Kibui Bubú Kasɛ 19 - Nyangbo New Testament

Kpɛ Owusoso Akaa Nɛinye Nɛitití

¹ Nɛ kɛlɛ niedeɛ, ilũ ozĩ hohoe toli gɛ ɔmɔ asɛ banɔɛza gbagbla tili odenɔ kititíɛ gɛ baakpɛ ɔlɛ asɛ, “Nɔkpɛ yɛinye nɛitití! Tibubu, ishu dadalɛ nɛ̀ ohumi onu bɔlɔ Owusoso Akaa ɔyɛ,

² yɛebhu kukulu nɛ̀ ebui mɛ bhui bhui lɛ alɛ ɔzãkɔ. Ebu kedulũ azazã gbagbla nepɔ gɛ ezĩ esiakpa nɛ̀ yɛedulũ zazã axɔ̃ɛ. Ebisi yɛaxɔ̃ɛdɛ dzyosu nɔ otití odenɔ yɛɔkɔ.”

³ Bazakpɛ ozĩ bɔbhalà asɛ, “Nɔkpɛ yɛinye nɛitití! Ɔnyɔ̃ gɛ okoeyi ode adzɛ mɛɛ, obowu abha tihɔ, tihɔ.”

⁴ Banɔ sheshè afɛtaabha nɛ̀ talɛ, nɛ̀ bagã talɛ akpɛ amɛ esi pɛ bakpɛ ɛtakpu esi akɔ Owusoso Akaa gɛ azã ekusiegbu nabhaa. Kɛlɛ bakpɛ ozĩ asɛ, “Amen! Nɔkpɛ yɛinye nɛitití!”

⁵ Kɛlɛ ozĩ oyi odenɔ ekusiegbuɔ shu ɔsɛ, “Nɔkpɛ bɔlɔ Owusoso Akaa nɛinye nɛitití, wɔnɔ yɛaxɔ̃ɛdɛ nyɔ̃ɔ, wɔnɔ agɛ osi yɛifuɔ bunuvɔɛ nɛ̀ esheshè!”

⁶ Kɛlɛ ilũ ozĩ gɛ oyi asɛ banɔɛza kpekpè tili ɔyɛ ana, nɛ̀ asɛ ɔtsɛtsɛ toli gɛ ɔtsɛ, nɛ̀ subha gɛ azalɛ́ɛ nɔ, aɖɔ asɛ, “Nɔkpɛ yɛinye nɛitití! Ɔmɔsɛ bɔlɔ Apalete Owusoso Akaa Ohumielete yɛaŋã ukusiɛ.

⁷ Nɔkɔ bɔkpɛ same tɛ bɔmɔ same tɛ bɔkɔɛ ishu dadalɛ! Ɔmɔsɛ Obhoshieyiɛ adzɛ gbagbana ɛbeɛ na, kɛlɛ adzɛ gɛ akpɛ uluwɔ̃a eluɔ, etiwoese yɛishu ebeke.

⁸ Balɔkɔ aklalɛ kplɔkpɔlɔ gɛ etse pɛ yɛamɛ ebhuiɛ, balɔkɔ akɔɛ asɛ tɛ akpɛ.” (Balɔkɔ aklalɛ kplɔkpɔlɔɔ, ashɔnɔ banɔ dadalɛ ebui gbangbã bhɛbhɛtɛ.)

⁹ Kɛlɛ axɔ̃ɛdɛ etseɖe mɛasɛ, “Fɔnɔ olu ɔsɛ, ‘Beyula akɔ bagɛ bekulu alɛ amana Obhoshieyiɛ adzɛ gbagbana ɔwlɔago ɔdɔ̃ ɔŋãkɔɔ!’ ” Kɛlɛ aɖɔ aplɛnɔ asɛ, “Owusoso Akaa, yɛolugbũ mɛ ebuiɛ gɛenu ɛgbã nu alɛ.”

¹⁰ Nɛ yɛibui ɛlɛ shuɔ, idzu ekluisi esi sɛ tɛ mɛkpɛ ɛtakpu esi kɔɛ, pɔ etseɖe mɛasɛ, “Tɛbhɛtɛ ibui ɛlɛ! Wɔhagbo axɔ̃ɛdɛ mɛinu plɛnɔ wɔ, ɔlɔkɔ ɔplɛnɔ wɔadzya alɛ gɛ baɖɔaɖɔ adalɛ Yesu shuɔ. Kpɛ ɛtakpu esi ɔkɔ Owusoso Akaa! Ɔmɔsɛ ebuiɛ gɛ baɖɔ adalɛ Yesu shuɔ alɛ enu ɔfɔfuĩa mɛ ebui gɛ baɖɔ eluɔ.”

Anɔ Nɔ̀ Gɛ Azã Ɛsɔ Fufu Nabha

¹¹ Ɛmɔ ititíɛ dalɛ zã kɛlɛ ɛmɔ ɛsɔ fufu teli, gɛ bekulu anunɔ gɛ azã yɛabha asɛ, Kibui gɛlɛ ɛlɛ ɔzãkɔelete nɛ̀ Kibui gbã elete. Alɔkɔ bamɛ maɖi maɖi ekulu ebhu pɛ atà eyu nɔ.

¹² Yɛawuhũɔ alɛ asɛ kifu ɔɖɛklɛmɛ ana, kɛlɛ bukusi ekutu gelee alɛ yɛtakpuɔ. Bafɔnɔ kinye nɛishu gɛ anɔ nanà etinyi, pɔ yɛ ete ko kɛlɛ̀ tititì mɛ ɔkɔ.

¹³ Akpɛ akpɛkpɛ dzlolo teli gɛ batɔɛ nɛ dzyosu mɛ, kɛlɛ bekulu yɛasɛ Owusoso Akaa Yɛibui.

¹⁴ Kitití uyuaza azã basɔ fufu abha nɛ yɛede. Bakpɛ aklalɛ kplɔkpɔlɔ, gɛ efuli pɛ yɛishu dalɛ piapii nɔ.

¹⁵ Bɛtɛ̀ ŋaŋã teli edekoeyì nɛ yɛolugbũɔ mɛ, gɛ abalɔkɔ eté ɛmadiɛ nɔ. “Abaŋã ukusi nɛ alɛ abha nɛ̀ ɔɖaɛshi.” Alɔkɔ Owusoso Akaa ɔmɔpɔɛ kpɛkpɛ, agã alɛ abha asɛ ɛgɛ gɛ bagã waian eyuyu abha nɛ yɛɔkãkɔ ana.

¹⁶ Bafɔnɔ kinye ɛlɛ nɛ yɛakpɛkpɛ dzlolo nɛ̀ ɛtsrɛta nabha asɛ, BEKUSI ABHA EKUSI NƐ̀ BAPALETE ABHA APALETE.

¹⁷ Kɛlɛ ɛmɔ axɔ̃ɛdɛ teli yɛalɔɛtití nɛ kiwi nabha. Akpɛ ozĩ gagalĩ etseɖe bɔzhɔɛ nɔ nɛ kɛlɛ́ nɔ mɛ asɛ, “Nobo shogò ɔkɔ Owusoso Akaa yɛɔwlɔago ɔdɔ̃ ŋaŋã hohoeɛ,

¹⁸ sɛ tɛ nɔbɔtã bekusi, buyuaza lũazazãnɔ gbagbla nɛ̀ ohumi anɔ gbagbla, basɔ nɛ̀ bagɛ azã alɛ abha, nɛ̀ banɔ edi edì, banɔ gɛ alɛ ishu ahɔɛ mɛ nɛ̀ banɔ dzidzi, bunuvɔɛ nɛ̀ besheshè ɔdzya.”

¹⁹ Kɛlɛ ɛmɔ agãhoeɛ nɛ̀ esiakpa abha ekusiɛ nɛ̀ balɛ buyuaza gɛ eshogò asɛ tɛ batá eyu nɛ̀ anunɔ gɛ etsiɖi ɛsɔ nabhaa, nɛ̀ yɛeyuiza.

²⁰ Pɔ bevũ agãhoeɛ, nɛ̀ yɛasɛnɛ ebuiɖɔluanɔ gɛ azabhɛtɛ atsyindzye ebui akasɛ nɛ yɛinye mɛɛ. Bɔdɔ̃ bubú kasɛ ɛlɛ yɛalɔkɔ awɔɛ bagɛ ayɛkɛ agãhoe ɛná tsatsà, pɛ bazakpɛ ɛtakpu esi akɔ yɛafafatɛɛ. Balɔkɔ banɔ alɛ enunuɔ taabha atɛ́ akpɛ aklagbuifuɔ, gɛtã nɛ̀ ɔɖɛklɛmɛ nɔ mɛ.

²¹ Bagɔgɔɛ nɔ xɔ̃nɔ beyí alɛ nɛ̀ bɛtɛ̀ɛ gɛ ekoeyì ede anunɔ gɛ azã ɛsɔ nabha olugbũɔ mɛ, kɛlɛ bɔzhɔɛ nɔ petee batsyuĩ alɛ ɔdzya aŋã.