Kibui Bubú Kasɛ 18 - Nyangbo New Testament

Babilonia Ayɛɛ

¹ Nɛ kɛlɛ niedeɛ ɛmɔ axɔ̃ɛdɛ bhlatɔ gɛ ezhi ede ititíɛ àba. Kabha ŋaŋã ohumi ɔzã yɛahɔɛ, kɛlɛ yɛ tɛdadalɛ kɔ ɔsɛ kesiakpa adalɛ.

² Akpɛ ozĩ gagalĩ asɛ, “Ayɛ mɔo! Babilonia hohoeɛ ayɛmɔo! Etsyina edzi ɔma ɔkɔ ɛfɔfuĩa zizĩ nɛ̀ okpukpũ ɔkɔ, ɔkɔ ɛfɔfuĩa zizĩ ka nyia ka edzì ɔzãkɔ ɔkɔ bagã nɛ̀ bɔzhɔɛ gɛ batɛtã okpũkɔ.

³ Ɔmɔsɛ amadiɛ pete awɔ̃ɛ yɛunuɔ ebuku yɛegugù unuɔ gɛ amɔ edenɔ yɛɔmamɛ dɛdɛ mɛ. Kesiakpa abha ekusiɛ awɔ̃sɔ nɛ̀ adzɛ alɛ, kɛlɛ kesiakpa abha edzinigã bedzi ehoeyielete ɔgana yɛehoeyiudɔ̃ kpekpèɛ gɛzɛ pɔɖiɛ mɛ.”

⁴ Kɛlɛ izilũ ozĩ odenɔ ititíɛ gɛɔɖɔ ɔsɛ, “Nokoeyi nɛ yɛ mɛ, mɛeyi alɛ mɔ sɛ tɛ notɛ bodzi ebui kpa abhɛbhɛtɛelete asɛ yɛ ana, sɛ tɛ yɛɔtɔ̀ kpa nanà tɛbàba ɔna abha,

⁵ ɔmɔsɛ yɛebui kpa bhɛbhɛtɛ ewu adɛtɔ̃ ititíɛ, kɛlɛ Owusoso Akaa abakà yɛ ɛtakpumɛ gagalĩɛ.

⁶ Nɔbhɛtɛ ɔkɔɛ asɛ ɛbhɛtɛ gɛ abhɛtɛ akɔ ɔnɔɔ, nɔbuia ɛbhɛ kɛlɛ edi taabha ɔkpɛ yɛyɛ́ nulũ ɔkɔɛ. Noshì kayintse nɔ gɛ eshi akɔ ɔnɔɔ, edi taabha ɔkpɛ bɔlɛulũ ɔkɔɛ.

⁷ Nɔhɔhɔli piapii tɛ amɔ ɔwɔ̃nyɔnɔ nɛ yɛishu dadalɛ ɔdɔ̃ nɛ̀ ehoeyiudɔ̃ gɛ abhɛtɛ akɔ yɛishuɔ. Efeke ishu nɛ yɛitúɔ mɛ, ‘Ɛzã esi asɛ adzɛekusi ana, itinu avɛvɛ yɛedzini, kɛlɛ yoyo bibí tɛbàba mamɛ oɖi.’

⁸ Klisoɔ bɔtɔ zizĩ babà yɛabha kiwui tili, gɛinu butsí, yoyò bibi nɛ̀ bɔbhɛ. Kifu bapɔɛ yɛ, ɔmɔsɛ ohumielete yɛenu Apalete Owusoso Akaa gɛ ekulu ebhu nii.

⁹ “Onupɛ kesiakpa abha ekusiɛ gɛ baza wɔ̃sɔ nɛ̀ adzɛ alɛ pɛ baza amɔ same nii amɔ ɔnyɔ̃ gɛ ode okoeyi gɛ onupɛ atãa, bebèbi yoyo pɛ babàmɔ ɔwɔ̃nyɔnɔ nɛ yɛtakpu.

¹⁰ Gɛ kifù badɛ alɛ nɛ yɛɔtɔ̀ shu soɔ, babazã itsí pɛ bebèebi yoyò akɔɛ. “ ‘Kɛba gagalĩ! Kɛba gagalĩ, ɔkɔ wɔ ɔma hohoe, Ɔma hohoe Babilon gɛ ohumi ɔzã ɔlɛ ahɔɛ! Nɛ ɔɖa tatá tonikpo mɛ koɔ kɛlɛ bagbã wɔakpɛ!’

¹¹ “Kesiakpa abha edzinigã ebebi yoyò nɛ̀ ɔwɔ̃nyɔnɔ ɔmɔsɛ anɔ nanà etikedzi balɛ ɔdɔ̃ dɛdɛɛ,

¹² kedzi gagã ɔdɔ̃ gɛinu sikã, sikãfufu, aklagbu gɛ ayɛkɛ edzì nɛ̀ bɔdɔ̃ gbangbã, aklalɛ kplɔkpɔlɔ nɛ̀ blɔɔ apɔtɛ, apɔtɛ gɛ ayɛkɛ edzi, silikì nɛ̀ apɔtɛ dzadzã. Bɔdɔ̃ bhlatɔ tsyɛ nu besi gɛ alɔ̃ huhuhù edi edi, nɛ̀ bɔdɔ̃ gɛ balɔkɔ kifutu mɛenyi yɛ onotsó afatɛ nɔ, isí gɛ lɛ yɛkɛ edzi, ɔɖa dzadzã nɛ̀ ɔɖa tutũ nɛ̀ aklagbuɔ gɛ ayɛkɛ edzí,

¹³ etuku gɛenu osí huhuhù toli gɛ bekulu asɛ sinamɔn nɛ̀ babɔ̀ huhuhù gɛ basara, pepere, kilifi nɛ̀ ahaliwɔɛ, wain nɛ̀ bɔbɔ́ ŋaŋã, bɔna hɔhɔ nɛ̀ agɔlɛ, banɛtsyɔɛ nɛ̀ ibhoshi, basɔɔ nɛ̀ bapakahu, ɔlɔkɔ plɛnɔ banɔdzyrame nɛ̀ balɛ atɔwuiɛ.

¹⁴ “Bedzinigã abaɖɔ asɛ, ‘Beesi eyuyuɔ gɛ ɔdɛmɛ nɔ koeyì nɛ wɔahɔɛ. Wɔehoeyi udɔ̃ pete nɛ̀ kana gɛ otséɛ ɔyala, gɛ ɔzɛɔmɔ ɔlɛ oɖi.’

¹⁵ Bedzinigã gɛ bazadɛ bɔdɔ̃ ɔlɛ pɛ bazamɔ ehoeyiudɔ̃ edenɔ adzɛ ɔkɔɔ, babazã kitsí, nɛifusisí mɛ ɔkɔ yɛatɔ̃ pɔpɔ̃ɔ. Bebèbi yoyò pɛ babà nyɔnɔ awɔ̃.

¹⁶ kɛlɛ babà kpɛ ozĩ asɛ, “ ‘Kɛba gagalĩ! Kɛba gagalĩ, Wɔ ɔma hohoe, wɔ gɛ ɔɔzã apɔtɛ kplɔkpɔlɔ, apɔtɛ gɛ ayɛkɛ edzi nɛ̀ apɔtɛ dzadzã mɛ, pɛ ozotsé nɛ sikãdɔ̃ nɛ̀ aklagbu gɛ ayɛkɛ edzi nɛ̀ bakukɔli gbangbã mɛɛ!

¹⁷ Nɛ ɔɖa tatá tonikpo mɛɛ, ehoeyiudɔ̃ ɛlɛ nyɔ̃ɔ zĩ!’ “Kelĩabha ihu anɔ gbagbla, bagɛ azazã ɛlɛ mɛ nɛ̀ bagɛ bezege ɛlɛ nɛ̀ banunɔ nyɔ̃ɔ gɛ azamɔ alɛ ehoeyiudɔ̃ edenɔ aƒu nabha, abàzã itsí.

¹⁸ Onupɛ bamɔ ɔnyɔ̃ gɛ okoeyi nɛ ɔma gɛ ɔtã mɛɛ, bebee bisi asɛ, ‘Ɔma hohoe toli ɔtɛzã asɛ ɔma hohoe ɔlɛ nɛidi oɖi dza?’

¹⁹ Babà yalɛ osubhududu awɔ̃anya akpɛ atakpuɔ mɛ kɛlɛ nɛ̀ yoyò bibí nɛ̀ ɔwɔ̃nyɔnɔ mɛɛ, babàkpɛ ozĩ gagalĩ asɛ, “ ‘Kɛba gagalĩ! Kɛba gagalĩ, O ɔma hohoeɛ, ɛkɛlɛ gɛ banɔ gelee ahɔɛ gɛ kelĩabha ihu zã nɛ aƒu nabha bamɔ ehoeyiudɔ̃ edenɔ yɛ ehoeyiudɔ̃ mɔmɔ mɛɛ! Nɛ ɔɖa tatá tonikpo mɛ koɔ yɛka nyia ka zĩ!

²⁰ O kititíanɛ, nɔmɔ same nɛ Babilonia tɛyɛyɛ nɔ shu! Nɔmɔ samɛ banɔ dadalɛ, nɛ̀ banɔ kpɛkpɛ nɛ̀ ebuiɖɔluanɛ! Owusoso Akaa ekulu kebhu nii nɛ kana gɛ awɔa ɔfɔ nɛ ɔnɔ.’ ”

²¹ Kɛlɛ axɔ̃ɛdɛ ohumielete teli alɔkɔ kɛklagbu hohoe tili gɛ kɛlɛ asɛ bɔhɔ hohoe tuli anaa, awɔanyã atɛ́ akpɛ aƒuɔ mɛ, pɛ aɖɔ asɛ, “Gana agbagbà ibui tɛbhɛbhɛtɛ ɛlɛ nɛidi mɛɛ Babà wɔanyã Babilonia ɔma hohoeɛ atɛ́ ehu esi, gɛ baza amɔ ɔlɛ eɖi.

²² Ɛdzɛ gɛ sangũelete, ɛdzɛ afafatɛelete, babe elete nɛ̀ buxoele abɔbɔ̀ azabɔɔ, bezelũ ɛlɛ odenɔ wɔ mɛ eɖi ɖa. Ahɔɛmɛ axɔ̃ɛwɔa nanà azawɔa ɛxɔ̃ɛ bazamɔ alɛ nɛ wɔ mɛ eɖi ɖa. Bɔdɔ̃ hɔhɔ gɛ bezelũɔ bezelũ nɛ wɔ mɛ eɖi ɖa.

²³ Kani mɛifu zatã nɛ wɔ mɛ oɖi. Adzɛenyine nɛ̀ anyɛedzini aɖɔ bezelũ alɛ nɛ wɔ mɛ oɖi. Wɔedzinigã balɛ edzì kanɔ nɔ̀ mɛ anɔ gbagbla. Gana wɔ ihui ebui bhɛbhɛtɛ mɛɛ, ɔgbana ɛmadiɛ pete ɔtsrakɛ idzo.

²⁴ Nɛ yɛ mɛɛ, bamɔ ebuiɖɔluanɛ nɛ̀ banɔ dadalɛ dzyosu nɔ, nɛ̀ banunɔ nyɔ̃ɔ gɛ beyí nɛ esiakpa nabha.”