Kibui Bubú Kasɛ 2 - Nyangbo New Testament

Ɔklasɔ̃ Ɔkɔ Efeso Ɔha

¹ “Fɔnɔ ebui alɛ ɔsɛsɛ axɔ̃ɛdɛ nɛ Efeso ɔha mɛ. Anɔ nɔ̀ gɛ anyana awɔ̃ɛ tegegeneɛ evunɔ nɛ kɛŋã ahɔɛ mɛ, pɛ agãfala nɛ sikã efu isí tigegene nɛishiɛ, yɛebui nu alɛ.

² Inyi ebuiɛ gɛ ɔbhɛtɛɛ, wɔaxɔ̃ɛ gagalĩ wɔawɔa nɛ̀ emi kpɛkpɛ. Inyi sɛ ɔtɛ dɛmɛ nɔ nɛ̀ ɛtakpu mɛ gagalĩelete ibui, kɛlɛ nolu awɔ̃ oɖi agɛ beekulu alɛishu asɛ anɔ kpɛkpɛ benu, pɔ anɛ ana flogo nɔ, pɛ nɔmɔ alɛ ɔsɛ asɛnɛ elete benu.

³ Inyi ikpɛ gɛ ɔkpɛ emi nɛ̀ ilu gɛ olu itú esi nɛ bɔtɔ mɛ gɛ ɔgã nɛ mɛtakpu, pɔ ɔgɛkɔ ɛtakpu.

⁴ Pɔ kɛgɛ mɛmɔ nɛ wɔshuɔ nu ɔsɛ, ɔshɛnɛ ahɔɛ nɛ wɔtɛdɛdɛmɛ nɔ gɛiputɔ shu olu.

⁵ Baka ɔɖaɖama ɔkɔ gɛ ɔwɔlɛ odeɛ. Tsyina itú mɛ tɛ owlui ɔbhɛtɛ ebui asɛ kuku ibeɛ. Onupɛ ogitsyina wɔɛtúɔ mɛɛ, ɛbàba wɔkɔ bàbu wɔɛfu osíɛ nɛ ɔlɛ ɔzãkɔ.

⁶ Pɔ kɛgiku mɛawɔ̃ nɛ wɔshuɔ nu ɔsɛ, ɔgɛdɛmɛ nɔ nɛ Nikolainɛ ede azazã ebui bhɛbhɛtɛ asɛ kɛdɛmɛ gɛ mɛtsyɛ gɛ dɛmɛ balɛ ibui ana.

⁷ Anunɔ gɛ batɔ̃ alɛ yɛ, tɛ elũ ibuiɛ gɛ Ɔfɔfuĩa nɔ ɔɖɔ otseɖe baháa. Kɛlɛ anɔ gɛ aŋã abhaa, ɛbakɔ yɛidzo yɛaŋã busiɛ gɛ ɛkɔ ɛkpã, pɛ lɛlɛ Owusoso Akaa Bɔkã mɛɛ.

Ɔklasɔ̃ Ɔkɔ Ɔha Nɛ Smirna

⁸ “Fɔnɔ ebui alɛ ɔsɛsɛ axɔ̃ɛdɛ nɛ Smirna ɔha mɛ. Anɔ nɔ̀ gɛenu anɔ gɛ Eputɔ nɛ̀ Agɔgɔɛ nɔ, gɛ etsí pɛ azamɔ ɛkpãa, nɛibui nɛlɛ.

⁹ Inyi ampɔɛ ebuiɛ gɛ ɔmɔ nɛ̀ wɔɛtsyui dɔdɔɔ, pɔ ehoeyielete wonu nɛ ɔfɔfuĩa mɛ flogo! Inyi ishu zizĩ ebuiɛ gɛ bagɛ basɛ Yudanɛ benu, pɔ anɛ alɛ benu flogo nɔ, pɛ benu Satana ɔtsyɔakɔ azazã.

¹⁰ Tɛ osí ifu nɛ bɔtɔ gɛ bàba wɔabha shu. Itseɖe wɔ ɔsɛ, Abosam abakpɛ ɔnɔ eteli nɛ ɔɖavũ mɛ, sɛ tɛ efeke ɔnɔ eɖi, kɛlɛ nɔbɔmɔ ede tɔtɔnɔ nɛ ewui gulũi mɛ. Onupɛ butsí ibui tsyɛ elo, nɔzã kɛgɛ nɔyɛkɛ ɔŋã niede, kɛlɛ ɛbakɔ ɔnɔ ɛkpã ekusikutu.

¹¹ Anunɔ gɛ batɔ̃ alɛ yɛ, tɛ elũ ibuiɛ gɛ Ɔfɔfuĩa nɔ ɔɖɔ otseɖe baháa. Kɛlɛ anɔ gɛ aŋã abhaa, butsí bhalà tɛbabhɛtɛ ibui nanà nii.

Ɔklasɔ̃ Ɔkɔ Ɔha Nɛ Pergamo

¹² “Fɔnɔ ebui alɛ ɔsɛsɛ axɔ̃ɛdɛ nɛ Pergamo ɔha mɛ, Anɔ nɔ̀ gɛ bɛtɛ̀ ilugbũ tɛbha ŋaŋã lɛ yɛahɔɛɛ, yɛebui nu alɛ.

¹³ Inyi wɔzãkɔ nɛ ɛkɛlɛ gɛ Satana yɛekusiegbuɔ alɛ, pɔ ogitso dzi nɛ miede. Ɔgɛɖɔ ɔsɛ ɔshɛnɛ ahɔɛ nɛ mɛabha tɛyɛyɛkɛŋã shu olu. Nɛibeɛ gɛ Antipa azaɖɔ mɛibuiɛ nɛ kɛlɛ ɔzãkɔ pɛ beyí nɛ wɔnɔ ɔma hohoe mɛ tsyɛ elo, owlui ɔzã miede kokoko nɛ ɛkɛlɛ gɛ Satana alɛɛ.

¹⁴ Pɔɔ, ebui teli xɔnɔ alɛ mɛahɔɛ nɛ wɔshu. Banɔ teli alɛ wɔahɔɛ nɛ ɛkɛlɛ gɛ banyana Bileam yɛɔdɔ̃ kakasɛ mɛ evunɔ. Yɛ gɛ akɔ asɛ tɛ Balak awɔɛ Israelanɛ akpɛ ebui kpa bhɛbhɛtɛ mɛ ɔgana bɔdɔ̃ tɔtɔ ɔkɔ ibudi tɛŋaŋã, nɛ̀ ɔmamɛ dɛdɛ mɛ.

¹⁵ Kidzo ɛlɛ nabha wɔnɔ mɛ beteli tsyɛ anyana Nikolaianɛ ɔdɔ̃ kakasɛ mɛ evunɔ.

¹⁶ Kliso notsyina etúɔ mɛ! Onu gɛ nanàa, kɛtɛ badzè, ɛbàba wɔnɔkɔ, kɛlɛ ɛbaté banɔ alɛ nɛ̀ bɛtɛ̀ gɛ ede mɛolugbũɔ mɛ nɔ.

¹⁷ Anunɔ gɛ batɔ̃ alɛ yɛ tɛ elũ ibuiɛ gɛ Ɔfɔfuĩa nɔ ɔɖɔ otseɖe bahá. Kɛlɛ anɔ gɛ aŋã abhaa, ɛbakɔɛ manà kpukpũɔ teli. Ɛbakɔɛ kɛklagbu fufuɔ tsyɛ gɛ bafɔnɔ kinye vɔvɔ atɔɖɔ kɛlɛ abha ɔplɛnɔ, kɛlɛ anunɔ gɛ ayɛkɛ kɛklagbuɔ ete yɛebeti kinyeɛ.

Ɔklasɔ̃ Ɔkɔ Ɔha Nɛ Tiatira

¹⁸ “Fɔnɔ ɔsɛsɛ axɔ̃ɛdɛ nɛ Tiatira. Owusoso Akaa Yɛeyiɛ gɛ yɛawuhũɔ edzi ɔmɔ asɛ kifu ɔɖɛklɛmɛ, pɛ yɛtsɛɖɛ dzi asɛ ɔɖa dzadzã gɛ bewoese ɔlɛishu piapii ana.

¹⁹ Inyi ebuiɛ gɛ ɔbhɛtɛ, wɔtɛdɛdɛmɛ nɔ nɛ̀ tɛyɛyɛkɛŋã, wɔaxɔ̃ɛ dɛdɛ nɛ̀ wɔemi kpɛkpɛ, kɛlɛ ɔwɔa axɔ̃ɛ otsiɛ, ɔdɛ kuku ibeɛ.

²⁰ Pɔ kibui tili lɛ mɛahɔɛ nɛ wɔshu ɔsɛ, ɔdɛmɛ obuidzo ɔkɔ adzɛ alɛ gɛ enu Izebel, gɛ ekulu yɛishu asɛ ebuiɖɔluanɔ yɛenuɔ. Kɛlɛ gana yɛɔdɔ̃ kakasɛ mɛɛ, awɔɛ mɛaxɔ̃ɛdɛ asɛ tɛ bedzi ɔmamɛ dɛdɛeleteɛ, tɛ bazaŋã ɔdɔ̃ gɛ batɔ akɔ ibudiɛ.

²¹ Ɛkɔ yɛibe sɛ tɛ etsyina itúɔ mɛ, nɛ yɛɔmamɛ dɛdɛ ebui kpaa shu, pɔ atɛ adɛmɛ.

²² Ɛbakɔ yɛadɔ ɔnyã, atɔ nɛ oputso abha, kɛlɛ ɛbakɔ bagɛ awɔ̃sɔ niyɛ amɔ ɔtɔ nyagãa, onupɛ begitsyina nɛ yɛebui kpa niedeɛ.

²³ Ɛbahu yɛeyi alɛ bho bebètsí. Kɛlɛ baha nyɔ̃ɔ bebèti asɛ mɛinu anunɔ gɛ ɛmɔ banɔ etúɔ nɛ̀ alɛ ekpeɖekpeɖe mɛ. Kɛlɛ ɛbabuia ɛbhɛ ɔkɔ ɔnɔ mɛ anɔ nyia anɔ nɛ wɔ tɛbhɛbhɛtɛ ulũ.

²⁴ Wɔnɔ Tiatiranɛ gɔgɔɛ nɔ gɛ nɔgɛ nyana yɛɔdɔ̃ kakasɛ ɛlɛ mɛ ovunɔ, pɛ nɔgɛ kpasɛ Satana yɛotumũ mɛedzoɔ (ɛtɛ bawlui kpɛ ɔnɔ bɔtɔ bhlatɔ nanà.)

²⁵ Nɔnyana kɛgɛ lɛ wɔnɔ ahɔɛ mɛ ovunɔ piapii, ɔvɛnɔ mɛ babeɛ.

²⁶ Anunɔ gɛ akpɛ emi, pɛ abhɛtɛ nɛ mɛ tɛtɛtɔtɔɖɔ nabha ɔvɛnɔ kibe gɔgɔɛ nɔɔ, ɛbakɔɛ ohumi nɛ ɛmadiɛ nabha.

²⁷ ‘Abaŋã balɛ abha nɛ̀ ɔɖaɛshi, kɛlɛ abayɛ alɛ wluiwlui asɛ ketsukpu ana’, asɛ kɛyɛkɛ gɛ ɛyɛkɛ ohumi odenɔ Mɛakaa ɔkɔ ana.

²⁸ Ɛbalɔkɔ kabha ŋaŋã tsyɛ kɔɛ.

²⁹ Anunɔ gɛ batɔ̃ alɛ yɛɛ, tɛ elũ kɛgɛ Ɔfɔfuĩa nɔ ɔɖɔ etseɖe baháa.