖɔluanɛ nɛ̀ bagɛ anyana ebuiɛ nɛ eplukpa alɛ mɛ evunɔ. Kpɛ ɛtakpu esi ɔkɔ Owusoso Akaa ete!”

¹⁰ Kɛlɛ etseɖe mɛasɛ, “Tidere ɔdɔ̃ nɛ ebui alɛ gɛ baɖɔ elu nɛ eplukpa alɛ mɛ ulũ, ɔmɔsɛ kibeɛ tso ba.

¹¹ Nɔkɔ anunɔ gɛ abhɛtɛ ebui kpa azã yɛebui kpa bhɛbhɛtɛ abha, anunɔ gɛ abhɛtɛ atsɔ̃buiɛ, tɛ azã alɛ abha tɛ azabhɛtɛ, nɔkɔ anunɔ gɛ abhɛtɛ ebui gbangbã, tɛ azã alɛ abha tɛ azabhɛtɛ ebui gbangbã, kɛlɛ nɔkɔ anunɔ gɛ enu anɔ dadalɛ tsyɛ azã yɛ tɛdadalɛ nabha.”

¹² “Noɖio, ɛɛba otsiɛ tsĩɔɔ! Ivũnɔ kɛbhɛ gɛ ɛbabuia nɔ, kɛlɛ ɛbakɔ anɔ ka nyia ka nɛ kɛbhɛtɛ gɛ abhɛtɛ nulũ.

¹³ Mɛinu anɔ Gɛeputɔ nɛ̀ Agɔgɔɛ nɔ, Agɛ alɛ Otugba nɛ̀ agɛ yɛalɛ Kedeɛ, Kesikpɛkpɛ nɛ̀ Ɔtɔ̃kɔ.

¹⁴ Beyulà banunɔ gɛ beplu balɛ akpɛkpɛ dzloloɔ, sɛ tɛ bakɔ alɛ idzo nɛ busiɛ gɛ akɔ ɛkpãa shu, kɛlɛ tɛ bamɔ idzo agã afala nɛ budulũɔ tɛ betsoku ɔma mɛ.

¹⁵ Bagɛ babàwɔ kevudeɛ, balɛ enu beebu, behuinɛ, bagɛ baaŋã agɔlɔ, bagɛ beyi anɔ, ibudielete nɛ̀ anɔ ka nyia ka gɛ adɛmɛ asɛnɛ sɛsɛ ebui pɛ asɛɔsɛ.

¹⁶ Mɛinu Yesuɔ, gɛ ɛkpɛ mɛaxɔ̃ɛdɛ sɛ tɛ adalɛ ebui alɛ shu akɔ wɔ tɛ odi tseɖe bahameɛ. Mɛinu David yɛogu nɛ̀ Yɛeshui nɔ, nɛ̀ Kɛvɔlɔ Ɛwɔ̃ɛ gɛ kɔ tɛdadalɛɛ.”

¹⁷ Ɔfɔfuĩa nɔ nɛ̀ anyɛedziniɛ aɖɔ asɛ, “Ba!” Anunɔ gɛ elũɔ aɖɔ asɛ, “Ba!” Anunɔ gɛ oluwɔ̃ɛ oyi yɛɛ, nɔkɔ yɛaba, kɛlɛ anunɔ gɛ apɛɛ nɔ, nɔkɔ yɛabawɔ̃ɛ bulĩɛ gɛkɔ ɛkpã faa, kɛbhɛ mabuia, mabuia.

¹⁸ Itseɖe nɔ nɛ̀ anɔ nyia anɔ gɛ elũ ebui alɛ gɛ baɖɔ elu nɛ eplukpa alɛ mɛ asɛ, onupɛ anɔ teli alɔkɔ kibui tili aplɛnɔ alɛɛ, Owusoso Akaa abalɔkɔ bɔtɔ ebuiɛ gɛ baɖɔ nɛ eplukpa alɛ mɛɛ, aplɛnɔ akɔɛ.

¹⁹ Kɛlɛ onupɛ anɔ teli ebu ebui teli tsyɛ eyinɔ nɛ ebuiɛ gɛ baɖɔ elu nɛ eplukpa alɛ mɛɛ, Owusoso Akaa tsyɛ abayɛkɛ anɔ alɛ yɛɔŋãkɔ gɛ ɔlɛ busiɛ gɛ akɔ ɛkpãa nɛ̀ ɔma dadalɛ ebuiɛ gɛ baɖɔ nɛ eplukpa alɛ mɛɛ, nɛ yɛahɔɛ.

²⁰ Anɔ nɔ̀ gɛ aɖɔaɖɔ adalɛ ebui alɛ shuɔ aɖɔ asɛ, “Ee, ɛɛba otsiɛ tsĩɔɔ.” Amen, Apalete Yesu ba.

²¹ Apalete Yesu tibhui bhuibu zã ɔplɛnɔ Owusoso Akaa yɛeyi alɛ oo. Amen.