Kibui Bubú Kasɛ 21 - Nyangbo New Testament

Kitití Vɔvɔ Nɛ̀ Kesiakpa Vɔvɔ

¹ Kidegbaa ɛmɔ itití vɔvɔ nɛ̀ esiakpa vɔvɔ. Ɔmɔsɛ kititíɛ gɛiputɔ nɛ̀ esiakpa gɛeputɔ ulũ tɛba fala, kɛlɛ aƒu nanà tsyɛ agabazã.

² Ɛmɔ Ɔma Dadalɛ gɛonu Yerusalem vɔvɔ loozhi ode Owusoso Akaa ɔkɔ nɛititíɛ ɔba. Bewoese ɔlɛ piapii asɛ kiwoese gɛ bewoese adzɛ gɛ bakpɛ buluwɔ̃a akɔ anyɛ sɛ tɛ agbana ana.

³ Kɛlɛ ilũ ozĩ loyi gagalĩ ode ekusiegbuɔ shu ɔsɛ, “Otsi alɛ Owusoso Akaa ɔzãkɔ lɛ banɔdzyrame ishi, kɛlɛ abazã aplɛnɔ alɛ. Bebedzi yɛanɔ, kɛlɛ Owusoso Akaa abazã balɛ ɔbha, pɛ yɛebedzi alɛ Owusoso Akaa.

⁴ Ebetsuru ɛwɔ̃mɛ ka nyia ka nɛ alɛ amɛ. Butsí, ɔwɔ̃nyɔnɔ, yoyò bibi alo bɔtɔ nanà zɛbazã, ɔmɔsɛ ebui kukuɔ gɛazã ulũ tɛbafala.”

⁵ Anɔ nɔ̀ gɛ azã ekusiegbu nabha aɖɔ asɛ, “Idzinɔ kɛka nyia ka bhɛtɛ ɛdɔ̃ vɔvɔ.!” Kɛlɛ azaɖɔ asɛ, “Fɔnɔ ɛlɛ olu, ɔmɔsɛ ebuiɛ alɛ àlɛ, alɛ ɔzãkɔ kɛlɛ lɛenu kɛgbã.”

⁶ Etseɖe mɛasɛ, “Kɛka nyia ka na. Mɛinu anɔ gɛ eputɔ, pɛ ɛka wlui nu Agɔgɔɛ nɔ tsyɛ, mɛinu Kesikpɛkpɛ nɛ̀ Ɔtɔ̃kɔɔ. Anunɔ gɛ olũwɔɛ oyi yɛ ɛbakɔ yɛulĩ yɛawɔɛ odenɔ bulĩɛ gɛ bukoeyi odenɔ ɛkpã bulĩ ozĩɛ mɛ, gɛ atɛ babuia ɔlɛ ɛbhɛ.

⁷ Anunɔ gɛ aŋã abhaa, bɔdɔ̃ ɛlɛ nyɔ̃ɔ badzi yɛɔyɛ, kɛlɛ ɛbadzi yɛ Owusoso Akaa, kɛlɛ yɛtsyɛ ebedzi mɛeyi.

⁸ Pɔ kifusisíelete, bagɛ agɛyɛkɛ aŋã, atsɔ̃bui abhɛbhɛtɛelete, bagɛ beyì anɔ, aglɔŋaŋãelete, behuinɛ, ibudielete nɛ̀ asɛnɛ sɛsɛelete peteɛ xɔ̃nɔɔ-balɛ ɔzãkɔ obodzi kifu gɛtã nɛ̀ aklagbuifu ɔɖɛklɛmɛ nɔ mɛ. Kɛlinu butsi bhalàa.”

⁹ Baxɔ̃ɛdɛ tegegene gɛ bevunɔ buyintse tugegene gɛ buyuku nɛ̀ bɔtɔ gɔgɔ̃ɛ nɔ gɛ bàba, ɔmayɛmɛ tenikpo aba kɛlɛ etseɖe mɛasɛ, “Ba, ɛbakasɛ wɔ adzɛ gɛ bakpɛ buluwɔ̃a eluɔ, gɛenu Obhoshieyiɛ yɛedzini.”

¹⁰ Nɛ Ɔfɔfuĩa mɛɛ, efeke mɛ adɛ tɔɖɔ butu hohoe, ɖaɖama tuli abha, kɛlɛ ebu Ɔma Dadalɛ, gɛonu Yerusalem gɛode Owusoso Akaa ɔkɔ nɛititíɛ ozhiɛ akasɛ mɛ.

¹¹ Owusoso Akaa ishu dadalɛ zitse nɛ ɔlɛ mɛ, kɛlɛ ɔlɛ titsetseɛ zã ɔmɔ asɛ yaspa ɛklagbu, gɛ kɛlɛ mɛ dalɛ ɔmɔ asɛ ahuhɔ̃ɛ mɛ.

¹² Babhɔ egli dodó, ɖaɖama akana ɔmaa, gɛ budulũ lɔfɔ nɛ̀ tɔɔbha zã alɛishu. Baxɔ̃ɛdɛ lɔfɔ nɛ̀ taabha azã budulũɔ. Nɛ budulũɔ shuɔ, bafɔnɔ Israel egbogbo lɔfɔ nɛ̀ taabha enye atɔɖɔ.

¹³ Bebu budulũ tɔɔta nɛ kiwiɛ otukɔ nɛibe, tɔɔta lɛ piabhaɛbeɛ, tɔɔta lɛ pialɛ ibe kɛlɛ tɔɔta tsyɛ lɛ kiwiɛ ɔdɔkɔ nɛibe.

¹⁴ Buvũ esikpɛkpɛ egli edi lɔfɔ nɛ̀ taabha babhɔ akɔ ɔma egiliɛ. Kɛlɛ nɛ kɛka nyia aka abhaa, bafɔnɔ Obhoshieyiɛ yɛanɔ kpɛkpɛ lɔfɔ nɛ̀ taabha enyeɛ atɔɖɔ.

¹⁵ Axɔ̃ɛdɛ gɛ aɖɔaɖɔ nɛ mɛɛ, evunɔ sikãishi tili idi gɛ alɔkɔ edzyidzyi ɔmaa, ɔlɛ budulũɔ nɛ̀ egiliɛ nɔ.

¹⁶ Ɔma gɛ bebhuiɛ, ɔlɛ tidzedze mɛ nɛ̀ ɔlɛ tɛnɛnɛ̀ɛ mɛ pete ashɔ̃. Axɔ̃ɛdɛ edzyidzyi ɔma ɔlɛ kɛwɔã zɛ̀zɛ nɛ̀ ɔɖɛishì nɔ, kɛlɛ ɔlɛ tidzedzeɛ mɛ lɛ asɛ ɛtsɛkɔ ohotu zɛzɛ̀ nɛ̀ akpã talɛ̃. Ɔma ɔlɛ tidzedzeɛ, nɛ̀ tɛnɛnɛ̀ mɛ̀ pete shɔ̃.

¹⁷ Axɔ̃ɛdɛ edzyidzyi egiliɛ tsyɛ kɛlɛ alɛ tɛɖaɖama mɛ zã asɛ bɔtsrɛkpɔ akpã taabha, kishi nɔ gɛ axɔ̃ɛdɛ alɔkɔ nu anɔdzyrame ɔdɔ tidzyi dzyidzyí ɔyɛ.

¹⁸ Balɔkɔ yaspa aklagbu abhɔ egiliɛ nɔ, kɛlɛ babhɔ ɔma nɛ̀ sikã gbangbã gɛ yɛmɛ adalɛ asɛ ahuhɔ̃ɛ ana.

¹⁹ Balɔkɔ aklagbu gbangbã edi edi ewoese kesikpɛkpɛ egiliɛ nɔ. Kesikpɛkpɛ aklagbuɔ gɛeputɔ enu yaspa, tɛbhɔbhɔ tɔɖɔ ɔbhalà nu safir, atramɛ enu kalkedon, kɛlɛ alɛlɛmɛ enu emaragad,

²⁰ etrimiɛ enu sardonik, ehlomiɛ enu sardis, egegenemiɛ enu krisolit, asɛmiɛ enu beril, ezhitamiɛ enu topas, kɛfɔ̀miɛ nu krisopras, kɛfɔ̀ nɛ̀ toliɛ nu hiakink kɛlɛ kɛfɔ̀ nɛ̀ taabhaa nu ametist.

²¹ Balɔkɔ bɔdɔ̃ gɛitse ŋelĩŋelĩɛ ewoese ɔma ɔlɛ budulũ lɔfɔ nɛ̀ tɔɔbhaa nɔ. Sikã gbangbã adɛ gɛ ɔbɔlà ɔmɔ bɔdɔ̃ ɔgana yɛmɛ asɛ ahuhɔ̃ɛ anaa, yɛ balɔkɔ akpɛ ɔma tipɔ hohoeɛ nɔ.

²² Ɛgɛmɔ Owusoso Akaavũ nanà nɛ ɔmamɛ, Apalete Owusoso Akaa Ohumieleteɛ nɛ̀ Obhoshieyiɛ balɛ enu Owusoso Akaavũɔ nɛ ɛkɛlɛ.

²³ Kiwi nɛ̀ woele etienye nɛ ɔma mɛ, ɔmɔsɛ Owusoso Akaa tɛdadalɛ yɛakɔ ɔsɛ ɔlɛ mɛ ɔdalɛ, kɛlɛ Obhoshieyiɛ yɛenu ɔlɛ kifuɔ.

²⁴ Yɛtɛdadalɛ mɛ ɛmadiɛ abàgã, kɛlɛ kesiakpa abha ekusiɛ abalɔkɔ alɛ tɛpɔpɔɖiɛ mana ɔlɛ mɛ.

²⁵ Batɛ badã ɔma ɔlɛ budulũɔ eɖi, ɔmɔsɛ elishi nanà atɛ bazã ɛkɛlɛ.

²⁶ Ɛmadiɛ abalɔkɔ balɛishu dadalɛ nɛ̀ kinye kpɛkpɛ nɛitití amana ɔma ɔlɛ mɛ.

²⁷ Kɛdɔ̃ gɛ ɛlɛ shu gɛdalɛ nanà tɛbaku ɔma ɔlɛ mɛ ɖi, alo bagɛ babhɛtɛ awuĩ ebui alo asɛnɛ elete atɛ bazã ɔlɛ mɛ. Pɔ bagɛ alɛ enye bafɔnɔ akpɛ Obhoshieyiɛ ɛkpã eplukpa mɛ ete ko balɛ abazã ɛkɛlɛ.