Kibui Bubú Kasɛ 20 - Nyangbo New Testament

Agɔ Ohotu Zɛzɛɛ

¹ Ɛmɔ axɔ̃ɛdɛ teli gɛ ezhi ede ititíɛ, gɛ evunɔ ozĩ dzudzuɔ, ɔlɛ opupukɔ nɛ̀ ɔɖaohui gagalĩ toli.

² Evũ kɛtsɔpɛ, gɛinu ebeliɛ eblidzya, gɛenu abosamuɔ alo Satana, kɛlɛ anya yɛelu agɔ ohotu zɛzɛ̀.

³ Awɔanyã yɛatɛ akpɛ ozĩ dzudzuɔ mɛ, adã ɔlɛ pɛ edere ɔlɛ ulũ akpii, sɛ tɛ atɛ mɔ idzo nanà tɛ ewlui azawɔɛ ɛmadiɛ, ɔvɛnɔ agɔ ohotu zɛzɛ̀ ede flogo. Nɛ agɔ alɛ niedeɛ, bebebui gɛ azabazã nɛ kibe gulũi mɛ.

⁴ Ɛmɔ bagɛ bakɔ alɛidzo asɛ tɛ bekulu ubhuɔ bazã beekusi ugbu abha. Kɛlɛ ɛmɔ bagɛ alɛ atakpu bebhuiɛ atɔwuiɛ, bagɛ bazaɖɔaɖɔ adalɛ Yesu nɛ̀ Owusoso Akaa yɛibuiɛ shu soɔ. Bagɛ kpɛ ɛtakpu esi akɔ agãhoeɛ alo yɛafafatɛ, kɛlɛ bagɛ yɛkɛ yɛná tsatsà nɛ butúɔ alo ɛhɔɛ tsyɛ. Bazã nɛ̀ ɛkpã, kɛlɛ baŋã ukusi aplɛnɔ Kristo agɔ ohotu zɛzɛ̀.

⁵ (Banɔ tsitsí gɔgɔ̃ɛ nɔ xɔ̃nɔ egi tsodzi anyɛmɛ ɔvɛnɔ kibeɛ gɛ agɔ ohotu zɛzɛ̀ ulũ bafala.) Kɛlinu tɛlɔlɔ́ odenɔ bekpuɔ mɛ gɛiputɔ.

⁶ Tiyuyulà nɛ̀ tɛdadalɛ ɔkɔ bagɛ amɔ tɛlɔlɔ́ gɛiputɔ ɔlɛ. Butsí bhalà tɛbamɔ ohumi nɛ alɛ abha, pɔ bebèdzi Owusoso Akaa nɛ̀ Kristo balɛ anɔlũazazã, kɛlɛ babàŋã ukusi aplɛnii agɔ ohotu zɛzɛ̀.

Beté Satana

⁷ Onupɛ agɔ ohotu zɛzɛ̀ ɔbɔfalaa, bebèbu Satana odenɔ yɛɔɖavũɔ mɛ

⁸ kɛlɛ azabavɛ adɛwɔɛ ɛmadiɛ nɛ kesiakpa idekrekpu tɛlɛ nabha, gɛenu Gɔg nɛ̀ Magɔg tɛ edi shogò alɛ akɔ keyu tatá. Balɛ tikpekpè mɛ lɛ asɛ aƒutɔ̃ ayisɛ ana.

⁹ Batsà ɛha afala nɛ kanɔ nɔ̀ mɛ, kɛlɛ bebu kɛma akpɛ Owusoso Akaa anɔ dadalɛ nɛ̀ ɔma hohoeɛ gɛ adɛmɛ nɔ. Pɔ kifù wɔlɛ ide kititíɛ pɛ kɛpɔɛ alɛ.

¹⁰ Kɛlɛ balɔkɔ abosamuɔ gɛ awɔɛ alɛ, awɔanyã atɛ́ akpɛ aklagbuifuɔ gɛ ɛtã mɛ, nɛ ɛkɛlɛ gɛ batɛ́ɛ agãhoeɛ nɛ̀ asɛnɛ ebuiɖɔluanunɔ akpɛ. Babà hɔhɔlɛ alɛ elishi nɛ̀ emuze ɔvɛnɔ tihɔ, tihɔ.

Kebhu Gɔgɔɛ Kukulu Nɛ̀ Bekpuɔ

¹¹ Kɛlɛ ɛmɔ ekusiegbu hohoe fufú tieli, nɛ̀ anunɔ gɛ azã alɛ abhaa. Kesiakpa nɛ̀ kitití shɛ̃ nɛ yɛamɛ, kɛlɛ ɔzãkɔ nanà ɔgɛ ɔzã ɔkɔ alɛ.

¹² Kɛlɛ ɛmɔ banɔ tsitsí, besheshè nɛ̀ bunuvɔɛ gɛ bazã itití nɛ ekusiegbuɔ otugbà, kɛlɛ badalɛ uplukpa mɛ elu. Baza dalɛ eplukpa bhlatɔ tsyɛ gɛenu ɛkpã eplukpa. Bekulu ebhu nɛ̀ banɔ tsitsíɛ nɛ kɛzã gɛ bazã nɛ ɛkpã, pɛ bafɔnɔ elu nɛ buplukpa mɛ nulũ.

¹³ Aƒu ebu bagɛ betsí nɛ yɛmɛ amana, kɛlɛ butsí nɛ̀ bekpuɔ ɔzãkɔ tsyɛ obu banɔ tsitsíɛ gɛ balɛ alɛ mɛɛ amana. Kɛlɛ bekulu ebhu akɔ anɔ nyia anɔ nɛ kɛgɛ yɛabhɛtɛ nulũ.

¹⁴ Kɛlɛ balɔkɔ butsí nɛ̀ bekpuɔ ɔzãkɔ atɛ́ akpɛ kifu ɔɖɛklɛmɛ nɔ mɛ. Kifu ɔɖɛklɛmɛ nɔ ɔlɛ nu butsí bhalà.

¹⁵ Onupɛ bágɛmɔ anɔ teli yɛinye sɛ bafɔnɔ ɛlɛ akpɛ ɛkpãeplukpa mɛɛ, balɔkɔ yɛatɛ́ akpɛ kifu ɔɖɛklɛmɛ nɔ mɛ.

« Roimhe

Air adhart »

Lean sinn:

Ceanglaichean taic

Sanasan